Read Car_Nicobarese 2 SAMUĔL 23 Bible Online

2 SAMUĔL 23 - Car_Nicobarese bible

2 SAMUĔL 23

¹Në nun manāngö ṙô Tāvit. Ngö ṙô ök Tāvit ök kikōnyö kūön Yēsī, ök tarik ök töhachohlöng nö lātulöng nö ngö ṙô, ngam töhachāmö kui tö ngam Tēv Yāköp, ök tövāyö ṙô tö salmai nö in Israĕl:

²In chu ṙô ngam Fanöinylö ngam Mā Tēv, i rōi litāk chu inrē ngam ṙô ò.

³Ngö ṙô an ngam Tēv Israĕl, vë-ekūö chu an ngam Ihong Israĕl: ngam töchīpö tī nö hayöng tarik, ngam mahayöng i pinhë-eṅkūö tö ngam Tēv.

⁴Sā hanātö peuheū an min, yĕn meutlö ngam tavūöi, peuheū töt taṙūlu kūö; hē tö-ayal kiyôp nö sīöplö nö el tumlat, löklö el töyang unôichrit kumṙah.

⁵Öt ngatī ngam patī chu nö im Tēv; sön anga-aṅ nö in chu nö vīten töt chanūhuvṙen kinlēḵngô i taṙòkhöre nö chöngö, haköphanga inrē: pòn ṙòkhöre anū-ö nö inyööken chu, lōn chu inrē, pòrô anga-aṅ nö öt vīten e nö sīöp.

⁶Ṙòkhöre pöri min tötlöök aṅ in cha nö sā töchökhu kaha chōn nö kurahayö; pò cha nö öt kanë-en tö eltī:

⁷Öp tarik pöri lamūölken cha hòṅ aṅtī tö vët haṙah vöi inrē; ngaich anū-ö min nö keuheūtngöre nö haṙāpi nö ip chūök u.

⁸Në nun minënyö yik tökalēḵ tarik in Tāvit; Yôseppāsīpet aṅ Tahkēmòn, mākūö yik yöngṙen kumyung; ngatī inrē ang Atīnô aṅ Asnī, lā-al yik töhëvhör ṙông finëlngö nö hĕng tum.

⁹Unôichrit ò ang Eliēsör ök kikōnyö kūön Tōtō, ök kikōnyö kūön aṅ Ahohi, töhĕng tak aṅ in yik tölūöi tak tökalēḵ tarik in Tāvit, hē cha nö ahōngen yik aṅ Filistain yip mahamūlöre nö kiyung, ngaich yik tarik Israĕl nö kiröönngöre:

¹⁰Choholre anga-aṅ, ngaich fël yik aṅ Filistain hanöng saha ò nö cheingö kël, ngaich ök kël ò inrē nö köpta nö ik sanët: kētö inyööken ngam Mā Tēv ik sakāmö angū-ö; ngaich yik tarik nö havan unôichrit ò nöng kamëḵ nuk chehen.

¹¹Unôichrit ò ang Samāh ök kikōnyö kūön Aki aṅ Harar, Hamūlöre yik aṅ Filistain nö i Lehi nö kiyung, nö ik tumlat tö aṅtö lentil; falngöre ngaich yik tarik tö yik aṅ Filistain.

¹²Söklöre pöri anga-aṅ nö ellōn ök tumlat, nö laklö e, ngaich fëlngen yik aṅ Filistain kiröngötī ngaich ngam Mā Tēv tö inyööken.

¹³Lūöi tak aṅ i yik tölūöi anāi mā nö kiröönngöre, ngaich yihtöre nö in Tāvit nö el kinluhu Atulām hē el inmūlö ṙòng; ngaich yik kumyung aṅ Filistain nö iyöngtöre nö el achāṙö Rifēm.

¹⁴El kinluhu ang Tāvit nö ṙòng höichṙen, ngaich ök chūök kumyung yik aṅ Filistain hē e nö i Petlihem.

¹⁵Ngaich ang Tāvit nö yal, ngaich ngö ṙô, Hĕng tak öp öre kamëḵtö òk chu tö mak aṅ ngam tö-ūlö mak i Pethlihem, ngam mī-ikūö inkūp.

¹⁶Ngaich yik tölūöi tak tökalēḵ tarik nö tilungnyöre nö löknyö el ṙôngö yik aṅ Filistain, fòk mak ngaich nö ël ök tö-ūlö mak Pethihem, ök mī-ikūö inkūp. Ngaich kēten e nö in Tāvit: sōḵ pöri anga-aṅ nö ôkö e ṙöstö e pöri nö im Mā Tēv.

