Read Car_Nicobarese 2 SAMUĔL 13 Bible Online

2 SAMUĔL 13 - Car_Nicobarese bible

2 SAMUĔL 13

¹Ngaich angū-ö unôichrit ngih, hĕng taka ök tövai kanānö Apsalem, ök kikōnyö kūön Tāvit, ök töminënyuvö tö Tēmar; Ngaich ang Amön ök kikōnyö kūön Tāvit nö hāngenlōn tö ò.

²Ngaich Amön nö kihten lökten ôn ngaich nö vahavö tökūö Tēmar ök kanānö ò; pò ò nö rēlö; ngaich kihngen angū-ö nö in Amön ngam linök alaha ò.

³Hĕng tak pöri ök hol Amön, ök töminënyuvö tö Yônatap, ök kikōnyö kūön Sīmeah ök mëm Tāvit tömilichngen chanöh ellōn ök Yônatap nö tarik.

⁴Ngö ṙô anga-aṅ tö ò, Ō Më-eṅ kūön rācha, kūöyòh öm höng ngatī lanëvngö i tūmö në sakāmö? Öt hòṅ vë-eny nang chu ömeh? Ngaich Amön nö ngö ṙô tö ò, Hāngenlōn chin kòl tö Tēmar, öp kanānö Apsalem ap mak alaha chu.

⁵Ngaich ngö ṙô Yônatap tö ò, Ṙōlngöre man el chamam re, töltöre öm vahavö: ngaich yē öp kikōnyö yöng meh min nö yih nö chöhken meh, ngö ṙô pömchö tö ò, Vë-ekūö meh chin, hökngen öp kanānö chu Tēmar nö yih, nö ha-āṅlen chu tö nyā-aṅkūö, nö vī öp nyā-aṅkūö nö i kūö chu, hòṅ chu meūkö e, ngaich nyā-aṅ e nö eltī ò.

⁶Ṙōlngöre ngaich Amön, ngaich töltöre nö vahavö: ngaich hē ök rācha nö yih nö chöhken ò, ngö ṙô ngaich Amön tök rācha, Vë-ekūö meh chin, hökngen öp kanānö chu Tēmar nö yih, hòṅ ò nö nëthöl nö vī kēk nö i kūö chu, hòṅ chu nyā-aṅ eltī ò.

⁷Ngaich Tāvit nö tīnten Tēmar nö i patī, nö ngö ṙô, Kuṙòh chuh patī ap kanônyöre man ang Amön, vī nyā-aṅkūö ò.

⁸Lökten Tēmar nö chuh patī ök kanônyö re Amön; höng ṙōlhaka anga-aṅ. Kē atra ngaich Tēmar, ngaich kirāchö e, ngaich vī nuk kēk nö i kūö ò, ngaich kahul nuk kēk.

⁹Kē ök kunrālö ngaich anga-aṅ, ngaich hōngtö u nö i kūö ò; Sōḵ pöri anga-aṅ nö nyā. Ngö ṙô ngaich ang Amön, Ha-uknyö më tarik nö ṙòkhöre nö ṙā-ang in chu. Kö kunyī-inyre cha-a ngaich nö ṙāngen ò.

¹⁰Ngö ṙô ngaich Amön tö Tēmar, kētö nup nyā-aṅ el urôhò, hòṅ chu nyā eltī meh. Kē nuk kēk ngaich Tēmar nuk vahī ò, ngaich kētö u nö el urôhò nö in Amön ök kanônyö ò.

¹¹Ngaich hē ò nö kēten u nö röhta nö in ò, nö nyā-aṅ, kirūman ngaich anga-aṅ, ngaich ngö ṙô tö ò, Kanānö chu, tā-a ṙōlngöre man in chu.

¹²Sap ṙô ò ngaich anga-aṅ, Hö-ö kanônyö chu, uh man miṙēngen chu; tön ötkô ön nö ngatī nö i Israĕl. Uh man la-evṙen tö ngih kumlō-ov.

