Read Car_Nicobarese 1 RĀCHA 10 Bible Online

1 RĀCHA 10 - Car_Nicobarese bible

1 RĀCHA 10

¹Ngaich hē ök rānī aṅ Sīpā nö hang ineūnyö Sòlòmön nö i minë-eny ngam Mā Tēv, yih ngaich anga-aṅ nö kalahan tö tökihngen intönö.

²Yih ngaich anga-aṅ nö i Yērusalem nö pōyen hol röön, holre tö ūṅt nö kumtö tötahūsa, kiröngen inrē humlum, ihong inrē töpōiṙāi: ngaich hē ò nö yih nö in Sòlòmön, keuheūtnyö ṙô ellōn re anga-aṅ ngaich nö in ò.

³Ngaich Sòlòmön inrē nö keuheūtnyöre ṙô tö nup intönöre tö ò: öt hĕng töhanyāti tö ngam rācha ök töt vënyu nö in ò.

⁴Ngaich hē ök rānī aṅ Sīpā nö meuk nuk mikah Sòlòmön, meuk ök patī inrē mahānlö ò,

⁵Tö nuk nyā-aṅkūö inrē el mīs ò, tö nuk anūichö yik tarik ò inrē, tösānökö yik mā mameukṙen inrē tö hinlāṙö cha, tö yik sumlô nya-aṅkūö, töp tayôhò ò inrē nö yòhlö nö el patī ngam Mā Tēv; öt ma-alahavö ngaich anga-aṅ nö in re.

⁶Ngö ṙô ngaich anga-aṅ tök rācha, Tökô-en ineūka an ngamṙô ahang chu i panam chu, ngam mikah meh inrē.

⁷Hö-ö pöri chū-ö ṙātö ellōn re tö në ṙô, hanöng saha chu yih, meūkö e ngaich në mat chu: ngaich yĕh meuk ròngti nuk töt vënyu nö in chu: ngam mikah meh tö minë kanôlò meh nö saṙaklöng kūö tö ahang chu.

⁸Tö ṙāmölōn yin më tarik meh tö ṙāmölōn më tahölṙô meh, më tö-örheūheu nö sökhaka nö i kūö meh, më hamang ṙô ngam mikah meh inrē.

⁹Tökôlò an yēḵ ngam Mā Tēv ngam Tēv meh, ngam tökuchīkö lōn nö in meh, nö ha-ūichlen meh el kantēra Israĕl: Pô ngam Mā Tēv nö örheūheu nö hāngenlōn tö Israĕl, lökten an nö vīlen meh rācha, öm akah fālen ane inrē haṙong nup fālen.

¹⁰Ngaich anga-aṅ nö hēngòng nët anāi tālen tī tö humlum nö ik rācha, kiröngen inrē nuk tötahūsa, tö nuk ihong töpōiṙāi: öt töhēk törvö yanīhih tö ngatī ṙôken tötahūsa nö sā u nuk kahëtö ök rānī aṅ Sīpā nö in ök rācha Sòlòmön.

¹¹Nuk chōng Hairām inrē, nö kumtö humlum nö ṙā-ang Ôfir, kirööngen kum inrē tö òlmök chōn, ihong inrē töpōiṙāi.

¹²Ngaich ök rācha nö vī nuk òlmök chōn nö machööḵlö ngam patī ngam Mā Tēv, machööḵlö patī ngam rācha inrē, chōn harp inrē chōn ranöng ṙô tumkökṙôre inrē: öt töngatī-iv ṙôken òlmök chōn nö yih, öt rēhĕn nö meūkö ing töngamuh sakāmö.

¹³Ngaich ök rācha Sòlòmön nö kē-ĕkūö ök rānī aṅ Sipā tö nup töng lōn ò, nup töng havëkö ò, nö holre tö nup kahëtö Sòlòmön nö in ò raneushö, tī ò nö rācha. Havan ngaich anga-aṅ ngaich chuh panam re, anga-aṅ tö yik tarik ò.

