Read Car_Nicobarese 2 SAMUĔL 11 Bible Online

2 SAMUĔL 11 - Car_Nicobarese bible

2 SAMUĔL 11

¹Ngaich i invanrit ngam samyeūheu, ik hē vē rācha nö hakôtenre nö kiyung, ang Tāvit nö tīnngen Yô-ap, tö yip tarik ò inrē nö hol ò, ṙòkhöre inrē yik aṅ Israĕl; ngaich cha-a nö ṙôkngöre vah tī tö yik kūön Amön, havīlen Rappāh inrē nö kayīngö e. Höngngöh pöri Tāvit nö i Yerūsalem.

²Ngaich ik harap, ang Tāvit nö choholre nö ṙā-ang el chamam re, ngaich havötköre nö i kui ök patī rācha: löktö kui patī mat anga-aṅ nö meuk ök kikānö nö vōk; tövāyö mineūkö ök kikānö.

³Tīnngö mahatönken ök kikānö ngaich Tāvit. Ngaich hĕng tak ök tö ngö ṙô, Nö röh ang kan ngòh nö Pĕtsīpā, nö kikānö kūön Elīam, nö pīhö Yuriā öp aṅ Hiti?

⁴Tīnngö tö kumtö ṙô ngaich ang Tāvit, ngaich kē an; yih ngaich anga-aṅ nö in ò, ṙōlngöre ngaich anga-aṅ nö holtöṙah ò. (Pò ò nö ahetlöre tök kumnyahṙenre.) Havan ngaich anga-aṅ nö i patīre.

⁵Pirūkö nyīö ngaich ngam kikānö; ngaich ngö ṙô anga-aṅ nö söömtö vinë-eny nang Tāvit, Kūönu chin ngaich.

⁶Ngö ṙô ngaich Tāvit nö söömhöti nö in Yô-ap, Tīnten Yūriā man in chu öp aṅ Hītī. Ngaich Yô-ap nö tīnten Yūriā nö in Tāvit.

⁷Ngaich Yuriā nö yih nö in ò, hatön inlahen Yô-ap ngaich ang Tāvit nö in ò, inlahen yip tarik inrē, inlahen ök kinyūngö inrē.

⁸Ngö ṙô ngaich Tāvit tö Yūriā, Kuṙòh chuh patīre mana, söichlö röönre inrē. Kiröönngöre ngaich Yuriā nö ṙā-ang patī ök rācha ngaich tömrit ò ök raneushö ò alaha ṙamā-ang in ök rācha.

⁹Höng haṙòh i kūö inkūp ök patī ök rācha pöri ang Yūriā nö hol yik tarik ök mā ò nö ṙòkhöre, ngaich rö-ö nö chuh patī re.

¹⁰Ngaich hē cha nö ngö ṙô nö vë-eny nang Tāvit, Öt chuh patī re öp Yūriā, ngaich ngö ṙô Tāvit kiröönngöre? Kūö yòh ömeh öt chuh patīre?

¹¹Ngö ṙô ngaich Yūriā tö Tāvit, höng el rūkui ap kasòng chöngö, tö Israĕl, tö Yūtā inrē; ap mā chu inrē Yô-ap tö yip tarik ap mā chu inrē nöng iyöng elkahôiṙen; ngaich hòng chū-ö min chuh elpatī re, öich nyā òk inrē, hulalhak inrē holtöṙah pīhöre? Sā meh öm aṅ, sā ap nômö meh inrē nö aṅ, hö-ö chin hòṅ ngatī

¹²Ngö ṙô ngaich Tāvit tö Yūriā, Höngngöh man ihih tötaheui inrē, huṙöich chin min hökngen meh kiröönngöre. Lökten Yūriā nöng ngöh nö i Yerūsalem ik sakāmö angū-ö ip huṙöich inrē.

