Read Car_Nicobarese 2 SAMUĔL 4 Bible Online

2 SAMUĔL 4 - Car_Nicobarese bible

2 SAMUĔL 4

¹Ngaich hē Ispōset ök kikōnyö kūön Sôl, nö hāngö Apnör nö kapah nö i Hepròn, öt kalēkngöre ngaich nuk kël ò, ngaich ṙòkhöre yik aṅ Israĕl nö kihngen.

²Nët taka nak tarik yöng kūö kumyung in Ispōset, ök kikōnyö kūön Sôl: Pē-anā minënyi ök hĕng tak, Rikap minënyi ök tahëng taka nak kikōnyö kūön Rimòn aṅ Pīrōt aṅ i yik kūön Penyamin: (pò Pīrōt inrē nö kaheuktu nö i Penyamin.

³Pāngö yik aṅ Pīrōt nö i Kitēm, ngaich in e nö iyöng söl ik sakāmö angū-ö.)

⁴Hĕng tak kūön ök Yônatan tö kikōnyö, ök kūön Sôl, tök tölūmö kalröön. Taneui höny samyeūheu anga-aṅ hē hināngö nā Sôl nāṅ Yônatan nö i Yesrīl, ngaich kē an ök maharūkan, falngöre ngaich: ngaich kūö ò nö kurāten nö falngöre, sukngöre ngaich anga-aṅ, kētöre ngaich nö karòk. Mēfipōset minënyö ò.

⁵Ngaich nak kikōnyö kūön Rīmòn nak Pīrōt nāṅ Rikap, Pē-anā inrē, nö kiröönngöre ngaich yih i nö i patī Ispōset hē ṙānāchö ngam sakāmö, i saha ò nö heūheure tö sakāmö.

⁶Ngaich yih cha-a nö umuh nö el milūkö ök patī, nö sā kamë-eṅrö sāiny; i aich ò tī cha-a ngaich nö sapngen ò: falngöre ngaich Rikāp tö kahëm re nā Pē-anā.

⁷Hē cha nö kuhēthötre nö el ngam patī i saha ò nö hulalhakaṙen në el chaman re el urôhò mahaṙòh, sapngen ò cha-a ngaich nö fëlngen ò, ṙökngö kui ò inrē, ngaich kē ök kui ò, ngaich kiröönngöre nö hĕng mitööm röön nö lök el talöökö Arapā.

⁸Kētö ök kui Ispōset cha-a ngaich nö in Tāvit, nö i Hepròn ngaich ngö ṙô tök rācha, Yĕk meuk ngih kui Ispōset ök kikōnyö kūön Sôl, tökunyaha elmat tö meh, ök chamöh ngam nômö meh; havahlöng vah an ngam rācha ngam mā chu tö ngam Mā Tēv nö in Sôl ing tögamuh sakāmö in yip kūön ò inrē.

⁹Ngaich Tāvit nö sapṙô nā Rikāp nā Pē-anah tö kahëm re, nak kikōnyö kūön Rimòn aṅ Pīrōt, nö ngö ṙô tö cha, Sā ngam Tēv nö tö-aṅ ngam ṙāmānyö ngih nômö chu nö ṙā-ang i nup kanihngen nö ṙòkhöre,

¹⁰Hē ök töhĕng tak vame-eny nang chu nö ngö ṙô. Yĕh meuk, kapah ök Sôl, nö tö kumtö tölöök inhānga tölōnre, kē an ngaich chu-ö ngaich fëlngen ò i Siklek angū-ö ök reneushö ò tö tī chu nö ṙāi nuk tölöök inhānga kum ò.

¹¹Öt mötlö hòng, yē tötlöök tarik nö fëlngö tölöök tarik nö el chamamre nö el patīre, röh öich töngamuh hòṅ havëköp mahām ò eltī nā, öich kēngen nā ṙā-ang i kūö ngih tumlat?

¹²Tölṙô yik ṙāl tarikre ngaich Tāvit, fëlngen cha ngaich achā-a, rökngö kël cha inrē tö nuk kalröön cha, ngaich kiseutngen cha nö i kui öp mak i Hepròn. Kē ök kui Ispōset pöri cha-a ngaich lāpngen e nö i Hepṙòn el anūlö Apnör.