Read Car_Nicobarese Ranehlö 41 Bible Online

Ranehlö 41 - Car_Nicobarese bible

Ranehlö 41

¹Ngaich ngö inlahen, i kinheūṅtö nuk tö nët samyeūheu, heūv ngaich ang Fërō: ngaich, yĕh meuk, sökhaka angā-aṅ nö ikui öp tahël.

²Ngaich, yĕh meuk, sat nòng nuk umuh kan nuā meutlö nö ṙā-ang ël ök tahël, tökôlò, alāhavö inrē; nyā-aṅvkuö anū-ö tö rōi tafūyu.

³Ngaich, yĕh meuk, sat nòng nuk tahëng kan nuā meutlö nö unôichrit u nö ṙā-ang ël ngam tahël, tötkôlò, tölëv inrē; ngaich sökhaka nö ranghö nuk tahëng kan nuā nö ikui ngam Tahël.

⁴Ngaich nuk tötkôlò, tölëv inrē kan nūā nö kāngö nuk tösat nòng tökôlö, tö-alāhavö inrē kan nuā. Aṅhen ngaich Fërō.

⁵Haṙòh ngaich angā-aṅ, ngaich heūv im innët heuh: ngaich, yĕh meuk, sat nuk nëlö sāiny tösīöpnyi nö i rōi ök töhēngö kaha, tökôlò, tölöök inrē.

⁶Ngaich yĕh meuk, sat nuk nëlö töcheukyeung, töngāṅvngö inrē tökūö kuföt chuhöt, sīöplö nö unôichrit u.

⁷Ngaich nuk töcheukyeung nëlö nö ngeūṅktö nuk tösat tökôlò, tö tö tööḵlö inrē nëlö. Aṅhen ngaich Fërō, ngaich, yĕh meuk, höng heūvö angū-ö.

⁸Ngaich ngö inlahen im peuheū, ök ellōn ò nö kihngen; ngaich tīnngö mahavëken yik tömilūönö angā-aṅ aṅ Aikup, ṙòkhöre inrē yik tö-akāha tarik umuh: vë-eny ök heūvöre ngaich Fërō nö in cha; ngaich öt hĕng tak tökô nö vë-eny manah u nö in Fërō.

⁹Kaknyöre ngaich nö in Fërō ök yöngkūö yōm nyā-aṅkūö, nö ngöṙô, Fē-ĕlre chin i ngih sakāmö tö nuk fālen chu:

¹⁰Tainy ang Fërō töyik mahalanṙenre, ngaich chaphöt chu latuhēt el patī öp yöngkūö amahati, chū-ö tök mākuö vamī rôtī inrē:

¹¹Hēngö hatööm āyö ngaich, angā-aṅ töchu inrē, ai heūv heūvö; köheūvö āyö, ngaich nuk heūvö ai nö kö asā manahre.

¹²Ngaich hĕngtak ap umuh ṙāltarik hol ih Hiprū apa; mahalanṙen öp yöngkūö amahati; vë-eny nang ò ngaich āyö, ngaich angā-aṅ nö vë-eny manah nuk heūvö ai; kö asā nuk heūvö ai ṙô angā-aṅ nö vë-eny manah.

¹³Ngaich ngö inlahen, teungtökūö angū-ö, sā ök ṙô ò nö vë-eny manah, havanten chu anga-aṅ el chūök minā-aṅre, kiseutngö ök umuh angā-aṅ.

¹⁴Ngaich Fërō nö tīnngö mahavëken Yôsĕf, ngaich kurāten chā-a nö kēnyen ò nö ṙā-ang el kinlōngö: kuhāköre angā-aṅ ngaich, haṙī-il hilāre inrē, ngaich kuhēthötre nö in Fërō.

¹⁵Ngaich Fërō nö ngöṙô tö Yôsĕf, Heūvheūvö chin, ngaich öt hĕngtak tökô nö vë-eny manah e: ngaich hang ineūkö meh chū-ö, tö meh yē meh hang heūvö, ngaich kô öm vë-eny manah e.

¹⁶Ngaich ngöṙô Yôsĕf nö sapṙô Fërō, Öt in chu ön: kē-ĕkūö Fërō An min ngam Tēv tö sanap ṙô aṅ i lanāmö.

