Read Car_Nicobarese Ranehlö 46 Bible Online

Ranehlö 46 - Car_Nicobarese bible

Ranehlö 46

¹Keuheūtlöre kum ngaich Israĕl tö nuk chehenre, ngaich kiröönngöre nö im kinröönngöre, sölta ngaich nö i Pīrsipa, ngaich kētö tökētu nö im Tēv ök yöng ò Isak.

²Ngaich ngam Tēv nö vë-ekūö Israĕl nö i heūvö tö hatööm, nö ngöṙô, Yāköp, Yāköp, ngaich ngöṙô angā-aṅ, Ihih chini.

³Ngaich ngöṙô angā-aṅ, Chū-ö chin Tēv, Öich Tēv ök yöng meh: uh man pa-ekuö chuh Aikup; tön in e Chin min vīlen meh tökiröng pumnāmö tarik:

⁴In meh Chin min chuh Aikup; ngaich kô-en inrē min Öich kēten meh hēk: ngaich Yôsēf min inrē nö ṙātö eltīre nö i mat meh.

⁵Chōholre ngaich Yāköp nö ṙā-ang Pīrsipa: ngaich yik kūön Israĕl nö kumten Yāköp ök yöng cha kikōnyö, tö yik tökūöṅnö, tö yik pīhö cha, nö el nuk inröl, nuk sahöömtö Fërō nö chūök ò.

⁶Kē nuk nuā re chā-a ngaich, tö nuk chehen cha, nuk taneūngen cha nö ip panam Kanā-an, ngaich yih nö i Aikup, Yāköp, hol ò yik kūön ò nö ṙòkhöre inrē.

⁷Yik kūön ò kikōnyö, yik kūön yik kūön ò kikōnyö inrē nö hol ò, yik kūön ò kikānö, yik kūön yik kūön ò kikānö inrē, ṙòkhöre inrē yik kūön.

⁸Në nun minënyö yik kūön Israĕl, yik yamih nö i Aikup, Yāköp, tö yik kikōnyö kūön ò: Rūpön, lanòh Yāköp,

⁹Kikōnyö kūön Rūpön; Hanòk, Palu, Hesròn, Karmi inrē.

¹⁰Kikōnyö kūön Simōn; Yemuel, Yamin, Ohat, Yakin, Sohar, Sa-ul inrē, kikōnyö kūön ök kikānö aṅ Kanā-an.

¹¹Kikōnyö kūön Lēvī, Kersòn, Kōhat, Merari inrē.

¹²Kikōnyö kūön Yūtā; Er, Onan, Sēla, Peres, Sēra: kapah pöri nā Er nā Onan nö i Kanā-an. Ngaich nā kikōnyö kūön Peres, Hasròn, Hamul inrē.

¹³Kikōnyö kūön Isakar, Tola, Puah, Iyop, Simron.

¹⁴Kikōnyö kūön Sepulön; Seret, Elon, Yalil inrē.

¹⁵Chā-a yin vē kikōnyö kūön Leah kayôḵnyö ò nö kūön Yāköp nö i Patanaram, holten Tainā ök kikānö kūön ò: ṙòkhöre yik kūön ò, kikōnyö, kikānö inrē, nö lūöi anāi lūöi tak.

¹⁶Kikōnyö kūön Kāt; Sifion, Haki, Suni, Espon, Eri, Aroti, Areli inrē.

¹⁷Kikōnyö kūön Asēr; Imna, Isva, Isvi Peria, Sērah ök kanānö cha: kikōnyö kūön Peria; Hīpör, Malkiel inrē.

¹⁸Chā-a yin vē kikōnyö kūön Silpah, ök kahëtö Lēpān nö in Leah ök kikānö kūön ò, achā-a kayôḵnyö ò nö kūön Yāköp, tafūöl sīön taka.

¹⁹Kikōnyö kūön Rēchel, ök pīhö Yāköp; Yôsĕf, Penyamin inrē.

²⁰Ngaich in panam Aikup, fötnyu nö kūön Yôsĕf, Manasē, Ifrēm inrē, kayôḵnyö Asanat ök kikānö kūön Pòtifer ök kūön kūönṙô aṅ On kūön ò.

²¹Kikōnyö kūön Penyamin, Pela, Pechör, Aspel, Kira, Nianam, Ehi, Ros, Mupim, Hupim, At inrē.

²²Chā-a yin vē kikōnyö kūön Rēchöl, tö kayôḵnyu nö kūön Yāköp: ṙòkhöre nö fën sīön taka.

²³Kikōnyö kūön Tën, Husim.

²⁴Kikōnyö kūön Naftalī; Yasil; Kuni, Yesar, Silem inrē.

²⁵Chā-a yin vē kikōnyö kūön Pilhah, ök kahëtö Lēpān nö in Rēchöl, ök kikānö kūön ò, ngaich achā-a vē kayôḵnyö ò nö kūön Yāköp: ṙòkhöre nö sat tak.

²⁶Ṙòkhöre yik hol Yāköp nö yih nö i Aikup, yik lamöknyö in ò, holre tö yik pīhö yik kūön Yāköp, ṙòkhöre nö tafūöl anāi tafūöl tumtaka;

²⁷Kikōnyö kūön Yôsĕf; tökayôḵnyu nö kūön ò nö i Aikup; nët taka: ṙòkhöre yik tarik aṅ patī Yāköp, yik yamih nö i Aikup, nö sat anāi.

²⁸Ngaich angā-aṅ nö tīnngen Yūtā nö urĕh tö ò nö in Yôsĕf, nö urĕhtö ò nö hachōtö talöökö nö i Kōsen; sölta chā-a ngaich nö ip panam Kōsen.

²⁹Halēn inrölre ngaich Yôsĕf, ngaich kiröönngöre nö höngkūö ök yöngre kikōnyö Israĕl, nö i Kōsen; hameuktöre ngaich angā-aṅ nö in ò; fahlöre ngaich nö i neūyö ò, ngaich marô-òtô nö peuiny nö i neūyö ò.

³⁰Ngaich ngöṙô Israĕl tö Yôsĕf, Yĕh ngaich hökngen chu kapah, sā chu ngaich meuk kūö meh, öm ṙòngmö aṅ.

³¹Ngaich Yôsĕf nö ngöṙô tö yik mëmre, tö yik aṅ patī ök yöng ò inrē, Hòṅ ngaich chin, öich vë-eny nang Fërō inrē, öich ngöṙô min tö ò, Yih yip nö ngaich nö in chu hanöngkisānö chu, aṅ patī ap yöng chu inrē, yip mi-i Kanā-an;

³²Yōm pököre yik tarik, pò cha nö mahayōm nuā; ngaich yip nö kumtö nup nuāre, pököre cha inrē, ṙòkhöre nup töng chehen cha inrē.

³³Ngaich mīnö, yē Fërō nö havëten yīö min, nö ngöṙô min, Asuh öp töchöngṙen la-en yīö?

³⁴Ngaich ngöṙô pöichö min, Yōm pököre yin vē kūön alaha meh, hēten tö nyinī-öṅre, söl ing töngamuh, īhö nyöre tö yik yöng ih inrē: hòṅ yīö iyöng ip panam Kōsen; tön sinòkkūö vē aṅ Aikup yin vē yōm pököre.