Read Car_Nicobarese 1 RĀCHA 13 Bible Online

1 RĀCHA 13 - Car_Nicobarese bible

1 RĀCHA 13

¹Yĕh meuk, hĕng tak ök tarik ngam Tēv umuh yih nö ṙā-ang Yūtā nö i Pētĕl tökūö ṙô ngam Mā Tēv: sökhaka ang Yērōpōam nö ik tahāklö nö föng lōpān.

²Ngaich anga-aṅ nö hū-a, nö lā-alkūö ök tahāklö nö i ṙô ngam Mā Tēv, nö ngö ṙô, Ō tahāklö, tahāklö, ngö ṙô An ngam Mā Tēv: Yĕh meuk fötnyu öp min nyīö hĕng tak i patī Tāvit, Yôsīā tö ngö minënyi öp min nö kētö yip kūönṙô minë kui rung nö tökētu, yip famöng lōpān nö ël meh, föng tangëḵ tarik yip min nö ël meh inrē.

³Ngaich im sakāmö angū-ö anga-aṅ nö kētö minkahngö, nö ngö ṙô, Angū-ö ön ngih minkahngö ngam ṙô ngam Mā Tēv: yĕh meuk, larāki an min ngam tahāklö, ngaich minë tisum ël e min nö ahōngi.

⁴Ngaich ngö inlahen angū-ö, hē ngam rācha nö hangṙô ök tarik ngam Tēv, ök ṙô ò nö lā-alkūö ngam tahāklö i Pētĕl, ngaich ang Yērōpōam nö hanyāknyö kël re nö im tahāklö, nö ngö ṙô, Kē an. Ngaich ök kël ò nö nyôngö ök nyahatī ò, lökten anga-aṅ nö ötkô nö kirūtlö e nö hēk nö in ò.

⁵Larak inrē ök tahāklö, ngaich nuk tusum nö ahōngköṅny nö ṙā-ang ël ap tahāklö, sā ök minkahngö kahëtö ngam tarik ngam Tēv nö lökten i ṙô ngam Mā Tēv.

⁶Ngaich ngö ṙô ök rācha nö sapṙô ök tarik ngam Tēv, Havëkö inṙētö chu im Mā Tēv ngam Tēv meh, vë-elkui chu inrē, hòṅ ngih kël chu nö lööken nö hēk. Ngaich ngam tarik ngam Tēv nö vë-ekūö ngam Mā Tēv, ngaich ök kël ök rācha nö lööken nö hēk, ngaich sāre angū-ö tö lā-urĕh.

⁷Ngö ṙô ngaich ök rācha tök tarik ngam Tēv, Yih man tā-a i patī in chu, hakaplö nômöre, hòṅ chu inrē kētö raneushö meh.

⁸Ngaich ök rācha, Yē meh haròngtö tīre kētö ap patīre in chu, hö-ö chū-ö hòṅ kiröönngöre in meh, öt rēhĕn hòṅ nyā-aṅvkūö öt rēhĕn hòṅ òk mak i ngih chūökö:

⁹Pò e nö ngatī nö chöngö nö in chu i ṙô ngam Mā Tēv, nö ngö ṙô, Uh man nyā-aṅvkūö, un rēhĕn òk mak um rēhĕn havan ngam talöökö ngam löktö yīhih meh sin.

¹⁰Tahëngö talöökö ngaich anga-aṅ nö kiröönngöre, ngaich öt havan ngam talöökö ngam löktö ò sin nö yih nö i Pētĕl.

¹¹Ngaich hĕng tak ök umuh tököiny pròfĕt i Pētĕl; hĕng tak inrē ök yamih aṅ i yik kūön ò tökeuheūtnyöre ṙô nö in ò tö nuk la-en ök tarik ngam Tēv nö i Pētĕl ik sakāmö angū-ö: nuk ṙô ò nö vë-ekūö ò nö ik yöngre kikōnyö.

¹²Ngaich ngö ṙô ök yöng cha kikōnyö tö cha, Lökngö yih ök taheui? Meukngö talöökö ök tarik ngam Tēv öi nö kiröönngöre, yik kikōnyö kūön ò, ök yamih nö ṙā-ang Yūtā.

¹³Ngaich ngö ṙô anga-aṅ tö yik kūön re kikōnyö, Hanāmlö uk öp köttö chu. Lökten cha nö hanāmlö uk ök köttö ò; i uk ò ngaich anga-aṅ.

¹⁴Ngaich kiröönngöre anga-aṅ nö fachūngörit ök tarik ngam Tēv, ngaich kôtökūö tö ò nö ūichhakṙen nö elkatòh ök tarapīn chōn: ngö ṙô ngaich anga-aṅ tö ò, Më-eṅ öm tarik ngam Tēv öm yamih ṙā-ang Yūtā? Ngaich ngö ṙô anga-aṅ, Chū-ö chini.

¹⁵Ngö ṙô ngaich anga-aṅ tö ò. Yih man tā-a i patī in chu, öm nyā-aṅvkūö.

¹⁶Ngaich ngö ṙô anga-aṅ, Öt töhōtu chin havan in meh, öt rēhĕn hōtu kiröönngöre in meh: öt rēhĕn chin hōḵ nyā-aṅvkūö öt rēhĕn hōḵ òk mak in meh i ngih chūökö:

¹⁷Pò e nö ngö ṙô nö in chu nö i ṙô ngam Mā Tēv, Uh man nyā-aṅvkūö um rēhĕn òk mak umuh, um rēhĕn hōḵ havan löktö ip talöökö meh sin öm yih.

