Read Car_Nicobarese 2 SAMUĔL 18 Bible Online

2 SAMUĔL 18 - Car_Nicobarese bible

2 SAMUĔL 18

¹Kaheuk yik tarik ngaich Tāvit yik mī-in ò, ngaich asöklö yöngkūö tököṅnyu, yöngkūö töṙôngu angā-aṅ nö i kui cha.

²Tīnngörit yik tarik ngaich elkatòh Yô-ap hĕng linūöi milā-a, elkatòh Apīsāi ök kikōnyö kūön Serūya, kahëm Yô-ap, hĕng linūöi milā-a, elkatòh Ittāi ök aṅ Kitī, hĕng linūöi milā-a. Ngaich ngö ṙô ök rācha tö yik tarik, Hòṅ in yīö chin chū-ö inrē kiröönngöre,

³Ngö ṙô pöri yik tarik, Uh man kiröönngöre: pò ih min yē ih falngöre, öthō cha-a min nö chumkūö tö ih; öt rēhĕn yē ih pòrô ròngtī kapah, öthō cha-a nö chumkūöṙen tö ih: ngaich pöri më-eṅ sā ṙāi tösöm köṅny öm in ih: lökten an nö ĕhten tö meh öm höngöre holṙen ih löknyö elpanam.

⁴Ngö ṙô ngaich ök rācha tö cha, Hō chin ngaich ip tölöök lōn yīö. I kūö inkūp ngaich ök rācha nö sökhak, ṙòkhöre ngaich yik tarik nö ṙôngu nö kunyī-inyre köṅnyu inrē.

⁵Ngö ṙô ngaich ök rācha nö töl ṙô Yô-ap, Apīsāi, Ittāi inrē, Haṙēmngenre pöichö, öi ngëichkö kūö chu ip ṙāl tarik, ang Apsalem, Ṙòkhöre yik tarik inrē nö hang hē ök rācha nö kētö chöngö yik yöngkūö kumyung tö tī cha tö Apsalem.

⁶Ngaich yik tarik nö kunyī-inyre nö elkahôyö nö lā-al Israĕl: el inchōn Ifrēm ngaich ök kinyūngö.

⁷Ötkô ngaich yik tarik Israĕl tö yik tarik Tāvit, yöng ṙôkhangṙen yik tökapah ik sakāmö yik tönët anāi köṅny tarik.

⁸Pò ök kinyūngö nö parāti nö ngaich nö i kūö ngam panam: pōihangvah tī tö tarik ngam el inchōn ik sakāmö angū-ö mötlö ṙôken tö yik kūö fël.

⁹Ngaich Apsalem nö amahaiṙen nö kööḵlö tö yik tarik Tāvit. I uk ök köttö ngaich Apsalem, ngaich ök köttö nö lökngö elkatòh ök tölīpö pak tökiröng chōn, ngaich ök kui ò nö seūlöre nö ik chōn, ngaich anga-aṅ nöng kalööla ihôi ngam halīöngö töm tumlat; ngaich ök köttö elrāk ò nöng kiröönökūöre.

¹⁰Hĕng tak ngaich ök tarik mameūkö e, ngaich ngö ṙô tö Yô-ap, Yĕh meuk, meūkö Apsalem chin nöng kilölhaka nö in öp chōn.

¹¹Ngaich ngö ṙô Yô-ap tök tarik ök vamë-eny nang ò, Yĕh meuk, meūkan më-eṅ ngaich öt fëlngen ò nöng fuk umuh nö el tumlat? Ngaich öre chū-ö söm tāk tī tö rupīö meh, hĕng inmöpṙat inrē.

¹²Ngaich ngö ṙô ök tarik tö Yô-ap, Pòrô chin öre sömòng rupīö nö eltī chu ngaich rö-ö chū-ö hōḵ hanyāknyö kël re ip kūön ap rācha kikōnyö: pò në elnang ih nö hang ṙô ap rācha nö tölṙô meh, tö Apīsāi, Ittāi inrē nö ngö ṙô, Ṙēmen un hĕng tak lamūöltö tī re ip ṙāl tarik ang Apsalem.

¹³Yē chu öre milēḵṙen tök nômö ò, (ngaich öt hĕng tökô nö nyatngö nö ip rācha,) ngaich öre më-eṅ höng haköhngenre.

¹⁴Ngö ṙô ngaich ang Yô-ap, Ötkô chin höngngöh in meh. Lūöi nòng kahë ngaich anga-aṅ tö vöi nö eltīre ngaich i fanöinylö Apsalem tī anga-aṅ nö saphöt kūö u, hē ò nö ṙòngmö aṅ nö i rōi ök chōn.

¹⁵Söm tak yik ṙālö tarik kameun ök lanaklö Yô-ap, havīṙöre cha-a ngaich sapngen Apsalem, ngaich kapaha tī tö ò.

¹⁶Föö ngaich Yô-ap, ngaich havantöre yik tarik nö ṙeū-eung i linū-u Israĕl; pò Yô-ap nö ṙaptöröön yik tarik.

¹⁷Kē-ĕ Apsalem cha-a ngaich, ngaich sukten ò nö el ök tökiröng anūlö el inchōnngö ngaich afônglö tö pōyen ihong nö i kui ò: ngaich höng kö chuh el rūkui re yik Israĕl nö falngöre.

