Read Car_Nicobarese 2 SAMUĔL 16 Bible Online

2 SAMUĔL 16 - Car_Nicobarese bible

2 SAMUĔL 16

¹Ngaich hē Tāvit nö öl nö marôvat tö kui ök paneūlö, yĕh meuk, meukkūö ò ngaich Sīpā ök tarik Mefīpōset, nö holtö nuk tönët nòng köttö tölēnen nām uk, hēngòng tum nuk tönyô ṙòng angkūr, hēngòng nup ṙòng sikehngö ṙòng chōn, hĕng inrē ök vāin el uk.

²Ngaich ngö ṙô ök rācha tö Sīpā, Asuh ön në nö tī meh? Ngaich ngö ṙô ang Sīpā, Chūök yip aṅ patī ngam rācha nun minë köttö nö i uk u; ngaich minë rôti tö minë ṙòng chōn sikehngö nyā-aṅkūö yip ṙāl tarik; ngaich ngam vāin inrē nö òk yip tötayē alaha min nö el tönyalnyi.

³Ngö ṙô inrē ök rācha, Isuh ap kikōnyö kūön ap yöngṙen meh? Ngö ṙô ngaich Sīpā tök rācha, Yĕh meuk, höng ngöh ap nö i Yērusalem: pò ò nö ngö ṙô, Havantu an min ngam pūlngö ök yöng chu nö in chu töngamuh tö yip aṅ patī Israĕl.

⁴Ngaich ngö ṙô ök rācha tö Sīpā, Yĕh meuk ṙòkhöre nun nö mikahlōn meh në inlīnen Mefipōset. Ngö ṙô ngaich Sīpā, Salāmö meh chin; hökngen chu yēḵ kôtökūö tö neūkölōn i kūö meh, mā chu, Ō rācha.

⁵Ngaich hē ök rācha Tāvit nö sölta nö i Pahūrim, yĕh meuk hĕng tak ök tarik yamih nö ṙā-ang umuh aṅ mupīhö yik aṅ patī Sôl, Simēi ök minë-eny ò, kikōnyö kūön Kēra; kunyī-inre anga-aṅ, nöng kinröönngöre nö ötlēkôre nö rūtngö vah.

⁶Kulehtö ihong anga-aṅ nö in Tāvit, in yik tarik ngam rācha Tāvit inrē nö ṙòkhöre: ngaich ṙòkhöre yik tökalēḵ tarik nö lāhāmö ò lātavē ò inrē.

⁷Ngö ṙô ang Simēi hē ò nö öt lēkôre, Chuh mana, chuh mana, më-eṅ tarik kumtaknyö mahām, tarik, sāṙen inrē:

⁸Havantö kui meh an ngam Mā Tēv tö nup mahām aṅ patī Sôl, ök töṙënnguṙen tö meh hayöng; ngaich An inrē ngam Mā Tēv nö kētö ngam pūlngö nö eltī Apsalem öp kikōnyö kūön meh: yĕh meuk inrē kô-òngvah man ngaich im öt lanöököre, pò meh öm tarik kumtaknyö mahām.

⁹Ngaich ngö ṙô Apīsāi ök kikōnyö kūön Serūya tök rācha, Kūöyòh ang ngòh am tökapah nö ötlēkôre tö ngam mā chu ngam rācha? Vë-ekūö meh chin, hökngen chu havāngngöre öich kēngö ngam kui ò.

¹⁰Ngö ṙô ngaich ök rācha, Sitih tī öich min tö yīö, yī-ö kikōnyö kūön Serūyā? Pò ò nö öt lēkôre, kūö ngam Mā Tēv inrē nö ngö ṙô tö ò, Ötlēkôre man tö Tāvit; chiāp min tö ngö ṙô, Kūöyòh ömeh ngatī inlahen?

¹¹Ngaich ngö ṙô Tāvit tö Apīsāi, tö yik tarik ò inrē nö ṙòkhöre, Yĕh meuk, öp kikōnyö kūön chu, lamöknyö ellōn chu, nö chöh ngih nômö chu: ngaich samötlöng tī min ngòh aṅ Penyamin? Hökngen ò, hökngen ò nö ötlēkôre tö chu; tön tinöölô ò an tö ngam Mā Tēv.

¹²Lohten An min ngam Mā Tēv, nö ngëichkö ngam tövaich tī ò nö in chu, ngaich havāhalvah chu min tö tölöök tökūö ngih rinūtngövah chu töngamuh.

¹³Ngaich Tāvit tö yik tarik ò inrē nöng kiröönö kūöre: ngaich Simēi nö itūö kaha ök rung nö kiröönngöre nö kamlö nö in ò, höng kinröönngöre nö ötlēkôre, kulehtö ihong inrē nö in ò, tūitö tumlat inrē.

¹⁴Ngaich ök rācha tö yik tarik hol ò inrē, nö cheingö tö yanīhire: ngaich heūheure anga-aṅ nö umuh.

¹⁵Ngaich yih nö i Yērusalem ang Apsalem, nö holten yik tarik Israĕl, hol ò inrē ang Ahitōfel.

¹⁶Ngaich ngö inlahen angū-ö, hē ök hol Tāvit, ang Husāi aṅ Arkait nö yih nö in Apsalem, ngö ṙô Husāi tö Apsalem, Marô-òten An yēḵ ngam rācha nö aṅ! Marô-òten an yēḵ ngam rācha nö aṅ!

¹⁷Ngaich ngö ṙô Apsalem tö Husāi, Miṙēlōn meh öng angū-ö töp hol meh? Kūöyòh öm öt kiröönngöre ik holre?

¹⁸Ngö ṙô ngaich Husāi tö Apsalem, Hö-ö; pò öp katöllö ngam Mā Tēv, öp katöllö vē tarik inrē, tö vē tarik Israĕl inrē nö ṙòkhöre, in ò chū-ö min, in ò inrē öich haköpngöre.

¹⁹Ngaich hēk, chiāp min lahök la-en chu? Sōtu ṙöng öichu la-evṙen i kūö ngam kūön ò kikōnyö? Nö sā chu la-evṙen i kūö öp yöng ò kikōnyö, ngatī chū-ö min i kūö meh.

²⁰Ngaich ngö ṙô Apsalem tö Ahītōfel, halēnö hī man yĕh më-eṅ tö inlahen hī.

²¹Ngaich ngö ṙô Ahītōfel tö Apsalem, Kuṙòh kuhēthötre man in yip pīhö töl ap yöng meh yip töṙā-ayö tö ò nö mameukkö patī; ngaich ṙòkhöre yip aṅ Israĕl min nö hāngö meh kunyahaelmat töp yöng re kikōnyö: ngaich yip lā in meh nö ṙòkhöre nö kalēlöre kël.

²²Lökten cha ngaich nö vīlö rūkui Apsalem nö i kui patī; kuhēthötre ngaich Apsalem nö in yik pīhö töl ök yöng ò nö i kūö yik aṅ Israĕl nö ṙòkhöre,

²³Ngaich ök inlēnö aṅ in Ahitōfel, ök halēnlö ò hē e, nö sā ṙô öp tarik mahatöntöre nö i tarik mahatöntöre nö i chöngö ngam Tēv: ngatī nuk inlēnö tö Ahītōfel hĕnghöre in Tāvit in Apsalem inrē.