Read Car_Nicobarese Ranehlö 44 Bible Online

Ranehlö 44 - Car_Nicobarese bible

Ranehlö 44

¹Ngaich angā-aṅ nö tölṙô ök yōm chehen aṅ patī ò nö ngöṙô, Hatööḵlö minë sāk më tarik tö nyā-aṅkūö, ip tölngö kanô-òṅ cha nö keun, kö chaphöt rupīö öp töhĕng tak nö ikūö öp sāk ò.

²Chaphöt ap kōp chu, ap rupīö, ikūö sāk öp manāngö, tönup rupīö ò inrē ṙāi sāiny. Ngaich ngatī angā-aṅ nö sā ṙô Yôsĕf nö ṙô-òv.

³I hanetlö ngam peuheū, tīnirit ngaich yik tarik, chā-a tönuk köttö cha inrē.

⁴Ngaich hē cha nö ngaich nö el kahôyö tö ök el panam, öölu nö marôvat, ngaich ngöṙô Yôsĕf tök yōm chehenre, Chōholre, fachūlörit yip tarik; yē meh pöchö kôlö in cha, ngöṙô tö cha, Kūöyòh öyih aṅti tö tötlöök reushö tölöök?

⁵Röh öng ngih nö chūök kūö öp mā chu nö òk, ngam tökô-en nö chôngö alaha tö ò? Chōchö la-en yin ngaich öi ngatī.

⁶Kôlö ngaich angā-aṅ nö in cha, ngaich vë-ekūö cha tö u anū-ö ṙô.

⁷Ngaich ngöṙô chā-a tö ò, Kūöyòh ang ngam rācha nö ṙô tö në tö ngati? Sōtö tö ngatī An ngam Tēv nö la-en vē kūön alaha meh:

⁸Yĕhmeuk, tönuk rupīö, nö kētu tö ih nö hēk nö in meh, nö ṙā-ang ap panam Kanā-an, nuk kanôtökūö ih nö elkūö nuk sāk: ngaich sitih inlahen īhö hēk ulāingö rupīö hēk humlum, el patī ngam mā meh?

⁹Ip chūök kanôtö e nö i vē kūön alaha meh, hökngen ò nö kapah, ngaich īhö min inrē: töhakövö tarik ip mā ih.

¹⁰Ngaich ngöṙô angā-aṅ, Hökngen e yēḵ inrē nö sā minë ṙô meh: angā-aṅ öp chūök e nö kôti töhakövö min angā-aṅ nö tarik chu; ngaich yī-ö min öt vinëkuvö.

¹¹Kurāten chā-a ngaich, ngaich kö ṙātö nuk sākre më tarik nö el tumlat, kö löpnyukūö ngaich nuk sāk cha.

¹²Chöh ngaich angā-aṅ, löktökūö ik maṙöinylö, ik manāngö sanökngötī angā-aṅ: kôti ngaich ök kōp nö el sāk Penyamin.

¹³Tikaichngö hilāre chā-a ngaich, kö hakeunlö nuk köttöre ngaich më tarik, ngaich havantöre nö el panam.

¹⁴Ngaich Yūtā töyik hanöngkisānö ò yih nö i patī Yôsĕf; ṙòngmö umuh angā-aṅ: ngaich chā-a nö afukngöre nö ikūö ò nö el tumlat.

¹⁵Ngaich Yôsĕf nö ngöṙô tö cha, Asuh öng ngih tö ngaich la-en yīö? Öt akahalōn öyih tö chu öich tarik tökô chòng alaha?

¹⁶Ngaich Yūtā nö ngöṙô, Sitih ṙô öi min i ngam mā chu? Suh ap min ṙô ih? Hēk sitih inlahen öi min laklöre? Kôtökūö An ngam Tēv tö kanöölö i vē kūön alaha meh: yĕhmeuk, ngaich in töhakövö tarik ngam mā chu īhö nyöre, angā-aṅ inrē öp tö-aṅhaṅv eltī tö ngam kōp nö kôti.

¹⁷Ngaich ngöṙô angā-aṅ, Sōten chu An ngam Tēv öich ngatī; töhakövö öp min nö tarik angā-aṅ öp tö-aṅhaṅv eltī tö ngam kōp nö kôti; yī-ö pöri, chuh ip yöngre yin ngaich kiröönngöre im kumchikṙen.

