Read Car_Nicobarese 1 RĀCHA 14 Bible Online

1 RĀCHA 14 - Car_Nicobarese bible

1 RĀCHA 14

¹Hē e Apīchā ök kikōnyö kūön Yērōpoām nö vahavö.

²Ngö ṙô ngaich Yërōpōam tök pīhöre, Vë-ekūö meh chin, Chōholre, öm harīkngö inlahenre, hòṅ meh öt akahka öm pīhö Yērōpoām: kiröönngöre ngaich öm chuh Sailō; yĕh meuk, Ahīchā ap umuh ap pròfĕt, ap töṙôten chu öich chū-ö nyin rācha i kui vē tarik.

³Kē kum re tö rutri söm, tölakāsa pikoh inrē, hĕng pumlönö inrē hönī, kuṙòh chuh in ò: vë-eny nang meh ap min töp lainyngen ngòh nyīö min.

⁴Ngaich ngatī inlahen ök pīhö Yērōpōam, chōholre ngaich anga-aṅ ngaich kiröönngöre nö chuh Sailō, yih ngaich nö i patī Ahīchā. Hē e ngaich Ahīchā nö ötkô nö meuk; pò nuk mat ò nö meuichhak kūö ṙētö ò.

⁵Ngö ṙô ngaich ngam Mā Tēv tö Ahīcha, Yĕh meuk yih an ngam pīhö Yērōpoām nö hatöntöre nö in meh tö inlahen ap kūön ò kikōnyö; pò ò nö vahavö: ngö ṙô pömchö tö ò; Tön ane ap min, hanyatkö el mat nö sā tahëng kikānö yē ò min nö kuhēthötre.

⁶Ngaich ngö inlahen angū-ö hē Ahīchā nö hang ṙô röön ò, tök kunhēthöt ò nö ik inkūp, ngö ṙô ngaich anga-aṅ tö ò, Kuhēthötre man, më-eṅ pīhö Yērōpoām; kūöyòh öm töltöre öm sā tahëng? Kūöre chin tīntu in meh kumtö tölangan inhāṅnga.

⁷Kuṙòh, vë-eny nang Yērōpōam, Ngö ṙô An ngam Mā Tēv, ngam Tēv Israĕl: Pò chu urōsen hapōilen meh ṙā-ang i yip tarik, ngaich vīlen meh yöngṙen vē tarik chu Israĕl,

⁸Ngaich tikaingö ngam pūlngö ṙā-ang i patī Tāvit, ngaich kētö e in meh: ngaich sönngenre më-eṅ öt sā ök tarik chu Tāvit, ök mahaköp në chöngö chu, ök tamömrit chu inrē nö holtö ellōn re öt töchīpö la-en inrē nö i kūö chu;

⁹Ngaich pöri më-eṅ tôlö la-en tö töchōich tö yik mu-urēhĕkūö meh, ngaich man inrē vī tahëng tēv, nup insā tēv töhaṙöichö mās, öm harunnyö lanīnö chu, ngaich öm lā uk re tī kavalngen chu:

¹⁰Lökten, yĕh meuk kētö töchōich chin min i kui ap patī Yērōpōam ngaich rökngen kikōnyö nyīö min nö ṙā-ang i patī Yērōpōam, ök tö-öpikūö ök töṙā-ayö inrē nö elkahôyö in Israĕl, hatngö tī chin min fòhngö ngam patī Yērōpōam sā tī ap tarik nö fòhngö sôḵ, hanöng saha e nö ngaich nö hö-öv.

¹¹Öp tökapah aṅ in Yērōpoām nö elpanam kā-ayö min tö am; öp tökapah inrē nö elkahôyö sôki min tö nup chehechōn aṅ el kuföt: pò e nö ṙô ngam Mā Tēv

¹²Chōholre man lökten chuh patīre: yē minë kalröön meh nö vānghöt nö elpanam ngaich min ap nyīö nö kapah.

¹³Ngaich ṙòkhöre min Israĕl nö haṙivhen ò, ngaich lāpngen ò; pòn höng anga-aṅ kūön Yërōpōam min chamuh el anūlö; pòn in ò nö el patī Yērōpoām, nö kôti öp nö rahëichyen öp tökööl lā im Mā Tēv, ngam Tēv Israĕl;

¹⁴Hēk inrē min ngam Mā Tēv nö hachohlö rāchare nö i kui Israĕl, öp ramökngen ngam patī Yērōpōam min ip sakāmö angū-ö. Röh öng nö ngaich nöng ing töngamuh?