¹⁷Ngaich vë-ekūö Yôsĕf ang Fërō, Yĕhmeuk, ip heūvö chu, sökhaka chū-ö ikui ngam tahël:

¹⁸Ngaich, yĕh meuk, sat nòng nuk umuh kan nuā meutlö nö ṙā-ang ël ngam tahël, tö-alāhavö, tökôlô inrē; ngaich anū-ö nö nyā-aṅvkūö nö i rōi minë tafūyu:

¹⁹Ngaich, yĕh meuk, sat nòng nuk tahëng kan nuā, unôichrit u nö meutlö, öt kôlô, höng lëv inrē, öt meuk tö ngatī öt kanôlô chin ing panam Aikup nö ṙòkhöre:

²⁰Ngaich nuk tölëv tötkôlò kan nuā inrē nö kāngö nuk mu-urĕh tösat nòng kan nuā:

²¹Ngaich hē u nö keuheūtökūö nö kāngö u, öt akahaiṙen anū-ö töre nö kāngen u, ngaich pöri anū-ö nöng sön nöng ötkôlò höng sāre tö lā-urĕh. Ngaich aṅhen chū-ö.

²²Ngaich meuk chū-ö ip heūvöre, ngaich, yĕh meuk, sat nup nëlö sīöpnyi nö i rōi öp tö hēngö kāha, tö tööḵlö, tökôlò inrē:

²³Ngaich, yĕh meuk, sat nup nëlö tönyangngö, cheukyeung, ngāṅvngö inrē tökūö kuföt chuhöt, sīöplö nö unôichrit u:

²⁴Ngaich nuk tösat töcheukyeung nëlö nö ngeūṅktö nuk tösat tökôlò nëlö: vë-eny e chū-ö ngaich i yip tömilūönö; ngaich öthĕng tak tökô nö vë-eny e nö in chu.

²⁵Ngaich Yôsĕf nö ngöṙô tö Fërō, Höng hĕng an ngam heūvö Fërō: vë-eny nang Fërō an ngam Tēv töp tīre.

²⁶Minë tö sat nòng tökôlò kan nuā; minë tösat tökôlò nëlö; tösat samyeūheu nun: höng hĕng an ngam heūvö.

²⁷Ngaich nup tölëv tötkôlò kan nuā tösat nòng, nup mu-unôichrit u nö meutlö; tösat samyeūheu nun; ane inrē nup tösat töt aṅhanv nëlö töngāṅvngö tökūö kuföt chuhöt inyāchö nun min nö sat samyeūheu.

²⁸Anū-ö nun ṙô chu tö Fërō; Hameukhömat Fërō An ngam Tēv töp tīre.

²⁹Yĕh meuk, yih nup tösat samyeūheu tanëḵeṅ ṙòkngöre chūök nö ing panam Aikup:

³⁰Ngaich unôichrit u min, sat samyeūheu öp inyāchö; ngaich vāchi min nö ṙòkhöre nup tanëḵeṅ nö i panam Aikup; ngaich öp inyāchö min nö keuheūt töng panam;

³¹Öt akahaiṙen min ngam tanëḵeṅ nö im panam tökūö öp inyāchö, pò e min nö kiröngen.

³²Pòkūö ngam heūvö nö nët heuh hineūvö, nö nët van nö in Fërō: kūö e nö haköpiyö tö ngam Tēv, ngaich hataichtökūö e min ngam Tēv öt ṙôktörevö.

³³Lökten ön yĕh Fërō nö ngëichkö öp tarik tö-akahaṙa, töhuveū-en inrē, ngaich ha-ūichlen ò nö ikui ngih panam Aikup.

³⁴Ngö inlahen ön yĕh Fërō, hökngen ò inrē nö vīlö yip mameuka nö ikui ngih panam, ngaich kē öp tinneui milā-a ngam panam Aikup, isaha nup tösat samyēuheu tanëḵeṅ.

³⁵Ngaich hökngen cha nö hamūl nup nyā-aṅkūö nö ṙòkhöre i nup yamih tökôlò samyeūheu, ngaich hamūlngö nup sāiny nö el katòh Fërō nö nyā-aṅkūö i në el panam, ngaich hökngen cha nö hayōmö e.

³⁶Hachūöki min ngam nyā-aṅkūö nö im panam nö hanöng nup tösat samyeūheu inyāchö, nup mi-i ngam panam Aikup min; hòṅ ngih panam nö öt lëlngö tökūö öp inyāchö.

³⁷Ngaich angū-ö nö löök nö ikūö Fërō, ikūö yik tarik ò inrē nö ṙòkhöre.

³⁸Ngaich ngöṙô Fërō töyik tarikre, Kô-òren öi kôtökūö tö tösā tö ngatī, öp tarik tö-īnu tö ma-alāha aṅ im Tēv?

³⁹Ngaich ngöṙô Fërō tö Yôsĕf, Pön ngaich ngam Tēv nö hameukhömat meh tö në nö ṙòkhöre, öthĕngtak töngatī tö-akāhaṙa, töhuveū-en inrē nö sā meh:

⁴⁰Më-eṅ man ngaich mahayōm ngih patī chu, asā öp ṙô meh vē tarik chu min nö ṙòkhöre nö hayöngö: höng el kantēra chū-ö min kiröng tö meh.

