Read Car_Nicobarese Ranehlö 34 Bible Online

Ranehlö 34 - Car_Nicobarese bible

Ranehlö 34

¹Ngaich ang Tainā ök kikānö kūön Leah, ök kayôḵnyö ò nö kūön Yāköp, kiröönngöre nö ngëichkö yik kikānö kūön aṅ ngam panam.

²Ngaich ang Sikem ök kikōnyö kūön Hamôr ök aṅ Hivāit, ök mākūö ngam panam, nö meūkan; ngaich kē an angā-aṅ, hulalngöre ngaich nö in ò, ngaich miṙēngen ò.

³Ngaich ök ellōn ò nö lakukköiny nö ik kikānö kūön Yāköp ang Tainā, hāngenlōn angā-aṅ ngaich tö ngam kikānö, ṙô pinlööngölōn ngam kikānö ngaich.

⁴Ngaich Sikem nö vë-ekūö ök kikōnyö yöngre ang Hamôr, nö ngöṙô, Kē ngòh kikānö man nö pīhö chu.

⁵Hāngan ngaich ang Yāköp nö hachōichngen ök kikānö kūön ò ang Tainā: el kahôyö yik kūön ò kikōnyö nö i nuk pököre; höng öt ṙô-òvö Yāköp hanöng saha cha nö yih.

⁶Ngaich chuh in Yāköp ang Hamôr ök kikōnyö yöng Sikem nö vë-ekūö ò.

⁷Yih ngaich yik kikōnyö kūön Yāköp nö ṙā-ang elkahôyö hē cha nö hāngö e: ngaich yik tarik nö haṙivö ellōn, tainy chā-a inrē, pò ò nö kumlōngen Israĕl nö hulalhaka nö holtörah ök kikānö kūön Yāköp; ngam inlahen tö-uh öre.

⁸Ngaich vë-ekūö cha Hamôr nö ngöṙô, Hāngenlōn öp kikōnyö kūön chu Sikem töp kūön yīö kikānö: vë-ekūö yīö chin öi kēten ò nö pīhö ò.

⁹Ngaich yī-ö hapīhö tö aṅ in ih: kētö yip kūön yīö kikānö in ih, ngaich kē yip kūön ih yī-ö kikānö.

¹⁰Ngaich iyöng in ih yī-ö, inyih inrē in e, in e yī-ö inrē kē aminre.

¹¹Ngaich Sikem nö ngöṙô tök kikōnyö yöng ò tö yik kanônyö ò inrē, Yĕh töich sòk aṙētu tö yīö, yē nup töng ṙô yīö in chu, kē-ĕti chū-ö min.

¹²Vë-ekūö chu tö nup raneushö ngam töpīhuvö inrē, ngaich chū-ö min kē-ĕti sā ṙô yīö in chu: kētö ngam kikānö pöri nö pīhö chu.

¹³Ngaich yik kikōnyö kūön Yāköp nö sapṙô nā Sikem nā Hamôr ök kikōnyö yöng ò, nö milichngen, nö ngöṙô, Pò ò nö ngaich nö hachōichngen Tainā ök kanānö cha:

¹⁴Ngaich ngöṙô tö cha, Öthalöngten e in nö ngatī, öi kētö kanānöre nö i töt tunyīnyi; pòn sinrōngkūö angū-ö nö in ih:

¹⁵Höng hōḵ öre yī-ö tö ngih: yē yīö öi hòṅ sā ih, nö ṙòkhöre yip kikōnyö yīö nö tunyīnyi;

¹⁶Möl īhö min kētö vē kūönre kikānö in yīö, ngaich kē yip kūön yīö kikānö īhö inrē, ngaich iyöng in yīö īhö min, ngaich ayī-ö min töhĕng öi tarik.

¹⁷Ngaich yē yīö öthòṅ hang ṙô ih, öi tunyīnyi; ngaich kē ngam kūönre īhö min kikānö, öi kirööngöre ngaich.

