Read Car_Nicobarese Ranehlö 43 Bible Online

Ranehlö 43 - Car_Nicobarese bible

Ranehlö 43

¹Kalēḵ ngaich ngam inyāchö nö im panam.

²Ngaich ngö inlahen, hē cha nö keuhēutökūö tö nuk sāiny, nuk kum cha nö ṙā-ang Aikup, ngaich ngöṙô ök kikōnyö yöng cha tö cha, Hēk yin kuṙòh, rahëichyen havah tö nyā-aṅkūö hī.

³Ngaich vë-ekūö ò Yūtā, nö ngöṙô, Löökö ṙô öp tarik nö in ih, nö ngöṙô, Öt meukkūö chu yin min yĕn höng in yīö öp kahëm yīö.

⁴Yē meh hòṅ tīnngö öp kahëm ih nö in ih, ngaich kiröönngöre īhö havah nyā-aṅkūö meh:

⁵Yē meh pöri öthòṅ tīnngen ò, hö-ö īhö hòṅ kirööngöre; pòn ngöṙô öp tarik tö ih, Öt meukkūö chu yin min, höng in yīö öp kahëm yīö.

⁶Ngaich ngöṙô Israĕl, Kūöyòh öyih ngatī chanôchö tī in chu, öi vë-eny nang öp tarik töre öi ōtngöre kahëm?

⁷Ngaich ngöṙô chā-a, Höng löönyöre ṙô öp tarik nö hatön inlahen ih, inlahen mak alaha ih inrē nö ngöṙô, Ṙòngmö aṅ öp yöng yīö kikōnyö? Kahëmu öyih tö tahëng? Ngaich īhö vë-eny nang ò höng asā minë ṙô: ngaich kô-òren hòng öre īhö akahalōn tö ò nö hòṅ ngöṙô, Kē töp kahëmre yin?

⁸Ngaich Yūtā nö ngöṙô tök yöng re Israĕl, Tīntö ap nyīö nö hol chu, hòṅ ih chōholre ngaich kiröönngöre; hòṅ hī aṅ öi öt kapah, ayī-ö nyöre, më-eṅ inrē, vē kun kūöṅnö hī inrē.

⁹Chū-ö min töminënyu tö ò; ṙā-ang eltī chu më-eṅ havëken ò: yē chu min öt kēten ò in meh, öt asöklen ò inrē ikūö meh, ngaich hökngen chu urāngen kūön öp inchököre:

¹⁰Yē hī öre öt hangöhngöre, ngaich öre ayī-ö havan töngamuh, im innët van.

¹¹Ngaich ök yöng cha Israĕl nö ngöṙô tö cha, Yē e chĕi nö ngatī, ngö inlahen yin; kē kumre yin tö nup tö-atöllöng ṙòng chōn ngih panam el nup chūök kum yīö, kum tö raneushö öp tarik inrē, tötahūsā, mūr inrē, kulöl almòn inrē:

¹²Nët miyöngö kahëka tö rupīö; nup rupīö töhavantu nö ikūö sāk yīö, kē-e u hēk eltī yīö; lohten nuk nö töng öt meūkö:

¹³Kē ngam kahëmre inrē, chōholre ngaich, kuṙòh ip tarik hēk:

¹⁴Kētö neukhö yīö An yēḵ ngam Tēv tökeuhēuttöre chöngö öi ikūö öp tarik, hòṅ ò nö ṙānyö öp tahëng hanöng kisānö yīö tö Penyamin inrē. Ngaich yē chu öich ṙā-ai tö vē kūönre, höng töṙā-ai chū-ö ngaich.

¹⁵Ngaich yik tarik nö kē nuk raneushö, nët miyöngö kahë tö rupīö nö eltīre chā-a, tö Penyamin inrē; chōholre ngaich, ngaich kiröönngöre nö chuh Aikup, sökhakaṙen ngaich nö ikūö Yôsĕf.

¹⁶Ngaich hē Yôsĕf nö meūkö Penyamin in cha, nö ngöṙô angā-aṅ tök yōm chehen ngam patī ò, Kēhĕt më tarik el ngam patī, lòkhen cha, halēn inrē; tön holkūö chu yin min nö nyā tö sakāmö.

¹⁷Ngaich ök tarik nö asā ṙô Yôsĕf nö tölṙô ò; ane inrē ök tarik, kēhöt më tarik nö el patī Yôsĕf.

