Read Car_Nicobarese 2 SAMUĔL 21 Bible Online

2 SAMUĔL 21 - Car_Nicobarese bible

2 SAMUĔL 21

¹Inyāichö ök umuh i nuk sakāmö Tāvit lūöi samyeūheu, nö tömrit höö nuk samyeūheu; ngaich ang Tāvit nö chöh kūö ngam Mā Tēv. Ngaich ngö ṙô ngam Mā Tēv, Pòkūö Sôl an, kūö ngam patī ò inrē chūök mahām, kūö ò nö kumpahangvah yip aṅ Kipiā.

²Nö ngö ṙô tö cha, Hö-ö yin vē aṅ Kipiā nö in vē kūön Israĕl, tön aṅ i yip chööḵṙen aṅ Amôr yin; chūöku ṙô inrē yip kūön aṅ Israĕl nö in cha; ngaich Sôl nö hòṅ fëlngen cha i kumlēḵ lōn ò nö in yik kūön Israĕl in yip kūön Yūtā inrē:

³Ngaich ngö ṙô Tāvit tö yik aṅ Kipiā, Asuh min tī chu in yīö? Töp lökten chu min kētö inlāmö, hòṅ yīö hakôlò vē amin ngam Mā Tēv?

⁴Ngaich ngö ṙô yik aṅ Kipiā tö ò, Rö-ö nup nö rupīö hēk humlum ihôi ih tö Sôl, hēk ihôi ngam patī ò; öt rēhĕn ihö hòṅ tī-iv tö tarik nö kumpahaivah in Israĕl. Ngaich ngö ṙô anga-aṅ, Öp ṙô yīö min, ngaich angū-ö tī chu in yīö.

⁵Ngaich ngö ṙô cha-a nö in ök rācha, Öp tarik kumheūṅtngen ih, vamī löknyö chöḵnyöre inrē nö lā-al, öi hōtuṙen ahāti öi sōtu ngöhöre i kūöngö Israĕl,

⁶Hökngen yip tösat tak yēḵ kūön ò kikōnyö nö kētu nö in ih, hòṅ ih kiseutngen cha im Mā Tēv, i Kipiā ap amin Sôl, ök katöllö ngam Mā Tēv. Ngaich ök rācha nö ngö ṙô, Kēten cha chin min ngaich.

⁷Aṙēlen Mefipōset pöri ök rācha ök kikōnyö kūön Yônatan ök kikōnyö kūön Sôl, kūö ngam töchūöku ṙô im Mā Tēv ihôi cha, ihôi nā Tāvit nā Yônatan ök kikōnyö kūön Sôl.

⁸Kē nak tönët tak pöri ök rācha nak kikōnyö kūön Rispā ök kikānö kūön Ayā, nak kayôḵnyö ò nö kūön Sôl, Armônī, Mefipōset; yik tö taneui tak inrē kikōnyö kūön Maiköl ök kikānö kūön Sôl, yik kayônyö ò nö kūön Atrīĕl ök kikōnyö kūön Parsīlāi aṅ Meholat:

⁹Ngaich anga-aṅ nö kēten cha nö eltī yik aṅ Kipiā, kiseūti ngaich cha-a tö cha nö i kūö ngam Mā Tēv nö in öp rôngö, satre taka cha-a nö ṙongngö vah: kumpahaivah cha-a hē inmūlö ṙòng parlī, im raneh sakāmö, ranulten inmūlö ṙòng parlī.

¹⁰Ngaich Rispā ök kikānö kūön Ayā nö kē sāk, haṙĕhtö e ngaich nö chūök ò nö i kui ihong, löktökūö ranulten inmūlö ṙòng hanöng saha ap kumṙah nö chahūḵköti nö ṙā-ang el halīöngö; öt rēhĕn anga-aṅ nö halöngten chehechōn nö teungtöre nö in cha tö sakāmö öt rēhĕn nup töṙeūla aṅ el kahôyö nö yih tö hatööm.

¹¹Vënyu ngaich angū-ö inlahen Rispā ök kikānö kūön Ayā nö in Tāvit, ök pīhö Sôl töl.

¹²Kiröönngöre ngaich Tāvit ngaich kē nuk tangëḵ Sôl, tangëḵ Yônatan inrē ök kūön ò kikōnyö nö ṙā-ang in yik tarik aṅ Yapeskilīöt, yik mu-ulāingö u nö el talöökö Pĕtsān, i chūök tī yik aṅ Filistain nö kilöllen cha, ik sakāmö hē yik aṅ Filistain nö fëlngen Sôl nö i Kilpoā:

¹³Ṙā-ang umuh ngaich anga-aṅ nö kētö nup tangëḵ Sôl tangëḵ Yônatan inrē ök kikōnyö kūön ò; hamūlö inrē tö cha nuk tangëḵ yik tökiseūti.

¹⁴Ulngö nuk tangëḵ Sôl cha-a, tangëḵ Yônatan inrē ök kikōnyö kūön ò nö i panam Penyamin i Sēla, i kui kupah Kis ök kikōnyö yöng ò: keuheūten cha-a ngaich tök tinöölôre tök rācha. Unôichrit e ngaich ngam panam nö vëlöng kui nö im Tēv.

¹⁵Hēk yik aṅ Filistain nö kiyūngö Israĕl: kiröönngöre inrē Tāvit, in ò inrē yik tarik ò, ngaich kiyung nö lā-al yik aṅ Filistain, cheingö ngaich ang Tāvit.

¹⁶Ngaich ang Ispīpënōp ök aṅ i yik kikōnyö kūön ök chā-ën, ök tövöiyu tök tölūöi yòng siköl lumngan mās, i ṙat ò nö seūhaka ök tufömngöre sanët, nyaha Tāvit lang tö lōn ò.

¹⁷Ngaich pöri Apīsai ök kikōnyö kūön Serūyā nö holṙen ò, nö fël ök aṅ Filistain, ngaich kapaha tī tö ò. Chūöku ṙô ngaich yik tarik Tāvit nö in ò, nö ngö ṙô, Uh man kiröönngöre in ih hēk i kinyūngö, hòṅ meh öt nyangngö tī tö ngam ëāṅvö i Israĕl.

¹⁸Ngaich ngö inlahen angū-ö unôichrit ngih, tök kinyūngö hēk in yik aṅ Filistain i Kōp: ngaich Sīpëkai ök aṅ Husā nö fëlngen Saf, ök aṅ i yik kikōnyö kūön ök chā-ën.

¹⁹Hēk ök umuh kinyūngö in yik aṅ Filistain i Kōp; ngaich Elhēnan ök kikōnyö kūön Yāëreòrekim, ök aṅ Petlihem nö fëlngen Kōliat ök aṅ Kit, ök töhaṙahav vöi tök tösā kāl tī kumpāt hilā.

²⁰Ngaich hēk ök umuh kinyūngö i Kāt, i chūök ök tarik tömarôlòng tö-aṅngöre lā kël nö kö tafūöl nòng kuntī aṅngöre lā-a kalröön inrē nö kö tafūöl nòng kunröön, nët anāi fën tum nòng; anga-aṅ inrē töfötnyu nö kūön ök chāën.

²¹Ngaich hē ò nö harāinyngen Israĕl, ngaich Yônatan ök kikōnyö kūön Simēi ök kahëm Tāvit nö fëlngen ò,

²²Cha-a yin vē töfën tak töfötnyu nö kūön ök chāën i Kāt; fukngö achā-a nö lökngö eltī Tāvit, lök ngö eltī yik tarik ò inrē.