Read Car_Nicobarese 2 SAMUĔL 15 Bible Online

2 SAMUĔL 15 - Car_Nicobarese bible

2 SAMUĔL 15

¹Ngaich unôichrit ngih, ang Apsalem nö halēn inröl re kōra inrē, taneui anāi inrē yik tarik famal nö urēhĕkūö ò.

²Ka-euilökūö ngaich Apsalem nö choholre sökhak ngaich nö in ök lökhöt ök inkūp: ngaich ngö inlahen angū-ö yĕn tarīkuvö tövahënyu tö fālen öp töhōtu nö hateungtu nö ip racha nö kahòkkaṙen, ngaich Apsalem nö havëten ò, nö ngö ṙò, Aṅ öp yòh öm me-eṅ elpanam? Ngaich ngö ṙô anga-aṅ, Aṅ i nup miyöngö Israĕl ön ngòh tarik meh.

³Ngaich Apsalem nö ngö ṙô tö ò, Yĕh meuk, tölöök nun minë chööḵnyö meh töhuveū inrē; öt tarīkuvö pöri tö tölô töp rācha nö hang ṙô meh.

⁴Ngö ṙô inrē Apsalem, Ō chū-ö chin öre tö vīlöngö kamhôṅka ing panam, hòṅ ngam tö-eūka fālen tötöng tarik hēk inrē nup yô-òv chööḵ-nyi nöng löö in chu, ngaich chū-ö öre tölöökö tī tö ò!

⁵Ngaich angū-ö nö ngö inlahen, yĕn tarīkuvö yamih nö salāman nö haröhtöre nö in ò, hateutnyö këlre ngaich anga-aṅ ngaich kē an, hāmkūö ò inrē.

⁶Ngatī inlahen ang Apsalem nö in yik Israĕl nö ṙòkhöre yik yamih nö ik rācha tö hòṅ kahòkkaṙen: ngatī inlahen Apsalem nö ulāingö ellōn yik tarik aṅ Israel.

⁷Ngaich i kinheūten töfën anāi samyeūheu, ang Apsalem nö ngö ṙô tök rācha, Vë-ekūö meh chin hökngen chu kiröönngöre öich kētö ap ṙô re tö chūöku kinlēḵngô, öp ṙô chu chūökṙô kilēḵngôre im Mā Tēv, i Hepròn.

⁸Pò ngòh tarik meh nö chūöku ṙô nö kinlēḵngôre hē chu iyöng Kīsör i Siriā öich ngö ṙô, Yē ngam Mā Tēv min nö kô-en nö kēten chu hēk i Yerusalem, ngaich chū-ö min lök la-en ngam Mā Tēv.

⁹Ngö ṙô ngaich ngam rācha tö ò, Kuṙòh im kumchikṙen man ngaich. Chōholre ngaich anga-aṅ ngaich chuh Hepròn.

¹⁰Tīnngö mahayun pöri Apsalem nö keuheūtngöre chūök i miyöngö Israĕl, nö ngö ṙô, Höng hangtöre pöichö tö ṙôrömpet, ngaich ngö ṙô min yī-ö, rācha ap Apsalem nö i Hepròn.

¹¹Nëtòng yik tarik hol Apsalem nö kiröönngöre ṙā-ang Yerusalem, yik töngöönka, kiröönngöre cha-a nöng yāichö inlaha; öt akahalōn inrē tö yô-òv.

¹²Ngaich Apsalem nö tīnngö lamukken Ahītōfel ök aṅ Kilòn, ök mahalēnö Tāvit, nö ṙā-ang elpanam ò, ṙā-ang Kīlōh, hē ò nö ṙònghöichṙen nö kētö tökētu, Kalēḵ ngaich ök inhôngen chöngö pò yik tarik nö iṙūöhen ṙānūöhlö ṙôngö nö hol Apsalem.

¹³Ngaich hĕng tak ök umuh tö kumtö ṙô yamih nö in Tāvit, nö ngö ṙô, In Apsalem lōn yip tarik aṅ Israel.

¹⁴Ngaich ngö ṙô Tāvit tö yik tarikre nö ṙòkhöre, yik mi-in ò nö i Yērusalem, Chōholre yin, tā-a töi falngöre; Hòn öthĕng tak tö hī min töt kô-òngvah tö tī Apsalem: ka-eūyen yin kiröönngöre hòṅ ò min nö öt kô-òl nö in hī nö ka-eūyen, ngaich tī-iv min tö töchōich nö in hī, kilöön ngih elpanam inrē nö aṅtī töfël.

¹⁵Ngaich ngö ṙô yik tarik ök rācha tö ò, Yĕh meuk lēn yin vē tarik meh nö la-evṙen töp töng lōn ngam rācha min.

¹⁶Kiröönngöre ngaich ngam rācha, ṙòkhöre yik aṅ patī ò nö in ò. Söm tak yik kikānö ṙahāngö ngam rācha, yik töng pīhö töl, nö amahtö ök patī.

¹⁷Kiröönngöre ngaich ök rācha, ṙòkhöre inrē yik tarik nö tömrit ò; ngaich sökngöre cha-a nö i Pĕtmerhak.

¹⁸Ngaich ṙòkhöre yik tarik ò nö kiröönngöre nö in ò; ṙòkhöre yik Yĕrit, ṙòkhöre inrē aṅ Pēlet, ṙòkhöre inrē aṅ Kitit, tafūölòng yik tarik yik tamömkörit ò nö ṙā-ang Kāt, urēhĕkūö ök rācha ngaich nö kiröönngö re.