¹⁸Ngaich ngö ṙô anga-aṅ tö ò, Pròfĕt chin chū-ö inrē tösā meh; ngaich hĕng tak ök ma-ahānga vamë-eṅkūö chu nö i ṙô ngam Mā Tēv, nö ngö ṙô, Kumten ò man hēk hol meh nö i patī meh: hòṅ ò nö nyā-aṅvkūö òk mak inrē. Minyôinyaṅ pöri anga-aṅ nö in ò.

¹⁹Lökten ò ngaich nö havan nö in ò, nyā-aṅvkūö ngaich nö i patī ò, òk mak inrē.

²⁰Ngaich ngö inlahen angū-ö, hē cha nö ūichhakṙen nö ik mīs ngam ṙô ngam Mā Tēv nö yih nö ip pròfĕt ök mahavanrit ò:

²¹Ngaich anga-aṅ nö hūḵnyôre nö ik tarik ngam Tēv ök yamih nö ṙā-ang Yūtā, nö ngö ṙô, Ngö ṙô An ngam Mā Tēv, Pò meh ngaich ahôngö ṙô ngam Mā Tēv, ngaich rö-ö öm köp tö ngam chöngö hinôtö meh tö ngam Mā Tēv ngam Tēv meh,

²²Ngaich pöri havan, ngaich nyā-aṅvkūö òk mak inrē ing chūökö chūök ṙô ò tö meh, nö ngö, Un nyā-aṅvkūö, un òk mak inrē; hö-ö ap min tökapah alaha meh nö löö el anū-lö yip muvöhngö meh.

²³Ngaich ngö inlahen angū-ö, tö kinheūṅtökūö ò nö nyā-aṅvkūö, kinheūṅtökūö ò inrē nö òk, ngaich anga-aṅ nö hanāmlö uk ök köttö re nö chūök ök pròfĕt ök töhavānörit tö ò.

²⁴Hē ò ngaich nö kiröönngöre, el talöökö ngaich ök lāyön nö höngkūö ò, kapahakūö ngaich tö ò: ngaich ök alaha ò nö el talöökö nöng hulalhakṙen, in e inrē ök köttö nö sökhakṙen; sökhakṙen inrē ök lāyön nö ik alaha.

²⁵Yĕh meuk, lök umuh yik tarik, ngaich meuk ök alaha nö hulalhakṙen nö eltalöökö, sökhakṙen inrē ök lāyön nö ik alaha: ngaich yih cha-a ngaich vë-eny e nö elpanam i chūök ök pròfĕt nö iyöng.

²⁶Ngaich hē ök pròfĕt nö hāngö e ök mahavanrit ò nö ṙeū-eung el talöökö, ngö ṙô ngaich anga-aṅ, Ap tarik ngam Tēv ap ap ma-ahôngö ṙô ngam Mā Tēv: lökten ngam Mā Tēv nö kēten ò nö ik lāyön ök chumṙësan kapahatī inrē tö ò, sā ngam ṙô ngam Mā Tēv, ngam ṙô ò nö in ò.

²⁷Vë-ekūö yik kūön re ngaich anga-aṅ kikōnyö, nö ngö ṙô, Hanāmlö uk öp köttö chu Hanāmlö uk ò cha-a ngaich,

²⁸Kiröönngöre ngaich anga-aṅ ngaich kôtökūö tök alaha ò nö hulalhakṙen nö el talöökö, sökhakṙen inrē ök köttö tök lāyön nö ik alaha: öt kā ök alaha ök lāyön öt rēhĕn nö chiṙes ök köttö.

²⁹Ngaich ök pròfĕt nö kē ök alaha ngam tarik ngam Tēv, chaplö e ngaich nö i uk ök köttö, ngaich kumten e nö havan: yih ngaich anga-aṅ nö elpanam ök tököiny pròfĕt, nö haṙivlōn, ngaich lāpngen ò.

³⁰El ök anūlöre tī anga-aṅ nö ṙātö ök alaha ò; ngaich cha-a nö haṙivhen ò, nö ngö ṙô, Aōla, hol chu!

³¹Ngaich ngö inlahen angū-ö, tö kinheūṅten ò nö lāpngen ò, ngaich vë-ekūö yik kūön re anga-aṅ kikōnyö, nö ngö ṙô, Yē chu kapah, lāpngen chu pöichö el ngih anūlö i chūök ngam tarik ngam Tēv nö lāpi; ṙātö nup tangëḵ chu nö hol nup tangëḵ ò:

³²Tön kô-en an min nö teungtökūö ngam ṙô ò nö hūḵa i ṙô ngam Mā Tēv nö lā-alkūö ngam tahāklö i Pētĕl, lā-alkūö nup patī inrē i kui rung nup i Samariā elpanam.

³³Unôichrit e ang Yērōpoām nö öt havanköritre nö ṙā-ang im tötlöök talöökö re, hēk pöri anga-aṅ nö ahetlö aṅ i yip töng tarika nö kūönṙô nup kui rung chūökö, öp töng lōn ò: pòn hōtu nö kūönṙô-òvö nup i kui rung chūökö.

³⁴Ngaich angū-ö nö tökööl nö i patī Yërōpōam, nö rinökngen e, inhatngö e inrē nö ṙā-ang i kūö ngam tumlat.