Read Car_Nicobarese 2 SAMUĔL 7 Bible Online

2 SAMUĔL 7 - Car_Nicobarese bible

2 SAMUĔL 7

¹Ngaich hē ngam rācha nö iyöng el patī re, ngaich ngam Mā Tēv inrē nö kētö haneūheu ò nö ṙā-ang in yip lā-al ò mahavīlen ò.

²Ngö ṙô ngaich ngam rācha tö Natān ök pròfĕt, Yĕh meuk, iyöng el patī chin chū-ö tö chōntö sītör ngaich pöri ngam kasòng ngam Tēv nö iyöng ël ranangkūö.

³Ngaich ngö ṙô Natān tö ngam rācha, kuṙòh, la-evṙen man tö nup ellōn meh; tön in meh An ngam Mā Tēv.

⁴Ngaich im hē e angū-ö hatööm ngam ṙô ngam Mā Tēv nö yih nö in Natān, nö ngö ṙô,

⁵Kuṙòh, vë-eny nang ap tarik chu Tāvit, ngö ṙô An ngam Mā Tēv, Mānlö patī chu öm min tö chūök chu iyöng?

⁶Tö chu yih öt iyöng el patī hēten tö ök sakāmö chu kēnyen vē kūön Israĕl nö ṙā-ang Aikup, söl i ngih sakāmö, höng kiröön pöri el rūkui el inrūkui inrē.

⁷Keuheūtngöre chūök el nup talöökö chu kiröönngöre hol yip kūön Israĕl, ngaich ṙô-òv hòng chū-ö hĕng höiny milôhò in yip miyöngö Israĕl, yip tö tö tölô chu nö ha-aṅlö yip tarik Israĕl, öich ngö ṙô, Kūöyòh öi öt mānlö patī chu tö töchōntö sītör?

⁸Yĕh lökten töngamuh öm ngö ṙô töp tarik chu Tāvit, Ngö ṙô An ngam Mā Tēv yip tömaṙôngö, Kē-ĕ meh chin misī ṙā-ang i nāhal sīṅp, ṙā-ang i tinömkörit sīṅp pò meh hōtu rācha i kui vē tarik chu, i kui Israĕl:

⁹In meh chin ip töng kū-ö meh ngaich kiröönngöre, ngaich chin inrē rökngen yip lā-al meh nö ṙā-ang i kūö meh; vīlen meh chin min inrē kiröngö minë-eny, sā minë-eny yip tökiröng i kūö ngih tumlat.

¹⁰Vītö chūök yip tarik re chin min Israĕl, teūchten cha min inrē, hòṅ cha nö iyöng ip kanahngenre chūökö, ngaich öt hēk min nö halöinykaṙen; öt rēhĕn min yip kūön tötlöök nö hēka nö hakihten cha, nö sā ik lā urĕh.

¹¹Ngaich sā chu inrē löktökūö ik sakāmö chu tölṙô mahayöng i kui yip tarik Israĕl; vīten meh chin min heūheure ṙā-ang in yip lā-al meh. Hēk inrē ngam Mā Tēv nö vë-eny nang meh tö ngam Mā Tēv min nö vīlö patī meh.

¹²Yē nup sakāmö min nö keuheūten, ngaich më-eṅ min haṙòh in yip yöngre, ngaich min unôichrit meh, öp lāmök nyö ellōn meh min, haköpngö öp pūlngö ò chū-ö min inrē.

¹³Anga-aṅ öp min mamānlö patī nö i minë-eny chu, haköpngö ngam kantēra ngam pūlngö ò chin min nöng örheūheu.

¹⁴Yöng ò chin min chū-ö kūön chu min inrē anga-aṅ: yĕn lūölkö tökööl anga-aṅ chinökṙen ò min chū-ö aṅtī tö tinkung tarik aṅtī tö chanökṙen inrē aṅ in yip kūön tarik;

¹⁵Hö-ö pöri min öp miṙēlōn chu nö ṙāngen ò, nö sā tī chu kēngen e ṙā-ang in Sôl, ök töṙā-aiṙen tö chu nö ṙā-ang i kūö chu.

