Read Car_Nicobarese Ranehlö 3 Bible Online

Ranehlö 3 - Car_Nicobarese bible

Ranehlö 3

¹Ngaich ngam pēch nö tö mötlö milichngen tönë töfënö kalröön aṅ ngam kahôyö minë vahīlö ngam Mā Tēv. Ngöṙô anga-aṅ töngam kikānö, hôṅ, ngöṙô ang ngam Tēv, Uh nan nyā aṅ i në chōn ngam panô-òṅ?

²Ngaich ngam kikānö nö ngöṙô töngam pēch, Kô-òren an nyā ṙòng në chōn ngam panô-òṅ:

³Ṙòng ngam chōn pöri ngam ellōn ngam panô-òṅ, ṙô ngam Tēv nöngö, Uh nan nyā aṅ in ò, uh an rēhĕn min lūölken ò, hòṅ nāṅ ötkapah.

⁴Ngaich ngam pēch nö ngöṙô töngam kikānö, Öthōḵ nan min kapah.

⁵Tön akahalōn ngam Tēv ip sakāmö nāṅ nyā aṅ in ò, löpnyörekūömat nā-aṅ min, ngaich nā-aṅ min sā Tēv, akaha kūö tö tölöök tötlöök inrē.

⁶Ngaich hē ngam kikānö nö meuk tö ök chōn nö tölöök nö nyā-aṅkūö, ane inrē tö ò nö kumchik elmat, tö ngam chōn inrē nö töhòṅ akahatī, kē ṙòng anga-aṅ ngaich nö in ò, ngaich nyā; kē-ĕkūö ök pīhöre anga-aṅ inrē ök in ò, ngaich nyā anga-aṅ.

⁷Ngaich nuk matchanyöre nö löpnyörekūö, ngaich cha-a nö akahakūö töcha nö lichôi; ngaich cha-a nö chōk rōi fik, ngaich vī ngôngre.

⁸Ngaich hang ṙô ngam Mā Tēv chā-a nö havöt ël ngam panô-òṅ i unfōvö ngam sakāmö: ngaich ngam tarik tök pīhö ò inrē nö hayunngöre nö ṙā-ang ikūö ngam Mā Tēv nö inuk chōn ngam panô-òṅ.

⁹Ngaich ngam Mā Tēv nö havëkö ök tarik, nö ngöṙô tö ò, Isuh ömeh?

¹⁰Ngaich ngöṙô angā-aṅ: Hangṙô Meh chin taheui el panô-òṅ, ngaich chū-ö pa-ekūö; pòchu lichôi; ngaich hayunngöre chū-ö.

¹¹Ngaich ngöṙô Angā-aṅ, Chīök vamë-eny nang meh tömeh öm lichôi? Ngaich öm nyā aṅ ip chōn ap tinöölô meh töchu öm sōtu nyā?

¹²Ngaich ngöṙô ngam tarik, Ngam kikānö tökētu tö Meh nö holchu, kē-ĕkūö chu angā-aṅ tö aṅ im chōn, ngaich nyā chū-ö.

¹³Ngaich ngöṙô ngam Mā Tēv töngam kikānö, Asuh öng ngih falngen meh? Ngaich ngöṙô ngam kikānö, Hachīlö chu ök pēch, ngaich nyā chū-ö.

¹⁴Ngaich ngö ṙô ngam Mā Tēv tök pēch, Pò meh ngatī fālen töngih, mötngöre ötkanôlò man tö në töfënö kalröön aṅ ngam kahôyö; lanāntö aichre man ngaich kiröönngöre nyā pinṙōngö tumlat inrē i rô-òtö sakāmö ngam nômö meh:

¹⁵Ṙātö kumnyah Chin ihôi meh töngam kikānö, ihôi öp kūön meh inrē tö öp kūön ò inrē: paṙôkö kui man min tö tī ò, ngaich më-eṅ parôkötī tö kulôichröön ò.

¹⁶Ngöṙô Angā-aṅ töm kikānö Pōyentī Chin min ṙūölö mīṙivlōn meh ane inrē pinrūkö nyīö, i mirivlōnre man min kayôḵnyö nyīö, ngamlōn meh min inrē höng im pīhö meh, hayöngö meh min angā-aṅ inrē.

¹⁷Ngaich in Ātöm Anga-aṅ nö ngöṙô, Pò meh hangṙô ngam pīhöre, ngaich nyā aṅ im chōn ngam tinöölô meh tö Chu Öich ngöṙô. Uh man nyā aṅ in ò: ötkôlò an ngam tumlat töpòkūö meh: i chanëyöre man min nyā-aṅ e i rô-òtö sakāmö meh aṅ;

¹⁸Tölòkhu ane inrē min vòk kum e nö in meh; ngaich më-eṅ min nyā në kunchōn aṅ ngam kahôyö;

¹⁹Höng vang töhechkūö man min nyā-aṅvkūö, hanöng saha meh havantöre el tumlat; pò meh aṅ e misī kē-ĕ: pò meh pinṙōngö tumlat, ngaich pinṙōngö tumlat më-eṅ havantöre.

²⁰Ngaich ngam tarik nö kaheuk minënyö ök pīhöre nö Ēva; pòn yöng taṙòkhöre anga-aṅ tö-aṅ.

²¹Ngaich ngam Mā Tēv nö vī inyut Ātöm tök pīhö ò inrē tö uk, ngaich hayūtö cha. Ha-ōnyuvö Nā Ātöm Nāṅ Ēva Nö Ṙa-ang Ël Ök Panò-òṅ.

²²Ngaich ngöṙô ngam Mā Tēv, Yĕhmeuk, ngaich an ngam tarik nösā Hī, akahakūö tö tölöök tötlöök inrē; hòṅ ò pöri nö öt silôlö këlre, nö kēḵ aṅ im chōn nômö inrē, nö nyā, ngaich örheūheu nö aṅ:

²³Lökten ngam Mā Tēv nö tīnngen ò nö ṙāngö ngam panô-òṅ Ēten, nö ul ngam tumlat ṙeūngö ò nö kē-ĕ.

²⁴Ngaich ahōnyö ngam tarik Anga-aṅ; ṙātö Kerupim Anga-aṅ ngaich nö lā chuhöt ngam panô-òṅ Ēten, ane inrē pinchālökūö ök fël ök tökeuheūtngöre lā kū-ö, nö aṅtö talöökö ök chōn nômö.