Read Car_Nicobarese 2 SAMUĔL 3 Bible Online

2 SAMUĔL 3 - Car_Nicobarese bible

2 SAMUĔL 3

¹Marô-òten ngaich ök kinyūngö tö yik aṅ patī Sôl nö lā-al yik aṅ patī Tāvit: kalēḵ kalēḵlöre ngaich ang Tāvit: öt kalēngöre pöri yik aṅ patī Sôl.

²Kayônyu ngaich nö i Hepròn yik kikōnyö kūö Tāvit: Amnön ök lanòh, kayônyö Ahinôam ök aṅ Yesrīl;

³Chilīöp ök innëtö kūö ò, kayônyö Apīkēl ök pīhö Nēpòl aṅ Kārmel; Apsalòm, ök linūöyö kikōnyö kūön Mē-akah ök kikanö, kūön Tālmai ök rācha aṅ Kēsör;

⁴Atōniya, finënö kikōnyö kūön Hakit; tinneūyö Sĕfātia kikōnyö kūön Apītöl;

⁵Itarēm tinfūölö kūön ök pīhö Tāvit, Eklah, Kūön Tāvit yin cha-a töfönyu nö i Hepròn.

⁶Isaha ök kinyūngö tö aṅ patī Sôl nö lā-al aṅ patī Tāvit, ang Apnör nö vī-ilre nö kalēḵ nö i patī Sôl.

⁷Hē e ök hĕng tak töng töl nö pīhö Sôl, öp tö minënyuvö tö Rispā, kikānö kūön Ayā, ngaich ngö ṙô Ispōset tö Apnör, Kūöyòh öm chuh in öp töng töl pīhö ök yöng chu?

⁸Līn ngaich ang Apnör tökūö minë ṙô Ispōset, ngaich ngö ṙô, Kui am öich chū-ö öich aṅ Yūtā? Hameuktö neūkölōnre chin tö ngamuh i patī Sôl ök kikōnyö yöng meh, in yip makalaha ò, in yip hol ò inrē, öich öt kēten meh eltī Tāvit, ngaich sön më-eṅ ṙô-òv tö chu fāluṙen in ngòh kikānö öich sūöchka ing sakāmö.

⁹Ngatī tī an yēḵ ngam Tēv tö Apnör, hēk samötlöng inrē, yē chu min öt ngati tī tö ò, sā ṙô ngam Mā Tēv nö chūökūṙô nö in Tāvit;

¹⁰Öich kēngö ngam pūlngö nö ṙā-ang patī Sôl, ngaich asöklö ngam kantēra Tāvit nö i kui Israĕl i kui Yūtā inrē, löktökūö Tën sölngö nö i Pīrsipā.

¹¹Ngaich anga-aṅ nö ötkô nö sap ṙô Apnör tö tahëng ṙô, pò ò nö pa-ekūö tö ò.

¹²Tīnngö vame-eny nang Tāvit ngaich ang Apnör nö ngö ṙô nö ṙôtö ṙô ò, Panam chīöng ngih? Ngö ṙô inrē, Hanôltöre man in chu yĕh meuk, in meh an ngam kël chu min, nö kēten Israĕl nö ṙòkhöre nö in meh.

¹³Ngaich ngö ṙô anga-aṅ Hôṅ yĕh; vītenre chin nôlta in meh; hĕng pöri öp lōn chu in meh, nö tö ngö, öt meuk kūö chu man min, yē meh öt urĕh kumten Maiköl öp kūön Sôl kikānö, ip hē meh min yih meuk kūö chu.

¹⁴Tīnngö vame-eny nang Ispōset ngaich Tāvit, ök kikōnyö kūön Sôl, nöngö ṙô, Kēten Maiköl öp pīhö chu öp töhapīhtu nö in chu nö ṙôngu ṙāi tö laneūchlö kūö chehen aṅ Filistain.

¹⁵Tīnngö kamë-eṅren ò ngaich Ispōset nö ṙā-ang ik pīhö ò ang Piltiel ök kikōnyö kūön Lā-is.

¹⁶Hōlu anga-aṅ tök pīhöre, höng paneuinygöre nö kirööngngöre, tömrit ò inrē nö tölngö Pahūrim. Ngaich ngö ṙô Apnör tö ò, kuṙòh, havan man. Havanritre ngaich anga-aṅ.

¹⁷Ve-ekūö yik mā ngaich ang Apnör aṅ Israĕl nö ngö ṙô, Lukkenre yin misī hòṅ rāchavö tö Tāvit nö kui yīö:

¹⁸Ngaich pöichö ngatī yin yēḵ ngaich töngamuh: tön ngö ṙô an ngam Mā Tēv tö Tāvit, Ṙānyen yip tarik Israĕl chin min löktö eltī öp tarik chu Tāvit ṙā-ang eltī yip Filistain, ṙā-ang eltī yip tökunyaha elmat tö cha inrē nö ṙòkhöre.

¹⁹Vëhöt el nang yik aṅ Penyamin inrē ang Apnör: Vë höt el nang Tāvit inrē ang Apnör nö chuh Hepròn tö nup tölöök i Israĕl, i patī Penyamin inrē nö keuheūtlöre.

²⁰Yih ngaich ang Apnör nö in Tāvit nö i Hepròn, nët anāi hol ò tarik. Vī nyā-aṅkūö Apnör ngaich Tāvit tö yik hol ò inrē.

²¹Ngö ṙô ngaich Apnör tö Tāvit, Hòṅ hōklöre chin öich ngaich, öich hamūl tö yip Israel ṙòkhöre nö im rācha ngam mā chu, hòṅ cha min nö kīlēḵngôre nö in meh, hòṅ meh inrē më-eṅ hayöng i kui hakô-ònglōnre. Tīnngen Apnör ngaich Tāvit; i kumchikṙen ngaich anga-aṅ nö kiröngöre.

