Read Car_Nicobarese Ranehlö 31 Bible Online

Ranehlö 31 - Car_Nicobarese bible

Ranehlö 31

¹Ngaich angā-aṅ nö hang ṙô yik kikōnyö kūön Lēpān, nö ngöṙô, Keuheūtlöre tī öp Yāköp nö kēngö nup chehen öp yöng hī höng i nup chehen ap yöng hī; ap nö teūngen tö kanôlòre.

²Ngaich ang Yāköp nö hatīönkö arëkūö Lēpān, ngaich meūkö e nö öt sāre ik lā urĕh nö lā in ò.

³Ngaich ngöṙô ngam Mā Tēv tö Yāköp, Havantöre man i panam yip yöngre, ip hanöngkisānö meh; holtöṙah meh Chin min.

⁴Ngaich ang Yāköp nö tīnngö mahavëten nā Rēchöl nā Leah nö el kahôyö nö i nuk pököre ò,

⁵Ngaich ngöṙô tö cha, Meuk arëkūö öp yöng nā chin kikōnyö, öt sāre öp tö lā urĕh nö lā in chu; holtöṙah chu pöri ngam Tēv öp yöng chu.

⁶Akahalōn yin yī-ö tö chu holtö kumlēḵre halinṙen öp yöng nā kikōnyö.

⁷Ngaich öp yöng nā kikōnyö nö hachīlngen chu, söm heuh nö haṙīkö raneushö chu; öt halöngten ò pöri ngam Tēv nö chökhutī tö chu.

⁸Yĕn ngöṙô öre angā-aṅ, Nup töpatohköre kaha nup raneushö meh; ngaich ṙòkhöre nup pököre nö rööichnyö töpatohköre kāha: ngaich yĕn ngöṙô öre angā-aṅ, Nup tökurānö kāha nup min raneushö meh; ngaich ṙòkhöre nup pököre nö rööichnyö tö kurānö kāha.

⁹Ngatī tī An ngam Tēv nö kēngö në pököre öp yöng nā kikōnyö, ngaich kētö u nö in chu.

¹⁰Ngaich ip hē në pököre nö kūönu ellōn, ngaich môklökūöre chū-ö, ngaich meuk öp heūvö, ane inrē meuk öp kōiny pököre tökurānö kāha, töpatohköre kāha, tököinyö insōhoh kāha nö tisòklöre nö i uk öp pököre.

¹¹Ngaich ngöṙô öp ma-aṅhānga ngam Tēv tö chu nö i heūvö, Yāköp; Ihih chini, ngaich ngö chū-ö.

¹²Ngaich ngöṙô anga-aṅ, Môklökūöre man, Yĕh meuk, ṙòkhöre nun minë kōiny pököre nö kurānö kāha, patohköre kāha, köinyö insohoh kāha inrē, minë tumsòklöre nö i uk minë pököre: pò chu meuk nup tī Lēpān tö meh nö ṙòkhöre.

¹³Chū-ö chin Tēv aṅ Pētĕl, i chūök meh hacham alaha ap machööḵlö ihong, i chūök meh chūöku ṙô kilēḵngôre: in Chu: yĕh chōholre man ngaich, kē-ĕngre ṙāngö ngih panam, havantöre ip panam chūök finötnyö meh.

¹⁴Ngaich Rēchöl nā Leah nö sapṙô ò nö ngöṙô, Ōtre minchöḵö aivö āyö, hēk nup amin ai i patī ap yöng ai kikōnyö?

¹⁵Röh ai vö ṙung kaheuktu tö ò ai höng aṅ tahëng? Tön ngaich öp yih nö inyihngen ai, ngaich nö keuheūt takô inrē tö nuk rupīö ai.

¹⁶Ṙòkhöre nuk kanôlò nuk kahëngö ngam Tēv nö ip kikōnyö yöng ai, nö kanôlò ai, kanôlò vē kūön ai inrē: yĕh ngaich kētöre man ip töng ṙô ngam Tēv tö meh.

¹⁷Chōholre ngaich Yāköp ngaich ha-ūichlö yik kikōnyö kūönre tö nak pīhö ò inrē nö i uk nuk ūṅt;

¹⁸Kēngö nuk pököre inrē angā-aṅ nö ṙòkhöre, ṙòkhöre inrē nuk inlānen ò nuk hamūllö ò, nö i Patanarām; nö chuh in Isāk ök kikōnyö yöng ò ip panam Kanā-an.

¹⁹Kiröönngöre ang Lēpān nö i kinmööpö nuk sīṅp: ngaich ang Rēchöl nö ulāingö ök insā tarik ök me-el patī ök kikōnyö yöng ò.