¹⁸Hē Apsalem nö ṙòngmö aṅ ngaich anga-aṅ nö vīlö machööḵlöre, ök el achaṙö ök rācha: pòn ngö ṙô anga-aṅ, Hö-ö chin kūönu tö kikōnyö nö inköpkö minë-eny chu: ngaich kaheuk minë-eny ök machööḵlö anga-aṅ nö i minë-enyre: kui mitīlö Apsalem öp tö ṙô, söl ing töngamuh.

¹⁹Ngaich ngö ṙô ang Ahīmāis ök kikōnyö kūön Sētòk, Hökngöröön chu fal, öich kumtö inhānga ip rācha, tö inlahen tī ngam Mā Tēv nö havahalvah ò in yip tökunyahaelmat tö ò.

²⁰Ngaich Yô-ap nö ngö ṙô tö ò, Uh man më-eṅ söömngö inhānga töngamuh, tahëngö sakāmö pöri min më-eṅ söömngö inhānga: uh pöri më-eṅ töngamuh söömngö inhānga, tönkapah ök kikōnyö kūön öp rācha.

²¹Ngaich ngö ṙô Yô-ap tök aṅ Kus, Kuṙòh vë-eny nang ap rācha man töp maheuk meh. Sōntöre ngaich ök aṅ Kus nö in Yô-ap, ngaich fal.

²²Ngaich ngö ṙô ök kikōnyö kūön Sētòk nö hēk tö Yô-ap ang Ahīmās, Sòk öp tö sitih, vë-ekūö meh chin, hökngen chu chū-ö inrē unôichrit öp aṅ Kus. Ngaich ngö ṙô ang Yô-ap, Fal yòh öm min, kakūönö, yĕh meuk tö meh min öt raneushu i ngam inhānga?

²³Öp tö sitih sòk, hòṅ fal chin. Ngö ṙô ngaich anga-aṅ tö ò, ngaich man kuṙòh fal. Lök ël öp töṙā-akūö ang Ahīmas nö fal, ngaich urĕh tök aṅ Kus.

²⁴Ūichhak ang Tāvit nö ihôi nup tönët inkūp: ngaich ök chamônga nö yônlö nö i uk ök inkūp ök kinlōngö ihong, chingôhòl mat re ngaich anga-aṅ, nö ngëicha, yĕh meuk hĕng tak öp tarik töng hēngö röön nö fal.

²⁵Hūnyôre ngaich ök chamônga nö vë-eny nang ök rācha. Ngaich ngö ṙô ök rācha, Yē ò nöng hĕng tak, inhānga ap umuh elvāng ò. Veūtö yanīhih anga-aṅ ngaich nö röhta.

²⁶Tahëng ök tarik hēk tömeūkö tök chamônga nö fal; ngaich ök chamônga nö fal; ngaich ök chamônga nö ahang tö nang ök yōm inkūp, nö ngö ṙô, Yĕh meuk, tahëng ön ngòh tarik töng hēngö röön nö fal. Ngaich ngö ṙô ök rācha, Kumtö inhānga ap inrē anga-aṅ.

²⁷Ngö ṙô inrē ök chamônga, Sā fanālö Ahimās an ngòh mu-urĕh tölōn chu, ngòh kikōnyö kūön Sētòk. Ngö ṙô ngaich ök rācha, Tölöök ap nö tarik, yih ap min nö kum tö tölöök inhānga.

²⁸Hū-a ngaich Ahīmās nö ngö ṙô tök rācha, Ṙòkhöre nö lööken. Sōntökūö ngaich anga-aṅ nö el tumlat nö i kūö ök rācha, nö ngö ṙô, Tökôlò An ngam kamëtö yip tarik yip mahachônglö këlre nö lā-al ngam mā chu ngam rācha.

²⁹Ngö ṙô ngaich ök rācha, Lööken ap ṙāl tarik ang Apsalem? Sap ṙô ò ngaich Ahīmās, Hē Yô-ap nö tīnngö ngòh tarik ngam rācha, chū-ö öich tarik meh, meuk ök yöng tinṙōlen chū-ö, hö-ö pöri öich akahalōn tö e.

³⁰Ngö ṙô ngaich ök rācha, Havāngngöre man, Sökhak ihih. Havāngngöre ngaich anga-aṅ öthalöinyköre ngaich nö sökhak.

³¹Yĕh meuk, chalôkötī ngaich öp aṅ Kus; ngö ṙô ngaich öp aṅ Kus, Inhangkö ngam mā ngam rācha: pò ngam Mā Tēv nö havahalvah meh töngamuh in yip chamôhòlre nö lā-al meh.

³²Ngaich ngö ṙô öp rācha töp aṅ Kus, Lööken ap ṙāl tarik ang Apsalem? Ngaich ök aṅ Kus nö sap ṙô, Yip tökunyaha elmat tö ngam mā chu ngam rācha, ṙòkhöre inrē yip chamôhòlre nö lā-al meh nö chökhu tī tö meh, ngatī yēḵ sā tī ök ṙāl tarik.

³³Haṙivlōn ngaich ök rācha, yòhlö ngaich nö el urôhò i kui ök inkūp ngaich peuiny: ngö ṙô anga-aṅ tö yanòhlö re, Ō kūön chu Apsalem, kūön chu, kūön chu Apsalem! Lōn ngam Tēv an öre tö chu kapah tö pòkūö meh Ō Apsalem, kūön chu, kūön chu!