Read Car_Nicobarese Ranehlö 47 Bible Online

Ranehlö 47 - Car_Nicobarese bible

Ranehlö 47

¹Chuh in Fërō ngaich Yôsĕf, ngaich ngöṙô, Ngaich ap yöng chu kikōnyö, tö yip hanöngkisānö chu inrē nö yih nö ṙā-ang ip panam Kanā-an, tö nup nuā cha, pököre cha, nup töng chehen cha inrē nö ṙòkhöre, yĕh meuk. Ngaich yip nö ip panam Kōsen.

²Ngaich taneui tak ngahôṅ angā-aṅ tö tarik aṅ i yik hanöngkisānö ò, ngaich kēten cha nö in Fërō.

³Ngaich Fërō nö ngöṙô tö yik hanöngkisānö ò, Asuh ap töchöngṙen la-en yīö? Ngaich ngö ṙô chā-a, tö Fërō, Yōmpököre yin vē kūön alaha meh, īhö nyöre tö yik yöng ih inrē.

⁴Ngaich ngöṙô chā-a tö Fërō, Yih in i ngih panam öi töhòṅ rahëichtaṙen i yöng; pòn öt nyā-aṅvkūö në nuā vē kūön alaha meh; pò ngam inyāchö nö kiröngen nö im panam Kanā-an: angū-ö lökten in vë-ekūö meh, hökngen vē kūön alahare man nö iyöng im panam Kōsen.

⁵Ngaich Fërō nö vë-ekūö Yôsĕf, nö ngöṙô, Yih ap yöng meh kikōnyö nö in meh, tö yip hanöngkisānö meh inrē:

⁶Ikūö meh an ngam panam Aikup; iyöngtö ap yöngre man tö yip mëm meh inrē, im tökôlò panam; hökngen cha nö iyöng im panam Kōsen: ngaich yē meh akahalōn tö yip in cha tarik tökeū, ngaich vīlen cha nö yōm në nuā chu.

⁷Ngaich Yôsĕf nö kēhĕt Yāköp ök yöng ò kikōnyö, asöklen ò nö ikuö Fërō: hakôlò Fërō ngaich Yāköp.

⁸Ngaich ngöṙô Fërō tö Yāköp, Ām nup sakāmö nup samyeūheu ngam nômö meh?

⁹Ngaich Yāköp nö ngöṙô tö Fërō, Hēngòng lūöi anāi nun në sakāmö samyeūheu invötö chu: öt pōyen, tötlöök inrē nuk sakāmö samyeūheu nômö chu: öt söllö nun nö i sakāmö samyeūheu nômö yik yöng chu i nuk sakāmö invötö cha.

¹⁰Ngaich Yāköp nö hakôlò Fërō, kunyī-inyre ngaich nö ṙā-ang ikūö Fërō.

¹¹Ngaich Yôsĕf nö ṙātö ök yöngre kikōnyö tö yik hanöngkisānö ò inrē, ngaich kē-ĕkūö cha tö amin cha nö im panam Aikup, im tökôlò panam, im panam Ramisis, sā hachöng Fërō.

¹²Ngaich Yôsĕf nö haruk ök yöngre kikōnyö yik hanöngkisānö ò inrē, ṙòkhöre yik aṅ patī ök yöng ò kikōnyö, tö nyā-aṅkūö, i tumtak cha nö i mupīhöre,

¹³Ngaich ṙòkngöre chūök nö öt nyā-aṅvkūö nö im panam; pò ngam inyāchö nö kiröngen, lökngen, ngam panam Aikup tö ngam panam Kanā-an nö aheuk tökūö ngam inyāchö.

¹⁴Ngaich Yôsĕf nö hamūl nuk rupīö nö ṙòkhöre nuk mi-ik panam Aikup, ik panam Kanā-an inrē, nuk ṙāi nuk töhavaha sāiny tö cha: ngaich kētö nuk rupīö ang Yôsĕf nö i patī Fërō.

¹⁵Ngaich hē nuk rupīö nö ṙòkngöre nö keuheūt, im panam Aikup, im panam Kanā-an inrē, ṙòkhöre ngaich yik aṅ Aikup nö yih nö in Yôsĕf, ngaich ngöṙô, Kētö nyā-aṅkūö ih höng kapah ṙöng öi ikūö meh? Tön ngaich nuk rupīö ih nö keuheūt.

¹⁶Ngaich Yôsĕf nö ngöṙô, Kētö ṙô, Kētö nup nuā re yin; ngaich chū-ö min kē-ĕkūö yīö nö ṙāi nup nuā, yĕn keuheūt rupīö.

