Read Car_Nicobarese 1 RĀCHA 1 Bible Online

1 RĀCHA 1 - Car_Nicobarese bible

1 RĀCHA 1

¹Köiny ngaich ök rācha Tāvit sööḵngö inrē nö i samyeūheu re; ngaich cha-a nö kahumngen ò tö hilā, hö-ö pöri anga-aṅ nö ṙāich.

²Lökten yik tarik ò nö ngö ṙô tö ò, Chöhlö öp tö-ayal, rēlö hĕng tak mameukṙen ngam mā ngam rācha: hökngen ò nö sökhak nö i kūö ngam rācha, nö ôyan inrē; hökngen ò inrē nö ṙōlhak nö lā kūö ò, hòṅ ngam mā chu ngam rācha nö ṙāichta alaha.

³Lökten cha nö chöhlö tövai ṙālö kikānö nö keuheūt kūöngö Israĕl, ngaich kôtökūö tö Apīsak aṅ Sunam, ngaich kēten ò nö ik rācha.

⁴Tövai ök kikānö nö ṙālö; ngaich anga-aṅ nö ôi ök rācha, meukṙen ò inrē; hö-ö pöri ök rācha nö akahakūö tö ò.

⁵Ngaich Atōniyā ök kikōnyö kūön Hakit nö hapōilöre, nö ngö ṙô, Chū-ö chin min rācha: halēn inröl re ngaich anga-aṅ tarik inrē mī-i uk kōra, taneui anāi inrē tarik mu-urēhĕkūö ò nö fal.

⁶Öt hĕng heuh ök kikōnyö yöng ò nö ngö ṙô nö kumnyahngö lōn ò, Kūöyòh öm ngatī inlahen? Tövai ök inrē anga-aṅ nö tarik töfötnyu unôichrit Apsalem.

⁷Vë-ekūö Yô-ap anga-aṅ ök kikōnyö kūön Seruyā, Apīatör inrē ök kūönṙô: ngaich cha-a nö tömrit Atōniyā nö holṙen ò.

⁸Hö-ö pöri Sētòk ök kūönṙô, Pënāyā inrē ök kikōnyö kūön Yēhoiata, Nātan inrē ök pròfĕt Simēi, Rēi, yik tökalēḵ inrē tarik aṅ in Tāvit nö in Atōnīyā.

⁹Ṙatnyö likeun sīṅp ngaich ang Atōnīyā kōiny nuā, tö-alahavö inrē nö ik Ihong Sōhëlet, ök mi-i Enrōkel; ṙòkhöre havëti anga-aṅ tö yik kikōnyö kūön rācha mak alaha ò, ṙòkhöre inrē yik aṅ Yūtā tarik, tarik ök rācha:

¹⁰Hö-ö pöri Nātan ök pròfĕt, Pēnaya, yik tökalēḵ tarik, Sòlòmön inrē ök mak alaha ò nö havëtu.

¹¹Ngaich Nātan nö vë-ekūö Petsīpā ök kikānö yöng Sòlòmön, nö ngö ṙô, Öt hāngö Atōniyā öm më-eṅ nö hayöng, öp kikōnyö kūön Hakit, ngaich ap mā hī Tāvit nö öt akahalōn tö e?

¹²Lökten man tā-a yih, vë-ekūö meh chin, töich halēnö meh, hòṅ meh yöölen tī tö nômö re, tö nômö Sòlòmön inrē ap kikōnyö kūön meh.

¹³Kuṙòh kuhēthötre man ip rācha Tāvit, öm ngö ṙô tö ò, Mā chu, Ō rācha röh öm ngö ṙô chūöku ṙô i ngòh tarik meh kikānö, Kô-en an Sòlòmön min ngam kūön meh kikōnyö, nö hayöng min unôichrit chu, anga-aṅ ang min amūich el kantēra chu? Kūöyòh ang pökeh Atōniyā nö hayöng?

