Read Car_Nicobarese 1 RĀCHA 11 Bible Online

1 RĀCHA 11 - Car_Nicobarese bible

1 RĀCHA 11

¹Ṙōl tak hanāngenlōn ngaich ök rācha Sòlòmön tö kikānö aṅ tahëng, nö hol ök kikānö kūön Fërō, kikānö aṅ Mô-ap, aṅ Amön, aṅ Itöm, aṅ Sītōn, aṅ Hitait inrē.

²Aṅ i yik pumnāmö tarik yik ṙô ngam Mā Tēv nö in yik kūön Israĕl nö ngö ṙô, Uh yin chuh in cha, un rēhĕn cha-a inrē nö yih nö in yīö: tön öthōḵ yip min nö öt havööngökūö ellōn yīö nö i nup tēv cha: i hanāngenlōn re ngaich Sòlòmön nö köpngö nö in në.

³Sātòng pīhö anga-aṅ, tö kūön rācha, lūöiyòng yik pīhö töl: ngaich yik pīhö ò nö havööngö kūö ellōn ò.

⁴Ngaich ngö inlahen angū-ö, hē Sòlòmön nö ngaich nö köiny, yik pīhö ò nö havööngö kūö ellōn ò nö i tahëng tēv; ngaich ök ellōn ò nö ötteung nö im Mā Tēv ngam Tēv ò nö sā ök ellōn Tāvit ök yöng ò.

⁵Tömrit Astòròt ngaich ang Sòlòmön, ök kikānö tēv aṅ Sitōn, tömrit Milkòm inrē ök sin-òkkūö aṅ Amön.

⁶Ngaich Sòlòmön nö chōichö inlahen nö i kūö ngam Mā Tēv, öt keuheūtlöre nö tömrit ngam Mā Tēv nö sā ök yöng ò Tāvit.

⁷Vīlö chūök Kīmòs ngaich ang Sòlòmön nö i törunglöre öp sin-òkkūö aṅ Mô-ap, nö in ök rung lā kūö Yērusalem chūök Mōlek inrē ök sin-òkkūö aṅ in yik kūö Amön.

⁸Kö vīlö chūökṙen yik pīhöre anga-aṅ aṅ tahëng nö föng tötahūsa kētö tökētu inrē nö in nup tēv cha.

⁹Līn ngaich ngam Mā Tēv nö in Sòlòmön, kūö ök ellōn ò nö havööngökūöre nö ṙā-ang im Mā Tēv, ngam Tēv Israĕl, ngam tömeūkö tö ò nö nët heuh.

¹⁰Ngaich hōten ò nö in e angū-ö nö un tömrit tahëng tēv; hö-ö pöri anga-aṅ nö haköp ngam chöngö ngam Mā Tēv.

¹¹Lökten ngam Mā Tēv nö ngö ṙô tö Sòlòmön, Kūö meh ngaich ngatī inlahen, ngaich man ötköp tö ngam kinlēḵngô aṅ in chu minë chöngö chu inrē, minë inchöngten meh tö chu, kô-òtī chin min tikaichngö ngam pūlngö meh nö ṙā-ang in meh, ngaich kēten e min ip tarik meh.

¹²Hö-ö pöri öich tī-iv min tö e i në sakāmö meh, tökūö ök yöng meh Tāvit: lökngö eltī öp kūön meh pöri chū-ö min tikaichngö e.

¹³Hö-ö pöri chū-ö min tikaichngö ngam pūlngö nö ṙòkhöre: hĕnghata miyöngö chin min ip kūön meh kikōnyö, tökūö öp tarik chu Tāvit, kūö Yerusalem inrē ngam atöllö chu.

¹⁴Hachohlö lā-al Sòlòmön ngaich ngam Mā Tēv, tö Hatat aṅ Itöm: kūön ök rācha ök anga-aṅ aṅ Itöm.