¹⁹Ngaich ngö ṙô ök rācha tö Ittai ök aṅ Kitit, Kūöyòh öm më-eṅ inrē in ih? havan man, höng ngöh ip rācha: tön aṅ tahëng man, tö-ahötiyö inrē; havantöre man ip chūök re.

²⁰Tön höichngen man höng vahë tö yīhih ngaich ṙöng öich töngamuh vīten meh höng chavāla kinröönngö öm in ih, yĕh meuk man tö chu kiröönngöre ip töng kū-öre? Havan man, kē më hol re inrē; in meh ap yēḵ miṙēlōn kanô-en inrē.

²¹Ngaich sap ṙô ök rācha ang Ittāi, nö ngö ṙô, Sā ngam Mā Tēv nö tö-aṅ, sā ngam rācha inrē ngam mā chu nö tö-aṅ, kô-òren ip töng chūök ngam mā chu ngam rācha min, yĕn i kinpaha hēk yĕn i unhômö, in e min inrē ngòh tarik meh.

²²Ngö ṙô ngaich ang Tāvit tö Ittāi, Kuṙòh ngaich havānglöre. Ngaich Ittāi ök aṅ Kitit nö havanglöre, tö yik tarik ò inrē nö ṙòkhöre, ṙòkhöre inrē yik tö kūöṅnö mī-in ò.

²³Ṙòkhöre ngaich ngam panam nö harāmöre nö pōitô, ṙòkhöre inrē yik tarik nö havāngngöre: havāngngö ök kun mak Kitròn inrē ök rācha, ṙòkhöre yik tarik inrē nö havāngngöre, nö kū-ötö el tönyalnyi.

²⁴Yĕh meuk, yihinrē ang Sētòk, ṙòkhöre inrē yik Lēvi nö in ò, keunkö ök kasòng kinlēḵ-ngô ngam Tēv; ngaich cha-a nö ṙātö ök kasòng ngam Tēv, kiröönngöre ngaich Apiātör nö lā urĕh hanöng saha yik tarik nö ṙòkhöre nö ngaich nö kunyī-inyre nö ṙā-ang el ök panam.

²⁵Ngaich ngö ṙô ök rācha tö Sētòk, Keuntö ngam kasòng ngam Tēv man hēk elpanam: yē chu min kôtökūö tö neūkölōn i kūö ngam Mā Tēv, ngaich havanten chu min anga-aṅ nö hēk, ngaich nëtre anū-ö min nö hameuktu nö in chu, tö ngam elyöngö ò inrē:

²⁶Yē ò pöri nö ngö ṙô, Hö-ö chin kuchīkölōn in ò; yĕh meuk ihih chin yih ngaich, hökngö tī ò yēḵ tö chu sā öp tölöök nö in ò.

²⁷Ngö ṙô inrē ök rācha tö Sētòk ök kūönṙô, Röh öm më-eṅ mameuk? Havantöre man elpanam im kumchikṙen, holtö minā kūön meh kikōnyö inrē, ngam kikōnyö kūön meh Ahīmās, Yônatan inrē ngam kikōnyö kūön Apiātör.

²⁸Yĕh meuk, höngngöh chin min i nup invāngngö el mak el tönyalnyi hanööngen öp ṙô ṙamā-ang in meh minkahtölōn chu.

²⁹Lökten ang Sētòk ang Apīatör inrē nö keunngö ök kasòng ngam Tēv nö hēk nö i Yērusalem: ngaich in e cha-a nöng ngöh.

³⁰Kiröönngöre ngaich Tāvit nö löklö ök paneūlö ök rung Ôliv, höng paneuinyngöre nö peūlöre; kahul kui re anga-aṅ öt kunröpu inrē nö kiröönngöre: ṙòkhöre inrē yik tarik hol ò nö kahul kui re, peūlöre cha-a ngaich, höng paneuinyngöre nö peūlöre.

³¹Ngaich hĕng tak ök tö ngö ṙô nö vë-eny nang Tāvit, Ahītōfel öp hol Apsalem nö halēnlö ap chöngö. Ngaich ngö ṙô ang Tāvit, vë-ekuö meh chin, Ō Mā Tēv, havāngtö öp halēnlö Ahītōfel nö kumlō-ov.

³²Ngaich angū-ö, hē Tāvit nö söllö nö ngaich nö i kui ök paneūlö, nö i chūök vamë-eṅ-kūötēv rung, yĕh meuk yihtöre ang Husāi ök aṅ Arkāt nö höngkūö ò nöng takācha inyut, tumlātu el kui inrē:

³³Ngaich ngö ṙô Tāvit tö ò, Yē meh hòṅ kiröönngöre in chu, ngaich më-eṅ min höng lumngan chu:

³⁴Yē meh pöri havantöre elpanam, öm ngö ṙô tö Apsalem, Tarik meh chin, Ō rācha; sā chu misī tarik ök yöng meh, ngaich ngatī chū-ö min tarik meh töngamuh: ngaich më-eṅ min halōngökūö öp inlēnö tö Ahītōfel.

³⁵Röh nap umuh inrē nö hol meh nāṅ Sētòk, Apiātör inrē nap kūönṙô? Lökten yē e min, öp töng ahang meh ṙāmā-ang el patī ap rācha, ngaich vë-eny e më-eṅ in Sētòk, in Apiātör inrē nap kūönṙô.

³⁶Yĕh meuk in cha nap kikōnyö nët taka Ahīmās ap kikōnyö kūön Sētòk, Yònatan inrē ap kikōnyö kūön Apiātör, löktö in cha tī pöichö söömtö nup ahang yīö min in chu.

³⁷Lökten ök hol Tāvit ang Husāi nö yih nö elpanam; ngaich yih inrē Apsalem nö i Yērusalem.