Read Car_Nicobarese 2 SAMUĔL 20 Bible Online

2 SAMUĔL 20 - Car_Nicobarese bible

2 SAMUĔL 20

¹Ngaich hĕng tak ök umuh tarik sāṙen, ök töminënyu tö Sepā kikōnyö kūön Pikrī, aṅ Penyamin; föönyö kūö ök fanöö anga-aṅ, nö ngö ṙô, Öt minchöḵövö in īhö in Tāvit, Öt rēhĕn öi amīnu im kikōnyö kūön Yēsī: Ō Israĕl, kö chuh el inrūkui re yin.

²Lökten nö ṙòkhöre yik tarik aṅ Israĕl nö ṙāngöre nö tömrit Tāvit, ngaich tömrit Sepā ök kikōnyö kūön Pikrī: ngaich pöri yik tarik aṅ Yūtā nö haköpngöre nö ik rācha re, löktökūö Yôtön söl Yērusalem.

³Sölta ngaich Tāvit nö ik patī re i Yerusalem; ngaich ök rācha nö kē yik tösöm tak kikānö tötöl pīhö ò, yik töṙā-āyö tö ò nö meukkö ök patī, kēhĕtnen cha ngaich nö latuhēt, ngaich meukṙen cha tönyā-aṅkūö, öt kuhēthöre pöri nö in cha. Söl kinpahare cha-a ngaich nö öpikūö, nöng tafīösi.

⁴Ngö ṙô ngaich ök rācha tö Amāsā, Havëten yip tarik aṅ Yūtā nö in chu i el töluöi sumkam ihih më-eṅ inrē.

⁵Kiröönngöre ngaich Amasā nö havëten yik tarik aṅ Yūtā: marô-angṙen pöri anga-aṅ tök ṙētak ṙô ò tö ò.

⁶Ngö ṙô ngaich Tāvit tö Apisai, Pōihangen tī öp min Sepā tö hī nö mötlö tö Apsalem, öp kikōnyö kūön Pikrī: kē yip tarik ngòh mā re man, lūḵ an, hòṅ ò nö öt kuhēthötre nö el tökinlōngu elpanam, ngaich öt meūkö min tö hī.

⁷Ngaich yik tarik Yôap nö fachūlörit ò, yik Chēritait, Pēletait, ṙòkhöre inrē yik tökalēḵ tarik: kiröönngöre cha-a nö ṙā-ang Yērusalem, nö lūlörit Sepā ök kikōnyö kūön Pikrī.

⁸Ngaich hē cha nö ik tökiröng ihong i Kipīön, yihtöre ngaich Amasā nö höngkūö cha. Hanyöṅthaka nuk chehen kumyung nö in Yôap, inmöpṙat ök umuh inrē hamöphak kūö nö i ṙat ò töhayūlö kūö sanët; ngaich hē ò nö kiröönngöre sukngöre ngaich angū-ö.

⁹Ngaich ngö ṙô Yôap tö Amāsa, hol chu, lööken ömeh? Tūök sanôi kūö Amās ngaich ang Yôap tök lahāmö kël re ngaich hāmkūö ò.

¹⁰Öt chumkūöṙen pöri ang Amāsa tök fël eltī Yôap: aṅtī ten tö ò anga-aṅ ngaich nö sapnyö aich ò, ngaich chalulköṅny nuk puhū ò nö el tumlat, ngaich öt hĕngtöre heuh tī anga-aṅ nö sapngen ò; kapah ngaich anga-aṅ. Ngaich nā Yôap tö kahëmre nā Apisāi nö lūḵu Sepā ök kikōnyö kūön Pikrī.

¹¹Ngaich hĕng tak ök ṙāl tarik in Yôap umuh nö sökhak ranghen ò, nö ngö ṙô, Ngòh tö lā in Yôap lōn, lamā in Tāvit ap anga-aṅ, hökngen ò nö tömrit Yôap.

¹²Ngaich ang Amās nö hulalhaka, ellōn ök tökiröng talöökö nöng palöna nö i mahām re. Hē ök tarik nö meuk yik tarik nö ṙòkhöre nö sökngöre, chātngen Amās anga-aṅ nö ṙā-ang el ök tökiröng talöökö nö el kahôyö kavalhöti tök hilā nö i alaha ò, hē ò nö meuk yik chamööḵngen ò nö sökngöre.