²²Yĕh meuk, yih ngaich yik tarik Tāvit tarik Yô-ap inrē nö ṙa-ang i kinlöönö panam holre, ngaich pōyen kum tö nuk pôḵ re: hö-övö pöri ngaich Apnör nö in Tāvit nö i Hepròn; pòn ngaich anga-aṅ nö tīnngörit ò, ngaich kiröönngöre anga-aṅ nö i kumchikṙen re.

²³Hē yanīhih Yô-ap tö yik hol ò inrē kumyung, ngö ṙô cha-a nö ve-eny nang Yô-ap, Yih ök kòl taheui Apnör ök kikōnyö kūön Nör, nö im rācha, ngaich anga-aṅ nöng tīnngörit ò, ngaich ök pöchö yih nö im kumchikṙen.

²⁴Ngaich yihtöre Yô-ap nö ik rācha, ngaich ngö ṙô, Sitih inlahen öm taheui? Yĕh meuk, yih ök taheui Apnör nö in meh; ngaich kūöyòh më-eṅ tinngörit ò, ngaich ök yih nö marôvat?

²⁵Akahalōn man tö Apnör öp kikōnyö kūö Nör, tö ò nö yih nö mahachīlö meh töhòṅ akahalōn inrē tö kū-ö meh tö yanīhih meh inrē, hòṅ akahalōn inrē tö nup taṙòkhöre la-en meh.

²⁶Ngaich hē Yô-ap nö kunyī-inyre nö ṙā-ang in Tāvit, tīnngö vame-eny nang Apnör anga-aṅ, ngaich kumten ò cha-a nö ṙā-ang ip mak Sīrah: hö-ö pöri Tāvit nö akahalōn tö e.

²⁷Ngaich hē Apnör nö havan nö i Hepròn, sarōkngen ò Yô-ap nö ellōn kūö ök inkūp nö hòṅ hiṙeūtkôre nö vë-ekūö ò, in e ngaich anga-aṅ nö sapnyö aich ò, lökten ò ngaich nö kapah, tökūö mahām ök kahëm ò Asahĕl.

²⁸Unôich ngaich hē Tāvit nö hāṅngö e, ngö ṙô anga-aṅ ngaich, Hö-ö chin chū-ö fāluṙen i kūö ngam Mā Tēv tö ngih pūlngö chu inrē i mahām Apnör ök kīkōnyö kūön Nör, Söl môkö örheūheu:

²⁹Hökngen e nö fuk kui Yô-ap, fuk kui yip aṅ patī yöng ò inrē nö ṙòkhöre; uh pöchö nö hĕng hang tak aṅ patī Yô-ap öp tö kūönu, hēk töyeūnyu, hēk maharônhaka nö i kui kinchīṙöre, hēk töfukngö tökūö fël, hēk töhāṅten tö nyā-aṅvkūö.

³⁰Fëli ang Apnör tö Yô-ap tök kahëm ò inrē Apisai, pò ò nö kapahatī nö ik kinnyūngö tö Asahĕl ök kahëm cha.

³¹Ngaich ngö ṙô Tāvit tö Yô-ap, tö yik tarik inrē hol ò nö ṙòkhöre, Tikaichngö inyut re yin kahumlöre inrē tö sāk, sanòkngen Apnör. Tömrit ök chūök kupah ök rācha Tāvit.

³²I Hepròn cha-a ngaich nö lāpngen Apnör: pōitô ngaich ök rācha nö peuiny nö i kui ök anūlö Apnör; ṙòkhöre inrē yik tarik nö peuiny.

³³Harāmö Apnör inrē ök rācha nö ngö ṙô, Hōtu ök Apnör nöng sā kin- paha tökulō-ov?

³⁴Hö-ö nuk kël meh nö nyëkö, Ötrēhĕn nuk kalröön meh nö halöki: sā fanukngö tarik man i kūö vē kūön tötlöök, ngatī fanuk- ngö me-eṅ. Ngaich ṙòknyöre ṙô yik tarik nö peūnyan nö hēk.

³⁵Yihtör ngaich yik tarik nö ṙòkhöre nö hōten Tāvit nö nyā-aṅvkūö isaha e nö ṙòngmö sakāmö; chūökuṙô pöri Tāvit ngö ṙô, Ngatī tī An yēḵ ngam Tēv tö chu, hēk mötlö inrē, yē chu kalahkö nyā-aṅkūö, hēk öp yô-òv nö pòrô, hanöng saha sanipti ngam tavūöi.

³⁶Ṙòkhöre ngaich yik tarik nö akahalōn tö e, ngaich ṙāmölōn cha-a tö e: nup töng sitih tī ngam rācha ṙòkhöre yip nö ṙāmölōn.

³⁷Lökten ngaich yik tarik nö ṙòkhöre tö yik aṅ Israĕl inrē nö akahalōn ik sakāmö angū-ö tö ngam rācha nö öt anga-aṅ famëlngen Apnör ök kikōnyö kūön Nör.

³⁸Ngö ṙô ngaich ök rācha tö yik tarik re, Öt akahalōn öyih tö ök kūön rācha hĕng tak tökiröng tarik in Israĕl nö fukngö, ing taheui sakāmö?

³⁹Öt kalĕ-en chin chū-ö i ngih sakāmö, pòrô rācha ngaich öich hachāmö kui; yahlö kumlēḵ yin vē kikōnyö kūön Seruya tö chu; reushö vē töla-evṙen An yēḵ ngam Mā Tēv tö tötlöök sā nup öt lanöökö ò.