⁴¹Ngaich Fërō nö ngöṙô tö Yôsĕf, Yĕh meuk, ha-ūichlöng man ngaich ikui ngih panam Aikup nö ṙòkhöre.

⁴²Ngaich ang Fërō nö silötnyö ök kinlong nö ṙā-ang in re, ngaich silöthöt ò nö in Yôsĕf, hayutlen ò inrē tö tö-aṙū-uti inyut, tövai linen inrē, hūöttö ök humlum sayōk inrē nö i likeun ò:

⁴³Ngaich hōḵten ò angā-aṅ nö ël ök innëtö inröl ök in ò; ngaich chā-a nö urēhĕkūö ò nö hūḵa, nö ngöṙô, Simtökui kinmônöre: ha-ūichlen ò angā-aṅ ngaich nö ikui ngam panam Aikup nö ṙòkhöre.

⁴⁴Ngaich ngöṙô Fërō tö Yôsĕf, Chū-ö chin Fërō, öt tarīku min mahachônglö këlre hēk kumchöötlö kalröönre nö öt lökngörit in meh ing panam Aikup nö ṙòkhöre.

⁴⁵Ngaich kaheuk minë-eny Yôsĕf ang Fërō nö Safenatpaneah; ngaich kētö pīhö ò angā-aṅ tö Asenat ök kikānö kūön Pòtifera, ök kūönṙô, aṅ On. Ngaich Yôsĕf nö kiröönkūö ngam panam Aikup.

⁴⁶Lūöi anāi samyeūheu ṙēti Yôsĕf hē ò nö ikūö Fërō nö sökhak. Kiröönngöre ngaich Yôsĕf nö ṙā-ang ikūö Fërō, ngaich chuh i nuk panam nö ṙòkhöre i Aikup.

⁴⁷I minë tö sat samyeūheu tanëḵeṅ, ngam tumlat nö pōyen aṅ.

⁴⁸Ngaich angā-aṅ nö hamūllö nup nyā-aṅkūö nö ṙòkhöre nup im panam Aikup, i minë tö sat samyeūheu, ngaich halinngen minë nyā-aṅkūö i minë elpanam: minë nyā-aṅkūö el panô-òṅ, nup mahavīlö nup panam, in u tī angā-aṅ nö halinngen u.

⁴⁹Ngaich nup sāiny halinngen Yôsĕf nö sā ṙôken kuyāyö ngam mai, hanöngsaha ò nö ṙāngôṅre nö kaheuk; pò e nö öt kanṙeūken.

⁵⁰Ngaich nëttak nak nyīö kikōnyö tö fötnyu kūön Yôsĕf urēhĕkūö ngam yanīhih ngam samyeūheu inyāchö, kayôḵnyö Asenat, kūön ò, ök kikānö kūön Pòtifera, kūönṙô aṅ On.

⁵¹Ngaich Yôsĕf nö kaheuk minë-eny ök lanòh nö Manasē: pò ngam Tēv, nö vīten chu vaichngö tö nuk kanihngen chu nö ṙòkhöre, tö patī ap yöng chu kikōnyö inrē.

⁵²Kaheuk minë-eny ök innëtö angā-aṅ nö Ifrēm: Pò ngam Tēv nö vīten chu mikūönlö i panam kanihngen chu.

⁵³Keuheūten ngaich minë tö sat samyeūheu tanëḵeṅ im panam Aikup.

⁵⁴Rultöre ngaich nö yih minë tösat samyeūheu inyāchö, nöng sa ṙô Yôsĕf: keuheūtngöre chūök ngaich ngam inyāchö nö i minë panam; nyā-aṅvkūö pöri i minë panam Aikup; nö ṙòkhöre.

⁵⁵Ngaich hē minë panam Aikup nö ṙòkhöre nö aheuk; ngaich yik tarik nö peuinyhökūö Fërō tö yik aṅ Aikup nö ṙòkhöre, Chuh in Yôsĕf yin kuṙòh; öp töng ṙô ò tö yīö, ngatī yī-ö.

⁵⁶Ngaich ngam inyāchö nö keuheūtngöre chūök nö ikūö ngam tumlat: ngaich Yôsĕf nö löpnyökūö nuk patī chūök sāiny nö ṙòkhöre, ngaich inyīhihkūö yik aṅ Aikup; kalēḵ ngam inyāchö ngaich nö im panam Aikup.

⁵⁷Ṙòkhöre nuk tahëng pumnāmö nö yih nö i Aikup nö in Yôsĕf nö havah sāiny; pò ngam inyāchö nö kalēḵ nö i minë panam nö ṙòkhöre.