¹⁵Pòn ngö inlahen angū-ö, hē Tāvit nö i Itöm, Yôap inrē nö yöngkūö kumyung nö kiröönngöre nö lāpngen yik töfëli, ngaich keuheūngöre vah tī nö fëlngö yik kikōnyö aṅ Itöm;

¹⁶(Pò Yô-ap tö yik Israĕl inrē nö tafūöl chumngëṅtö nöng ngöh nö umuh, hanöng saha tī ò nö keuheūtngörevah tī nö rökngen yik kikōnyö aṅ Itöm;)

¹⁷Falngöre ngaich ang Hatat, anga-aṅ tö yik rīkre aṅ Itöm yik tarik ök yöng ò nö hol ò, nö chuh Aikup; ṙòngmö kun nyīö ang Hatat.

¹⁸Chōholre cha-a ngaich nö ṙāngö Mitīa, ngaich yih nö i Paran: kē tarik cha-a ngaich i Paran nö hol cha, yih cha-a ngaich nö i Aikup, in Fërō ök rācha aṅ Aikup; ök töhĕnghata nö kētö patī ò, ngaich halēnngen ò tö nya-aṅkūö, kētö taṙeū ò inrē.

¹⁹Kôtökūö ang Hatat nö i kūö Fërō tö neūkölōn, lökten anga-aṅ nö kētö pīhö ò tök kanānö ök pīhö ò, kanānö ök ranī Tahpenes.

²⁰Ngaich ök kanānö Tahpenes nö kūönu nö in ò tö Chenupat ök kūön ò kikōnyö, ök töṙā-ai kūö nö pōḵ tö Tahpenes nö i patī Fërō: ngaich ang Chenupat nö i patī Fërō nö hol yik kūön Fërō kikōnyö.

²¹Ngaich hē Hatat nö hang nö i Aikup tö Tāvit nö ngaich nö haṙòh nö in yik yöng re, tö Yô-ap inrē nö kapah ök yöngkūö kumyung, ngö ṙô ngaich Hatat tö Fërō, Hökngen chu ngaich kiröönngöre, hòṅ chu chuh panam re.

²²Ngaich ngö ṙô Fërō tö ò, Nö yòh öp hanāten meh in chu, yĕh meuk, töp lökten meh lukkenre hòṅ chuh panam re? Öt hĕng, ngö ṙô anga-aṅ nö sapṙô: Höng hökngen chu pöri më-eṅ kiröönngöre.

²³Hachohlö lā-al ò inrē ngam Tēv tö tahëng, Rēsön ök kikōnyö kūön Eli-āta, ök famalngöre nö ṙā-ang in ök mā ò Hatātēsör rācha aṅ Sōpah.

²⁴Ngaich anga aṅ nö hamūl tarik nö in ò vītöre anga-aṅ inrē nö yöngkūö kumyung, hē Tāvit nö fëlngen cha yik aṅ Sōpāh yih cha-a ngaich nö i Tamaskös, ngaich iyöng in e, ngaich hayöng nö i Tamaskös.

²⁵Ngaich anga-aṅ nö lā-al Israel i rô-ötö nuk sakāmö Sòlòmön, holre anū-ö tö nuk inkihten tī Hatat; kunyah elmat anga-aṅ tö Israel, hayöng inrē nö i kui Siriā.

²⁶Ngaich ök kikōnyö kūön Nēpòt ang Yērōpō-am, aṅ Ifrēm, i Serīta, ök tarik Sòlòmön, yöng ò ök kikānö tö minënyu tö Sërūya, ök tafīösi kikānö, anga-aṅ inrē mahachônglö këlre nö lā-al ök rācha.

²⁷Angū-ö ön ngih chööḵnyö ò nö hachônglö kël re nö lā-al ök rācha: vīlen Milō ang Sòlòmön, vītit nuk tömëngö inrē im elpanam ök yöng ò Tāvit.

²⁸Tökalēḵ ök Yërōpōām nö tarik nö tö-eūnyu: meuk ök ṙāl tarik ang Sòlòmön nö tökën ngaich kēten ò anga-aṅ nö yöngṙen nuk la-en i patī Yôsĕf.

²⁹Ngaich ngö inlahen angū-ö hē e, hē Yërōpōām nö kiröönngöre nö ṙā-ang Yerūsalem, ngaich kôtökūö ök pròfĕt tö ò nö el talöökö ang Ahīchā aṅ Sītōn; hayūtöre ang Ahīcha tö tufömngöre hilā; höng nët tak acha-a nö elkahôyö.