¹⁸Pa-ekūö ngaich yik tarik, pò cha nö kēhĕtvö nö el patī Yôsĕf; ngaich ngöṙô chā-a, Kēhötvö in kūö nuk rupīö nuk töhavantu nö ikūö sāk hī ik raneh van; pòn hòṅ chöh chööḵnyöre angā-aṅ nö in hī, ngaich afuk kui hī, ngaich kē-ĕ hī öi töhakövö, tö në köttö hī inrē.

¹⁹Haröhtöre ngaich chā-a nö ik yōm chehen patī Yôsĕf, ngaich vë-ekūö ò nö ikūö inkūp ök patī,

²⁰Nö ngöṙô, Ō mā chu, kô-en in kòl ik raneh van öi yih havah nyā-aṅ:

²¹Ngaich ngö inlahen, hē ih sölta ip chūök sanökngö, löpnyö kūö nuk sākre īhö, ngaich, yĕhmeuk, höng, kö ikūö nuk sāk ih nuk rupīö, nuk rupīö ih nöng timhöre lumngan: eltī ih pöchö nun nö kētū nö hēk.

²²Kūmu in tö tahëng rupīö eltīre öi havah nyā-aṅkūö: öt akahalōn in tö chamaphöt minë rupīö ih nö el minë sāk ih.

²³Ngaich ngöṙô angā-aṅ, kumchikṙen yēḵ in yīö, ui pa-ekūö: ngam Tēv yīö an, Tēv öp yöng yīö inrē kamë-ekūö yīö tö töpōi ṙāi chehen nö el sāk yīö: īnu chin chū-ö ngaich tö nuk rupīö yīö. Kēnyen Simōn angā-aṅ ngaich nö in cha.

²⁴Ngaich ngam tarik nö kēhĕt më tarik nö el patī Yôsĕf, ngaich kētö mak cha, söich röönre chā-a ngaich; ngaich angā-aṅ inrē nö kētö nyā-aṅkūö nuk köttö cha.

²⁵Halēn nuk raneushö chā-a ngaich nö höng yanīhih Yôsĕf tö sakāmö: pò cha nö hāngöre nö nyā nö umuh.

²⁶Ngaich hē Yôsĕf nö yih nö i patī, kētö nuk raneushö ò chā-a ngaich nö el ngam patī, nuk me-el tī cha ngaich fātngöre chā-a nö el tumlat nö in ò.

²⁷Hatönö cha ngaich angā-aṅ tö lanööken cha, nö ngöṙô, Lööken ap yöng yīö, ap ṙô yīö tököiny tarik? Ṙòngmö aṅ apa?

²⁸Ngaich ngöṙô chā-a, Lööken öp yöng ih, öp kūön alaha öp yöng ih, öp kūön alaha meh, ṙòngmö aṅ ap. Sōnngö kui re chā-a ngaich, ngaich salām.

²⁹Chingôhòl kuire angā-aṅ ngaich meuk ök kahëmre Penyamin, kūön ök yöng ò kikānö, ngaich ngöṙô, Ngòh ang manāngö kahëm yīö, ngam ṙô yīö in chu? Ngaich ngöṙô angā-aṅ, Aheūkölōn An yēḵ ngam Tēv tö meh, më-eṅ kūön chu.

³⁰Kurāten ngaich Yôsĕf; pò ök ellōn ò nö paṙūtlöng nö ik kahëm ò: chöh chūökre angā-aṅ nö peuny; kuhēthötre nö el ök urôhòre, ngaich in e nö peuny.

³¹Söichlökūöre angā-aṅ ngaich, ngaich kunyī-inyre; ngaich angā-aṅ nöng ma-inngenre, ngaich ngöṙô, Ṙātö nyā-aṅ ngaich.

³²Ngaich chā-a nö ṙātö nyā-aṅkūö ò nö köhngen, köhngen më inrē, köhngen inrē më aṅ Aikup, yik nyamā nö holkūö ò; pò vē aṅ Aikup nö öt holkūö Hiprū nö nyā, pò e nö sinòkkūö vē aṅ Aikup.

³³Ngaich lākūö ò tī chā-a tök lanòh, sā finötnyö ò, sā ṙētöre yik manāngö: pingangkūö ngaich yik tarik nöng in höö.

³⁴Ngaich angā-aṅ nö kē nuk i kūöre nyā-aṅkūö; kētö u ngaich nö in cha: ngaich pöri ök nyā-aṅkūö Penyamin nö taneuiköti nö pōyen tö nyā-aṅ më. Òk chā-a ngaich, ngaich ṙāmölōn nö in ò.