¹⁴Tafūölòng lūöi anāi tafūöl tālen lumngan nuk humlum lamöö in Sòlòmön i töhĕng samyeūheu,

¹⁵Nö holre tö nuk kumṙen yik töha-eh nö tī-iv; tö nuk kumṙen yik mī-inyih inrē, tö nuk aṅ i yik rāchakūö yik töṙōl mihëṅṙö tarik, aṅ in yik mahayöng panam inrē.

¹⁶Nëtòng vahī Sòlòmön tö lanaklö törömö humlum: tafūlòng siköl humlum i töhĕng lanaklö.

¹⁷Lūöyòng vahī anga-aṅ tö lanaklö törömö nö humlum, lūöi pāôn (2 Kilō) humlum i töhĕng lanaklö: ngaich ngam rācha nö chaphöt u nö el ök patī chūölchōn aṅ Lepanön.

¹⁸Vī tö kiröng kantēra inrē ök rācha tökanël alafānta, ngaich haṙungtö alaha e tö töhöi humlum.

¹⁹Tafūöl nuk vanānglö ik kantēra, chuvī ök kui ök kantēra nö lā uk: kël e nuk umuh aṅngöre lā-a ik anūchö, nët nòng nuk lāyön sökhaka nö i nuk kël.

²⁰Nët sīön nuk lāyön inrē hĕng lā im lā tahëng inrē i nup tö tafūöl vanānglö: öt töngatī-ivö tövī-i i tahëng pūlngö.

²¹Ṙòkhöre inrē nö humlum nuk chūök kūö Sòlòmön nö òk, ṙòkhöre inrē nup chūökṙen el ngam patī chūölchōn aṅ Lepanön nö tötkatĕhka nö humlum: öt hĕng rupīö in u: höng öt tökaheuktuvö i nuk sakāmö Sòlòmön.

²²Pò ök rācha nö chōngu nö el mai nö i Tārsis nö hol nuk chōng Hairam: hĕng heuh i tölūöi samyeūheu nö yih nuk chōng aṅ Tārsis, kumtö humlum, rupīö, kanël Alafānta, ôinychi tökiraha kūö, fumṙëch inrē.

²³Lökten ök rācha Sòlòmön nö töyahlö kanôlò mikah inrē tö yik rācha nö ṙòkhöre ing panam.

²⁴Ṙòkhöre ngaich panam nö chöhkö kūö Sòlòmön, nö hang ṙô mikah ò inrē, öp chahap höt ngam Tēv nö ellōn ò.

²⁵Kökūmuṙen cha-a tö raneushö ò, rupīö chūökṙen humlum chūökṙen, hilā inrē lanaklö kumyung, tötahūsa, kōra, köttö, kaheuk samyeūheu inrē masūl.

²⁶Hamūl inröl inrē ang Sòlòmön tö yik tarik aṅ uk kōra: hĕng köṅny fënòng nuk inröl in ò nët sīön köṅny tarik aṅ uk kōra yik ṙahātö ò nö el nuk elpanam chūök inröl, in ök rācha inrē i Yērusalem.

²⁷Ngaich vī rupīö ök rācha nö i Yērusalem nöng sā ihong, vī nuk sitör anga-aṅ nö sā sikamôr chōn nö pōiyen nup më-el töṙā-akūö panam.

²⁸Nuk kōra inrē kahë Sòlòmön nö ṙā-ang Aikup; ngaich yik mī-inyih tarik ök rācha nö kē-ĕ u nö ṙōl kiteūm, hēngö ṙāi ngih töhĕng kiteūm.

²⁹Hĕng nòng ök inröl ṙamā-ang Aikup tötafūölòng siköl ṙāi tö rupīö hĕng nòng ök kōra inrē töhĕnghöt ṙòng taneui anāi: ṙòkhöre yik rācha aṅ Hitait, rācha aṅ Siriā inrē nö kumten u nö ṙā-ang panam re.