Read Car_Nicobarese 2 SAMUĔL 17 Bible Online

2 SAMUĔL 17 - Car_Nicobarese bible

2 SAMUĔL 17

¹Hēk inrē Ahītōfel nö ngö ṙô tö Apsalem, Hökngen chu man yĕh katöllö tönët sīön köṅny tarik, hòṅ chu öich chōholre lū-u Tāvit i ngih hatööm:

²Ngaich chū-ö min yih in ò i saha ò nö ṙòngmö cheingö öt kalĕ-en kël inrē, öich pinheṅtökūö ò min: ngaich ṙòkhöre min yip tarik in ò nö falngöre; ngaich höng öp rācha min töfëli tö chu:

³Ngaich kumten yip tarik chū-ö in meh nö ṙòkhöre: ngaich ök chahöh meh tarik nö sā töng ṙòkhöre min nö havantöre: ngaich ṙòkhöre min vē tarik nö lām.

⁴Ṙāmölōn ngaich Apsalem tö ngam ṙô, tö yik Israĕl inrē nö ṙòkhöre.

⁵Ngö ṙô ngaich Apsalem, Yĕh havëten Hūsai inrē öp aṅ Arkait, hòṅ hī hang ṙô ò anga-aṅ inrē.

⁶Ngaich hē Hūsai nö yihtöre nö in Apsalem, vë-ekūö ò ngaich Apsalem, nö ngö ṙô, Ngö inlahen ṙô ap taheui Ahitōfel: ngaich öi pökeh tömken ṙô ò? Ngaich yĕn rö-ö, ṙô-òv man yēḵ më-eṅ.

⁷Ngaich Hūsai nö ngö ṙô tö Apsalem, Hö-ö an nö tölöök töngamuh ngam inlēnö ṙô Ahitōfel:

⁸Ngö ṙô inrē ang Hūsai, Akahalōn man töp yöng meh tö yip tarik ò inrē, tö cha nö tökalēḵ nö tarik, tö cha inrē nö tānyö ellōn, sā öp për öre tö-ulāiyi kūön nö elkahôyö: kumyung ap inrē yöng meh, öthō nö hanôltö chūök re nö in yip tarik.

⁹Yĕh meuk, ngaich ap yih töngamuh nö hayunngöre nö el kinluhu, hēk el tahëng chūökö: ngaich mīnö, hē yip rīkre tö cha nö urĕh töng hamāngö e min nö ngö ṙô. Ngaich vah yip tarik hol Apsalem.

¹⁰Ngaich anga-aṅ min öp töt pinhëṅ-evkūö nö pòrô, öp tösā ellōn lāyòn, min nö paṙööyi ellōn pòn ṙòkhöre vē aṅ Israĕl nö akahalōn töp yöng meh nö tökalēḵ, tö yip in ò inrē tarik nö tötpa-ekūö.

¹¹Halēnö meh pöri chū-ö öm hamūl yip aṅ Israĕl nö in meh, löktökūö Tën söl i Pīrsīpā, öi sā ṙôken kuyāyö i kūö mai tö ṙô ngöre; hakôtenre inrē më-eṅ kiyung.

¹²Ngaich ayī-ö min höng siyahtöre in ò ip chūök ò min nö kôti ngaich ayī-ö min höng sā hanôngti tacham nö el tumlat öi i kui ò: ngaich min ayī-ö öt hĕng tit tak ṙahāti tö hol ò in yip tarik nö ṙòkhöre.

¹³Hēk inrē, yē ò min nö elpanam, ngaich ṙòkhöre min vē aṅ Israĕl nö havīlö öp elpanam ngaich ayī-ö min taptökūöre ip tahël hanöng saha öp kun ihong töhĕng nö ötkôtī nö in e.

¹⁴Ṙòknyöre ṙô ngaich hē Apsalem tö yik tarik Israĕl nö ngö ṙô, Ĕhten an ngam ṙô Husāi inrē tö ngam inlēnö ṙô Ahitōfel. Pò ngam Mā Tēv nö vīngen ngam inlēnö tö Ahītōfel nö ötkô, pò ngam Mā Tēv nö hòṅ kētö tötlöök nö i kui Apsalem.

¹⁵Ngaich ngö ṙô Husai tö Apiātör inrē, nak kūönṙô, Ngö ṙô ap taheui Ahitōfel nö halēnö Apsalem tö yip mā i Israĕl inrē; ngaich ngö ṙô chū-ö inrē halēnan.