¹⁷Ngaich chā-a nö kētö nuk nuā re nö in Yôsĕf: kētö nyā-aṅkūö cha ngaich Yôsĕf nö inṙënngö kōra, nuā, pököre, köttö inrē: ngaich ha-aṅlen cha angā-aṅ nö inṙënngen nuk nuā cha nö ṙòkhöre im samyeūheu angū-ö.

¹⁸Ngaich hē ngam samyeūheu angū-ö nö keuheūt, yihtöre chā-a nö in ò im innët samyeūheu, ngaich ngöṙô tö ò, Öthòṅ hanyathanga in im mā ih tö inlahen nuk rupīö ih nö keuheūt; ngaich nuk nuā ih inrē nö nuā ngam mā ih; öthĕng tit tö-ōtre nö ikūö ngam mā ih, höng në alaha ih, tö në töṙeūla ih inrē:

¹⁹Sitih öi min höng kapah, öi höng meūkö tö meh, īhö nyöre tönë taṙeū ih inrē? Havāha ih man tö nyā-aṅkūö, tö në taṙeū ih inrē, ngaich īhö tönë taṙeū ih öi kūön alaha Fërō: kētö kulöl in ih, hòṅ ih aṅ, öi öt kapah, hòṅ ngam panam nö öthöng lëlngö.

²⁰Lökten Yôsĕf nö havah nuk panam Aikup nö ṙòkhöre nö panam Fërō; pò yik aṅ Aikup nö kö inyihngö panô-òṅre, tökūö ngam inyāchö nö kalēḵ nö in cha; ngaich nuk panam nö panam Fërō.

²¹Ngaich pöri yik tarik, kēten cha angā-aṅ nö i nuk elpanam; löktökūö manā-angkūö öp manā-angkūö Aikup söl ip tahëng manā-angkūö e.

²²Höng nuk panam yik kūönṙô töt havāha tö ò; pò yik kūönṙô nö tö minchöö-övö tö Fërō, ngaich nyā nuk minchöö-öre kahëtö Fërō nö in cha; lökten cha nö öt inyihngö panamre.

²³Ngaich ngöṙô Yôsĕf tö yik tarik, Yĕhmeuk, ngaich chin havāha yīö töngamuh tö minë panam yīö öi inlanen Fërō: yĕhmeuk, ngih yih kulöl, kulöl yīö, ngaich yin teūich ngam panam.

²⁴Ngaich ngö inlahen min ip hē inmūlö, tö yīö min hĕnghata i tö taneui in Fërō, ngaich fën tit nup kanahngen yīö, nö kulöl ngam panô-òṅ, nyā-aṅkūö yīö inrē, ṙòkhöre yip aṅ patī yīö, nyā-aṅkūö yip kūön yīö inrē.

²⁵Ngaich ngöṙô chā-a, Ngaich in hayöölöngṙen nômö tö meh: hökngen ih yēḵ aheukhuvö ikūö ngam mā ih, ngaich īhö min kūön alaha Fërō.

²⁶Ngaich Yôsĕf nö vī-i e nö chöngö, nö im panam Aikup, söl ing tö ngamuh, tö Fërō nö hĕng vat i tö taneui, höng nup panam yip kūönṙô hangen töt inlanen Fërō.

²⁷Ngaich Israĕl nö iyöng im panam Aikup, im panam Kōsen; ngaich chā-a nö amīnu nö umuh, kūönuvö, ngaich ṙūölöre ṙôken nö pōyen.

²⁸Sat sīön samyeūheu ang Yāköp nö iyöng im panam Aikup: lökten minë sakāmö samyeūheu Yāköp nö aṅ nö hēngòng fën anāi sat samyeūheu.

²⁹Ngaich röhta ök hē Israĕl nö hòṅ kapah: havëtök kūönre ngaich angā-aṅ Yôsĕf, ngaich ngöṙô tö ò, Yē meh öm aheuk tö chu töngamuh, vë-ekūö meh chin, ṙātö eltīre man el katòh takeun chu, aṙē-ĕlōn pömchö ömkô-en in chu; vë-ekūö meh chin, uh chin lāpi i Aikup:

³⁰Yē chu pöri min haṙòh i yip yöngre kikōnyö: kēnyen chu më-eṅ ṙā-ang Aikup, lāpngen chu ngaich i chūök lināpngö cha. Ngaich ngöṙô angā-aṅ, Ngaich chin min asā ṙô meh.

³¹Ngaich ngöṙô angā-aṅ, Chūökuṙô man kilēḵngôṅre in chu. Ngaich chūöku ṙô anga-aṅ nö kilēḵngôre nö in ò. Ngaich ang Israĕl nö samöllöre nö i sinlāngö ök chūök ò nö haṙòh nö lā kui.