Read Car_Nicobarese 2 SAMUĔL 24 Bible Online

2 SAMUĔL 24 - Car_Nicobarese bible

2 SAMUĔL 24

¹Ngaich hēk nö hūlö kūö ngam tanānyö ngam Mā Tēv nö in Israĕl, ngaich vīhöt ellōn Tāvit anga-aṅ nö lā-al cha, nö ngö ṙô, Kuṙòh, kaheuk ṙôken Israĕl, Yūtā inrē.

²Ngö ṙô ngaich ök rācha tö Yôap ök yöngkūö kumyung, ök mi-in ò, Kuṙòh keuheūt kūö nup miyöngö Israĕl, löktö kūö Tën tölngö kūö Pīrsiā, kaheuk yip tarik yī-ö, hòṅ chu akahalōn tö ṙôken yip tarik

³Ngaich ngö ṙô Yôap tök rācha, Ṙūötö ṙôken, vē tarik An ngam Mā Tēv ngam Tēv meh, öp töng sitih ṙôken, nö hēngòng tumvan hēngòng, meūkö e An yēḵ ngam Mā chu ngam rācha: kūöyòh ang pöri ngam mā chu ngam rācha nö ngatī lōn tö e?

⁴Öt anhôngen pöri ngam rācha tö Yôap tö yip tahëng inrē yöngkūö kumyung. Ngaich ang Yôap tö yik yöngkūö kumyung nö kiröönngöre nö ṙā-ang i kūö ök rācha, nö kaheuk yik tarik Israĕl.

⁵Havāngngö kui Yôtön cha-a, ngaich iyöngtöre nö i Arōer, lahāmö töp elpanam ök më-el lōn ök achāṙö Kāt i Yēsör inrē:

⁶Sölta cha-a ngaich nö i Kilīöt ip panam Tahtimhòtsī; sölta inrē cha-a nö i Tën yĕn vintakūö inrē nö i Sītōn,

⁷Sölta inrē cha-a nö ip töngëḵ chūök kumyung i Tūrös, i nup elpanam yip Hivait inrē, tö yip aṅ Kanā-an: chuh lā lòhngö cha-a inrē tö Yūtā, i Pīrsīpā.

⁸Ngaich hē cha nö keuheūt töng panam, yih cha-a ngaich nö i Yerusalem, unôichrit tö machūötöre chumngëṅtö nët anāi sakāmö inrē.

⁹Ngaich Yôap nö kētö ṙôken yik tö kaheūkö tarik nö ik rācha: ngaich yik i Israĕl nö hëvhör ṙòng köṅny töt pa-ekūö tarik yik tösanëtu; fënòng köṅny yik tarik aṅ Yūtā.

¹⁰Chökö ellōn ngaich Tāvit unôichrit ò nö kaheuk yik tarik. Ngö ṙô ngaich Tāvit tö ngam Mā Tēv, Pōihangṙen chin köölö fālen im kahëken chu: vë-ekūö meh pöri chū-ö töngamuh, Ō Mā Tēv, öm kavalngö ngih tökööl ngòh tarik meh; tön ngaich chin kulō-òv inlahen.

¹¹Ngaich hē Tāvit nö chōholre tö peuheū, yih ngaich ngam ṙô ngam Mā Tēv nö in Kāt ök pròfĕt ök mī-in Tāvit mameuk, nö ngö ṙô,

¹²Kuṙòh vë-ekūö Tāvit man, Ngö ṙô An ngam Mā Tēv, Lūöi nup tī chu in meh; hēngö katöllö më-eṅ in u, hòṅ chu tī tö e in meh.

¹³Chalô ngaich Kāt nö in Tāvit, ngaich vë-eny nang ò nö ngö ṙô tö ò, Kô-òren hòng min nö sat samyeūheu inyāichö nö yih nö in meh im panam meh? Hēk hō ömeh lūöi chumngëṅtö falngöre i kūö yip lā-al meh i saha cha nö lū-u meh? Hēk lūök sumkam hòng kô-òren öp invah tölëlngökūö im panam meh? Halēnlö e man, ngaich ngëichkö öp sanap ṙô kum chu min in ò öp tamīnten chu.

