Read Car_Nicobarese Ranehlö 42 Bible Online

Ranehlö 42 - Car_Nicobarese bible

Ranehlö 42

¹Ngaich meuk ang Yāköp tö nuk sāiny nö i Aikup, ngaich ngöṙô angā-aṅ tö yik kuönre kikōnyö, kūöyòh öi höngkö hatīönkökūö höö?

²Ngaich ngöṙô angā-aṅ, Yĕhmeuk, hang sāiny chin nö i Aikup: chuh in e yin kuṙòh, in e havah nyā-aṅkūö hī; hòṅ hī aṅ, öi öt kapah.

³Ngaich yik tösöm tak mëm Yôsĕf nö kiröönngöre nö havah sāiny nö i Aikup.

⁴Hö-ö pöri Penyamin, kahëm Yôsĕf, nö tīni tö Yāköp nö hol yik mëmre; pòn ngöṙô angā-aṅ, Hòn öt amahaiṙen ang min nö palā-aiṙen nö i kanihngen.

⁵Ngaich yik kikōnyö kūön Israĕl nö yih nö in yik yamih nö havah: pò ngam inyāchö nö kalēḵ nö im panam Kanā-an.

⁶Angā-aṅ ök Yôsĕf mahayöng ngam panam; angā-aṅ mi-inyihikūö yik tarik nö ṙòkhöre aṅ ngam panam: yih ngaich yik tarik nö ṙòkhöre aṅ ngam panam: yih ngaich yik mëm Yôsĕf, afukngöre ngaich nö in ò nö afātngöre nö el tumlat.

⁷Meuk yik mëmre ngaich Yôsĕf, ngaich akahakūö tö cha, tohlö inlahenre pöri angā-aṅ nö in cha, kësô inrē nö vë-ekūö cha; ngaich ngöṙô tö cha, Ṙamā-ang yih öi yī-ö? Ngaich ngöṙô chā-a, Ṙā-ang ap panam in Kanā-an, mahavah nyā-aṅkūö.

⁸Akahakūö ang Yôsĕf tö yik mëmre, hö-ö pöri chā-a nö akahakūö tö ò.

⁹Fē-ĕlre ngaich Yôsĕf tö nuk heūvöre nö heūvö cha, ngaich ngöṙô tö cha, Mahayun yin; yamih yin ngëichkö ötkanôlò ngih panam.

¹⁰Ngaich ngöṙô cha-a tö ò, Mā, hö-övö, mahavah nyā-aṅkūö yin vē kūön alaha meh nö yih.

¹¹Ṙòkhöre in īhö kūön töng hĕngtak; tökô-en in öi tarik, rö-ö yin vē kūön alaha meh nö mahayun.

¹²Ngaich ngöṙô angā-aṅ tö cha, Rö-ö, yih yin öi ngamëichkö ötkanôlò ngih panam.

¹³Ngaich ngöṙô chā-a, Tönët sīön maneuk yin vē kūön alaha meh, nö kūön töng hĕng taka tarik ip panam Kanā-an; ngaich, yĕhmeuk, ip yöngre öp manāngö takô töngamuh, ngaich hĕngtak ök törö-ö.

¹⁴Ngaich Yôsĕf nö ngöṙô, tö cha, Lökten ṙô chin vë-ekūö yīö, öich ngöṙô, mahayun yin:

¹⁵Hòṅ kalaha kanô-en yin min: lökten im nômö Fërō yin min öt kiröönngöre ṙā-ang hih, höng yih öp manāngö kahëm yīö nö ihih.

¹⁶Hĕngtak tahīnngö yin tö aṅ in re, hökngen ò nö kē-ĕre ök kahëm yīö, ngaich nyëki yī-ö min ihih, hòṅ yīö kalaha kanô-òṅ ṙô, yĕn kanô-envö in yīö: yĕn rö-ö lökten i nômö Fërō yin kô-en öi mahayun.

¹⁷Ngaich angā-aṅ nö chaphöt cha nö ṙòkhöre nö lātuhēt, lūöi sumkam.

¹⁸Ngaich Yôsĕf nö ngöṙô tö cha im linūöi sumkam, Ngaich chö, ha-aṅhare, tön pa-ekūö chin tö ngam Tēv:

¹⁹Yē yīö tökô-en tarik, hĕngtak ahökngen yin tö hanöngkisānöre nö nyëki nö el öp kinlōngö yīö patī: kiröönngöre pöri yī-ö kuṙòh kumtö sāiny öp inyāchö i patī yīö:

²⁰Ngaich kētö öp manāngö kahëm yīö in chu; hòṅ nup ṙô yīö min nö hakôtuṙen, ngaich öt kapah yī-ö. Ngaich ngatī chā-a.

