Read Car_Nicobarese Ranehlö 48 Bible Online

Ranehlö 48 - Car_Nicobarese bible

Ranehlö 48

¹Ngaich ngö inlahen unôichrit në, tö ök töhĕng tak tö ngöṙô Yôsĕf, Yĕhmeuk, vāhav öp yöng meh kikōnyö: ngaich angā-aṅ nö ngôṅ nak kūönre kikōnyö nö hol ò, Manasē, Ifrēm inrē.

²Ngaich hĕngtak ök vamë-eny nang Yāköp, nö ngöṙô, Yĕhmeuk, yih ap kūön meh Yôsĕf nö in meh: ngaich Israĕl nö hangëṅeṅl alahare, ūichlöre ngaich nö el chamam.

³Ngaich Yāköp nö ngöṙô tö Yôsĕf, Meūkö an ngam Tēv tökeuheūttöre chöngö töchu nö i Lus ip panam Kanā-an, ngaich hakôlò chu,

⁴Ngaich ngöṙô tö chu, Yĕhmeuk, vīlen meh Chin mikūönlö, ṙūölö ṙôken meh inrē, vīlen meh Chin min inrē tömaṙôngö öm tarik; ngaich Chū-ö min kētö ngih panam ip kūön meh, unôichrit meh, nö töt chanūhuvṙen nö amin.

⁵Ngaich nap töngamuh kūön meh kikōnyö nö chū-ö, nap tökayôḵnyu in meh ing panam Aikup urēhĕkūö yanīhih chu in meh i Aikup; Ifrēm, Manasē inrē, sā Rūpen, simōn inrē nö chū-ö chu min.

⁶Ngaich ap kūön meh, öp hakūön tö meh unôich tö cha, nö më-eṅ meh min chā-a i nup amin cha.

⁷Ngaich pöri chū-ö, hē chu yih ṙā-ang Patan, kapah ngaich Rēchöl nö ranghen chu el talöökö im panam Kanā-an, hē ih ṙòngmö marôvat tö Efrāt: ngaich lāpngen ò chū-ö el talöökö Efrāt; (angū-ö ön Petlihem.)

⁸Ngaich Israĕl nö ngëichkö nak kūön Yôsĕf, ngaich ngöṙô, Chīö aich nā?

⁹Ngaich Yôsĕf nö ngöṙô tök yöngre, Kikōnyö nan kūön chu, kahëtö ngam Tēv nö in chu ihih. Ngaich ngöṙô angā-aṅ, vë-ekūö meh chin, kēten cha in chu, hòṅ chu hakôlò cha.

¹⁰Paṙeūma nuk mat Israĕl tökūö kanöönyö, lökten ò nö ötkô nö meuk. Ngaich anga-aṅ nö haröhten cha nö in ò; hāmkūö cha ngaich angā-aṅ; fūölö cha inrē.

¹¹Ngaich Israĕl nö ngöṙô tö Yôsĕf, Öt lōnu chin tö mineukkūö meh: ngaich, yĕh meuk, halöngten chu An ngam Tēv meuk kūön meh inrē.

¹²Ngaich Yôsĕf nö kēnyen cha nö ṙā-ang ihôi nuk kinmônö ò; ngaich fātngöre angā-aṅ nö el tumlat,

¹³Ngaich ang Yôsĕf nö kē-ĕ cha nö nëtre taka, lahāmö ò ang Ifrēm ngaich lā tavē Israĕl, lātavē ò ang Manasē, ngaich haröhten cha nö in ò.

¹⁴Hateutnyö ök lāhāmö këlre ngaich Israĕl, ngaich ṙātö e nö elkui Ifrēm, ök manāngö, ngaich ök lātavē ò nö ikui Manasē, Supānngö këlre anga-aṅ nö huveū-en; pò Manasē nö lanòh,

¹⁵Hakôlò Yôsĕf ngaich angā-aṅ, nö ngöṙô, Ngam Tēv ngam tölöökö kūö tī tö nak yöng chu, Aprahām, Isāk inrē, ngam Tēv maha-aṅlen chu i rô-òtö nômö chu, söl ing töngamuh,

¹⁶Ngam ma-aṅhānga, ngam ṙamānyen chu ṙā-ang i nup taṙòkhöre tötlöök, hakôlò nāṅ nyīö yēḵ; hökngen ngam minë-eny chu nö minë-eny cha, ngam minë-eny nak yöng chu inrē, nā Aprahām nā Isak; ngaich hökngen cha nö sīöplö nö maṙôngö nö ellōn ngih tumlat.

¹⁷Ngaich hē Yôsĕf nö meuk ök yöngre nö ṙātö ök lāhāmö eltire nö ikui Ifrēm kunyāṅhaṅlōn tī angū-ö tö ò: ngaich angā-aṅ nö kē kël ök yöngre, nö kē-ĕng e nö ṙā-ang ikui Ifrĕm nö ikui Manasē.

¹⁸Ngaich Yôsĕf nö ngöṙô tök yöngre, Kayöngö, Rö-ön ngatī: pòn ngòh lanòh; ṙātö ngam lāhamö eltīre ikui ò.

¹⁹Ngaich sōḵ ök yöng ò, ngaich ngöṙô, Kakūönö, akahalōn chin tö e; akahalōn: tarik an angā-aṅ min inrē, kiröng an inrē min angā-aṅ: kiröng pöri ngam manāngö min tö ò, ngaich öp kūön ò min nö tö maṙôngö pumnāmö tarik.

²⁰Ngaich hakôlò cha angā-aṅ hē e, nö ngöṙô, In meh an min Israĕl nö hakôlò, nö ngö ngöṙô, Vīlen meh An min ngam Tēv sā Ifrēm, Manasē inrē: ngaich angā-aṅ nö halānyen Ifrēm nö lā kūö Manasē.

²¹Ngaich Israĕl nö ngöṙô tö Yôsĕf, Yĕhmeuk, kapah chin: holtöṙah meh pöri min ngam Tēv, kēten meh min inrē hēk im panam yik yöng meh.

²²Ane chin inrē kē-ĕkūö meh, hĕnghöl minchöö-ö nö samöthë tö minchöö-ö yip hanöngkisānö meh, ip kahë chu ṙā-ang eltī yip aṅ Amôr öich aṅtī tö sanëtre, linreny inrē.