Read Car_Nicobarese Ranehlö 7 Bible Online

Ranehlö 7 - Car_Nicobarese bible

Ranehlö 7

¹Ngaich ngöṙô ngam Mā Tēv tö Nō-a, Keuhēthötre man ël ngam chōng tö yip aṅ patī meh inrē nö ṙòkhöre; tön meūkö meh Chin chiplö ikūö Chu i ngih tumköl chap.

²Kēḵ pömchö inup tölöök töfënö kalröön nö sat, sat nòng; tö kōiny tö kan ò inrē; aṅ inup töfënö kalröön nup töthet nët nòng, tö kōiny tö kan ò inrē;

³Inup chehechōn inrē el kuföt, sat, sat nòng, kōiny kan inrē: nö haköp nup kūön nö aṅ ikūö ngam tumlat nö ṙòkhöre.

⁴Tön sattöre nup sakāmö, ngaich Chū-ö min vīten e nö kumṙah ikui ngam tumlat, fën anāi sakāmö, fën anāi hatööm inrē; keuheūtngöre tö-aṅ chehen min nö piyāyi nö ṙā-ang ikūö ngam tumlat nup vahī Chu.

⁵Ngaich Nō-a nö asā nup taṙòkhöre tinöölô ò töngam Mā Tēv.

⁶Tafūölòng samyeūheu ṙēti Nō-a nö köiny hē ngam ṙanöingö aṅ minë mak nö ikui ngam tumlat.

⁷Kuhēthötre ngaich Nō-a, yik kūön ò inrē nyīö kikōnyö, ök pīhö ò, töyik pīhö yik kūön ò nyīö kikōnyö hol ò, nö ël ök chōng, kūö minë mak ngam ṙanöingö.

⁸Aṅ inup töhet töfënö kalröön, ane inrē aṅ inup töthet töfënö kalröön, aṅ inup chehechōn, aṅ inup chëhen töṙeūla inrē tökeuheūttöre,

⁹Nët nët nòng nuk kumhëthötre nö in Nō-a nö ël ök chōng, kōiny kan inrē, sā ṙô ngam Tēv nö tölṙô Nō-a.

¹⁰Chalô ngaich tö e unôichrit tö sat sakāmö tö minë mak ṙanöingö nö ngaich nö ikui ngam tumlat.

¹¹Im tinfūölòng samyeūheu nômö Nō-a, im innët chumngëṅtö, im sinatsīön sakāmö ngam chingëṅt, im sakāmö angū-ö; ṙòkhöre nuk töhëmlö mak aṅ im tö-aṙū nö lakukköinykūö, minë inkūp ngam halīöngö inrē nö löpnyukūö.

¹²Ngaich ngam kumṙah nö ikui ngam tumlat fën anāi sakāmö fën anāi hatööm inrē.

¹³Hē ngam sakāmö angū-ö ang Nō-a, nö yôklö, Sem, Hem, Yafet inrē, yik nyīö kikōnyö kūön Nō-a, tök pīhö Nō-a, töyik tö lūöi tak pīhö yik nyīö kikōnyö in cha, nö ël ök chōng;

¹⁴Chā-a, keuheūtlöre töfënö kalröön kö i mihëṙöre, ṙòkhöre nuā, kö i mihëṙöre, keuheūtlöre töṙeula chehen nup ikūö ngam tumlat ṙameūla, keuheūtlöre chehechōn kö i mihëṙöre, keuheūttör mihëṙö nup tösanëòku chehechōn.

¹⁵Ngaich anū-ö nö kuhēthötre nö in Nō-a nö ël ök chōng, nët nòng nö ṙòkhöre, tö-alahav tö-aṅhav-in tö unhôṅmö.

¹⁶Ngaich anū-ö nuk kumhēthötre, kōiny kan inrē nö kuhēthötre, aṅ inup taṙòkhöre tö-alahav sā ṙô ngam Tēv nö tölṙô ò: ngaich öpngökūö ò ngam Mā Tēv.

¹⁷Ngaich ngam ṙanöingö nö fën anāi sakāmö nö ikui ngam tumlat; ṙūöhölre ṙôken ngam mak, ngaich hatöhlö ök chōng, kachöötlöng ngaich angā-aṅ nö i ngam tumlat.

¹⁸Mihôiṅ ngaich minë mak, ṙūöhölre ngaich nö kiröngen nö ikuö ngam tumlat; ngaich ök chōng nö kiröönngöre nö ikui minë mak.

¹⁹Ngaich minë mak nö yahlö nö mihôiṅ nö ikui ngam tumlat; ngaich ṙòkhöre nup tömarô-òlkui rôngö keuheūtngöre elkatòh ngam halīöngö nö kahūli.

²⁰Saṙaklöngkūö tö tö taneuisīön mikëlö minë mak nö mihôiṅ; kahūli ngaich nuk rôngö.

²¹Kapah nuk alaha ngaich nö ṙòkhöre nuk mahalöinyköre nö ikūö ngam tumlat, hĕnghöre chehechōn nuā, töfënö kalröön, keuheūtngöre töṙeūla chehen nup ṙameūla nö ikui ngam tumlat, keuheūtngöre inrē tarik:

²²Ṙòkhöre nup tö-aṅhav elmeh tö unhôṅmö aṅ im mā-alaha ṙòkhöre nuk el tanyô nö kapah.

²³Keuheūtngöre inrē nuk tö-aṅ chehen nö pisū-uyö nuk mī-ikūö ngam tumlat, hĕnghöre tarik, nuā, töṙeūla chehen inrē, chehechōn ël ngam halīöngö inrē; pisū-uyö anū-ö nö ṙā-ang im tumlat: ngaich höng Nō-a tö ṙa-ai, chā-a inrē yik hol ò nö ël ök chōng.

²⁴Mihôiṅ ngaich minë mak nö ikūö ngam tumlat, hēngòng taneui anāi sakāmö.