Read Car_Nicobarese Ranehlö 38 Bible Online

Ranehlö 38 - Car_Nicobarese bible

Ranehlö 38

¹Ngaich ngö inlahen hē e tö Yūtö nö kiröönngöre nö ṙā-ang i yik hanöngkisānöre, ngaich kāntöre nö ik tö hĕngtak aṅ Atulam, ök tö Hirā minënyi.

²Ngaich meuk ök umuh Yūtā hĕngtak kikānö kūön aṅ Kanā-an ök tö Su-ā minënyi; kē an ngaich angā-aṅ, ngaich kuhēthötre nö in ò.

³Pirūkö nyīö ngaich angā-aṅ, ngaich kayôḵnyö kikōnyö nyīö; kaheuk minë-eny ò ngaich angā-aṅ nö Er.

⁴Hēk angā-aṅ nö pirūkö nyīö, ngaich kayôḵnyö kikōnyö nyīö; kaheuk minë-eny ò ngaich angā-aṅ nö Onan.

⁵Ngaich hēk angā-aṅ nö kayôḵnyö kikōnyö nyīö, kaheuk minë-eny ò ngaich nö Sĕla: i Kesip angā-aṅ hē ò nö kayôḵnyen ò.

⁶Ngaich Yūtā nö kē pīhö Er ök lanòh ò, Tēmar ök minë-eny ò.

⁷Ngaich Er ök lanòh Yūtā, nö tötlöök nö ikūö ngam Mā Tēv; ngaich ngam Mā Tēv nö fëlngen ò.

⁸Ngaich ngöṙô Yūtā tö Onan, Kuhēthötre man ip pīhö ök mëm re, öm hateungngö la-en pamīhöre in ò, hakūöntö kūön öp mëmre.

⁹Akahalōn ang Onan tö öp nyīö nö öt kūön ò min; ngaich ngö inlahen, hē ò nö kuhēthötre nö ik pīhö ök mëmre, höng pitā-ang angā-aṅ nö el tumlat, pòn sōḵ nö kētö kūön ök mëmre.

¹⁰Ngaich ngam inlahen ò nö töchōich nö ikūö ngam Mā Tēv: fëlngen ò Angā-aṅ ngaich inrē.

¹¹Ngaich ngöṙô Yūtā tö Tēmar, ök kankūön ò, i patī ap kikōnyö man yöngre ngöhöre höng tafīsösi, hanöngsaha Sĕla öp kikōnyö kūön chu nö pōyö: pòn ngöṙô anga-aṅ, Hòn öt kapah ang inrē nö sā nak hanöngkisānöre. Kiröönngöre ngaich Tēmar ngaich iyöng patī öp yöngre kikōnyö.

¹²Ngaich ik ṙētak, kapah ngaich ök kūön Su-ā, ök pīhö Yūtā; ngaich ang Yūtā nö haṙāmölōn, ngaich chuh i yip kammöp sanôi sīṅp nö i Timnā, angā-aṅ tök hol ò Hirā, ök aṅ Atulam.

¹³Ngaich vënyu angū-ö nö in Tēmār nö ngö yĕhmeuk, Chuh Timnā öp yöng pīhö meh nö kamöp sanôi sīṅp.

¹⁴Luhngö nuk hilāre ngaich angā-aṅ nö tafīösi, ngaich kahulkuire, vöönöre inrē ūichngöre ngaich nö ikūö inkūp, i Enēm ök i taseū talöökö chamuh Timnā; pòn meūkö Sĕla angā-aṅ ngaich nö pōyö; ngaich hö-ö anga-aṅ nö kētu nö pīhö ò.

¹⁵Hē Yūtā nö meūkan, ngaich angā-aṅ nö mi-inyihköre nö kikānö tölōn ò; pò ò nö kahulngökūöre.

¹⁶Kāntöre angā-aṅ ngaich nö in ò nö el talöökö, ngaich ngöṙô, Vë-ekūö meh chin, kuṙòh, hökhöt chu kuhēthötre in meh: pòn öt akahakūö angā-aṅ tö ò nö kan kūön ò. Ngaich ngöṙô angā-aṅ, Suāp min tī meh in chu, hòṅ meh kuhēthötre in chu?