¹⁴Yĕh meuk, yē meh ṙònghöich ṙô vë-ekūö öp rācha, ngaich chū-ö min inrē yih tömrit meh, öich vë-eny nup ṙô meh nö tökô-en.

¹⁵Kuhēthötre ngaich Petsīpā nö in ngam rācha nö el unôhò: köiny ök rācha; ngaich ang Apīsak ök aṅ Sunam nö meukṙen ök rācha.

¹⁶Sōnngöre ngaich Petsīpā nö salām ök rācha. Ngö ṙô ngaich ök rācha, Asuh ap lōn meh?

¹⁷Ngö ṙô ngaich anga-aṅ, Mā chu, chūöku ṙô man im Mā Tēv ngam Tēv meh öm in ngòh tarik meh kikānö, öm ngö ṙô, Kô-en an Sòlòmön min ngam kūön meh kikōnyö nö hayöng unôichrit chu, anga-aṅ an min amūich el kantēra chu.

¹⁸Yĕh meuk, ngaich ap yih Atōniyā nö hayöng töngamuh; ngaich më-eṅ, mā chu öm rācha, öt akahalōn tö e:

¹⁹Ngaich ap yih nö pōihöiny nö ṙatnyö likeun kōiny nuā, nup tö-alahavö, sīṅp inrē ngaich ṙòkhöre havëti tö yip kikōnyö kūön rācha, Apiātör inrē ap kūönṙô, Yô-ap inrē ap yöngkūö kumyung: hö-ö pöri ngòh tarik meh Sòlòmön nö havëtu.

²⁰Ngaich më-eṅ mā chu öm rācha, öm hatīönka tö mat yip aṅ Israĕl nö ṙòkhöre, öm hōtu vë-eny nang chu töp amūich el kantēra ngam mā chu ngam rācha nö unôichrit ò.

²¹Pò e min nö yih, hē ngam mā chu ngam rācha nö haṙòh min nö in yip yöng re, ngaich chū-ö min tö ngòh kūön chu kikōnyö inrē ang Sòlòmön ai kaheuktu min tököölö fālen.

²²Yĕh meuk hē ò nö ṙòng höich ṙô nö in ök rācha, kuhēthötre ngaich ök pròfĕt Natān.

²³Ngaich cha-a nö vë-eny nang ök rācha nö ngö ṙô, Yĕh meuk ngòh pròfĕt ön ngòh Natān. Hē ò nö kuhēthötre nö i kūö ök rācha, sōntökūöre anga-aṅ nö i kūö ök rācha nö el tumlat.

²⁴Ngaich ngö ṙô ang Natān, Ō rācha, mā chu, ngö ṙô öm kaneh, Atōniyā ap min mahayöng unôichrit chu, anga-aṅ min inrē amūich el kantēra chu?

²⁵Tön ngaich ap yih ing sakāmö nö ṙatnyö likeun kōiny nuā, tö-alahavö, sīṅp inrē nö pōyen, ṙòkhöre yik kūön rācha nö havëtu, tö yip yöngkūö kumyung, Apiātör inrē ap kūönṙô; yĕh meuk, nyā yip òk inrē nö i kūö ò, ngaich ngö ṙô, Tēv, Hayööken ngam rācha Atōniyā!

²⁶Rö-ö pöri chū-ö, öich tarik meh, tö Sētòk inrē öp kūönṙô, Penayā inrē öp kikōnyö kūön Yēhōiata, tö ngòh tarik meh inrē Sòlòmön, nö havëtu.

²⁷Tī ngam mā chu öng angū-ö ngam rācha, ngaich rö-ö më-eṅ inrē hameukhömat vē tarik re töp amūich el ngam kantēra ngam mā chu ngam rācha nö unôichrit ò min?

