Read Car_Nicobarese Ranehlö 8 Bible Online

Ranehlö 8 - Car_Nicobarese bible

Ranehlö 8

¹Köpölōn ngam Tēv tö Nō-a, ṙòkhöre nup tö-aṅ chehen, ṙòkhöre inrē nuā nuk hol ò nö ël ök chōng: ngaich ngam Tēv nö vī kuföt nö lökngökui ngam tumlat, kūönngöre ngaich minë mak;

²Nuk töhëmlö mak inrē aṅ ngam tö-aṙū, asöki inrē minë inkūp ngam halīöngö, ṙāpö inrē ngam kumṙah nö ṙā-ang el halīöngö;

³Havanngöre ngaich minë mak nö iṙūöhöröön nö ṙā-ang ngam tumlat: ngaich unôichrit manāngen sakāmö töhēngòng taneui anāi minë mak nö kūöṅnngöre.

⁴Ngaich ngam chōng nö töönglöre nö ikui nup rôngö Ararët im sinātö chingëṅt, im sinatsīön sakāmö ngam chingëṅt.

⁵Iṙūöhöröön minë mak nö kūöṅnngöre, hanöngsaha ngam sinöm chumngëṅtö: im sinöm chumngëntö, im raneh sakāmö ngam chingënt, minë kui minë rôngö nö meūkö.

⁶Chalô ngaich i manāngen tö fën anāi sakāmö, tö Nō-a nö löpnyökūö inkūp ök chōng ök vahī ò:

⁷Ngaich angā-aṅ nö tīnngö rēven hĕng nòng, ngaich kiröönngöre angā-aṅ nöng havanköritre, hanöng saha minë mak nö nyôngö nö ṙā-ang ngam tumlat.

⁸Ṙā-ang in ò angā-aṅ ngaich nö tīnngö nyö-öṅ hĕng nòng, nö ngëcha, yē minë mak nö kūöṅnngöre nö ṙā-ang ikūö ngam tumlat;

⁹Ngaich pöri ngam nyö-öṅ nö öt kôḵtökūö töchūök elröönre nö heūheure, ngaich havantöre angā-aṅ nö in ò nö im chōng, pò minë mak nö ikūö ngam tumlat nö ṙòkhöre: silônyö këlre ngaich angā-aṅ, ngaich kēḵ an, kēḵhĕtnen ò ngaich nö in ò nö ël ök chōng.

¹⁰Sattöre sakāmö angā-aṅ ngaich nö ngöh; ngaich hēk angā-aṅ nö tīnngö nyö-öṅ nö ṙā-ang ël ök chōng;

¹¹Ngaich ngam nyö-öṅ nö yih nö in ò tö el harap; yĕh meuk, elvāng ò hĕng tāk rōi òliv tösòklöngö; lökten Nō-a nö ngaich nö akahalōn tö minë mak nö kūöṅnngöre nö ṙā-ang ikūö ngam tumlat.

¹²Sattöre sakāmö ngaich angā-aṅ nö ngöh; ngaich tīnngö ngam nyö-öṅ; ngaich angā-aṅ nö öt havanku nö in ò nö hēk,

¹³Chalô ngaich im tö tafūölòng raneh samyeūheu, im raneh chingëṅt, im raneh sakāmö ngam chingëṅt, minë mak nö nyôngö nö ṙā-ang ngam tumlat; ngaich Nō-a nö kēḵngö ök rūkui ök chōng, ngëcha ngaich, yĕh meuk, ngam kūö ngam tumlat nö nyôlö.

¹⁴Ngaich im innët chumngëṅtö, im innët anāi sat sakāmö ngam chingëṅt ök tumlat nö nyô.

¹⁵Ngaich ngam Tēv nö vë-ekūö Nō-a, nö ngö ṙô,

¹⁶Kuṙòh, ṙāngö ngam chōng, më-eṅ, ap pīhö meh inrē, kūön meh kikōnyö, ane inrē yip in meh pīhö yip kūön meh kikōnyö.

¹⁷Keuheūtlöre nup tö-aṅ chehen nö kum meh nup mī-in meh aṅ i në taṙòkhöre alaha, hĕngöre chehechōn, nuā, keuheūtlöre töṙeūla chehen nup ṙameūla nö i kui ngam tumlat; hòṅ u nö asīöpöre nö pōyen nö im tumlat, mikūönlö ngaich. Ngaich ṙūölöre ṙôken i kui ngam tumlat.

¹⁸Kiröönngöre ngaich Nō-a yik kūön ò kikōnyö, ök pīhö ò, yik pīhö yik kūön ò kikōnyö inrē nö hol ò:

¹⁹Keuheūtlöre töfënö kalröön, keuheūtlöre töṙeūla chehen, keuheūtlöre chehechōn, nup töng mahalöinyköre i kui ngam tumlat, kö i tumkangen u, kunyī-inyre nö ṙā-ang ël ök chōng.

²⁰Ngaich Nō-a nö vīlö tahāklö ngam Mā Tēv; ngaich kö kēḵ aṅ i nuk töhet tö fënö kalröön, aṅ i nuk töhet chehechōn, ngaich kēḵtö nuk töföngö tökēḵtu nö ël ök tahāklö.

²¹Ngaich ngam Mā Tēv nö tong tökuchik tinhūsö; ngaich ngam Mā Tēv nö ngö ṙô nö ellōnre, Rö-ö Chin min hēk rūttö öt kanôlò ngam tumlat nö hēkngöre tö pòkūö tarik, pò ngam chanöh ellōn tarik nöng tötlöök löktökūö nyīni-öṅ ò; ötrēhĕn Chin min hēk fël nup tö-aṅ chehen Öich hēkngöre, sā tī Chu ngaich.

²²Hanöng saha ngam tumlat nö ngöh, hē kulöl, kanöinyòng inrē, unfōvö, ṙanāchö inrē, sikehngö, laneūichö inrē, sakāmö hatööm inrē, ötṙākenre min.