Read Car_Nicobarese 2 SAMUĔL 14 Bible Online

2 SAMUĔL 14 - Car_Nicobarese bible

2 SAMUĔL 14

¹Ngaich Yôap ök kikōnyö kūön Sēruyā nö akahalōn tök rācha nö lā in Apsalem ellōn.

²Tīnngö kamë-eṅren ök tö akaha kikānö anga-aṅ ngaich nö i Tēkoā, ngö ṙô ngaich tö ò, Vë-ekūö meh chin, töltöre man öm töhaṙīvölōn, vë-ekūö meh chin inrē, öm hayutlöre tö inyut töhaṙīvlōn, uh inrē më-eṅ hachāmöre tö tavī-i, sā ök kikānö pöri tömarô-òten nö sanòkngö kupah:

³Kuhēthötre pömchö ip rācha, ngaich ngö inlahen ṙô vë-ekūö ò. Chaphöt nuk ṙô ngaich Yôap nö elvāng ök kikānö.

⁴Ngaich hē ök kikānö aṅ Tēkoā nö vë-ekūö ök rācha, afukngöre anga-aṅ ngaich nö el tumlat nö fāthakkūö, nö salām, nö ngö ṙô, Ō rācha, holṙen chu.

⁵Ngaich ngö ṙô: ök rācha tö ò, Asuh ap halöiny meh? Ngaich ngö ṙô anga-aṅ nö sapṙô, Tökô-en chin chū-ö tafīösi kikānö, kapah ök pīhö chu.

⁶Ngaich ngòh tarikmeh kikānö nö nët tak kūön tö kikōnyö, ngaich cha-a nak tönët tak nö kilöönö höö nö el panô-òṅ; ngaich öt hĕng tak kamëtī cha-a, ngaich hĕng tak tö cha famël ök tahëng, ngaich kapaha tī tö ò.

⁷Yĕh meuk, hĕng mumātö yip nö choholre nö lā-al ngòh tarik meh kikānö ngö ṙô yip yih, Kēten ò öp famël hanöng kisānöre hòṅ ih fëlngen ò nö ṙënngen nômö ök hanöng kisānö ò ök fahëlngö ò, ngaich inhatngö öp tö amīnu inrē: ngatī tī cha-a min nö hanyangngö kūö ngam ta-ök tameūyö chu ngam tö ōtren, ngaich öp pīhö chu min nö öt ṙahāngu tö minë-enyre öt rēhĕn tö ötrēvöre nö i kūö ngih tumlat.

⁸Ngaich ngö ṙô ök rācha tök kikānö, Kuṙòh chuh patī re man ngaich, ngaich chin min kētö chöngö ip inlahen meh.

⁹Ngaich ngö ṙô ök kikānö aṅ Tēkoā tök rācha, Ō rācha, mā chu, i kui chu ap yēḵ tökööl, i kui patī ap yöng chu kikōnyö inrē: un fāluṙen ngam rācha chu tö ngam kantēra ò.

¹⁰Ngö ṙò ngaich ök rācha, Öp töṙô-òvötö tö sitih nö in meh, kēten ò in chu, hòṅ ò min nö öt lūölken meh nö hēk.

¹¹Ngö ṙô ngaich anga-aṅ, Vë-ekūö meh chini, hökngen ngam rācha yēḵ nö köpölōn tö ngam Mā Tēv, ngam Tēv meh, hòṅ ngam mahavahal vah ngam mahām nö öt fëlhanga nö hēk, hòṅ ngam kūön chu kikōnyö nö öt fëliyö tö cha. Ngaich ngö ṙô anga-aṅ, Sā ngam Mā Tēv nö tö-aṅ, öt hĕng hang milööchö keūyö ap min kikōnyö kūön meh tö tösuktöre nö el tumlat.

¹²Ngö ṙô ngaich ök kikānö, Vë-ekūö meh chin, hökngen ngòh tarik re man kikānö nö hĕng höny milôhò tö ṙô nö mā chu ngam rācha. Ngaich ngö ṙô anga-aṅ, Yĕh iṙūöhö ṙô man.

¹³Ngö ṙô ngaich ök kikānö, Kūöyòh ömeh vīten töngatī in vē tarik ngam Tēv? Pòn i kinakkö ngih ṙô ngam rācha nö anga-aṅ töfāluṙen, pò ngam rācha nö öt kēten ò nö i patī nö hēk ök tö-ahötiyö.

¹⁴Pòhī tökapah, ngaich höng sā ṙanösngö mak nö el tumlat, öp töthanmūlen nö hēk; öt rēhĕn an ngam Tēv nöng kēngö nômö, vī talöökö pöri hòṅ ò ngam tö-ahötiyö nö öt tö-ahōṙiyö nö ṙā-ang in ò.

¹⁵Yĕh meūkö e lökten chu yih kaknyö ngih ṙô im mā chu ngam rācha, tö e nö kūö yip tarik nö pinhëṅtökūö chu: ngaich ngö ṙô ngòh tarik meh kikānö, Hòṅ vë-ekūö öp rācha chin; lohten öp min rācha nö kētö öp havëkö ngòh tarik ò.

¹⁶Pò ngam rācha min nö hang, nö ṙānyö öp tarik re nö ṙā-ang eltī öp tarik öp töhòṅ fëlngen chu töp kikōnyö kūön chu inrē nö ṙā-ang im amin ngam Tēv.

