Read Car_Nicobarese 2 SAMUĔL 19 Bible Online

2 SAMUĔL 19 - Car_Nicobarese bible

2 SAMUĔL 19

¹Ngaich vënyu angū-ö nö in Yôap, Yĕh meuk, peuiny ap rācha, haṙivhen Apsalem inrē.

²Ngaich ik sakāmö angū-ö ök minhôiṅyö nö havāngtu nö miṙīvlōn nö in yik tarik nö ṙòkhöre: pò yik tarik nö hāngö ṙô nö ngö ik sakāmö angū-ö, Haṙivlōn öp rācha töp kūön re.

³Ngaich yip tarik nö ulāingöre nö chuh elpanam ik sakāmö angū-ö, nö sā tarik tösirōngkūö nö ulāingöritre yē cha nö falngöre nö i kinyūngö.

⁴Kahulngö kūö re ngaich ök rācha ngaich peuiny nö pōitô. Ō kūön chu Apsalem, Ō Apsalem, kūön chu, kūön chu!

⁵Yihtöre ngaich Yôap nö i patī ök rācha, ngaich ngö ṙô, Sirōngkūö tī man töngamuh tö vē tarik meh nö ṙòkhöre, vē mahayöölen nômö meh töngamuh, nômö yip kūön meh kikōnyö yip kūön meh kikānö inrē, nômö yip pīhö meh, nômö yip pīhö meh töl inrē;

⁶Pò meh hāngenlōn tö cha yip tö sumrīk tö meh, ngaich surīkhen cha më-eṅ yip töhāngenlōn tö meh. Pò meh yih ngaich vë-eny e töngamuh, tö vē kūön rācha tarik inrē nö töng rö-ö nö in meh: pò chu yih ngaich meuk töngamuh, yē Apsalem öre nö aṅ, ngaich öre īhö tö ṙòkngörevah kapah töngamuh ngaich öre më-eṅ ṙāmölōn tö e.

⁷Lökten man yĕh chōholre, kunyī-inyre, vë-ekūö më tarik re öm ṙāmölōn: tön chūöku ṙô chin im Mā Tēv, yē meh öt hòṅ kunyī-inyre, öt hĕng tit tak min tarik tö ngöh nö in meh i ngih hatööm: ngaich angū-ö min nö höichngen nö in meh tö nuk tötlöök famuk in meh nö ngaich löktökūö i nyīnī-öṅ meh söl ing töngamuh.

⁸A Chōholre ngaich ök rācha, ngaich ūichhaka nö i kūö inkūp. Ngaich cha-a nö vë-eny nang yik tarik, nö ngö ṙô, Yĕh meuk, ūichhaka ap rācha nö i kūö inkūp: ṙòkhöre yik tarik nö yihtöre nö i kūö ök rācha. b Höng kö falngöre ngaich yik tarik Israĕl nö el inrūkui re.

⁹Ṙòkhöre ngaich yik tarik nö lā-alkūö re yik miyöngö aṅ Israĕl, nö ngö ṙô, Ṙānyen hī ap rācha ṙā-ang eltī yip lā-al hī, hayöölen hī inrē ṙā-ang eltī yip aṅ Filistain, ngaich ap yih töngamuh nö falngöre tö Apsalem nö ṙāngö ngih panam.

¹⁰Ngaich Apsalem inrē nö kapah nö ik kinyūngö, ök töhachāmö kui tö hī. Yĕh lökten kūöyòh öi öt hĕng höiny milôhò ṙô tö invantö öp rācha?

¹¹Tīnhanga ngaich ök rācha Tāvit nö in Sētòk in Apiātör inrē nak kūönṙô, nö ngö ṙô, Vë-ekūö yip mā-aṅ Yūtā, ngö ṙô, Kūöyòh öi yī-ö unôich öi kētö ngòh rācha nö i patī ò? Ngaich yip yih aṅ Israĕl nö yīhih ṙô nö i ngòh rācha, tö kinëtö ò nö i patī ò.

¹²Yī-ö yin hanöng kisānö chu, yī-ö yin tangëḵ chu alaha chu inrē: kūöyòh öi pökeh unôich kēten ngòh rācha?

¹³Ngö ṙô yin tö Amasā, Röh öm më-eṅ tangëḵ chu, alaha chu inrē? Nga ti tī An yēḵ ngam Tēv tö chu, hēk möthë hē meh min öt vīlöngö yöngkūö kumyung öm örheūheu min i kūö chu i chūök Yôap.

¹⁴Ngaich anga-aṅ nö vītö ellōn yik tarik aṅ Yūtā nö ṙòkhöre, nö sā ellōn töhĕng tak tarik; lökten cha nö söömtö ṙô nö ik rācha, nö ngö ṙô, Havantöre man, tö yip tarik meh inrē nö ṙòkhöre.

