Read Car_Nicobarese 2 SAMUĔL 12 Bible Online

2 SAMUĔL 12 - Car_Nicobarese bible

2 SAMUĔL 12

¹Ngaich ngam Mā Tēv nö tīnten Natān nö in Tāvit, yih ngaich anga-aṅ nö in ò, ngaich ngö ṙô tö ò. Nët tak nak tarik umuh ik töhĕng elpanam; hĕng tak ök tökôlò, tötkôlò ök tahëng.

²Pōyen sīṅp ök tökôlò tarik ṙōl kiteūm inrē;

³Hö-ö pöri nö īnu ök tötkôlò tarik, höng humĕng nòng ök tökūöṅnö kan sīṅp, ök haruklö ò. Haruklöng ngaich anga-aṅ tö ò, pōyö ngaich anga-aṅ nöng in ò, hol yip kūön ò inrē; nyā nyā-aṅkūö ò anga-aṅ, òk kūö ök chūök òk ò inrē pa-aka inrē nö elngòh ò ngaich nöng sā kūön ò tö kikānö.

⁴Ngaich hĕng tak ök umuh mahavöt nö löö ik tökôlò tarik, ngaich anga-aṅ nö aṙē-ĕl tīre nö kē nö i nuk tö kiteūmhaka chehen ò, i nup töhĕng mihëṅṙö tökiteūmhaka chehen ò inrē, nö ṙatnyö likeun kā ngam tarik ngam yamihihkūö ò, kē ök kūön sīṅp ök tötkôlò tarik pöri anga-aṅ, ngaich ṙatnyö likeun ò nö kā ök tarik yamihih kūö ò.

⁵Hūlökūö tanānyö ngaich Tāvit nö ik tarik; ngö ṙô ngaich anga-aṅ tö Natān, Sā ngam Mā Tēv nö tö-aṅ, töhòṅ kumpaha öp tarik öp töngatī:

⁶Ngaich hòṅ fën nòng tī anga-aṅ min nö havantö nup kūön sīṅp, pò ò nö ngatī inlahen pò ò inrē nö öt aṙē-ĕlōn.

⁷Ngaich ngö ṙô Natān tö Tāvit, Më-eṅ man tarik. Ngö ṙô An ngam Mā Tēv, ngam Tēv Israĕl, hacham kui meh chin rācha i kui Israĕl, ṙānyen meh inrē ṙā-ang eltī Sôl;

⁸Kē-ĕkūö meh chin inrē tö patī öp yöngṙen meh, kē-ĕkūö meh inrē tö patī Israĕl, patī Yūtā inrē; ngaich yē e öre angū-ö nö kūöṅnen, ngaich chū-ö öre ṙūöten meh tö nup töng sitih.

⁹Kūöyòh ömeh ha-āichngen ṙô ngam Mā Tēv, öm la-evṙen tö tötlöök ikūö ò? Ngaich man fëlngen Yūriā ök aṅ Hītī öm aṅtī tö sanët, ngaich kē öp pīhö ò nö pīhö meh, ngaich fëlngen ò inrē öm aṅtī tö sanët yip kūön Amòn.

¹⁰Lökten an töngamuh ngam fël nö öthētu nö ṙāngö patī meh; pò meh ha-āichngen chu, öm kē öp pīhö Yūriā öp aṅ Hitī nö pīhö meh.

¹¹Ngö ṙô an ngam Mā Tēv, Yĕh meuk, hachohlö tötlöök chin lā-al meh nöng aṅ el patī meh, kē yip pīhö meh chin min nö i kūö meh, ngaich kēten cha min i hol meh, ngaich anga-aṅ min nö ṙōlngöre nö i yip pīhö meh nö i mat ngòh tavūöi.

¹²Pò meh më-eṅ ulāiken e; i kūö Israĕl tī pöri chū-ö min nö ṙòkhöre tö ngih, i kūö ngam tavūöi inrē.

¹³Ngaich ngö ṙô Tāvit tö Natān, Köölö fālen chin ngaich im Mā Tēv. Ngöṙô ngaich ang Natān tö Tāvit, Ngaich An inrē ngam Mā Tēv nö kavalngö ngam tökööl meh; hö-ö man min kapah.

¹⁴Pò meh pöri öm ngatī la-en ngaich kētö löknyô yip tökunyaha-elmat tö ngam Mā Tēv nö öt lēkô, kapah öp inrē min nyīö töfötnyu kūön meh.

¹⁵A Kiröönngöre ngaich Natān nö chuh patī re. b Ngaich ngam Mā Tēv nö hachök ök nyīö töfötnyu tök pīhö Yūriā kūön Tāvit, ngaich vahavö anga-aṅ.

¹⁶Lökten Tāvit nö vë-elkui ngam nyīö nö im Tēv; ahik inrē Tāvit, kuhēthötre ngaich hĕng mitööm ngaich nöng hulalhaka nö el tumlat.

