Read Car_Nicobarese 2 SAMUĔL 22 Bible Online

2 SAMUĔL 22 - Car_Nicobarese bible

2 SAMUĔL 22

¹Ngaich Tāvit nö vë-ekūö ngam Mā Tēv nö in në ṙô ngih tinkökö ik hē tī ngam Mā Tēv nö ṙānyen ò nö ṙā-ang eltī yip lā-al ò, ṙā-ang eltī Sôl inrē:

²Ngö ṙô anga-aṅ, Ihong chu An ngam Mā Tēv, chūök chu inrē kiyung, ṙamānyen chu, tö nup chū-ö chu;

³Ihong chu an ngam Tēv, In ò chin hayönglenre; Lanaklö chu, sinrōl inyööken chu, tömarô-òl kui chūök chamônga, innyatlö chu inrē; Mahayööken chu, hayöölen chu man ngaich i kanihngen.

⁴Havëkö ngam Mā Tēv chin min, ngam töhòṅ ha-öönyö: hòṅchu min hayöökaṙen in yip lā-al chu.

⁵Havīlöng chin tö në mahūvö kinpaha, pa-ekūö chin tö në ṙanööingö aṅ i öt lanöökö;

⁶Havīṙi nun në tökuvaha anūlö nö in chu: yih nö i kui chu në tinngöp kinpaha.

⁷Havëkö ngam Mā chin hē el re kihngen, hòṅ havëkö ngam Tēv chin: Ngaich anga-aṅ nö hang ṙô chu nö el ök töhet chūök re, teungta ap ṙô chu nö elnup nang ò.

⁸Kayīna ngaich ngih panam la- röiya inrē, faṙöti minë chūök rööntö ngam halīöngö, ngaich kayī- na pò ò nö līn.

⁹Tafūnlöng ngaich ök lul nö löknyö el meh ò, löknyö el vāng ò ngaich ap tameūyö nö haṙāphanga: kūö e nup ta-ök nö öktī kūö.

¹⁰Yūpūttö ngam halīöngö anga- aṅ inrē, ngaich yônti; el katòh röön ò ngaich tökufëi sinngūlö.

¹¹I uk kërup anga-aṅ, ngaich kiteū: hôṅ, meūkö anga-aṅ nö i rōi kël ngam kuföt.

¹²Vī ngam sinngūlö anga-aṅ nö rūkui nö havīlen ò, mūlngö në mak, tökufëi taṙul eltaṙul.

¹³Löktökūö ngam töyechta i kūö ò nö ökti kūö nup ta-ök tameūyö.

¹⁴Löktö el halīöngö ngam Mā Tēv nö tī tö kunṙôkö, ṙô-òvö ngaich ngam aṅ lātulöng.

¹⁵Tīnngörit chòk anga-aṅ, ngaich pirātngö u; hanyāṅlö, mihôiṅ ngaich tö u

¹⁶Meūkö ngaich minë hôi mai, lungāṅ töhëich ngaich rööntö machööḵlö ngam panam, i vinëköre tö ngam Mā Tēv, i lanöpnyökūö ngam umhômö ò minë el meh ò

¹⁷Tīnhöti anga-aṅ nö ṙā-ang lā- tulöng, kē-ĕ chu anga-aṅ; tūöklen chu inrē anga-aṅ ṙā- ang el nup tökiröng mak;

¹⁸Ṙānyen chu anga-aṅ ṙā-ang ip tökalēḵ lā-al chu, ṙā-ang in cha yip tösumrīk tö chu; pò cha nö yahlö kumlēḵ tö chu;

¹⁹Yih cha-a nö in chu ip sakāmö kanihngen chu; inköp chu pöri ngam Mā Tēv.

²⁰Kēten chu anga-aṅ inrē ip töpōiti chūökö: ṙānyen chu anga-aṅ, pòn kuchīkölōn nö in chu.

²¹Reushen chu ngam Mā Tēv asā ngam lanöökö chu; asā hanëtö eltī chu nö kē-ĕkūö chu anga-aṅ.

²²Pò chu köptī tö në talöökö ngam Mā Tēv, öt i öt lanöökö inrē öich ṙāngö ngam Tēv re

²³Pòn ṙòkhöre nö i kūö chu nup aṅ in ò inkaha fālen: i minë chöngö ò, rö-ö chū-ö ṙāngö u.

²⁴Teung chū-ö inrē lā in ò haköhngenre chū-ö töp tötlöök in chu.

²⁵Lökten ngam Mā Tēv nö asā öp tölöök in chu nö kē-ĕkūö chu; asā ngam hanëtö chu i kūö ò.