¹⁷Ngaich ngö ṙô ngam tarik meh kikānö, vë-ekūö meh chin, hökngen ngam ṙô ngam mā chu ngam rācha nö ṙanāmölōn: pòn sā ma-ahānga aṅ im Tēv, ngatī, ngam mā chu ngam rācha nö akaha elmat tö tölöök tötlöök inrē: In meh An yēḵ inrē ngam Mā Tēv ngam Tēv meh.

¹⁸Ngaich sap ṙô ngam kikānö ök rācha nö ngö ṙô, Vë-ekūö meh chin, uh man hayunku in chu tö töng ṙô chu min hatönö meh. Ngaich ngö ṙô ök kikānö, Ngaich an yēḵ ngam mā chu ngam rācha nö ṙô-òv töngamuh.

¹⁹Ngaich ngö ṙô ök rācha, In meh ap kël Yôap i në nö ṙòkhöre? Ngaich ngö ṙô ök kikānö nö sap ṙô, Sā ngam nômö meh nö tö-aṅ mā chu ngam rācha, öt hĕng tak tökô nö kān lahāmö hēk kān lātavē tö ngam ṙô ngam mā chu ngam rācha: pò ngam tarik meh Yôap nö anga-aṅ tamölṙô chu, anga-aṅ inrē chamaphöt në ṙô nö elvāng ngòh tarik meh kikānö:

²⁰Nö mahaṙāingö ngam fālen, ngam tarik meh Yôap nö ngatī le-en tö ngih: tö-akaha an inrē ngam mā chu sā mikah ma-ahānga aṅ im Tēv, nö akahalōn tö taṙòkhöre nup më el tumlat.

²¹Ngö ṙô ngaich ök rācha tö Yōap, Yēh meuk keuheūten chin ngaich tö ngih: lökten man ngaich kuṙòh hēk kētö ap ṙāl tarik ang Apsalem.

²²Afukngöre ngaich Yôap nö el tumlat nö fāthakkūö, nö salām, hakôlò ngam rācha inrē: ngö ṙô ngaich ang Yôap, Mā chu, ō rācha, akahalōn ön ngòh tarik meh töngamuh töre nö aheukhuvönö i kūö meh, i tī ngam rācha nö kētö öp havëkö ngòh rarik ò.

²³Choholre ngaich Yôap nö chuh Kīsör, ngaich kēten Apsalem nö i Yērusalem.

²⁴Ngaich ngö ṙô ök rācha, Hökngen ò nöng löö el ap patī re, uh pöri nö ngëichkö kūö chu. Lökten Apsalem nöng löö elpatī re, ngaich nö öt meukkuö ök rācha.

²⁵Ngaich öt hĕng taka tö ngatī ineū-eu tö sā vanāyö Apsalem nö keuheūtngöre chūök i Israel: löktökūö kintal elröön ò söl el chalòng kui ò nö öt nônguvö in ò.

²⁶Ngaich hē ò nö kamöpi kui, (i kinheūtö töhĕng samyeūheu anga-aṅ nö kamöpngö e: pòn langan ök keūyö ò, lökten ò nö kamöpngö e:) kalah lumngan ök keūyö kui re anga-aṅ nö nëtòng siköl, sā lumngan rācha.

²⁷Lūöi tak yik kūön Apsalem kikōnyö, hĕng tak ök kikānö, ök tö minënyu tö Tēmar: tövāyö kūö ök nö kikānö.

²⁸Nët samyeūyeu höre Apsalem nö iyöng Yērusalem, ngaich rö-ö nö meukkūö ök rācha.

²⁹Tīn-ngö mahavëken Yô-ap ngaich Apsalem, pòn hòṅ tīnten ò nö ik rācha; sōḵ pöri anga-aṅ nö yih nö in ò: tīnngö mahavëten hēk anga-aṅ ik innët heuh sōḵ pöri anga-aṅ nö yih.

³⁰Lökten anga-aṅ nö ngö ṙô tö yik tarik re, Yĕh meuk, panô-òṅ Yô-ap ap umuh ranghö öp panô-òṅ chu, aṅtö parlī apa; kuṙòh kiröönngöre föngtökūö e. Ngaich yik tarik Apsalem nö föngtökūö ök panô-òṅ.

³¹Chōholre ngaich Yô-ap ngaich yih nö i patī Apsalem, ngaich ngö ṙô tö ò, Kūö-yòh yik tarik meh nö föngtökūö ap panô-òṅ chu?

³²Ngaich Apsalem nö sap ṙô Yô-ap, Yĕp meuk, söömtö ṙô chin in meh, öich ngö ṙô, Yih man ihih, hòṅ chu tīnten meh ip rācha, öm ngö ṙô, Kūöyòh öich yih ṙā-ang Kīsör? Ĕhten chin öre höngngöh umuh: yĕh lökten ngaich hökngen chu chônghöre kūö öp rācha; ngaich yĕn tököölu in chu, hökngen ò nö fëlngen chu.

³³Yih ngaich Yô-ap nö ik rācha, ngaich vë-eny nang ò: ngaich hē ò nö havëten Apsalem, yih anga-aṅ ngaich nö ik rācha, ngaich sōntökūöre nö el tumlat nö i kūö ök rācha: hāmkūö Apsalem ngaich ök rācha.