³⁰Kētö tīre ngaich Ahīcha nö ik tufömngöre hilā ök i alaha ò, tikaichngö e ngaich nö nët sīön tit.

³¹Ngaich ngö ṙô anga-aṅ tö Yërōpōām, kētösöm milôhò man më-eṅ: tön ngö ṙô an ngam Mā Tēv, ngam Tēv Israel, Yĕh meuk, tikaichngö ngam pūlngö chin min ṙā-ang eltī Sòlòmön, ngaich kētö tösöm miyöngö in meh;

³²(Höng hĕng miyöngö in pöri min anga-aṅ tökūö ök tarik chu Tāvit, kūö Yērusalem inrē, ngam katöllö chu elpanam in nup miyöngö Israĕl nö ṙòkhöre:)

³³Pò cha nö ṙāngen chu, ngaich salām Astòret öp kikānö tēv aṅ Sītōn, Kēmòs öp tēv aṅ Mô-ap, Milkòm inrē öp tēv yip kūön Amön; ngaich rö-ö cha-a nö lök eltalöökö chu, nö la-evṙen tö nup töhuveū nö i mat chu, öt haköp në chöngö chu në inkaha fālen inrē aṅ in chu, nö sā ök yöng ò Tāvit.

³⁴Hö-ö pöri min chū-ö keuheūtngöre tī tö ngam pūlngö nö ṙā-ang eltī ò: vīlen ò pöri min chū-ö kūön rācha i rô-òtö sakāmö ò nö aṅ, tökūö ök tarik chu Tāvit ök katöllö chu, pò ò nö köptī tö në inchöngten aṅ in chu në chöngö chu inrē:

³⁵Kē ngam pūlngö pöri min chū-ö ṙā-ang eltī öp kūön ò kikōnyö, ngaich kētö e min in meh, minë tösöm miyöngö.

³⁶Hĕng miyöngö tī öich kē-ĕtī ip kūön ò, hòṅ Tāvit ngam tarik chu nö örheūheu nö ëāṅvö nö i kūö chu nö i Yērusalem, ngam katöllö chu elpanam chūök ṙinātö ngam minënyö chu nö umuh.

³⁷Ngaich kē-ĕ meh min chū-ö ngaich hayöng më-eṅ min asā nup lōn meh nö ṙòkhöre, ngaich rācha min inrē i kui Israĕl.

³⁸Ngaich mīnö angū-ö, yē meh min hang nup tinöölôre tö chu, ngaich lök el në talöökö chu, ngaich la-evṙen inrē tö töhuveū nö i mat chu, öm haköp në chöngö chu tö në inchöngten inrē aṅ in chu, sā ök tarik chu Tāvit; hòṅ chu min in meh, ngaich mānlö patī meh min tö tököp, sā ti chu mānlö patī Tāvit, ngaich kēten Israĕl min nö in meh.

³⁹Kūö e chin min hakihten öp kūön Tāvit, hö-ö pöri nö töng örheūheu.

⁴⁰Lökten ang Sòlòmön nö lukkenre nö fëlngen Yērōpōām: choholre pöri Yērōpōam, ngaich falngöre nö i Aikup, nö in Sissak ök rācha aṅ Aikup, ngaich i Aikup anga-aṅ hanöng saha kinpaha Sòlòmön.

⁴¹Nuk inlahen Sòlòmön, nuk la-en ò inrē nö ṙòkhöre, tök mikah ò inrē röh nuk nö kūichiyö nö i mat līpöre nup inlahen Sòlòmön?

⁴²Ök hē Sòlòmön inrē nö hayöng nö i Yērusalem nö i kui Israel nö ṙòkhöre nö fën anāi samyeūheu.

⁴³Haṙòh ngaich Sòlòmön nö in yik yöngre ngaich lāpi nö ik elpanam Tāvit ök yöng ò: ṙënngen ò ngaich Rēhōpoām ök kikōnyö kūön ò nö hayöng.