¹³Ngaich hē Tāvit nö havëten ò, nyā ngaich anga-aṅ nö i kūö ò; òk inrē; ngaich mihīyōyi anga-aṅ tö ò: ngaich ik harap anga-aṅ kunyī-inyre nö ṙōlngöre nö el chamam re nö in yik tarik ngam mā ò, hö-ö pöri nö chuh patī re.

¹⁴Ngaich im huṙöich, ang Tāvit nö kūich chitri Yô-ap, ngaich söömngö e nö eltī Yūriā.

¹⁵Ngö ṙô tī anga-aṅ nö kūich ök chitri, Asöklen Yūriā yin nö lākūö öp tökalēḵ kinyūngö, ngaich heūlngöre yī-ö tö ò, hòṅ ò nö kô-òngvah nö kapah.

¹⁶Ngaich hē Yô-ap nö aṅtö ök elpanam, ngaich anga-aṅ nö halēnngö chūök Yūria nö in yik mikahlōn ò tökalēk tarik.

¹⁷Kunyī-inyre ngaich yik tarik aṅ ngam elpanam, ngaich kiyūngö Yô-ap: rīkre ngaich yik töfukngö tarik, aṅ in yik tarik Tāvit; kapah inrē Yūriā ök aṅ Hītī.

¹⁸Söömhang ngaich Yô-ap nö vë-eny nang Tāvit tö inlahen ngam kinyūngö;

¹⁹Ngaich ngö ṙô anga-aṅ töp tö kumtö ṙô, Yē meh pöchö keuheūtö ṙô ip rācha öm vë-eny inlahen ngam kinyūngö.

²⁰Ngaich angū-ö min, yē öp rācha nö tainy nö ngö ṙô min tö meh, Kūöyòh öi rih yāha ranöhta ip elpanam öi kiyung? Öt akahalōn ṙöng öyih tö cha nö kô-òren nö löktö kui ap kinlōngö tī nö lirënyö yīö?

²¹Chīöp tö pô-òv tö Ahimelek ök kikōnyö kūön Yerūpĕset? Röh ök nö kikānö samuktö kui ò tök kōiny tinlön nö löktö kui ap kinlōngö, ngaich kapah anga-aṅ nö i Tīpes? Kūöyòh öi yaha röön haröhtöre ip kinlōngö? Ngaich ngö ṙô pömchö min, Kapah, ök inrē tarik meh Yūriā ök aṅ Hītī.

²²Kiröönngöre ngaich ök tö kumtö ṙô, ngaich yih ngaich nö hameukhö mat Tāvit tö nuk tīnīnngö ò tö Yô-ap nö ṙòkhöre.

²³Ngö ṙô ngaich nö in Tāvit ök tökumtö ṙô, Mihôiṅ yip tarik nö lā-al ih, kunyī-inyre nö in ih nö elkahôiyö, ngaich īhö in cha uroh söl ip lökhötkūö inkūp.

²⁴Ngaich yik lumreny nö lireny yik tarik meh nö löktökūö ip kinlōngö; rīkre yik tarik ngam rācha tökapah, kapah ök inrē tarik meh Yūriā ök aṅ Hītī.

²⁵Ngaich ngö ṙô Tāvit tök tökumtö ṙô, Ngö ṙô pömchö in Yô-ap Uh man kunyahalōn in e angū-ö, tö ngam fël nö haroh tum hang vah kūö, vī ap kinyūngöre man nö ṙūöhölre kumlēḵ nö lā-al ap elpanam, ngaich tiṙölngö e. Ṙūöhöl alaha ò pömchö më-eṅ inrē.

²⁶Ngaich hē ök pīhö Yūriā nö hang ök pīhöre nö kapah ang Yūriā, haram ök pīhöre ngaich anga-aṅ.

²⁷Ngaich hē kinheūten ök sanòk tīnngö kamë-erkūö ò ngaich anga-aṅ ngaich kēten ò nö i patī ò, pīhö ò ngaich anga-aṅ, ngaich kayônyö kikōnyö kūön ò. Kunyahalōn pöri ngam Mā Tēv tö inlahen Tāvit.