²⁰Öt akahairit Yāköp tö Lēpān ök aṅ Sirīa, nö ulāingöritre, pò ò nö öt vë-eny nang ò töre nö afalngöre.

²¹Kumtö nuk inlānenre angā-aṅ nö ṙòkhöre nö afalngöre: chōholre angā-aṅ ngaich, ngaich havāngngö kui öp Tahël, ngaich hachip kū-öre nö kū-ö tö öp rông Kilīöt.

²²Im linūöi sumkam angū-ö nö eūka nö in Lēpān tö Yāköp nö afalngöre.

²³Ngaich ngôṅ yik hanöngkisānöre angā-aṅ nö hol ò, ngaich sat sumkam röön nö lūḵ an; kôḵlö ngaich nö in ò nö ikui öp rôngö kilīöt.

²⁴Ngaich ngam Tēv nö yihtöre nö in Lēpān ök aṅ Sirīa, tö hatööm, nö i heūvö, ngaich ngöṙô tö ò, Haṙēmngenre man, um vë-ekūö Yāköp tö tölöök hēk tö chōich.

²⁵Söllö ngaich Lēpān nö in Yāköp. Vītö inrūkuire ang Yāköp nö ikui ngam rôngö: vītö inrūkuire Lēpān tö yik hol ò nö ikui ap rôngö Kilīöt.

²⁶Ngaich Lēpān nö ngöṙô tö Yāköp, Suāp lāinyngen meh öm höng ulāingöritre tö chu, öm kēngö minā kūön chu kikānö nö töhakövö nö pôḵ ngam sanët meh?

²⁷Kūöyòh öm afalngöre höng ulāingöritre, ulāingen chu inrē; öt ṙô-òv öm in chu hòṅ chu, öre tīnngörit meh holtö ṙanāmölōn, tinkökö inrē, holtö trömpet, hāp inrē?

²⁸Ngaich öt halöngten chu hāmkūö më kūönre kikōnyö, kikānö inrē? Kulō-ovṙen mana.

²⁹Mihôiṅ ön ngih kël chu nö chökhutī tö meh: vë-evkūö pöri chū-ö vahë tö hatööm tö ngam Tēv öp yöng meh nö ngöṙô, Haṙēmngenre man um vë-ekūö Yāköp tö tölöök hēk töchōich.

³⁰Yĕh tö ngaich man öre kirööngöre, pò meh paṙūtalōn tö patī ap yöngre, ngaich kūöyòh öm ulāingen minë tēv chu?

³¹Ngaich sapṙô Lēpān, Yāköp nö ngöṙô, Pò re chin pa-ekūö: ngaich öich ngöṙô, Hòṅ meh öt kilöönö chu kē minā kūönre kikānö.

³²Öp chūök meh kôtökūö tö nup tēv meh, öt aṅ min angā-aṅ, ikūö yip holre man yĕh akah öp chëhenre in chu, ngaich, kē-ĕ e më-eṅ, Pò Yāköp nö öt akahalōn tö Rēchöl nö ulāingen u.

³³Kuhēthötre ngaich Lēpān nö el inrūkui Yāköp, el inrūkui Leah, el inrūkui nak mahalanṙen kikānö inrē; ngaich öt kôtökūö angā-aṅ tö u. Kunyī-inyre angā-aṅ nö ṙā-ang el in rūkui Leah, ngaich kuhēthötre nö el inrūkui Rēchöl.

³⁴Rēchöl ök kamë nuk insā tarik, ngaich chaphöt u nö ël chūök chehen ūṅt, ngaich ūichngöre nö ikui u. Ngaich ang Lēpān nö ṙēpkö ël nuk inrūkui nö ṙòkhöre, öt kôtökūö pöri tö u.

³⁵Ngaich ngöṙô angā-aṅ tök yöngre kikōnyö, Mā chu, uh man līn, tö chu ötkô söklöre ikūö meh; pò chu ṙònghöichṙen īnu tö inlahen kikānö. Chöh ngaich angā-aṅ, öt kôtö kūö pöri tönuk insā tarik.

³⁶Ngaich ang Yāköp nö tainy, ngaich hūḵkö elnang Lēpān: ngöṙô ang Yāköp nö sapṙô Lēpān Asuāp fālen chu? Asuāp tökööl chu, töp lökten meh haṙāchöre öm lūḵu chu?

