Read Car_Nicobarese 2 SAMUĔL 10 Bible Online

2 SAMUĔL 10 - Car_Nicobarese bible

2 SAMUĔL 10

¹Ngaich angū-ö unôichrit ngih, tök rācha yik kūön Amön nö kapah, ngaich ṙënngen ò ök kikōnyö kūön ò Hanun nö hayöng.

²Ngö ṙô ngaich ang Tāvit, Hòṅ hameuktö neūkölōn re chin in Hanun öp kikōnyö kūön Nāhas, sā ök yöng ò kikōnyö nö hameuktö neūkölōn re nö in chu. Lökten ang Tāvit nö lökten eltī yik tarik re nö haṙamlōn ò tökūö ök yöng ò kikōnyö. Yih ngaich yik tarik Tāvit nö i panam yik kūön Amön.

³Ngaich pöri yik kūön rācha yik kūön Amön, nö ngö ṙô tök mā cha Hanun, ʽʽTömilēḵṙen ang Tāvit tö lōn meh tök yöng meh kikōnyö töp lökten ò nö tīntö mahaṙāmlōn meh? Röh ṙöng ang Tāvit nö tīntö yip tarik re nö chöh ngih elpanam hayuntö matre inrē tö e, nö hòṅ tiṙōlngen e?ʼʼ

⁴Lökten ang Hanun nö kē yik tarik Tāvit, ngaich haròngtötīre nö kuhākngö sanôi kūö cha ngaich söl ṙat tī nö kamöpngö nuk tökiröng inyut cha, nö lökngö ṙòng rit cha, tīnngen cha ngaich nö kiröönngöre.

⁵Ngaich hē cha nö vënyen e nö in Tāvit, tīnngö hamöngkūö cha ngaich anga-aṅ; pò yik tarik nö kiröngö sumrōngkūö. Ngö ṙô ngaich ök rācha, Höngngöh yin i Yerikō hanöng saha nup sanôikūö yīö nö sīöplö, ngaich möl öi havan.

⁶Ngaich hē yik kūön Amön nö meūköre nö kunyaha elmat tī tö Tāvit, tīnngö ngamöönkö yik aṅ Sīriā aṅ Pĕtrehòp ngaich yik kūön Amön, tö yik aṅ Sīriā i Sōpāh nët anāi köṅny kumröön hĕng köṅny inrē yik tarik aṅ Mē-akāh nët sīön köṅny inrē yik tarik aṅ Tòp.

⁷Ngaich hē Tāvit nö hāngö e, tīnngen Yô-ap ngaich anga-aṅ, ṙòkhöre inrē yik tökālēḵ tarik.

⁸Kunyī-inyre ngaich yik kūön Amön, haṙāköre ngaich nö im kinyūngö ip lökhöt ip inkup; elkahôiṙen nö köhngen, yik aṅ Sīriā aṅ Sōpāh, aṅ Rēhòp tö yik tarik Tòp, Mē-akāh inrē.

⁹Ngaich hē Yô-ap nö meuk ngam kinyūngö nö lā kūö ò lā-uk ò inrē, katöllö yik aṅ Israĕl ngaich anga-aṅ nö ṙòkhöre yik tö-atölka tarik, ngaich hatöökö cha nö lā-al yik aṅ Sīriā:

¹⁰Eltī Apīsāi ök kahëm ò tī angā-aṅ nö kēten yik chööḵṙen tarik, hatöökö cha ngaich anga-aṅ nö lā-al yik kūön Amön.

¹¹Ngaich ngö ṙô anga-aṅ, Yē yip aṅ Sīriā min nö yahlö kumlēḵ tö chu, ngaich holṙen chu min më-eṅ: yē yip kūön Amön pöri nö yahlö kumlēḵ tö meh, ngaich yih chū-ö min holṙen meh.

¹²Um pa-ekūö, tā-a töi sā tarik laklö vē tarik re, në elpanam ngam Tēv hī inrē: tī-iv An ngam Mā Tēv inrē töp tölöök min aṅ in ò.

¹³Ngaich Yô-ap tö yik tarik in ò inrē nö ṙūötöre nö ik kinyūngö nö lā-al yik aṅ Sīriā: falngöre cha-a ngaich nö i kūö ò.

¹⁴Ngaich hē yik kūön Amön nö meukngen yik aṅ Siriā nö falngöre nö i kūö Apīsāi, ngaich kuhēthötre nö elpanam. Havantöre ngaich Yô-ap nö ṙā-ang i yik kūön Amön, ngaich yih nö i Yerusalem.

¹⁵Ngaich hē yik aṅ Sīriā nö meukngenre nö höichngen nö i kūö Israĕl, hamūlöre cha-a ngaich.

¹⁶Tīnhanga ngaich Hatatēsör, ngaich kētö yik aṅ Sīriā yik lāmuh tö ngam tahël Yufratīs cha-a ngaich nö i Helām, holten Sōpak nö yöngkūö kumyung nö i kui cha yik aṅ in Hatatēsör.

¹⁷Vënyu nang ngaich Tāvit tö e; hamūl yik aṅ Israĕl ngaich anga-aṅ ṙòkhöre, ngaich havāngngö kui Yôtön, yih ngaich nö i Helām. Haṙāköre ngaich yik aṅ Sīriā nö lā-al Tāvit, ngaich kiyūngan.

¹⁸Falngöre ngaich yik aṅ Sīriā nö i kūö yik Israĕl: fëli ngaich yik aṅ Sīriā tö Tāvit yik tarik tösātòng inröl, fën anāi köṅny tarik inrē aṅ uk kōra, fëli inrē Sōpak ök yöngkūö kumyung cha, ngaich kapah anga-aṅ nö umuh. Ngaich hē yik rācha nö ṙòkhöre yik tö ngaich nö tarik Hatatēsör ngaich meukngenre cha-a nöng höichngen nö i kūö Israĕl, vī lanāmö cha-a ngaich nö in Israĕl ngaich kūö alaha cha. Pa-ekūö ngaich yik aṅ Sīriā nö holṙen yik kūön Amön nö hēk.