²⁶Ip tö-aṙē-ĕlōn min më-eṅ hameuktöre aṙē-ĕlōn, ip tarik töteung min më-eṅ hameuktöre töteung;

²⁷Ip töhet min më-eṅ hameuktöre töhet; ip mahaköpngöre nö i töt löök min më-eṅ hameuktöre öt hanvööken kūö.

²⁸Hayööken yip tarik min më-eṅ töhakihtuṙen: i kui yip mahakeūlenre pöri minë mat meh, hòṅ meh tumṙeūten cha.

²⁹Pò meh, Ō Mā Tēv, öm ëāṅvö chu: ngaich ngam Mā Tēv min nö ahatlö ngam sinngūlö chu.

³⁰Pò chu lökten in meh rööntö kui yip kumyung: lökten im Tēv chu öich kumöingö kui kinlōngö.

³¹Töteung An ngam talöökö ngam Tēv: kalaha An nö ngaich ngam ṙô ngam Mā Tēv; lanaklö cha an yip mahayönlenre nö in ò.

³²Achīö ṙöng ang ngam Tēv, tön höng ngam Mā Tēv? Achīö ṙöng ang ngam Ihong, tön höng ngam Tēv hī?

³³Ngam Tēv An töngëḵ chūök kumyung: Hachōḵkūö töteung An nö el talöökö ò.

³⁴Vī kunröön ò anga-aṅ nö sā kunröön kan tīör: ngaich haūichlen chu el ngam lātulöng chūök chu.

³⁵Harun në kël chu anga-aṅ nö i kinyūngö; lökten chu mihôiṅ yūpūttö mā linreny.

³⁶Kē-ĕkūö chu man inrē tö lanaklö aṅ in meh inyööken: ngaich ngam ṙanëmen meh nö kiröngötī tö chu.

³⁷Ṙūönyö rô-òl vāngö chu man ngaich elrāk chu, ngaich rö-ö chū-ö taleūchi röön.

³⁸Lūḵ yip lā-al re chū-ö ngaich fëlngen cha; öt rēhĕn öich havöökūöre hēk hanöng saha chu hatngö tī tö cha.

³⁹Hatngö tī chin ngaich tö cha, löngö nyaha tī tö cha, lökten cha nö öt chanòhlen: hôṅ, fukngö yin nö elröön chu.

⁴⁰Pò meh nyëk ṙat chu tö kumlēḵ i kinyūngö: ngaich më-eṅ lātaṙeū tī tö cha yip chamôhòlre nö lā-al chu.

⁴¹Vī-iyöṙen inrē tö meh yip lā-al chu nö havöötö uk re tö chu, pò chu hōtu rökngen cha yip tösumrīk tö chu

⁴²Ngëicha achā-a, ngaich öt hĕng tak mahayööken; pòrô ngam Mā Tēv, hö-ö pöri anga-aṅ nö sapṙô cha.

⁴³Ngaich chū-ö kūöṅnö tī pinyāchö cha sā tumlat, rööntökui cha chū-ö sā tilin el talöökö, pōiti tī ngaich pirātngen cha.

⁴⁴Ṙānyen chu më-eṅ inrē ṙā-ang i kinlöönö tö yip tarik chu; ṙātu chū-ö ngaich tö meh yöngkūö pumnāmö tarik: kūön alaha chu yip min tarik töt mikahkūö chu.

⁴⁵Tumṙeūtöre yip min aṅ tahëng tö chu: yē cha nöng hangtöre tö chu, ngaich hang chöngö chu min cha-a.

⁴⁶Changāṅchiyö yip min aṅ tahëng, ngaich meutnyi min nöng kichëyöre nö ṙā-ang ël nup tö öphakkūö chūök cha.

⁴⁷Tö-aṅ An ngam Mā Tēv; tökôlò inrē ngam ihong chu; hapōilöng an yēḵ ngam Tēv ngam Ihong inyööken chu:

⁴⁸Höng ngam Tēv An tötī-iv tö invahalvah chu, ane inrē kamëḵten vē tarik nö el katòh chu,

⁴⁹Kamënyen chu inrē ṙā-ang in yip lā-al chu: hôṅ, hachônglen chu man ngaich tulöng tö cha yip chamôhòlre nö lā-al chu: ṙānyen chu më-eṅ ṙā-ang in yip tötainy tarik.

⁵⁰Ō Mā Tēv, lökten chin ha-öönyö meh, i vē pumnāmö tarik, tikökṙôre min inrē tö nöönyö ngam minënyö meh.

⁵¹Kiröngö tī An nö ṙānyö ngam rācha ò: hameuktö hanāngenre inrē nö im töhachāmö kui tö ò, in Tāvit ip kūön ò inrē nöng örheūheu.