¹⁷Choholre ngaich yik mā-aṅ el patī ò, ngaich sökhak nö in ò, nö hachohlen ò nö ṙā-ang el tumlat: sōḵ pöri anga-aṅ, öt rēhĕn nö nyā-aṅvkūö nö in cha.

¹⁸Ngaich ik sinātö sakāmö, ök nyīö nö kapah. Ngaich pa-ekūö yik tarik Tāvit nö vë-eny nang ò tök nyīö nö kapah: pòn ngö ṙô cha-a, Yĕh meuk, i saha ngam nyīö nö ṙòngmö aṅ, ngaich vë-ekūö ò ayī-ö, ngaich rö-ö anga-aṅ nö hang ṙô hī: yē hī vë-eny nang ò tö ngam nyīö nö kapah ngaich chökhutī min anga-aṅ tö re röh?

¹⁹Hē Tāvit nö meuk yik tarik re nö siṙös ṙôre nö in höö, akahalōn ngaich Tāvit tök nyīö nö kapah: ngaich ngö ṙô Tāvit tö yik tarik re, Kapah ap nyīö? Ngaich ngö ṙô cha-a, Kapah ana.

²⁰Choholre ngaich Tāvit nö ṙā-ang el tumlat, söichöre ngaich hacham alahare inrē, ngaich haṙī-il inyut re; yihtöre ngaich nö el patī ngam Mā Tēv, ngaich vë-ekūötēv: ngaich möl nö yihtöre nö i patī re; ngaich hē ò nö hòṅ nyā ṙātö nyā-aṅkūö ò ngaich cha-a nö i kūö ò, ngaich nyā anga-aṅ.

²¹Ngaich ngö ṙô yik tarik ò tö ò, Asuh öng ngih inlahen meh? Ahik man yih sin, peuiny ngam nyīö inrē, i saha ò nö ṙòngmö aṅ; hē ò pöri nö ngaich nö kapah, choholre më-eṅ, ngaich nyā-aṅvkūö.

²²Ngaich ngö ṙô anga-aṅ, I saha ngam nyīö nö ṙòngmö aṅ, ahik chū-ö peuiny inrē: pò chu ngö ṙô. Chiāp tö-akahalōn yē ngam Mā Tēv min nö aṙē-ĕlōn tö chu, nö hökngen ngam nyīö nö aṅ?

²³Ngaich pöri yih ang-aṅ nö kapah, ngaich kūöyòh öich ahik? Kô ṙöng öich hēk havanlen ò? Chuh in ò chin chū-ö min, hö-ö pöri anga-aṅ min nö havantöre nö in chu.

²⁴Haṙamkölōn ök pīhöre ngaich Tāvit ang Pĕtsīpā, kuhēthötre ngaich nö in ò, hulalngöre ngaich nö holtöṙah ò; kūönu ngaich anga-aṅ tö kikōnyö ngaich kaheuk minë-eny ò anga-aṅ nö Sòlòmön. Hāngenlōn ngam Mā Tēv tö ò;

²⁵Ngaich löktö eltī Natān anga-aṅ ök pròfĕt nö söömhöti, ngaich kaheuk minë-eny ò nö Yetit pò kūö ngam Mā Tēv.

²⁶Ngaich Yôap nö kiyung yik kūön Amön nö i Rapā, ngaich kē ök elpanam rācha.

²⁷Tīnngö tökum tö ṙô ngaich Yôap nö in Tāvit, nö ngö ṙô Ngaich chin kiyūngö Rapā, hòṅ, kô-òngvahtī chin ngaich tö ngam elpanam mak.

²⁸Lökten hamūl yip tö ōtren tarik, iyöngtöre im elpanam, kē-ĕ e ngaich: hòṅ chu chū-ö öt kē ngam elpanam, ngaich kaheūkö min angū-ö nö minë-eny chu.

²⁹Hamūl yik tarik ngaich Tāvit nö ṙòkhöre ngaich chuh Rapā, kiyūngö e ngaich, ngaich kē-ĕ e.

³⁰Kē ök sapīöv ök rācha cha angā-aṅ nö ṙā-ang i kui ò; hĕng talen nö humlum lumngan e, i kui e nuk töpōiṙāi ihong; sumpīövlöng ngaich angū-ö nö i kui Tāvit. Kēnyö nuk pôḵre anga-aṅ aṅ ök elpanam, nö pōyen.

³¹Kēnyö yik tarik anga-aṅ aṅ e, ngaich i kūö ṙanat tī tö cha, i kūö vët hanāk inrē, i kūö vët hanīöng inrē, ngaich hōten cha nö kiröön nö lök chūök vinī-i īt: ngatī tī anga-aṅ tö nuk elpanam yik kūön Amön, nö ṙòkhöre, Havan ngaich Tāvit nö i Yerūsalem tö yik tarik nö ṙòkhöre.