Read Car_Nicobarese Ranehlö 49 Bible Online

Ranehlö 49 - Car_Nicobarese bible

Ranehlö 49

¹Ngaich Yāköp nö havëtö yik kūönre kikōnyö, ngaich ngöṙô, Hamūlöre yin, hòṅ chu vë-eny nang yīö tö lāinyngen yīö min i në unôich sakāmö.

²Kiteūmöre yin, hang inrē, yī-ö kikōnyö kūön Yāköp; hangihtô Israĕl ngam kikōnyö yöng yīö.

³Rūpen, lanòh chu man më-eṅ, kumlēḵ chu, ranehlö nganë-eṅ chu inrē, yöngkūö im ineū-euṅ, yöngkūö inrē i minā-aṅ,

⁴Tö taṙēichlöng sā mak, hö-ö pöri më-eṅ min īnu tö kinëtö chöngö; pò meh chuh el chamam ngam yöngre kikōnyö; ngaich hachōichngen e më-eṅ: pòn chuh i chūök hunlālö chu angā-aṅ.

⁵Simōn Lēvī inrē, hanöng kisānöre nan chā-a; nyāhatī töchökhuṙen nup sanët cha.

⁶Ō më-eṅ nômö chu, uh man yihtöre in cha nö halēnöre; i nup manūlö cha, më-eṅ ineū-eu chu, uh man mūlta; pò cha nö i inngëṅṙöre, nö kumpah tarik, ane inrē i kanahanglōnre chā-a nö hamūl linkölngö kalröön nuā.

⁷Tötkôlò ap yēḵ inngënṙö cha, pò e nö kalēḵ; ap tanānyö cha inrē; pò e nö öt milēḵ: harēvö cha chin min in Yāköp, pirātö cha inrē in Israĕl.

⁸Yūtā, më-eṅ man min ha-öiny yip hanöngkisānö meh: i likeun yip tökunyāhaṅ elmat tö meh min ngam eltī meh; ikūö meh min yip kikōnyö kūön ngam yöng meh nö sōntöre.

⁹Kūön lāyön ön Yūtā, kakūönö, ṙeū-eung im pôḵre man ngaich kū-ö tö lātulöng: sōntöre angā-aṅ: sā fanātö lāyön angā-aṅ, sā kan lāyön inrē; chiāp min maharōilen ò?

¹⁰Öt ṙāken Yūtā an min ngam tinkung minā-aṅ, öt rēhĕn ngam kinchīrö mahayöng nö ṙākö hôi kalröön ò hanöng saha Siloh nö yih; in ò min yip tarik nö hang chöngö ò.

¹¹Kapòkngö ngam kan kūön köttö an nö i kaha ngam vain, ngam kūön köttö ò inrē nö i kaha tökôlò vain; söich hilāre an min nö el vain, tö-aṙū inyut ò inrē nö i mahām ṙòng vain.

¹²Turëṙö elmat an min tökūö vain, isōho kanap inrē tökūö aṅteh.

¹³Sepulön, iyöng el sanāṙö man min: ngaich angā-aṅ min nö sanāṙö chōng; i Sitōn öp min kūöngö ò.

¹⁴Isakar, tökalēḵ nö köttö, fāthakkūö nö ihôi chūök minë sīṅp:

¹⁵Meūkö e angā-aṅ nö tölöök chūök haneūheu, ngam panam inrē nö tövāyen; singeuntö elranôṙöre angā-aṅ nö keun, ngaich nöng kūön alaha yöngṙen la-en.

¹⁶Tën, kamhòkken yik tarikre min, sā töhĕng i miyöngö Israĕl.

¹⁷Pēich ap min Tën nö el talöökö tösinrōlu nö pēich el kanröönö, kamap kulôich röön kōra, ngaich ngam mi-i uk nö töö-ölkūö nö suktöre.

¹⁸Ō Mā Tēv, hökkö ngam inyööken chin ngaich aṅ in meh.

¹⁹Kāt, harāha ò min yip kumyung: ngaich angā-aṅ pöri min nö unôichrit cha nö harāha cha.

²⁰Löknyö in Asēr öp nyā-aṅkūö ò min töng sangöönyöre, ngaich angā-aṅ min nö kēlö nyā-aṅkūö rācha tö tökuchik.

²¹Hāin an Naftalī töluhlöngö, kamëtö tölöök ṙô.

²²Pak an Yôsĕf nö tö ṙôngu, tö ṙôngu nö pak, ranghö öp töhëmlö mak; vinngö nup pak ò nö i kaha kinlōngö:

²³Chökhutī yip lumreny tö ò, lirënyan, öthakôlò, ò inrē:

²⁴Ngaich pöri ngam linreny ò im kumlēḵ nö ngöhakṙen, vītu inrē nö kalēḵ minë takeun kël ò lökten i tī ngam Tökeuheūttöre chöngö in Yāköp; (aṅ in e ap yōmpököre, ap ihong in Israĕl).

²⁵Lökten im Tēv ngam Yöng meh, ngam hamòlṙen meh min; lökten im Tökeuheūttöre chöngö, ngam mahakôlò meh min, tö inkôlò aṅ lātulöng el halīöngö inkôlò aṅ el ngam mai nup töhulalhaka lataṙeū, inkôlò teh, chūök kanūönö inrē:

²⁶Mihôiṅ nun minë inkôlò tī ngam yöng meh nö ṙūölöng tö minë inkôlò tī yik muvöhngö meh söl ip manā-angkūö minë rung töt chanūhuvṙen: ikui Yôsĕf nun min anū-ö, el chalòngkui ò inrē ngam tököhngen töyip hanöngkisānöre.

²⁷Vul ön Penyamin tötainy; lāpeuheū min angā-aṅ nö kāḵngö nup pôḵre, lā harap min inrē angā-aṅ nö michööḵngö nup pôḵre.

²⁸Ṙòkhöre yin vē tönët sīön miyöngö in Israĕl: angū-ö ngih inrē ṙô ngam yöng cha tö cha nö hakôlò cha; kö asā nup inkôlò cha, tī ò nö hakôlò cha.

²⁹Kētö chöngö cha angā-aṅ inrē, nö ngöṙô tö cha, Hòṅ hamūltu chin i yip tarikre; lāpngen chu holtöṙah yip yöng chu el kinluhu öp el panô-òṅ Efròn öp aṅ Hitait,

³⁰El kinlūhu öp el panô-òṅ i Makpelā, öp lakūö Mamri, ip panam Kanā-an, öp panô-òṅ aṅ in Efròn, ök aṅ Hitait, nö amin, chūök lināpngö.

³¹In e chā-a nö lāpngen Aprahām: Sëra inrē ök pīhö ò; in e chā-a nö lāpngen Isāk, Repëka inrē ök pīhö ò; i chūök tī chu lāpngen Leah:

³²Öp panô-òṅ, töp kinlūhu inrē ël e, öp tö havāha nö i yip kūön Het.

³³Hē Yāköp ngaich nö keūheūten nö halēn yik kūönre, hamūl kalröönre ngaich angā-aṅ nö el ök chamam, ngaich kapah, hamūli ngaich nö i yik tarikre.