Read Car_Nicobarese 2 SAMUĔL 5 Bible Online

2 SAMUĔL 5 - Car_Nicobarese bible

2 SAMUĔL 5

¹Ngaich yihtöre nö ṙòkhöre yik miyöngö Israĕl nö in Tāvit nö i Hepròn, ngaich ngö ṙô nö vë-ekūö ò, Yĕh meuk, tangëṅ meh in īhö alaha meh inrē.

²Hē Sôl misī nö rācha nö i kui ih, ngaich höng më-eṅ mahachōnyen ih kamëhetnen ih inrē i Israĕl: ngaich ngö ṙô ngam Mā Tēv tö meh, Ha-āṅhal vē tarik chu man min Israĕl, ngaich më-eṅ min inrē yöngṙen i kui Israĕl.

³Lökten yik mā aṅ Israĕl nö yihtöre nö ik rācha nö i Hepròn; ngaich ök rācha Tāvit nö i Hepròn nö i kūö ngam Mā Tēv nö vī kinlēḵngô nö in cha; hacham el kui Tāvit chā-a ngaich nö rācha nö i kui Israĕl.

⁴Lūöi anāi samyeūheu ṙēti ang Tāvit hē ranulten ò nö hayöng, ngaich fën anāi samyeūheu anga-aṅ nö hayöng.

⁵Sat samyeūheu tafūöl chumngëṅtö anga-aṅ nö hayöngö Yūtā nö i Hepròn: lūöi anāi lūöi nö i Yerusalem i kui Israĕl nö ṙòkhöre tö Yūtā inrē.

⁶Ngaich ök rācha tö yik tarik ò inrē nö chuh Yerūsalem nö lā-al yik Yapus, yik aṅkūö ngam panam: yik tö ngö ṙô tö Tāvit, Yē meh öt kēngö yip tötmeuk tökaròk inrē ihih, pòn tötkô Tāvit tö lōn cha nö kuhēthötre nö in e.

⁷Sön pöri ang Tāvit nö kē ngam töngëḵ Siyôn: angū-ö an elpanam Tāvit.

⁸Ngaich ngö ṙô Tāvit ik sakāmö angū-ö, Öp famëlngö yip Yapus, hökngen ò nö reunglöre nö löklö el ngam talöökö mak, nö fël yip tökaròk yip töt meuk inrē, yip surīkhö Tāvit, Öp löknyô cha nö ngö ṙô, Tötmeuk yip umuh tökaròk inrē; ötkô anga-aṅ nö kuhēthötre nö el ngam patī.

⁹Ngaich Tāvit nö iyöng el ngam tögëḵ chūökö, ngaich kaheūkö e nö elpanam Tāvit. Löktökūö Millō tī ang Tāvit nö havīngö kaha e nö lātuhēt.

¹⁰Kiröng kirönglöre ngaich ang Tāvit pò ngam Mā Tēv yip tömaṙôngö nö in ò.

¹¹Ngaich ök rācha aṅ Tūrös nö tīnngö vamë-eny nang Tāvit tö nuk chōn Sītör, tö yik vamī chōn inrē tö yik mamān ihōng patī inrē: ngaich cha-a nö mānlö patī Tāvit.

¹²Ngaich akahalōn Tāvit tö ngam Mā Tēv nö haköpngen ò nö rācha nö i kui Israĕl, tö ò inrē nö hapōilö ngam pūlngö ò tö kūö yik tarik Israĕl.

¹³Ṙūölö tum tak kahëre ngaich Tāvit tö töng töl pīhöre tö pīhö ò inrē aṅ Yerūsalem, unôichrit yanihih ò nö ṙā-ang Hepròn: kikōnyö yik umuh ngaich kikānö inrē töfötnyu kūön Tāvit.

¹⁴Në nun yih minë-eny cha yik töfötnyu kūön ò nö i Yerūsalem; Samuā, Sōpāp, Natān, Sòlòmön inrē,

¹⁵Iphār, Elaisuā; Nīfek, Yafiā inrē;

¹⁶Elaisama, Eliata, Elifëlet inrē.

¹⁷Ngaich hē yik aṅ Filistain nö hāngö cha nö hacham kui Tāvit nö rācha nö i kui Israĕl, ṙòkhöre ngaich yik aṅ Filistain nö chöhö Tāvit; hē Tāvit nö hāngö e, kiröönngöre ngaich nö chuh ël ök chūök kumyung.

¹⁸Yih ngaich yik aṅ Filistain ngaich pirātngöre nö el achāṙö Rifēm.

¹⁹Ngaich ngö ṙô Tāvit nö hatöntöre nö im Mā Tēv, Kiröönngöre öichu lā-al yip Filistain? Kēten cha öm min eltī chu? Ngaich ngö ṙô ngam Mā Tēv tö Tāvit, Kiröönngöre man kuṙòh: tön öt hō chin öt kēten yip Filistain nö eltī meh.

²⁰Yih ngaich Tāvit nö i Pē-ālperasim, ngaich umuh nö fëlö cha; ngö ṙô ngaich anga-aṅ, Piyāyi yik lā-al chu tö ngam Mā Tēv nö i kūö chu, sā panôpnyö kūö mak. Lökten ò nö kaheuk minënyö ök chūökö Pē-alperasim.

²¹Ṙāngö nuk insātev re cha-a ngaich nö umuh, ngaich kē-ĕ u hēḵ Tāvit tö yik tarik ò inrē.

²²Hēk yik Filistain nö yih, ngaich pirātngöre nö el achāṙö Rifēm.

²³Ngaich hē Tāvit nö hatöntöre nö im Mā Tēv, ngaich ngö ṙô anga-aṅ, Uh man kiröönngöre; havīngöre pöri lā uk cha, ngaich löktö i nup malparī chōn öm peūtöre in cha.

²⁴Ngaich ngö angū-ö min, yē meh hang ṙô röön kumröönngöre nö lātulöng i nup malparī chōn, ngaich möl pömchö hōklö alaha re: tön ngaich an min ngam Mā Tēv nö urēhĕkūö meh nö fël yip kumyung aṅ Filistain.

²⁵Ngaich ngatī ang Tāvit, sā tinöölô ò tö ngam Mā Tēv; ngaich löktö kūö Kīpā söl Kēsör nö fëlngö yik Filistain.