¹³Isuh kū-ö öich chū-ö min keun ngih miṙē-ĕvre? Lahë man më-eṅ, pò meh min hĕng tak aṅ in tö yip tökulō-ov in Israĕl. Vë-ekūö meh chin lökten öm vë-ekūö ap rācha; öthō ap min nö ma-iṅhngen chu tö meh.

¹⁴Hö-ö pöri anga-aṅ nö hòṅ hang ṙô ò, kūö ò pöri nö kalēḵ tö ò, miṙēngen ò ngaich anga-aṅ, nö ṙōlngöre nö in ò.

¹⁵Kunyāha elmat ngaich Amön tö ò, nö kiröngö kumnyah elmat; pò ngam kumnyah elmat ò nö ngaich nö kiröng tö ngam hanāngenlōn ò tö ò sin. Ngö ṙô ngaich Amön tö ò, Chōholre, kiröönngöre man ngaich kuṙòh,

¹⁶Ngaich ngö ṙô anga-aṅ tö ò, Ötkô nö ngatī, pòn höichngen nö tökiröngö chanôchö ngih inhôngö chu tö meh, tö ngam tahëng tī meh taheui tö chu Hö-ö pöri anga-aṅ nö hòṅ hang ṙô ò.

¹⁷Havëtö öp tarik re ngaich anga-aṅ öp mameukṙen ò, nö ngö ṙô, Kēnyö ngòh kikānö elkahôyö nö ṙā-ang in chu, ngaich kuṙōlngö kūö ngam inkūp unôichrit ò.

¹⁸Inyūtu anga-aṅ tö töṙōlkangen mirun mat: pòn ngatī inyut vē kikānö kūön rācha tö inyut re nö rēlö. Ngaich ök tarik ò nö kēnyen ò nö elkahôyö, kuṙōlngö kūö ök inkūp ngaich nö unôichrit ò.

¹⁹Tūilö tisum ngaich Tēmar nö elkuire, tikāichngö ök töṙōlkangen mirun mat inyutre inrē ök in ò; ngaich rup kui re anga-aṅ tö eltī re, kiröönngöre ngaich, nö pōitô nöng paneuinyngöre nö kiröönngöre.

²⁰Ngaich Apsalem ök kanônyö ò nö ngö ṙô tö ò, Löökö alaha öm taheui tap kanônyöre Amön? Kö kanānö, uh man ngaich ṙô-òv: köplōn tö e ngaich. Lökten Tēmar ngaich nöng ngöh hol tö nāichngenre nö i patī ök kanônyöre Apsalem.

²¹Hē ök rācha pöri Tāvit nö hāngö u nö ṙòkhöre, kiröngö tanānyö elmat ngaich anga-aṅ.

²²Ngaich Apsalem nö öt kuchīkô nö vë-ekūö Amön: pò Apsalem nö kunyaha elmat tö Amön, kūö ò nö miṙēngen Tāmar ök kanānö ò.

²³Ngaich ngö inlahen angū-ö unôichrit tö nët samyeūheu nö timtörekūö, ang Apsalem nö ngöönkö kammöp sīṅp i Pēalasör, öp tökamlö nö i Ifrēm: ngöönkö yik kikōnyö inrē kūön rācha ang Apsalem.

²⁴Yihtöre ngaich Apselem nö ik rācha, nö ngö ṙô, Yĕh meuk, kammöpngö sīṅp yip umuh i ngòh kūön meh; vë-ekūö meh chin, hökngen ngam rācha yēḵ inrē tö yip tarik ò nö kiröönngöre nö i ngòh kūön meh.

²⁵Ngaich ngö ṙô ök rācha tö Apsalem Hö-ö, kakūönö, uh in ṙòkhöre kiröönngöre, tön langānö tī in min tö meh. Līpö ò anga-aṅ: hö-ö pöri anga-aṅ nö hòṅ kiröönngöre, höng hakôlò ò.