¹⁶Lökten yĕh ka-eūyen tīnngö vamë-eny nang Tāvit, nö ngö ṙô, Uh man iyöngtöre i ngih hatööm öm i nup lökngö mahavāngngö el mak nö chuh el tönyalnyi uh tal öm öt havāngngöre; hòṅ ngam rācha nö öt kô-òngvah, tö yip tarik in ò inrē nö ṙòkhöre.

¹⁷Höng iyöng Enrōkel nā Yônatan nāṅ Ahīmāis; ngaich hĕng tak ök kikānö mahalanṙen chamuh in e nö vë-eny nang cha; kiröönngöre cha-a ngaich nö vë-eny nang ök rācha Tāvit: pò cha nö sōḵ nö meūkö nö kuhēthötre nö elpanam.

¹⁸Hĕng tak pöri ök ṙālö tarik cha, ngaich ve-eny nang Apsalem: ka-eūyen cha-a ngaich nö kiröönngöre, ngaich yih nö i patī ök tarik hĕng tak ök tömāku tö tö-ūlö nö el kinlōngö ök patī re; meutti cha-a ngaich nö ël e.

¹⁹Ngaich ök kikānö nö kē ranup tö kui e, ngaich haṙĕhtö kui e, pirāt nuk tösōngö sāiny inrē nö i kui e; ngaich nöng öt akahaiṙen cha-a.

²⁰Yihtöre ngaich nak tarik Apsalem nö ik kikānö nö in ök patī; ngö ṙô ngaich cha-a, Isuh nak nā Ahīmais nā Yônatan? Ngaich ngö ṙô ök kikānö tö cha, Ngaich nak nö havāngngö kui ap kun töhëm mak. Ngaich hē cha nö chöhö cha ngaich ötkôtökūö tö cha havan cha-a ngaich nö i Yerusalem.

²¹Ngaich ngö inlahen angū-ö, unôichrit chanūhuh cha nö ngaich, ngaich meutlö nak tarik nö el mak, ngaich kiröönngöre nö ve-eny nang ök rācha Tāvit; ngö ṙô cha-a tö Tāvit, Chōholre yin, ka-eūyen havāngngö kui ngam mak: tön ngö ṙô ap Ahitōfel nö halēnlö kanô-òngvah meh.

²²Chōholre ngaich Tāvit, hol ò inrē yik tarik nö ṙòkhöre, ṙòkhöre cha-a ngaich nö havāngngö kui Yôtön.

²³Ngaich hē Ahitōfel nö meuk ök halēnlöre nö öt tömkaṙen, hanāmlö uk öp köttö re ngaich anga-aṅ, chōholre ngaich, yih ngaich nö i patī re, nö ik elpanam ò, halēnngö ök patīre anga-aṅ ngaich kiseutngöre; kapah ngaich anga-aṅ, lāpi ngaich nö el anūlö ök yöng re kikōnyö.

²⁴Chalô ngaich Tāvit nö i Mahanēm. Havāngngöre ngaich Apsalem tö kui Yôtön, in ò yik tarik Israĕl nö ṙòkhöre.

²⁵Vīlen Amās ang Apsalem nö ṙënngen Yô-ap nö yöngkūö kumyung. Kūön ök tarik ök Amās ök töminënyuvö tö Itra aṅ Israĕl, ök kumhēthötre nö in Apīkēl ök kikānö kūön Nāhas, kanānö Sērūyā kikānö yöng Yô-ap.

²⁶Ngaich yik Israĕl tö Apsalem inrē nö iyöngtöre nö panam Kilīöt.

²⁷Ngaich ngö inlahen angū-ö hē Tāvit nö yih nö i Mahanēm, yihtöre ngaich Sopī ök kikōnyö kūön Nāhas aṅ Rapā aṅ i yik kūön Amön, Makīr inrē ök kikōnyö kūön Ami-ĕl aṅ Lotepār, Parsilāi inrē ök aṅ Kīliöt i Rōkēlem,

²⁸Kumtö chamam, chūök sanöich kūö, tanīöyö, vit, pārli, atra, tönyô piôk, kulöl, pāchī, tönyô kulöl inrē,

²⁹Höni, ta-öng aṅteh, sīṅp, chīs inrē aṅten nuā, nö nyā-aṅkūö Tāvit, tö yik hol ò inrē tarik: pòn ngö ṙô cha-a, Kapahare yip tarik, chei haṙehe nômö inrē, nö el tönyalnyi