²¹Ngaich ngöṙô chā-a tö höö, Kô-en in köölö fālen ik hanöngkisānö hī, pò hī meuk kanihngen ellōn ò, hē ò nö vë-ekūö hī nö hòṅ aṙētu ṙô, ngaich rö-ö ayī-ö hang; lökten ön ngih kanihngen nö yih nö ikui hī.

²²Ngaich sapṙô cha Rūpön, nö ngöṙô, Öt vë-ekūö yīö öich chū-ö öich ngöṙô, Uh yin köölö fālen im nyīö; ngaich rö-ö yī-ö hòṅ hang? Yĕhmeuk, lökten ap mahām ò inrē nö havëka.

²³Öt akahalōn chā-a tö Yôsĕf nö akaha elnang tö ṙô cha; pò cha nöng vamënyu ṙô nö in höö.

²⁴Havööngökūöre ngaich angā-aṅ nö ṙā-ang in cha, ngaich peuiny; ngaich havantöre nö in cha, ngaich vë-ekūö cha, ngaich kē-ĕ Sīmōn nö ṙā-ang in cha, ngaich nyëkan nö ikūö cha.

²⁵Ngaich Yôsĕf nö tölṙô intööḵlö nuk chūök kum cha tö sāiny, invantö nuk rupīö cha inrē nö el sāk cha, kinëtö nyā-aṅkūö cha inrē nö el talöökö: ngaich ngatī inlinken chā-a.

²⁶Hakeunlö nuk köttöre ngaich chā-a tö sāiny, ngaich kiröönngöre nö ṙā-ang umuh.

²⁷Ngaich hĕngtak tö cha lamöpnyökūö sākre nö kētö nyā-aṅkūö ök köttö ò nö ël ök chūök sanökngö, meuk nuk rupīö re angā-aṅ ngaich; ngaich, yĕh meuk, höng ikūö ök sāk ò anū-ö.

²⁸Ngaich ngöṙô angā-aṅ tö yik hanöngkisānöre, Höng havantu nun në rupīö chu, yĕh meuk, höng ikūö ngam sāk chu nun: ngaich chā-a nö kapahare ellōn, kö havöötökūöre nö in höö, chā-a, nöng kichëyöre, nö ngöṙô, Asuh öng ngih tī ngam Tēv nö in hī?

²⁹Yih chā-a ngaich nö ik kikōnyö yöngre Yāköp, nö ip panam Kanā-an, ngaich vë-eny nang ò tö nuk lāinyngenre nö ṙòkhöre, nö ngöṙô,

³⁰Kësô öp tarik nö vë-ekūö ih, öp mākūö öp panam, ngaich in höng mahayun öp panam tö ṙô ò.

³¹Ngaich ngöṙô īhö tö ò, Tökô-en in öi tarik, rö-ö in mahayun:

³²Nët sīön tak in hanöngkisānöre, kūön öp yöngre öi kikōnyö, hĕng taka ök töhö-övö, ip kikōnyö yöng ih töngamuh öp manāngö takô ip panam Kanā-an.

³³Ngaich öp tarik, öp mākūö öp panam, nö ngöṙô tö ih, Ngih lökten chin min akahalōn tö yīö tökô-en öi tarik; hĕngtak ṙahāngö yin tö hanöng kisānöre in chu, ngaich kē kumre yī-ö tö sāiny ip inyāchö i patī yīö, ngaich kuṙòh, kiröönngöre:

³⁴Kētö öp manāngö kahëm yīö in chu: ngaich möl min chu-ö akahalōn tö yīö öi tarik: ngatī chū-ö min ṙānyö öp hanöng kisānö yīö, ngaich yī-ö min havah i ngih panam.

³⁵Ngaich ngö inlahen hē cha nö hōngnyö aṅ nuk sākre, ngaich, yĕhmeuk, höngkö ikūö nuk sāk yik tarik nuk inyul rupīö cha, ngaich hē cha tök yöng cha inrē nö meuk minë inyul rupīö, pa-ekūö chā-a ngaich.

³⁶Ngaich ök yöng cha Yāköp nö ngöṙô tö cha. Miṙivilōn chin tö yīö tö vē kūönre: hö-övö ök yih Yôsĕf, hö-övö inrē Simōn, ngaich yī-ö hòṅ kēngen Penyamin: ṙòkhöre nun nöng in chu.

³⁷Ngaich vë-ekūö ök yöngre Rūpön, nö ngöṙô, Fëlngö nap kūön chu kikōnyö, yē chu öt kēten ò in meh: kēten ò eltī chu, ngaich chū-ö min hēk kēten ò in meh.

³⁸Ngaich ngöṙô angā-aṅ, Hö-ö öp kūön chu nö kiröönngöre nö in yīö, pò ök hanöng kisānö ò nö kapah, ngaich nöng angā-aṅ tītö: yĕn palā-aiṙen min angā-aṅ nö el talöökö, ip tinlöökö yīö, ngaich yī-ö min kētö në pakūkui chu, hol tö miṙivlōn nö el anūlö.