Read Car_Nicobarese Ranehlö 6 Bible Online

Ranehlö 6 - Car_Nicobarese bible

Ranehlö 6

¹Chalô ngaich tö e, hē ranulten tarik nö ṙūölöre ṙôken nö ikūö ngam panam, kayôḵnyu ngaich nyīö kikānö;

²Ngaich yik nyīö kikōnyö aṅ im Tēv nö meuk yik nyīö kikānö aṅ i tarik, töcha növai; ngaich kēḵ pīhöre chā-a töcha nö ṙòkhöre yik töng atöllö cha.

³Ngaich ngöṙô ngam Mā Tēv, Hö-ö ön min ngihlōn Chu nö örheūheu nö lā-al tarik, pò ò inrē angā-aṅ nöng alaha: lökten nup sakāmö ò min nö hēngòng nët anāi samyeūheu.

⁴Nefēlim yik umuh ikūö ngam tumlat hē nuk sakāmö anū-ö, unôichrit e inrē, hē yik nyīö kikōnyö aṅ im Tēv nö yihtöre nö iyik nyīö kikānö aṅ i tarik, ngaich chā-a nö kayôḵnyö kūön cha tö nyīö: chā-a yik tökalēḵ tarik yik ik misī, tarik tö-eūnyu.

⁵Ngaich ngam Mā Tēv nömeuk tö ötlanöökö tarik nö kiröng nö im tumlat, ane inrē ṙòkhöre chanöh ellōn ò nö iṙūöhen nö ötlöök.

⁶Ngaich ngam Mā Tēv nö haṙivtīre nö vī tarik nö ikui ngam tumlat, ngaich miṙivngölōn Ò angū-ö.

⁷Ngaich ngöṙô ngam Mā Tēv, Hòṅ piyāingö ngòh tarik Chin ngam vahī-il Chu ṙā-ang ikūö ngam tumlat; hĕnghöre töfënö kalröön inrē, töṙeūla chehen, chehechōn inrē el kuföt; pò e nö miṙivngen Chu töchu vīlen cha.

⁸I mat ngam Mā Tēv pöri Nō-a nö teūngen tö inkôlò.

⁹Në nun ineūkö Nō-a, Töchiplö ök Nō-a nö tarik, töteung nö ik hēre: holröön ngam Tēv Nō-a nö kiröönköre.

¹⁰Hakūöntö nyīö kikōnyö ngaich Nō-a lūöi taka, Sem, Hem, Yafet inrē.

¹¹Ngaich ngam tumlat nö chōich nö ikūö ngam tumlat tö chanökhuṙen.

¹²Ngaich ngam Tēv nö ngëichkö ngam tumlat, yĕh meuk, chōich angū-ö: pòn ṙòkhöre alaha nö hachōichngö talöököre nö ikui ngam tumlat.

¹³Ngaich ngöṙô ngam Tēv tö Nō-a, Yih ön nö ikui Chu ngam manāngen në alaha nö ṙòkhöre: pòngam tumlat nö tööḵlö tö chanökhuṙen löktökūö cha; yĕh meuk, hòṅ piyāingen cha Chin anòngngen ngam tumlat.

¹⁴Vīchōngre man tö Kòför chōn; vī nup urôhò pömchö el ap chōng, ngaich pīrööman tö paröm lā ël lā uk inrē.

¹⁵Ngih ön inlahatī meh vī an: lūöyòng mikëlö rôḵta ap chōng, taneui anāi mikëlö ṙôḵtāk, lūöi anāi mikëlö rôlö fāp.

¹⁶Vī lökhöt yanāngö pömchö im chōng, hĕng sumkôngö rô-òltī nö kū-ö tö lātulöng; ikaha ngam chōng pöchö tö tī meh ngam inkūp; vī an më-eṅ nö lātaṙeū, innëtö, linūöyö tökiröönö inrē.

¹⁷Ngaich Chin, yĕh meuk, kēḵtö ṙanöingö Chin tö mak ikūö ngam tumlat, nö pīsūngen taṙòkhöre alaha, nup tö aṅhavin tö unhôṅmö aṅ im nômö; ṙā-ang el katòh ngam halīöngö; keuheūtngöre chehen nup el ngam tumlat nö kapah min.

¹⁸In meh pöri min Chū-ö vītö ngam kinlēḵngôre; ngaich kuhēthötre min më-eṅ ël ngam chōng, më-eṅ, yip kūön meh nyīö kikōnyö inrē, töm pīhö meh, töyip pīhö yip kūön meh nyīö kikōnyö nö hol meh.

¹⁹Aṅ inup tö-aṅ chehen nö ṙòkhöre tö-alahavö, nët nòng itöhĕng mihëṙö, kum meh min ël ngam chōng, haköpö u nö aṅ nö hol meh; kōiny, kan inrē anū-ö min.

²⁰Kö i mihëṙö nup chehechōn, ane inrē nuā kö i mihëṙöre, nët nòng itöhĕng mihëṙö min nö yih nö in meh, haköpö u nö aṅ.

²¹Ngaich më-eṅ inrē kēḵ nup nya-aṅkūö nö ṙòkhöre nup tö nya-aṅ, hamūlngö u in meh: ngaich anū-ö min nya-aṅkūö meh tö u inrē.

²²Ngaich ngatī Nō-a; sa nup taṙòkhöre ṙô ngam Tēv nö tölṙô ò, ngatī angā-aṅ.