¹⁸Yihtöre ngaich Yūtā nö haröhtöre nö in ò, ngaich ngöṙô Ō mā chu, vë-ekūö meh chin, hökngen ngòh kūön alaha meh nö hĕng höiny milôhòh nö el nang ngam mā chu, ane inrē un hūlökūö ngam lanīnö meh nö i ngòh kūön alaha meh: tön höng sā Fërō man më-eṅ.

¹⁹Mā, hatön vē kūön alahare man fömngöre, öm ngöṙô, Yöngu öyih tö kikōnyö, hēk kahëmu öyih?

²⁰Ngaich ngöṙô īhö tö ngam mā chu, Yöngu in tö kikōnyö, tököiny nö tarik, hĕngtak inrē öp nyīö kūön kanöönyö ò, kun kūöṅnö, kapah ök mëm ò, höng angā-aṅ tītö öp tö-ōtre nö kūön ök yöngre kikānö, ngaich öp kikōnyö yöng ò nö hāngenlōn tö ò.

²¹Ngaich ngöṙô më-eṅ tö vē kūön alahare, kēten ò in chu, hòṅ në mat chu nö meūkan.

²²Ngaich ngöṙô īhö tö ngam mā chu, Ötkô ap ṙāl tarik nö ṙāngö ap yöngre kikōnyö: yē ò nö ṙāngö ap yöngre, kapah min öp yöng ò,

²³Ngaich ngöṙô më-eṅ tö vē kūön alahare, Yĕn öt yih öp kahëm yīö nö in yīö, öt meukkūö chu yī-ö min.

²⁴Ngaich hē ih yih ip kūön alaha meh öp yöng chu, vë-eny nang ò īhö ngaich tö në ṙô ngam mā chu.

²⁵Ngaich ngöṙô ap yöng ih kikōnyö, Kiröönngöre yin hēk rahëichyen havah tö nyā-aṅkūö hī.

²⁶Ngaich ngöṙô īhö, Ötkô in kiröönngöre: yē öp manāngö kahëm ih nö öt in ih, ngaich möl īhö kiröönngöre: tön öt meukkūö öp tarik in nyin, höng in ih öp manāngö kahëm ih.

²⁷Ngaich öp kūön alaha meh yöng ih kikōnyö, nö ngöṙô. Akahalōn tök pīhö chu nö nët maneuk kayôḵnyi tö kikōnyö kūön chu:

²⁸Kiröönngöre ök hĕng tak nö ṙāngen chu, ngaich ngöṙô chū-ö, Kô-en ök nö chiṙësi nö panyeny; hēngen tö e chū-ö ngaich öt meūkan:

²⁹Ngaich yē yīö kē ngòh inrē ṙā-ang in chu, ngaich palā-aiṙen min angā-aṅ, ngaich yī-ö min kētö në pakūkui chu, holtö miṙivlōn nö el anūlö.

³⁰Lökten, hē chu yih ip kūön alaha meh ap kikōnyö yöng chu, ngaich öt īnu īhö tö ngam ṙāl tarik; pò ap nômö ò nö kapòktöre nö i nômö ngam nyīö;

³¹Ngaich min angū-ö, yĕn meuk ngam nyīö min angā-aṅ, nö öt in ih, ngaich kapah min angā-aṅ: ngaich vē kūön alaha meh min nö kētö pakūkui ap kūön alaha meh ap yöng ih, holtö miṙivlōn nö el anūlö.

³²Pò ngòh kūön alaha meh nö kinṙötngö ngam nyīö nö ip yöng chu kikōnyö, öich ngöṙô, Yē chu öt kēten ò in meh, ngaich chū-ö min töhachökö töp yöngre kikōnyö, tö-urāngen.

³³Yĕh lökten, vë-ekūö meh chin, hökngen ngòh kūön alaha meh nöng ngöh nö tarik töhakövö im mā chu, ṙënngen ngam nyīö; ngaich hökngen ngam nyīö nö kiröönngöre nö in yip mëmre.

³⁴Sitih kinröönngöre ṙöng öich chū-ö min chuh ip yöngre kikōnyö, ngaich rö-ö ngam nyīö nö in chu? Ngaich meuk öp töchōich chū-ö min yamih nö i kui öp yöng chu kikōnyö.