¹⁵Pò ngam Mā Tēv min nö tiṙōlngen Israĕl, sā öp tafūyö tökahööka nö el mak; ngaich min anga-aṅ nö teuklen Israĕl nö ṙā-ang ing tölöök panam, ngam kahëtö ò nö in yik muvöhngö cha, ngaich pirātngen cha min lā muh tö ngam Yufrātīs; pò cha nö vīlö Asērim re, ngaich harunnyö lanīnö ngam Mā Tēv.

¹⁶Ngaich anga-aṅ min nö ṙā-ang tīre tö Israĕl tökūö nuk tökööl Yērōpoām, nuk tī ò tökööl nuk aṅtī ò inrē nö vīten Israĕl nö köölöfālen.

¹⁷Chōholre ngaich ök pīhö Yërōpōam, ngaich kiröönngöre, yih ngaich nö i Tīrsa: ngaich hē ò nö sölta nö elmilūkö ök patī, kapah ngaich ök nyīö.

¹⁸Ṙòkhöre ngaich yik aṅ Israĕl nö lāpngen ò, haṙīvhen ò inrē; sā ngam ṙô ngam Mā Tēv, ngam ṙô ò nö löktö eltī ök tarik ò Ahīchā ök pròfĕt.

¹⁹Ṙòkhöre nuk inlahen Yērōpoām, inlahen ò nö kiyung, inlahen ò inrē nö hayöng, yĕk meuk, kūichi nuk nö i mat Līpöre Kinṙötngö yik rācha Israĕl.

²⁰Nuk sakāmö Yërōpōam nö hayöng nët anāi nët samyeūheu: haṙòh ngaich anga-aṅ nö in yik muvöhngöre hayöng ngaich ök kūön ò kikōnyö nö ṙënngen ò ang Nātap.

²¹Ngaich Rēhōpoām ök kikōnyö kūön Sòlòmön nö hayöng nö i Yūtā. Fën anāi kahuk samyeūheu ṙēti ang Rēhōpoām hē ranulten ò nö hayöng, satsīön samyeūheu anga-aṅ nö hayöng nö i Yerusalem ök elpanam atöllö ngam Mā Tēv nö i nuk miyöngö Israĕl nö ṙòkhöre, i chūök ṙinātö öp minënyö ò nö umuh: Nāmah minënyi ök yöng ò kikānö aṅ Amön.

²²Ngaich Yūtā nö la-evṙen tö töchōich nö i kūö ngam Mā Tēv: ngaich acha-a nö harunnyö kumnyahlōn ò nö i nuk tökööl cha nuk kahëken cha, nö mötlö tö nuk kahëken yik muvöhngö cha.

²³Pò cha inrē nö vī-il chūökö nö i kui rung, elkatòh tö ayālö rōi chōn inrē;

²⁴Ngaich inrē nö umuh im panam yik chamô-òṅ kikōnyö: ṙòkhöre la-en yip tahëng mihëṅṙö tarik yik tö-ahōṙi tö ngam Mā Tēv nö urēhĕkūö yik kūön Israĕl.

²⁵Ngaich ngö inlahen angū-ö im tinneui samyeūheu Rēhōpoām nö rācha, ang Sissak rācha aṅ Aikup nö yih nö lā-al Yērusalem:

²⁶Ngaich anga-aṅ nö kē nuk rupīö elpatī ngam Mā Tēv, nuk rupīö el patī ngam rācha inrē; urōsen anga-aṅ nö keuheūtlöre tī: kēḵ nuk humlum inrē anga-aṅ nö ṙòkhöre nuk lanaklö kumyung vahī Sòlòmön.

²⁷Ngaich ök rācha ang Rēhōpoām nö vī ṙënngen u tö mās lanaklö kumyung, ngaich kēten u nö in yik mākūö yik amahati, yik amahtö kūö inkūp patī ngam rācha.

²⁸Ngaich ngö inlahen angū-ö, i tum van ngam rācha nö kuhēthötre nö el ngam patī ngam Mā Tēv, kē-ĕ u ngaich yik amahatī, ngaich havanten u hēk nö el ök urôhò amahati.

²⁹Ṙòkhöre nuk inlahen Rēhōpoām, ṙòkhöre nuk la-en ò inrē, röh nuk nö kūichiyö nö i mat Līpöre Kinṙötngö yip Rācha aṅ Yūtā?

³⁰Ngaich örheūheu ök kinyūngö ihôi Rēhōpoām tö Yērōpoām.

³¹Haṙòh ngaich Rēhōpoām nö i yik muvöhngöre, ngaich lāpi nö in yik muvöhngöre ik el panam Tāvit: Nāmah minënyi ök yöng ò kikānö aṅ Amön. Hayöng ngaich Apīyāh nö ṙënngen ò, ök kikōnyā kūön ò.