¹⁸Ṙamölōn ngaich Hamôr tö ṙô cha, Sikem inrē ök kikōnyö kūön Hamôr.

¹⁹Ngaich ök ṙāl tarik nö öt ahāṅkenre tö e, pòn kuchīkölōn nö ik kikānö kūön Yāköp: ngaich angā-aṅ inrē nö tö mötlö ineū-euṅ tö yip taṙòkhöre aṅ patī ök yöng ò kikōnyö.

²⁰Ngaich ang Hamôr ök kikōnyö kūön ò inrē Sikem nö yihtöre nö ikūö inkūp ök panam, ngaich vë-ekūö yik tarik aṅ ngam panam, nö ngöṙô,

²¹Töṙēm yin vē tarik nö in hī; lökten hökngen cha tā-a nö iyöng ing panam; inyih nö in e inrē; yĕhmeuk, kiröng ön ngih panam; kô-òre tī tö cha; ta-a, töi kē yip kikānö kūön cha nö pīhö hī, ngaich ayī-ö tā-a inrē kē-ĕkūö cha tö yip kūönre kikānö.

²²Höng angū-ö an min lökten yip tarik nö hōḵ nö iyöng in hī, öi hĕng öi tarik, yē hī ayī-ö ṙòkhöre öi kikōnyö öi tunyīnyi, sā cha chā-a nö tunyīnyi.

²³Röh nup min pököre cha, chehen cha inrē, tö nup töṙeūla in cha nö ṙòkhöre nö chehen hī? Tā-a töi höng hōḵo lōn cha, ngaich iyöng in hī min chā-a.

²⁴Hāngôṅ ngaich nā Hamôr nā Sikem ök kikōnyö kūön ò tö yik taṙòkhöre kumnyī-inyre nö ikūö inkūp ök panam ò; ṙòkhöre ngaich yik kikōnyö nö tunyīnyi, ṙòkhöre yik kumnyī-inyre nö ikūö inkūp ök panam ò.

²⁵Ngaich im linūöi sumkam hē cha nö chök, nët tak nak kūön Yāköp kikōnyö, nā Simōn nā Lēvī, kö kē sanëtre chā-a, yih ngaich nö im panam nöng ök akahtuṙen, ngaich fëlngö yik kikōnyö nö ṙòkhöre.

²⁶Fëlngen Hamôr chā-a, Sikem inrē ök kikōnyö kūön ò, nö aṅtī tö sanët, ngaich kē-ĕ Tainā nö ṙā-ang el patī Sikem, ngaich kiröönngöre.

²⁷Ngaich yik kikōnyö kūön Yāköp nö yih nö i yik tö fëli, halëlngö ök panam ngaich, pò cha nö hachōichngen ök kanānö cha.

²⁸Kē nuk pököre chā-a, nuā, köttö inrē, nuk töng ël ök panam inrē, nuk el kahôyö inrē;

²⁹Ṙòkhöre nuk kanôlò cha, ṙòkhöre yik tökūönö kūön cha, inrē, nö kē-ĕ tö cha nö töhakövö, halëli inrē nuk taṙòkhöre el patī.

³⁰Ngaich ngöṙô Yāköp tö nā Simōn nā Lēvī, Kihngen chin tö tī nā, vītu chin tö nā inngeūtö i vē aṅkūö ngih panam, i vē aṅ Kanā-an, aṅ Perisāit inrē: ngaich chū-ö töng öt ṙōl tak, hamūlöre cha-a min ngaich nö lā-al chu, ngaich fëlngen chu; keuheūtngörevah min chū-ö ngaich, chū-ö, vē aṅ patī chu inrē.

³¹Ngaich ngöṙô chā-a, Höng hökiṙen ṙöng angā-aṅ nö im kanānö ih nöng sā tīre tömī-inyihköre kikānö?