²⁸Sapnyöre ngaich Tāvit nö ngö ṙô, Havëten Petsīpā in chu. Yihtöre ngaich anga-aṅ nö i kūö ök rācha sökhaka ngaich nö i kūö ök rācha.

²⁹Ngö ṙô ngaich ök rācha, nö chūöku ṙô nö kilēḵngôre, Sā ngam Mā Tēv nö tö-aṅ, ngam ṙamānyö ngih nômö chu nö ṙā-ang in yip tökunyaha elmat tö chu.

³⁰Kô-en chin chūöku ṙô kilēḵngôre in meh i ngam Mā Tēv, ngam Tēv Israĕl, öich ngö ṙô, Kô-en ap Sòlòmön min ap kikōnyö kūön meh nö unôichrit chu nö hayöng, ngaich ūich el kantēra chu min anga-aṅ nö ṙënngen chu; ngatī tī chin min kô-en i ngih sakāmö.

³¹Sōnngökūöre ngaich Petsīpā nö el tumlat, ngaich salām ök rācha nö ngö ṙô, Örheūheu An yēḵ ngam mā chu rācha Tāvit nö aṅ.

³²Ngö ṙô ngaich ök rācha Tāvit, Havëten Sētòk nö in chu ap kūönṙô, Nātan inrē ap pròfĕt, Penāyā inrē ap kikōnyö kūön Yēhōiata. Yihtöre cha-a ngaich nö i kūö ök rācha.

³³Ngö ṙô ngaich ök rācha tö cha, Kē yip tarik ngòh mā re yin, ha-ūichlö ap kikōnyö kūön chu Sòlòmön i uk ap köttö chu, ngaich kēten ò i uk ap köttö chu, ngaich kēten ò i Kihòn;

³⁴Hökngen Sētòk ap kūönṙô Nātan inrē ap pròfĕt nö hacham kui ò nö umuh nö rāchakūö Israĕl: föö ap römpet pöichö ngaich ngö ṙô, Tēv hayööken ngam rācha Sòlòmön.

³⁵Ngaich yī-ö min tömrit ò, ngaich yih min anga-aṅ, ngaich ūich el kantēra chu; pò ò min nö rācha nö i chūök chu: vīlen ò chin ngaich nö rācha i kui Israĕl i kui Yūtā inrē.

³⁶Ngaich Penāyā ök kikōnyö kūön Yēhōiata nö ngö ṙô nö sapṙô ök rācha, Āmen: ngatī ṙô An inrē ngam Mā Tēv, ngam Tēv ngam mā chu ngam rācha.

³⁷Sā ngam Mā Tēv misī nö im mā chu ngam rācha, ngatī An yēḵ nö in Sòlòmön hòn vīlöm kantēra ò nö kiröng tö ngam kantēra ngam mā chu rācha Tāvit.

³⁸Lökten Sētòk ök kūönṙô, Nātan inrē ök pròfĕt, Panāya inrē ök kikōnyö kūön Yēhōiata, tö yik aṅ Chērit, tö yik aṅ Pēlĕt, nö kiröönngöre, ngaich ha-ūichlen Sòlòmön nö i uk ök köttö ök rācha Tāvit, ngaich, kēten ò nö i Kihon.

³⁹Ngaich Sētòk ök kūönṙô nö kēḵ sinrōl chūök tavī-i nö el ök inrūkui, ngaich hacham kui Sòlòmön. Föö kūö römpĕt cha-a ngaich; ṙòknyöre ṙô ngaich yik tarik nö ngö ṙô, Tēv, Hayööken ngam rācha Sòlòmön!

⁴⁰Ṙòkhöre ngaich yik tarik nö tömrit ò, föö kūö nuk fanöö ngaich yik tarik ngaich pōyen ṙanāmölōn, lökten ngam tumlat nö larak tökūö ṙôktô cha.

