Read Car_Nicobarese Ranehlö 45 Bible Online

Ranehlö 45 - Car_Nicobarese bible

Ranehlö 45

¹Ngaich Yôsĕf nö ötkô nö ma-inngenre nö ikūö cha nö ṙòkhöre yik samökhaka nö in ò, ngaich ngöṙô angā-aṅ, Tölṙô më tarik nö kiröönngöre nö ṙā-ang in chu. Ngaich öthĕng tittak tarik tösökhaka nö in ò, isaha Yôsĕf nö mikahtökūö yik mëmre töre.

²Pōitô ngaich angā-aṅ nö peuiny: ngaich hang yik aṅ Aikup: aṅ patī Fërō inrē.

³Ngaich ngöṙô Yôsĕf tö yik mëmre, Yôsĕf chin kòl chū-ö ṙòngmö aṅ ap yöng chu kikōnyö? Ngaich yik mëm ò nö ötkô nö sapṙô ò pò cha nö pa-ekūö nö ikūö ò.

⁴Ngaich Yôsĕf nö ngöṙô tö yik mëmre, Ta-ih, haröhtöre in chu, vë-ekūö yīö chin. Haröhtöre chā-a ngaich. Ngaich ngöṙô angā-aṅ, Yôsĕf chin kòl chū-ö kahëm yīö, tö-inyīhiyö tö yīö i Aikup.

⁵Uh yin ngaich haṙīvölōn, ui rēhĕn līn in re tö pò yīö i nyihngen chu ihih: tön urēhĕkūö yīö chin tīntu tö ngam Tēv öich maha-aṅ nômö.

⁶Pòn ngaich nö nët samyeūheu ngam inyāchö nö im panam: ngaich ōttöre nup tö taneui töre samyeūheu, ip hē u min nö ötrēhĕn nö pôtu, ötrĕhĕn nö kanöönyu ṙòng.

⁷Urēhĕkūö yīö chin tīntu tö ngam Tēv, öich ha-aṅha yīö, yī-ö chööḵṙen ing panam, hayöölen yīö inrē öi aṅ, lökten i yöng ṙinānyö.

⁸Lökten yin öi rö-ö yī-ö tamīnten chu ihih, tön ngam Tēv: ngaich Angā-aṅ nö vīlen chu kikōnyö yöng Fërō, ngaich mā taṙòkhöre i patī ò, ane inrē mahayöng taṙòkhöre ing panam Aikup.

⁹Ka-eūyen yin, chuh ip yöng chu kikōnyö ngöṙô tö ò, Ngöṙô öp kūön meh Yôsĕf, Vīten chu An ngam Tēv mā taṙòkhöre i Aikup tā-a yih man in chu: un ngöh:

¹⁰Ngaich më-eṅ min iyöng im panam Kōsen, öm röhta in chu, më-eṅ, yip kūön meh inrē, yip kūön yip kūön meh inrē, tö nup pököre meh, nuā, ṙòkhöre nup töng in meh:

¹¹Ngaich in e chū-ö min harūkö meh; taneuitöre samyeūheu nup inyāchö; hòṅ meh öt i yanāchö, më-eṅ, yip aṅ patī meh, ṙòkhöre nup töng mi-in meh inrē.

¹²Ngaich, yĕhmeuk, meuk nun minë mat meh, tö minë mat ngam kahëm chu inrē Penyamin, tö e nö ngam elvāng chu vamë-eṅkūö meh.

¹³Ngaich vë-eny nang ap yöng chu yī-ö min tö kanôlò chu i Aikup, ṙòkhöre nup maheuṅk yīö inrē; ngaich ka-eūyen öi kēten öp yöng chu ihih.

¹⁴Afahalre angā-aṅ ngaich nö i likeun Penyamin; ngaich peuiny; peuiny inrē Penyamin nö i neūyö ò.

¹⁵Hāmkūö yik mëmre angā-aṅ ngaich nö ṙòkhöre, ngaich peuiny nö in cha: unôichrit e möl yik mëm ò nö vë-ekūö ò.

¹⁶Ngaich hangnyu hol angū-ö nö i pati Fërō, nö ngö öp ṙô, Yih yip mëm Yôsĕf: ngaich ang Fërō nö ṙāmölōn tö e, yik kūön alaha ò inrē.

¹⁷Ngaich Fërō nö ngöṙô tö Yôsĕf, Ngöṙô man tö yip mëmre, Ngö inlahen yin; hakeunlö nup chehechōnre yin kiröönngöre ngaich, yih ip panam Kanā-an;

¹⁸Kē ap yöng yīö yip aṅ patī yīö inrē, ngaich yih in chu: ngaich kē-ĕkūö yīö chū-ö min tö kanôlò ngih panam Aikup, ngaich yī-ö min nyā tanë-eṅ ngam panam.

¹⁹Ngaich man töölöṙô, ngatī inlahen yēḵ ngaich; kē inröl yip tökūöṅnö, pīhö yīö, kētö ap yöng yīö kikōnyö inrē, ngaich yih.

²⁰Un afēka nup chehen yīö, tön kanôlò yīö nun nö ṙòkhöre në ing panam Aikup.

²¹Ngaich ngatī yik kūön Israĕl: ngaich Yôsĕf nö kētö inröl nö in cha, sā chöngö Fërō, kētö nyā-aṅkūö cha inrē nö el talöökö.

²²Kö kē-ĕkūö yik tarik angā-aṅ nö ṙòkhöre tö hilā; in Penyamin tī pöri angā-aṅ nö lūöyòng tī tö rupīö, taneui hilā inrē.

²³Në sahöömtö ò nö ik yöng ò kikōnyö; söm nòng köttö, kumtö nuk chehen aṅ Aikup, söm nòng inrē nuk kan köttö, kum tö sāiny, ane inrē nyā-aṅkūö öp yöng ò nö el talöökö.

²⁴Ngaich angā-aṅ nö tīnngö yik mëmre, ngaich ngaich chā-a: ngaich ngöṙô angā-aṅ tö cha, Yĕh meuk, ui lā-alkūöre el talöökö.

²⁵Kiröönngöre chā-a ngaich nö ṙā-ang Aikup, ngaich yih nö ip panam Kanā-an nö ik yöngre Yāköp.

²⁶Ngaich vë-eny nang ò chā-a, nö ngöṙô, Ṙòngmö aṅ ap Yôsĕf, angā-aṅ ap mahayöng ap panam Aikup nö ṙòkhöre. Ngaich Yāköp nö sangūli ellōn, öt ṙātö ellōnre tö ṙô cha.

²⁷Keuheūtnyôre ngaich chā-a nö in ò tö nuk ṙô Yôsĕf, nuk ṙô ò nö in cha: ngaich hē ò nö meuk nuk inröl sahöömtö Yôsĕf, chūök ò, ngaich ök yöng cha Yāköp nö keūlöre ellōn;

²⁸Ngaich Israĕl nö ngöṙô, Ngöh tölngö ngaich; ṙòngmö aṅ ap kūön chu Yôsĕf: hòṅ kiröönngöre chin meūkan, urēhĕkūöre kapah.