¹⁶Vītu öp min patī meh ngam pūlngö min inrē nö örheūheu nö köp nö i kūö meh: haköpiyö min ngam kantēra meh nöng örheūheu.

¹⁷Sā në ṙô nö ṙòkhöre, sā në tömeūkö nö ṙòkhöre, ngatī ṙô Natān nö in Tāvit.

¹⁸Kuhēthötre ngaich ök rācha Tāvit, ngaich ūichngöre nö i kūö ngam Mā Tēv: ngö ṙô ngaich anga-aṅ, Achīö öich chū-ö, Ō Mā Tēv asuh ap inrē patī chu töp lökten meh kēten chu ngih rô-òl kūö ngaich?

¹⁹Ngaich angū-ö ngih nö ṙòngmö tökūönö nö i mat meh, Ō Mā Tēv: ngaich hĕnghöre ṙô-òvö më-eṅ inrē töp patī ngòh tarik meh öp tö-öl tö yīhih; ngaich angū-ö inrē, Ō Mā Tēv nö tösā chöngö tarik?

²⁰Suh kanô-òṅ ang Tāvit nö ṙô-òv nö hēk nö in meh? Ō Mā Tēv, tö-akahakūö man tö ngòh tarik meh.

²¹Kūö ngam ṙô meh, sā öp lōn meh inrē, öm tītö ngih tökiröng pòn hōtu ngòh tarik meh nö akahalōn tö e,

²²Lökten man tökiröng, Ō Tēv Mā Tēv: pòn öt hĕng tak tösā meh öt rēhĕn nö Tēvu hol meh, sā nuk töhāngö nö ngaich tö në el nang ih.

²³Öp yòh öp töhĕng pumnāmö tarik ing tumlat tösā vē tarik meh, tösā Israĕl, ngam töṙānyu tö ngam Tēv nö tarik ò nö vīlö minë-eny ò inrē, ngaich tī-iv inrē tö tökiröngen tö pò kūö meh pingangkūö inrē tökūö ngam panam meh, nö i kūö vē tarik meh, vē töṙānyu tö meh tö ṙā-ang Aikup, ṙā-ang i pumnāmö yip tarik, ṙā-ang i nup tēv cha inrē?

²⁴Ngaich më-eṅ inrē haköp vē tarik meh Israĕl nö tarik meh nöng örheūheu; ngaich më-eṅ inrē, Mā Tēv, vītenre Tēv cha

²⁵Ō Tēv Mā Tēv ngaich an ngam ṙô meh tö ngòh tarik meh, in öp patī ò inrē, haköpngö e man ngaich nöng örheūheu, ngaich sā ngam ṙô meh öm tī-iv.

²⁶Ngaich hökngen ngam minë-eny meh nö örheūheu nö hapōilöng, öi ngö ṙô, Ngam Mā Tēv yip tömaṙôngö An Tēv nö i kui Israĕl: haköpi min inrē nö i kūö meh ngam patī ngòh tarik meh Tāvit.

²⁷Ō Mā Tēv yip tömaṙôngö, pò meh Tēv Israĕl, ngaich öm hameukhöti i ngòh tarik meh, öm ngö ṙô Mānlö patī meh chin min: lökten ön ngòh tarik nö öt piyū-ulōn nö ngatī ṙô nö vë-ekūö meh.

²⁸Ō Mā Tēv, Më-eṅ man Tēv, kanô-en inrē në ṙô meh, ngaich më-eṅ inrē kilēḵngôre i ngòh kūönre tö ngih tölöök:

²⁹Ngaich man yēḵ lökten ṙāmölōn hakôlò ngam patī ngam tarik meh, hòṅ e nö örheūheu nö i kūö meh: Ō Mā Tēv pò meh ngaich ṙô-òv tö e: hökngen ngam inkôlò tī meh i patī ngòh tarik meh nö tökôlò tī nöng örheūheu.