⁴¹Ngaich ang Atōniyā, ṙòkhöre inrē yik töngööntu yik mī-in ò, nö hāngö e, tö kinheūtö kūö cha nö nyā. Ngaich hē Yô-ap nö hang ṙô ök römpet, ngö ṙô ngaich anga-aṅ, Asuh apvö angū-ö ṙënṙô nö elpanam nö taṙōlaṙen?

⁴²Ṙònghöich ṙô anga-aṅ, Yĕh meuk, yih ngaich Yônatan ök kikōnyö kūön Apiatör ök kūönṙô: ngaich ngö ṙô ang Atōniyā, Kuhēthötre man; tön tökô-en man tarik, tö kumtö tölöök inhānga.

⁴³Ngö ṙô ngaich Yônatan nö sap ṙô Atōniyā, Kô-en ap mā hī rācha Tāvit nö vīlen Sòlòmön nö rācha:

⁴⁴Ngaich ap rācha inrē nö tīnten Sētòk öp kūönṙô nö hol ò, Nātan inrē ap pròfĕt, Penāya inrē ap kikōnyö kūön Yēhōiata, tö yip aṅ Chērit, aṅ Pēlĕt, ngaich yip nö ha-ūichlen ò nö i uk ap köttö ap rācha:

⁴⁵Ngaich ap inrē Sētòk ap kūönṙô Nātan inrē ap pròfĕt nö hacham kui ò nö rācha nö i Kihon: ṙeū-eung in e yip nö ngaich nö ṙāmölōn, lökten an ngam elpanam nö takööya ṙô nö hēḵ. Angū-ö an ṙënṙô ahang yīö.

⁴⁶Ngaich ap inrē Sòlòmön nö ūich el kantēra ngam pūlngö.

⁴⁷Yih inrē yip tarik ap rācha nö hakôlò ngam mā hī rācha Tāvit, nö ngö ṙô, Vīlö minë-eny Sòlòmön an ngam Tēv meh nö samötlöng tö ngam minë-eny meh, vīlö ngam kantēra ò inrē nö kiröng tö ngam kantēra meh ngaich ap rācha nö sōntökūöre nö el chamamre.

⁴⁸Ngö ṙô inrē ap rācha, Tökôlò an yēḵ ngam Mā Tēv, ngam Tēv Israĕl, ngam töhĕng tak kahëti i ngih sakāmö tö amūich el kantēra chu, kôten nun në mat chu nö meūkö e.

⁴⁹Ṙòkhöre ngaich nö pa-ekūö yik töngööntu tö Atōnīya, choholre ngaich, ngaich nöng kö kiröönngöre yik tarik.

⁵⁰Pa-ekūö ngaich Atōniyā tökūö Sòlòmön; chōholre ngaich anga-aṅ inrē, ngaich kiröönngöre, kiṙapngö tīre ngaich nö i nuk sinrōl ök tahāklö.

⁵¹Vë-nyu ngaich angū-ö nö in Sòlòmön, nö ngö ṙô, Yĕh meuk, pa-ekūö ap Atōniyā tap rācha Sòlòmön: yĕh meuk, tön kiṙapngö tīre ap nö i nup sinṙōl ap tahāklö, nö ngö ṙô, Chūöku ṙô ap yēḵ rācha Sòlòmön nö in chu töngamuh, tö ò min nö öt fëlngö ngòh tarikre nö aṅtī tö sanët.

⁵²Ngaich ngö ṙô ang Sòlòmön, Yē ò min nö hameuktöre nö kô-en nö tarik, öt hĕng hang milööchö keūyö ap min tö tösuktöre nö el tumlat; yĕn kôtī pöri: öp tötlöök nö in ò, kapah min anga-aṅ.

⁵³Lökten ök rācha Sòlòmön nö tīnhanga, ngaich cha-a nö ṙā-ang ik tahāklö nö kēten ò. Yih ngaich anga-aṅ ngaich salām ök rācha Sòlòmön: ngö ṙô ngaich tö ò, Kuṙòh chuh patī re man.