³⁷Kūöyòh öm keuheūt ṙēp minë chehen chu, suāp kanôtökūö meh nö in u nö ṙòkhöre, öp chehen aṅ patī meh? Ṙātö e ihih ikūö vē hol chu ikūö më hol meh inrē, hòṅ cha nö i hôi nö kahòkken hā ai nët taka.

³⁸Nët anāi samyeūheu chin in meh; nuk kan sīṅp meh, kan pököre inrē öt rööich ṙāvat tö kūönre, ötrēhĕn chin kā kōiny kūön pököre meh.

³⁹Nup tö panyeny tökūö nup aṅ el inchōn tö tainy öt kētu tö chu nö in meh; chū-ö töyëḵngen; pôm löknyö eltī chu ṙô havë-a, yĕn pòrô nö tö-ulāyiṙen tö sakāmö hēk ulāyi tö hatööm.

⁴⁰Ngatī inlahen chū-ö keuheūt tökūö ngam ṙanāchö tö sakāmö, laneūchö inrē tö hatööm; falngöre ngam inṙôhòh nö ṙā-ang i në mat chu.

⁴¹Nët anāi nun në samyeūheu chu i patī meh; chööḵnyö tö minā kūön meh kikānö, fënsīön samyeūheu öich halinṙen meh, tafūöl samyeūheu inrē chööḵnyö tö minë pököre: ngaich më-eṅ söm heuh haṙīngö raneushö chu.

⁴²Yĕn öt in chu öre ngam Tēv öp yöng chu, ngam Tēv Aprahām, ngam pinhe-eṅkūö tö Isāk inrē, kô-òngvahtī man öre töngamuh tīnngen chu höng chanlööpṙen. Meuk kanihngen chu An ngam Tēv, la-en nö kël chu inrē, ngaich vëken meh vahë tö hatööm.

⁴³Ngaich Lēpān nö sapṙô Yāköp nö ngöṙô, Kūön chu yin më nyīö kikānö, kūön chu inrē më nyīö, pököre chu minë pököre, ṙòkhöre minë tömeūkö tö meh: suh kanô-òṅ pökeh töngamuh i vē kayôḵnyö cha nyīö?

⁴⁴Yĕh tā-a, töi vī kinlēngô, tö chu tö meh inrē; hökngen e pöchö nö vamë-eny i hôi chu tö meh.

⁴⁵Kē ihong ngaich ang Yāköp ngaich asöklö e nö machööḵlö.

⁴⁶Ngaich ngöṙô Yāköp tö yik holre, Hamūl ihong yin; kē ihong chā-a ngaich, ngaich afônglö u: ngaich chā-a nö nyā nö umuh i nuk töfônghak ihong.

⁴⁷Ngaich Lēpān nö kaheūkö e nö Yēkarsahatutā ngam tö ngöh, (Töfônghaka mameuk:) kaheūkö pöri angū-ö tö Yāköp nö Kalīt.

⁴⁸Ngaich Lēpān nö ngöṙô, Mameuk ön ngih tö fônghak ihong töngamuh i hôi chu tö meh. Lökten öp mine-eny e nö kaheūkö nö Kalīt;

⁴⁹Mispā inrē, pòn ngöṙô angā-aṅ, Ihôi an ngam Mā Tēv nö aṅten chu tö meh inrē, yē hā ötkö in höö.

⁵⁰Yē meh min hakihten minā kūön chu kikānö, yē meh min inrē kē pīhöre nö hol cha, öt tarīku hol an; yĕhmeuk, ngam Tēv An mameuk i hôi chu tö meh inrē.

⁵¹Ngaich Lēpān nö ngöṙô tö Yāköp, Yĕhmeuk në ihong tö fônghaka, yĕhmeuk ngam ihong machööḵlö inrē, ngam asöklö chu i hôi chu tö meh.

⁵²Mameuk ön ngih töfônghaka ihong, mameuk inrē ngòh machööḵlö ihong, tö chu min öt havāngngö kui ngih töfông öich chuh in meh, më-eṅ inrē öt havāngngö kui ngòh machööḵlö öm chuh in chu, öm hòṅ chökhuṙen.

⁵³Ihôi hā an nö akah, ngam Tēv Aprahām, Tēv Nāhōr, Tēv ök yöng cha inrē. Ngaich ang Yāköp nö chūöku ṙô nö kilēngôre lökten i pinhë-eṅkūöre tök yöngre Isāk.

⁵⁴Ngaich Yāköp nö kētö tökētu nö ikui ngam rôngö, ngaich havëtö yik holre nö nyā: nyā cha-a ngaich, ngaich hĕng mitööm nö höngngöh nö ikui ngam rôngö.