¹⁷Ngaich ngö ṙô anga-aṅ, Ō Mā Tēv marôvat an yēḵ tö chu, öich ngatī inlahen: òk mahām më tarik ṙöng öichu më mahakihten nômö re? Lökten anga-aṅ nö öt hòṅ ôkö e. Anū-ö në tī yik tölūöi tak tökalēḵ tarik.

¹⁸Apisāi, ök kahëm Yôap, kikōnyö kūön Serūyā, yöngkūö yik tölūöi tak. Hachônglö ök vöi re anga-aṅ nö lā-al yik tölūöyòng ngaich fëlngen cha, ngaich minënyu nö in yik tölūöi tak yik tökiröng kūö cha.

¹⁹Röh ök nö anga-aṅ tömötlö ineū-euṅ tö yik tölūöi tak? Lökten anga-aṅ nö vīlöng nö yöngkūö cha: hö-ö pöri anga-aṅ nö ṙonglö nö in yik mu-urĕh tölūöi tak.

²⁰Penāya inrē ök kikōnyö kūön Yehōiata, ök kikōnyö kūön ök töt pa-ekūö tarik aṅ Kapsīl, tö tinī-iv tö nup tökalēḵ la-en, nët höny anga-aṅ nö fëlngö nak kikōnyö kūön Arīel aṅ Mô-āp: kiröönngöre anga-aṅ inrē nö fëlngö ök lāyön nö ellōn öp tökuheôltöre hē el tökënngöre tacham:

²¹Ane inrē anga-aṅ fëlngen ök aṅ Aikup, tölöökö ṙôkö nö tarik: vöiyu eltī ök aṅ Aikup; ngaich pöri anga-aṅ nö chuh in ò nöng aṅ eltī tö chōn, ngaich filiny ök vöi nö eltī ök aṅ Aikup, fëlngen ò ngaich nö aṅtī tö ök vöi ò.

²²Anū-ö në tī Penāya ök kikōnyö kūön Yehōiata, ngaich minënyu nö in yik tölūöi tak tökalēḵ.

²³Anga-aṅ tömötlö ineū-euṅ nö in yik tölūöi anāi, hö-ö pöri anga-aṅ nö ṙonglö nö in yik mu-urĕh tölūöi tak. Ngaich Tāvit nö vīlen ò nö i kui yik amahten ò.

²⁴Asaĕl, kahëm Yôap töhĕng tak aṅ in yik tölūöi anāi; Elhēnan ök kikōnyö kūön Tōtō aṅ Petlihem,

²⁵Samāh ök aṅ Harōt, Elīka ök aṅ Harōt;

²⁶Heles ök aṅ Paltī, Irā ök kikōnyö kūön Ikkes aṅ Tēkōa;

²⁷Apiēsör aṅ Anatòt, Mepunāi ök aṅ Hūsat;

²⁸Salmòn ök aṅ Ahoh, Maharai ök aṅ Netōfah;

²⁹Helep ök kikōnyö kūön Pēanah aṅ Netōfah, Ittāi ök kikōnyö kūön Rīpāi aṅ Kipiā aṅ i kūön Penyamin;

³⁰Penāya aṅ Piratōn, Hittai aṅ i nup töhëmlö mak i Kāas,

³¹Apīalpön aṅ Arpāt; Asmāvet aṅ Pahūim,

³²Eliahpā aṅ Salpòn, yik kikōnyö kūön Yāsen, Yônatan;

³³Samāh aṅ Harar, Ahīam ök kikōnyö kūön Sārar aṅ Harar;

³⁴Elifëlet ök kikōnyö kūön Ahaspāi, ök kikōnyö kūön Mēakah, Eliām ök kikōnyö kūön Ahitōfel aṅ Kilō;

³⁵Hesrō aṅ Kārmel, Pēarāi aṅ Arpī;

³⁶Ikal ök kikōnyö kūön Nātan aṅ Sopāh Pēnī aṅ Kāt;

³⁷Sēlek aṅ Amön, Naharāi ök aṅ Pirōt, kameun lanaklö Yôapök kikōnyö kūön Serūya;

³⁸Irā ök aṅ Itrī, Karep ök aṅ Itrī;

³⁹Yuriā ök Hītait: ṙòkhöre nö lūöi anāi sat.