²⁶Ngaich ngö ṙô Apsalem, Vë-ekūö meh chin yĕm rö-ö më-eṅ, hökngen öp kahëm chu Amön nö kiröönngöre nö in ih. Ngaich ngö ṙô ök rācha tö ò, Kūöyòh öp anga-aṅ nö in meh?

²⁷Līpan pöri ang Apsalem, lökten ò nö halöngngen Amön nö in ò ṙòkhöre yik kikōnyö kūön rācha inrē.

²⁸Ngaich Apsalem nö kētö chöngö yik tarikre, nö ngö ṙô, Köpngöre yin, yē Amön min nö malĕh tökūö vāin; ngaich yē chu min inrē ngö ṙô tö yīö. Tinī-īv yin ngaich tö Amön, ngaich fëlngen ò yī-ö, ui pa-ekūö: röh öich chū-ö tamöl ṙô yīö? Ui pa-ekūö, hangëṅ alahare inrē.

²⁹Ngaich yik tarik Apsalem nö tinī-iv tö Amön nö sā chöngö Apsalem nö tölṙô cha. Ṙòkhöre ngaich yik kikōnyö kūön rācha nö choholre, ngaich kö yôklö nö i uk köttö re, falngöre ngaich.

³⁰Ngaich hē cha nö ṙòngmö el talöököre, ngaich ngam hināngö e nö sölta nö in Tāvit, nö ngö, Keuheūtngöre vah tī öp Apsalem nö fëlngö yip kikōnyö kūön rācha, öt hĕng tit tak tö cha tö ōtren.

³¹Chōholre ngaich ök rācha, tikāichngö inyūt re ngaich, ṙōlngöre ngaich nö el tumlat; ngaich yik tarik ò nöng sökhaka nöng takāicha inyut.

³²Ngaich Yônatap, ök kikōnyö kūön Sīmeah, mëm Tāvit nö ngö ṙô, Uh an yēḵ ngam mā chu nö ngö lōn tö cha nö ṙòkngöre vah tī tö yik ṙāl tarik kikōnyö kūön rācha; tön höng Amön ök tökapah: pòn i chöngö Apsalem angū-ö nö tölēnngen hēten tö ök sakāmö ò nö miṙēngen Tēmar ök kanānö ò.

³³Lökten an yēḵ ngam rācha mā chu nö un kē-ĕ e nö ellōn re, tö yik kikōnyö kūön rācha nö ṙòkngöre vah nö kapah; tön höng Amön ök tökapah.

³⁴Falngöre pöri ngaich Apsalem. Ngaich yik ṙāl tarik amahati nö chingôhòlkūöre, nö ngëicha, yĕh meuk pōyen ngaich yik tarik yamih nö löktö el ap talöökö i kaha ap rung unôichrit ò.

³⁵Ngaich ngö ṙô Yônatap tök rācha, Yĕh meuk, yih yin nö ngaich vē kikōnyö kūön rācha: ngatī an nö ngaich sā ṙô ngòh tarik meh taheui.

³⁶Ngaich hē ò nö keuheūtö ṙô nö ṙô-òvö, Yĕh meuk, yih ngaich yik kikōnyö kūön rācha, kaknyöre ngaich nö pōitô nö peuiny: peuiny inrē ök rācha nö pōitô tö yik tarik ò inrē.

³⁷Falngöre pöri nö ngaich Apsalem nö in Talmai ök kikōnyö kūön Ammihöt, rācha aṅ Kīsör. Öt hĕng hang sumkam miṙīvlōn ngaich Tāvit tök kūön re kikōnyö.

³⁸Falngöre ngaich Apsalem, nö chuh Kīsör, ngaich lūöi samyeūheu nö umuh.

³⁹Ngaich ök ellōn ök rācha Tāvit nö kū-ötö in Apsalem: pòn ngaich nö öt miṙīvulōn nö in Amön pò ôn ngaich nö kapah.