¹⁷Ngaich ngöṙô anga-aṅ, Söömtö kun pököre chin min hĕng nòng aṅ i nup tömūl pököre. Ngaich ngöṙô angā-aṅ, Hōḵ ömeh kētö minkahngö kinlēḵngô in chu hanöngsaha tī meh söömten ò?

¹⁸Ngaich ngöṙô angā-aṅ, Suāp min minkahngö kinlēḵngô tī chu in meh? Ngaich ngöṙô angā-aṅ, Ngam minkahngö meh, tökuvaha meh inrē tö ngam tinkung inrē eltī meh. Ngaich kētö u angā-aṅ nö in ò, kuhēthötre ngaich anga-aṅ nö in ò, ngaich pirūkö nyīö anga-aṅ tö tī ò.

¹⁹Choholre ngaich ök kikānö, ngaich kiröönngöre, ṙòngngö ök kinṙulkuire ngaich angā-aṅ, ngaich kafanlönre tö nuk hilāre nö tafīösi.

²⁰Ngaich Yūtā nö söömtö nuk kun pököre nö löktö eltī ök holre aṅ Atulam, nö kē nuk minkahngö kinlēḵngô nö ṙā-ang eltī ök kikānö: hö-ö pöri angā-aṅ nö kôtökūö tö ò;

²¹Ngaich hatön yik tarik angā-aṅ aṅ panam ò, nö ngöṙô, Isuh ök mi-inyihköre kikānö, ök mi-i Enēm i taseū talöökö? Ngaich ngöṙô chā-a, Öt mi-inyihkörevö kikānö ihih.

²²Havantöre angā-aṅ ngaich nö in Yūtā, ngaich ngöṙô, Ötkôtökūö chin tö ò; ngaich inrē yip tarik aṅ muh nö ngöṙô, Öt mi-inyihkörevö kikānö ihih.

²³Ngaich ngöṙô Yūtā, Hökngen ò nö kē-ĕ e nö in re, hòṅ hī öt sirōngkūö: yĕh meuk, söömtö ngòh chin kun pököre, ngaich rö-ö më-eṅ kôtökūö tö ò.

²⁴Ngaich ngö inlahen, lohten nö lūöi chumngëṅtö unôich, tö e nö vënyu nö in Yūtā nö ngö, Inyihköre apa kan kūön meh Tēmar; yĕh meuk, ngaich ap yih inrē nö lökten i innyihköre nö kūönu. Ngaich Yūtā nö ngöṙô, Kēten ò nö haṙāpi.

²⁵Ngaich hē ò nö kētu, söömtö ṙô ngaich angā-aṅ nö ik yöng pīhöre, nö ngöṙô, Kūönu chin tö tī öp tarik tö chëhevṙen tö në: ngaich ngöṙô angā-aṅ, Vë-ekūö meh chin, akaha u, chehen chīö önu, ngam minkahngö, tö minë tökuvaha, tö ngam tinkung inrē.

²⁶Akahakūö ngaich Yūtā tö u, ngaich ngöṙô, Mötlö chanīpö an ngam kikānö tö chu; pò chu öt kēten ò nö in Sĕla öp kikōnyö kūön chu. Öt hēk angā-aṅ ngaich nö akahakūö tö ò.

²⁷Ngaich ngö inlahen, ik hē ò nö kayôḵ, yĕh meuk, tumnëtö nak el chūök kanūönö ò.

²⁸Ngaich ngö inlahen, hē ò nö kayôḵ, hĕngtak ök kumlòknyö këlre: ngaich ök lamāich nö kē ök kël ò ngaich nyëktö töngāṅv ta-iö, nö ngöṙô, Ngòh ön mu-urĕhnyi.

²⁹Ngaich ngö inlahen, ik saha ò nö tūökhöt këlre, yĕhmeuk, ök kahëm ò nö meutnyi: ngaich ngöṙô ök lamāich. Kūöyòh öm vī löknyö tinlungnyöre? Lökten ök minë-eny ò nö kaheūkö nö Pērĕs.

³⁰Unôich ngaich ök mëm ò nö talōköiny, ök tö-aṅhaṅv kël tö töngāṅv ta-īö: ngaich kaheūkö minë-eny anga-aṅ nö Sēra.