¹⁵Havan ngaich ök rācha, teungta ngaich nö i Yôtön. Yih ngaich yik aṅ Yūtā nö i Kilkāl, nö höngkūö ök rācha, nö havāngngö ök rācha tö kui Yôtön.

¹⁶Ngaich Simēi ök kikōnyö kūön Kēra, aṅ Penyamin, ök mi-iyöng Pahūrim, kurāten nö yih nö höngkūö ök rācha Tāvit nö hol yik tarik aṅ Yūtā.

¹⁷Hĕng köṅnyu ngaich yik tarik aṅ Penyamin in ò nö umuh, ngaich Sīpā inrē tarik aṅ patī Sôl tö yik tö taneui sīön tak kūön ò kikōnyö yik tönët anāi inrē tarik alaha in ò; lök el Yôtön cha-a ngaich nö i kūö ök rācha.

¹⁸A Ngaich hĕng nòng ök kupòk chūök invāngngö yik aṅ patī ök rācha, hēk inrē nö hōtu anga-aṅ nö kahanglōnre töp la-en lōn ò. b Afukngöre ngaich Simēi ök kikōnyö kūön Kēra nö i kūö ök rācha, hē ò nö ngaich nö vāngngö tö kui Yôtön.

¹⁹Ngö ṙô anga-aṅ ngaich tök rācha, Uh an yēḵ ngam mā chu nö in chu tī töp tökööl chu, um rēhĕn köpölōn tö nuk töchōich tī ngòh tarik meh ik sakāmö ngam mā chu ngam rācha nö kunyī-inre nö ṙā-ang Yērusalem, hòṅ ngam rācha nö öt köpölōn tö e nö ellōn re.

²⁰Tön akahngenre ön ngòh tarik meh nö köölö fālen; yĕh meuk, lökten, öich yih töngamuh urĕh tö taṙòkhöre yip aṅ patī Yôsĕf öich höngkūö ngam mā re ngam rācha.

²¹Ngaich Apisāi pöri ök kikōnyö kūön Serūyā nö sap ngam ṙô nö ngö, Röh öng Simēi nö hòṅ kumpaha tö kūö e, pò ò nö ötlēkôre tö ngam töhachāmö kui tö ngam Mā Tēv?

²²Ngaich ngö ṙô ang Tāvit, Sitih inlahen öichvö in yīö, yī-ö kikōnyö kūön Sērūyā, tö yīö hòṅ lā-al chu töngamuh i ngih sakāmö? Hēktöre hòng min tarik tö kumpaha in Israĕl i ngih sakāmö? Röh öich ngaich akahalōn töre töngamuh öich rācha i kui Israĕl?

²³Ngö ṙô ngaich ök rācha tö Simēi, Öthō man kapah, Chūöku ṙô ngaich ök rācha nö in ò.

²⁴Yih ngaich ang Mefīpōset, nö höngkūö ök rācha, kikōnyö ök kūön Sôl; öt rēhĕn anga-aṅ nö kinfanngu kalröön, öt rēhĕn nö kamöpkö māinykūö re, öt rēhĕn nö söichkö hilā re hēngen tö ök sakāmö ngam rācha nö kiröönngöre söl im sakāmö hē ò nö yih nö i patī nö ngaich nö lām.

²⁵Ngaich angū-ö, hē ò nö yih nö i Yērusalem nö höngkūö ngam rācha, hē ök rācha nö ngö ṙô tö ò Mefīpōset, kūöyòh öm öt kiröönngöre in chu?

²⁶Ngaich ngö ṙô anga-aṅ, Ō Rācha, mā chu, hachīlö chin töp tarik re: pò chu tö ngö ṙô, Hòṅ hanāmlö uk öp köttö re chin, pò chu hòṅ i uk ò, öich kiröönngöre in öp rācha; kūö ngòh tarik meh nö tökaròk.

²⁷Ngaich anga-aṅ nö sūöichken ngòh tarik meh, nö im mā ngam rācha chu; tösā ma-ahānga ngam Tēv pöri ngam mā chu ngam rācha: lökten kētöre man ngaich ip tölöök elmat meh.

²⁸Tön ṙòkhöre yik aṅ patī ök yöng chu nöng kupah nö i kūö ngam mā chu ngam rācha: söntenre më-eṅ ha ūichlö ngòh tarik re nö in cha yip nyamā nö el mīs meh. Lökten suh ap huneū-en ṙô chu tö ōtngöre ap löknyö ṙô chu iṙūöhö ṙô peuinyhökūö ngam rācha?