¹³Hē ò nö kē-ĕyö nö ṙā-ang el ök tökiröng talöökö, ṙòkhöre ngaich yik tarik nö tömrit Yôap, nö lūḵu Sepā ök kikōnyö kūön Pikri.

¹⁴Lök i nuk miyöngö Israĕl anga-aṅ nö chuh Āpĕl, chuh Pĕtmēakā inrē, ṙòkhöre i yip aṅ Përit: hamūlöre cha-a ngaich, ngaich kiröönngöre nö tömrit ò.

¹⁵Yih cha-a ngaich, ngaich havīlen ò nö i Āpĕl öp i Pĕtmēakā, afônglö tumlat cha-a ngaich nö ik elpanam ngaich sökhak angū-ö nö lanaklö cha: ngaich ṙòkhöre yik tarik hol Yôap nö sōng ök kinlōngö, nö tiṙölngö e.

¹⁶Ngaich hūḵnyôre ök hĕng tak kikānö tö akaha aṅ ngam elpanam, nö ngö ṙô, Hangihtöre! Hangihtöre! Vë-ekūö yīö chin, in Yôap, Haröhtöre man ihih, hòṅ chu öich vë-ekūö meh.

¹⁷Haröhtöre ngaich anga-aṅ nö in ò; ngö ṙô ngaich ök kikānö, Më-eṅ öm Yôap? Chū-ö chin, ngö anga-aṅ nö sapṙô ò. Ngaich ngö ṙô anga-aṅ tö Yôap. Hang ṙô ngòh tarik re man kikānö. Ngaich ngö ṙô anga-aṅ nö sapṙô ò, Ngaich chin hang.

¹⁸Ngaich ngö ṙô ök kikānö, Tö ngö ṙô yik mā misī, Ötkô yip nö öt kē inlēnöre nö i Āpĕl: ngaich in e ngam falngen nö keuheūtiṙen.

¹⁹Töhĕng tak chin chū-ö aṅ in cha öich tölām tökô-en inrē i Israĕl: lukkenre man hòṅ tiṙölngö elpanam fëlngö yöngnyīö inrē aṅ Israĕl: kūöyòh öm hòṅ mīktö vē amin ngam Mā Tēv?

²⁰Ngaich ngö ṙô Yôap nö sapṙô, Marôvat an yēḵ angū-ö, marôvat an yēḵ angū-ö tö chu, öich mīkhöti hēk fëlhanga.

²¹Hö-ö an nö ngatī: tön hĕng tak ap tarik aṅ im rung panam Ifrēm, ök kikōnyö kūön pikrī Sepā minënyi öp mahachông lö këlre nö lā-al ngam rācha, nö lā-al Tāvit: kēten ò nöng hĕng tak, hòṅ chu kiröönngöre ngaich ṙāngö ngih elpanam. Ngaich ngö ṙô ök kikānö tö Yôap, Yĕh meuk, suktu ap min kui ò nö in meh nö löktö kui ngih kinlōngö.

²²Ip mikahre ngaich ök kikānö nö chuh in yik tarik nö ṙòkhöre. Rökngö likeun Sepā cha-a ngaich ök kikōnyö kūön Pikrī, ngaich suktö e nö in Yôap. Föönyö kūö ök fanöö ngaich anga-aṅ, piyāyi ngaich cha-a nö ṙā-ang im elpanam ngaich kö chuh el inrūkuire. Havantöre ngaich Yôap nö i Yerusalem nö in ök rācha.

²³Ngaich töngamuh ang Yôap nö yöngkūö kumyung yik aṅ Israĕl nö ṙòkhöre: Penayā inrē ök kikōnyö kūön Yēhōiatā i kui yik Chērit Pēlĕt inrē:

²⁴I kui töla-evṙen ang Atōrām: Yēhōsafet inrē ök kikōnyö kūön Ahīlöt nö yōm chūök kinūichngö,

²⁵Kamūich ang Sēvā: kūönṙô nā Sētòk nā Apiatör:

²⁶Irā inrē ök aṅ Yāirit kūönṙô nö in Tāvit.