Read Car_Nicobarese Ranehlö 9 Bible Online

Ranehlö 9 - Car_Nicobarese bible

Ranehlö 9

¹Ngaich hakôlò Nō-a ngam Tēv, yik kūön ò kikōnyö inrē, ngaich ngö ṙô tö cha, Mikūönlö yēḵ ṙūölöre ṙôken, ngaich hatööḵlö ngam tumlat.

²I kui minë töfënö kalröön aṅ ngam tumlat nup min pinhë-eṅ yīö, vanööṙö tö yīö inrē, i kui chehechōn inrē el kuföt nö keuheūtlöre; ṙòkhöre nup töng ṙeūla el ngam tumlat, ṙòkhöre inrē kāḵ aṅ el mai, el tī meh nun nö kēḵtu.

³Keuheūtlöre mahalöinyköre chehen nup tö-aṅ nö nyā-aṅkūö yīö min; sā minë tö-uhāv kun chōn nö kēktu tö Chu nö ṙòkhöre nö in yīö.

⁴Ngam alaha pöri tö hol tö nômöre, ngam mahām e un kāḵa tö yīö min.

⁵Ngaich kô-en ap mahām yīö, mahām nup nômö yīö, nö havëka min tö Chu; havëkö e Chin min eltī nup tökeuheūttöre töfënö kalröön: ane inrē eltī tarik, pòrô nö eltī tökeuheūttöre hanöng kisānö tarik Öich havëkö nômö tarik min.

⁶Ngòh kumtaknyö mahām tarik, lökten tarik min ap mahām ò nö kitaknyu: pòn vī tarik Angā-aṅ nö insā-a tö ngam Tēv.

⁷Ngaich yī-ö mikūönlö yin yēḵ ṙūöhölre ṙôken inrē; pōyen hakūönti ël ngam tumlat ṙūölöre ṙôken inrē ël e.

⁸Ngaich ngam Tēv nö vë-ekūö Nō-a, yik in ò inrē kūön ò kikōnyö, nö ngö ṙô.

⁹Ngaich Chin, yĕh meuk, in yīö an ngam kinlēḵngô Chu nö köp tö tī Chu, i yip kūön yīö inrē unôichrit yīö;

¹⁰Keuheūttöre nup tö-aṅ chehen nup in yīö, ngam chehechōn, ngam nuā, keuheūttöre inrē nup in yīö töfënö kalröön aṅ ngam tumlat: aṅ in u nö ṙòkhöre nuk kumnyī-inyre nö ṙa-ang el ngam chōng, höng keuheūttöre töfënö kalröön aṅ ngam tumlat.

¹¹In yīö Chin min haköpngö ngam kilēḵngôre; öt hēk nup min taṙòkhöre alaha nö rökiṙen tö mak ṙanöingö; ötrēhĕn min ṙanöingö nö hēkngöre nö piyāingö ngam tumlat.

¹²Ngaich ngö ṙô ngam Mā Tēv, Ngih ön minkahngö ngam kinlēḵngô, ngam vahī Chu ihôi Chu tö yīö inrē, tö në tö-aṅ chehen inrē töt ṙākenre i tumkölchap:

¹³Ṙātö ngam tasēköre Chin el taṙul, ngaich angū-ö min nö minkahngö kinlēḵngô ihôi Chu tö ngam tumlat.

¹⁴Ngaich chalô min angū-ö, yē Chu kēḵtö taṙul i kui ngam tumlat, ngaich ngam tasēkö min nö meūkö nö el taṙul,

¹⁵Ngaich Köpölōn Chū-ö min tö ngam kinlēḵngôre, ngam ihôi Chu tö yīö tö në tö-aṅ chehen tö-alahavö; ngaich minë mak min nö öt hēk nö ṙanöingö nö piyāingö në taṙòkhöre alaha.

¹⁶Ngaich el taṙul min ngam tasēkö; ngaich ngëichkö e Chū-ö min, hòṅ Chu Köpölōn tö ngam tötchanūhuvṙen kinlēkngô ihôi ngam Tēv tö në tö-aṅ chehen tö-alahavö në i kui ngam tumlat.

¹⁷Ngaich ngö ṙô ngam Tēv tö Nō-a, Ngih ön minkahngö ngam kinlēḵngô ngam haköpngö Chu ihôi chu tö në taṙòkhöre alaha i kui ngam tumlat.

¹⁸Ngaich yik kūön Nō-a kikōnyö, yik kumnyī-inyre nö ṙā-ang ël ök chōng, hēḵ Sem, Hem, Yāfet inrē: kikōnyö ök Hem yöng Kanā-an.

¹⁹Chā-a yin vē tölūöi tak kikōnyö kūön Nō-a: ngaich löklö in cha ngam tumlat nö keuheūtngöre nö parāti.

²⁰Kēḵtöre ngaich Nō-a nö vamī panô-òṅ, ngaich teūichtö vain;

²¹Ngaich angā-aṅ nö òk aṅ i nuk vain, ngaich hiyōi; ngaich anga-aṅ nöng chumlal nö el inrūkuire.

²²Ngaich Hem, ök kikōnyö yöng Kanā-an, nö meuk ök yöngre kikōnyö nö chumlal, ngaich vë-eny nang nak tö nët tak hol maneukre nö el kahôyö.

²³Ngaich kēḵ hilā nāṅ Sem, nāṅ Yāfet, ngaich kahumlö e nö i kūö kël cha, ngaich anheūlö, ngaich kahultö kui linchôyö ök yöng cha kikōnyö; lā ukre kū-ö chā-a, ngaich chā-a nö öt meuk linchôyö ök yöngre kikōnyö.

²⁴Ngaich aṅhen ang Nō-a nö ṙā-ang im vain, ngaich akahalōn tö tī ök manāngö kūönre kikōnyö tö ò.

²⁵Ngaich ngö ṙô anga-aṅ, Rūtpööḵ, öt kôlò an yēḵ Kanā- an; Mahalanṙen yip mahalanṙen an yēḵ min in yip hanöng kisānöre.

²⁶Ngaich ngö ṙô angā-aṅ, Tökôlò an yēḵ ngam Mā Tēv, ngam Tēv Sem Hökngen Kanā-an nö maha- lanṙen ò.

²⁷Ṙūönyö ṙôkö Yāfet yēḵ ngam Tēv, Hökngen ò nö iyöng el inrūkui Sem; Ngaich hökngen Kanā-an nö mahalanṙen ò.

²⁸Lūöyòng taneui anāi samyeūheu Nō-a nö aṅ unôichrit ök ṙanöingö.

²⁹Ngaich ṙòkhöre nuk sakāmö Nō-a nö machūötöre ṙòng taneui anāi: kapah ngaich angā-aṅ.