²⁹Ngaich ngö ṙô ök rācha tö ò, Kūöyòh öm höng iṙūöhöṙô tö inlahenre? Ngö ṙô chin, Michöḵlöre nan nā-aṅ Sīpā tap taṙeūḵ.

³⁰Ngö ṙô ngaich Mefīpōset tök rācha, Hôṅ, hökngen ò nö ṙòkhöre kahë, sā ngam mā chu ngam rācha nö ngaich nö yih im lanāmö nö i patī re.

³¹Ngaich ang Pārsilāi ök aṅ Kilīöt nö yih nö ṙā-ang Rōkelim; havāngngö kui Yôtön anga-aṅ ngaich nö hol ök rācha nö söömngen ò lāmuh tö Yôtön.

³²Tököṅnyu ök Pārsilāi nö tarik, töhëvhör anāi samyeūheu ṙēti: meukṙen ngam rācha anga-aṅ tö nyā-aṅkūö ò hē ò nö i Mahanēm; pò ò nö tökôlò nö tarik.

³³Ngö ṙô ngaich ök rācha tö Pārsilāi, Tā-a havāngngöre man in chu meukṙen meh chin min in chu i Yērusalem.

³⁴Ngö ṙô ngaich Pārsilāi tök rācha, Āmtöre nup sakāmö i në samyeūheu chu öich aṅ, töp lökten chu kiröönngöre in ngam rācha i Yērusalem?

³⁵Hëvhör anāi samyeūheu ṙēti chin töngamuh: ngaich kô hòng öich akah tölöök tötlöök inrē? Kô ang ngòh tarik meh nö kuchikkūö tö nup nyahāṅre hēk tö ha-òkre? Kô öichu hang ṙô tarik tövāyô nö tikökṙôre kikānö kūöyòh ang min ngòh tarik meh nöng lumngan ngam mā chu ngam rācha?

³⁶Höng havāngngö kui Yôtön ön ngòh tarik meh nö hol ngam rācha: kūöyòh ang inrē ngam rācha nö hòṅ havahaltī chu tö töngatī raneushö?

³⁷Vë-ekūö meh chin, hökngen ngòh tarikre man, nö havantöre nö hēk, hòṅ chu kapah in öp elpanam re, ranghö anūlö öp yöng chu kikōnyö tap yöng chu kikānö inrē. Yĕh meuk, ngam tarik meh Chimham; hökngen ò nö havāngngöre nö im mā chu ngam rācha; in ò tī tö nup tölöök lōn meh.

³⁸Sapṙô ò ngaich ngam rācha nö ngö, Chimham an min mahavāngngöre nö hol chu, ngaich chū-ö min meukṙen ò töp tölöök min tölōn chu nö in ò: ngaich yē öp töng lōn meh in chu angū-ö min tī chu in meh.

³⁹Ngaich ṙòkhöre yik tarik nö havāngngö kui Yôtön, havāngngöre ngaich ök rācha: hāmkūö Pārsilāi ngaich ök rācha, hakôlò ò inrē; havan ngaich anga-aṅ nö i chūök re.

⁴⁰Ngaich ök rācha nö havāngngöre inrē Chimham nö hol ò: ṙòkhöre inrē yik tarik aṅ Yūtā nö kumröön tök rācha nö havāngngöre, ròngti inrē yik tarik aṅ Israĕl.

⁴¹Yĕh meuk, ṙòkhöre ngaich yik tarik aṅ Israĕl nö yihtöre nö ik rācha, ngaich ngö ṙô tök rācha, Kūöyòh yip hanöng kisānö ih tarik aṅ Yūtā nöng ulāingen meh, havāngngö ngam rācha inrē tö kui Yôtön, tö yip aṅ patī ò inrē, tö yip tarik Tāvit inrē nö hol ò?

⁴²Ṙòknyöre ṙô ngaich yik tarik aṅ Yūtā nö sapṙô yik tarik aṅ Israĕl, Kūö ngam rācha nö töröhta nö mak alaha ih. Kūöyòh öi pökeh līn in e? Nyā-aṅvkūö ṙöng öi īhö i yanëngen ngam rācha? Hēk inrē kahëtu hòng anga-aṅ nö in ih tö raneushö?

⁴³Ngaich yik tarik aṅ Israĕl nö ngö ṙô nö sapṙô yik tarik aṅ Yūtā, Söm nup alaha ih im rācha, ngaich īhö inrē mötlö chanipta in Tāvit tö yīö yī-ö. Kūöyòh ṙöng öi ahūöngen ih, öi sōtu īhö urēhĕ ṙô tö invantö ngam rācha ih? Ngaich minë ṙô yik tarik aṅ Yūtā nö mötlö kumlēḵ tö nuk ṙô yik tarik aṅ Israĕl.