¹⁴Ngaich ngö ṙô Tāvit tö Kāt, El tökihngen chin: hökngen hī yēḵ fuk eltī ngam Tēv; sā nup neūkölōn ò nö töpōyen; uh chin yēḵ inrē fukngö eltī tarik.

¹⁵Lökten ngam Mā Tēv nö tīntö invah tölëlngökūö nö i kui Israĕl löktökūö peuheū söl ip ṙētak e nö halēniyö: ngaich kapah yik tarik umuk löktökūö Tën sölngö nö i Pīrsīpā, sat anāi köṅny tum tak tarik.

¹⁶Hē ngam ma-ahānga nö hateutnyö këlre nö kū-ötö Yerūsalem nö halëlngö e, havanrit lōn re ngaich ngam Mā Tēv tö ngam töchōich, ngaich ngö ṙô tök ma-ahānga ök mahalëlngö yik tarik, Ngö tölngö ngaich, ṙatö këlre man ngaich. I chūök pumṙōng sāiny Araunah ök Yepus ök ma-ahānga ngam Mā Tēv.

¹⁷Ngaich Tāvit nö vë-ekūö ngam Mā Tēv hē ò nö meuk ök ma-ahānga ök famëlngö yik tarik, nö ngö ṙô, Yĕh meuk, chū-ö chin tököölö fālen, chū-ö inrē töminôṙô: në sīṅp pöri, asuh ap tī u anū-ö? Vë-ekūö meh chin in chu an yēḵ ngam kël meh, i patī ök yöng chu inrē.

¹⁸Yih ngaich Kāt nö in Tāvit ik sakāmö angū-ö, ngaich ngö ṙô tö ò, Kuṙòh asöklö tahāklö ngam Mā Tēv man i chūök pinṙōngö sāiny Araunah öp Yepus.

¹⁹Asā ṙô Kāt ngaich Tāvit nö kiröönngöre, sā chöngö ngam Mā Tēv.

²⁰Ngëicha ngaich Araunah, ngaich meuk ök rācha nö yih nö kū-ötö in ò, tö yik tarik ò: kunyī-inyre ngaich Araunah sōntökūöre ngaich nö el tumlat nö i kūö ök rācha.

²¹Ngö ṙô ngaich ang Araunah, Kūöyòh ang ngam mā chu ngam rācha nö yih nö i ngòh tarik re? Ngö ṙô ngaich ang Tāvit, Hòṅ havah ngam chūök pinṙōngö sāiny meh chin, öich vīlö tahāklö ngam Mā Tēv, hòṅ ngam invah tölëlngökūö nö asöki nö öt i më tarik.

²²Ngö ṙô ngaich Araunah tö Tāvit, Hökngen ngam mā chu yēḵ ngam rācha nö kē nup tölöök tölōn ò nö tökētu: Yĕh meuk, minë kōiny nuā nö töföngö tökētu, minë chōn ngam chūök pinṙōngö sāiny inrē tö minë chehen minë kōiny nuā inrē nö ngòh:

²³Ō rācha, ṙòkhöre nun në nö kētu tö Araunah nö im rācha. Ngaich ngö ṙô Araunah tök rācha, Hō-o tī meh An yēḵ ngam Mā Tēv ngam Tēv meh.

²⁴Ngaich ngö ṙô ök rācha tö Araunah, Hö-ö; hòṅ havaha e chin in meh nö ṙāyu; öt rēhĕn chin hòṅ kētö töt ṙāyu töföngö tökētu im Mā Tēv ngam Tēv chu. Lökten ang Tāvit nö havah ök chūök pinṙōngö sāiny tö nup kōiny nuā nö taneūi anāi siköl ṙāi tö rupīö.

²⁵In e tī ngaich Tāvit nö vīlö tahāklö ngam Mā Tēv ngaich kētö töföngö tökētu, kētu tökētu kui ngam panam nö im Mā Tēv, asökiröön ngaich ngam invah tölëlngökūö nö ṙā-ang in Israĕl.