Read Car_Nicobarese Ranehlö 4 Bible Online

Ranehlö 4 - Car_Nicobarese bible

Ranehlö 4

¹Ngaich ngam tarik nö akahakūö tök pīhöre Ēva; pirūkö nyīö ngaich anga-aṅ, ngaich kayôḵnyen Kēn, ngaich ngö ṙô. Teūngen chin tö tarik hĕng tak i hinòlṙenre tö ngam Mā Tēv.

²Hēk anga-aṅ nö kayôḵnyö ök kahëm ò Āpēl. Ngaich Āpēl nö yōm pököre amul tumlat pöri ang Kēn.

³Ngaich uhē-ĕren ök ṙētak tö Kēn nö kēḵtö ṙòng chōn aṅ ngam tumlat nö tökētu nö i ngam Mā Tēv.

⁴Āpēl inrē kēḵtö nuk lanòh anga-aṅ i nuk pököre ò tö nup tösangöö u inrē. Ngaich ngam Mā Tēv nö hōḵ tö Āpēl tök kahëtö ò inrē:

⁵Hö-ö pöri Anga-aṅ nö hōḵ tö Kēn tök kahëtö ò inrē. Ngaich tainy ang Kēn ngaich anga-aṅ nö līnö kūö.

⁶Ngaich ngö ṙô ngam Mā Tēv tö Kēn, Kūöyòh öm tainy? Kūÿòh öng ngam kūö meh nö līn?

⁷Yē meh vī tölöök, öt hōḵovö öm öre? Ngaich yē meh vī tötlöök, hulalhakaṙen ngam tökööl nö i kūö inkūp: ngaich më-eṅ min lōn ò, ngaich hayöngö ò min më-eṅ.

⁸Ngaich Kēn nö vë-eny nang Āpēl ök kahëm ò. Ngaich hē cha nö el kahôyö, chōholre ngaich ang Kēn nö lā-al Āpēl ök kahëm ò, ngaich fëlngen ò.

⁹Ngaich ngö ṙô ngam Mā Tēv tö Kēn, Isuh ap kahëm meh Āpēl? Ngaich ngö ṙô anga-aṅ, Öt akahalōn chin: chū-ö öich mahayōm ap kahëmre?

¹⁰Ngaich ngö ṙô Anga-aṅ, Asuh ap tī meh taheui? Löklö el tumlat ṙô ap mahām ap kahëm meh nö peuinyhökūö Chu.

¹¹Ngaich man yih töngamuh rūtiṙen töt kôlò ṙā-ang i kūö ngam tumlat, ngam lumvā-ainykūöre nö kēḵ mahām ök kahëm meh nö ṙā-ang eltī meh.

¹²Yē meh ul ngam tumlat, ngaich öt kēḵĕkūö meh angū-ö min tö kumlēḵre; töng apāṙa man min, ane inrē töt kamnguvö öm ing tumlat.

¹³Ngaich ngö ṙô Kēn tö ngam Mā Tēv, Kiröng an ngam inṙeikö chu tö kanô-òṅ chu keun.

¹⁴Yĕh meuk, ngaich Man töngamuh ahōnyen chu ṙā-ang i kūö ngam tumlat; ane inrē nyatngö chū-ö min tö ngam kūö Meh; ane inrē chū-ö min töng apāṙa töt kamnguvö inrē ing tumlat; ngaich min öp töng kôḵtökūö tö chu nö famëlngen chu.

¹⁵Ngaich ngam Mā Tēv nö ngö ṙô tö ò; Lökten öp famëlngen Kēn, sat van sat tūmö nup öt kanôlò min nö kēḵĕ nö in ò. Ngaich ngam Mā Tēv nö vītö minkahngö Kēn, hòn öt fëlö tö öp töng kôḵtökūö min tö ò.

¹⁶Ngaich kiröönngöre Kēn nö ṙā-ang i kūö ngam Mā Tēv, ngaich iyöng ik panam Nòt, lā chuhöt Ēten.

¹⁷Ngaich Kēn nö akahakūö tök pīhöre; ngaich pirūkö nyīö anga-aṅ, ngaich kayôḵnyen Ēnòk: ngaich vīlö elpanam anga-aṅ hĕng, ngaich kaheuk minënyö ök elpanam, nö sā minë-eny ök kūön ò kikōnyö, Ēnòk.

¹⁸Ngaich fötnyu Irat nö kūön Ēnòk: ngaich Irat nö hakūönten Mahuya-el: ngaich Mahuya-el nö hakūönten Matusa-el: ngaich Matusa-el nö hakūönten Lamek.

¹⁹Kēḵ pīhöre ngaich Lamek nët tak: Āta minënyi ök hĕng tak, Silla minënyi ök tahëng.

²⁰Ngaich Āta nö kayôḵnyen Yapòl, angā-aṅ ök kikōnyö yöng vē mi-iyöng el inrūkui, tönū-aṅvö inrē.

²¹Yupòl minënyi ök kahëm ò: anga-aṅ ök kikōnyö yöng vē kamëken ranöng, fanöö inrē.

²²Ngaich Silla anga-aṅ inrē, kayôḵnyen Tupòlkēn, ök ramöm aṅtī ṙinātö mās, vët inrē: Nē-amā ök kanānö Tupòkēn.

²³Ngaich ngö ṙô Lamek tö nak pīhöre: Ātā, Sillā inrē hang ṙô chu: Nā-aṅ pīhö Lamek, hangihtöre tö ṙô chu: Tön fëlngö tarik chin hĕng tak, pòn hanyahken chu Hĕng tak tö-ayal tarik pòn pumṙôkö chu:

²⁴Yē kēn nö sat van sat invāhal, kô-en Lamek nö sat van sat anāi.

²⁵Akahakūö hēk Ātöm tök pīhöre; ngaich kayôknyö kikōnyö angā-aṅ nyīö, ngaich kaheuk minënyö ò nö Set: ngö ṙô anga-aṅ, Pò ngam Tēv nö kēḵtö kūön chu tö tahëng, ṙënngen Āpēl; pò Kēn nö fëlngen ò.

²⁶In Sët inrē, kikōnyö ök nyīö kūön ò tökayôḵnyu; ngaich kaheuk minënyö ò angā-aṅ nö Enòs: möl ngaich tarik nö havëkö minë-eny ngam Mā Tēv.