Read Car_Nicobarese 1 RĀCHA 16 Bible Online

1 RĀCHA 16 - Car_Nicobarese bible

1 RĀCHA 16

¹Ngaich ngam ṙô ngam Mā Tēv nö yih nö in Yēhū ök kikōnyö kūön Hananī nö lā-al Pāsa nö ngö ṙô.

²Pò chu uroh hapōilen meh ṙā-ang el tumlat, ngaich vīlen meh yöngṙen i kui vē tarik chu Israĕl; ngaich më-eṅ lök el talöökö Yērōpoām, öm vīten vē tarik chu Israĕl nö köölöfālen, nö harunnyö lanīnö chu tö nup tökööl cha;

³Yĕh meuk keuheūtngöre tī chin min fòhngen Pē-asā töp patī ò inrē; ngaich vīten ngam patī meh chū-ö min nö sā ngam patī Yērōpoām ngam kikōnyö kūön Nēpòt.

⁴Ök tökapah in Pē-asā nö elpanam kā-ayö min tö nup am; öp tökapah in ò nö el kahôyö sôki min tö chehechōn aṅ el kuföt

⁵Nuk inlahen Pē-asā, nup lā-en ò inrē, tök kumlēḵ ò, röh nuk nö kūichi nö i mat Līpöre Kinṙötngö yik Rācha aṅ Israĕl?

⁶Haṙòh ngaich ang Pē-asā nö in yik yöngre, ngaich lāpi nö i Tirsa; hayöng ngaich Elah ök kikōnyö kūön ò nö ṙënngen ò.

⁷Hēḵ inrē, nö löktö eltī ök pròfĕt Yēhū ök kikōnyö kūön Hananī nö yih ngam ṙô ngam Mā Tēv nö lā-al Pē-asā, lā-al öp patī ò inrē, nëtre nö kūö nuk tötlöök vahīṙen ò nö i kūö ngam Mā Tēv, nö harunnyö lanīnö ò tö nup la-en minë kuntī ò, nö sā ngam patī Yērōpoām, kūö ò inrē nö fëlngen ò.

⁸Im innët anāi tafūöl samyeūheu Asā ök rācha aṅ Yūtā, rultenre Elah ök kikōnyö kūön Pē-asā nö hayöng nö i kui Israĕl nö i Tīrsa, ngaich nët samyeūheu anga-aṅ nö hayöng.

⁹Ngaich ök tarik ò Simrī, yöngkūö nuk töròngtī inröl ò, nö ahôngen ò: ṙònghöchṙen anga-aṅ nö i Tīrsa, mihīyōyöre nö ka-eūt nö el patī Arsā ök mākūö yik aṅ patī i Tirsa:

¹⁰Kuhēthötre ngaich Simrī ngaich fëlan, kapaha tī tö ò ik tönët anāi sat samyeūheu Asā nö rācha nö Yūtā, hayöng ngaich Simrī nö ṙënngen ò.

¹¹Ngaich ngö inlahen angū-ö, hē ranulten ò nö hayöng, i lööṙen hē ò nö ūichlöre nö el kantēra, ngaich anga-aṅ nö keuheūtngörevah tī tö yik aṅ patī Pē-asā: öt hĕngtit tak kikōnyö nyīö töṙātu tö ò, öt rēhĕn aṅ i yik mak alaha ò, öt rēhĕn aṅ i yik hol ò.

¹²Ngatī hanatngö tī ang Simrī tök patī Pē-asā, sā ngam ṙô ngam Mā Tēv, ngam ṙô ò nö lā-al Pē-asā nö lökten in Yēhū ök pròfĕt,

¹³Kūö nuk tökööl Pē-asā, nuk tökööl Elah inrē ök kikōnyö kūön ò nuk tökööl tī cha, nuk aṅtī cha nö vīten Israĕl nö köölö fālen, nö harunnyö lanīnö ngam Mā Tēv, ngam Tēv Israĕl i nuk chanök alaha in cha.

¹⁴Nuk inlahen Elah, nuk tī ò inrē nö ṙòkhöre, röh nup nö kūichi nö i mat Līpöre Kinṙötngö Rācha aṅ Israĕl?

¹⁵Im tönët anāi samyeūheu Asā rācha aṅ Yūtā ang Simrī nö sat sumkam nö hayöng nö i Tīrsa. Hē e yik tarik nö iyöngtöre nö lā-al Kīpetòn, ök panam aṅ Filistain,

¹⁶Ngaich yik tarik yik mī-iyöngtöre nö hang öp ṙô tö ngö, Ahôngö chöngö ap Simrī, ngaich inrē nö fëlngö ök rācha: lökten yik aṅ Israĕl nö ṙòkhöre nö vīlen Omrī, ök yöngkūö kumyung, ik sakāmö angū-ö nö rācha nö i kui Israĕl nöng ik elyöngö.

¹⁷Kiröönngöre ngaich Omrī nö ṙā-ang Kīpetòn, hol ò yik aṅ Israĕl nö ṙòkhöre, ngaich cha-a nö kayīngö Tīrsā.

¹⁸Ngaich ngö inlahen angū-ö hē Simrī nö meuk ök elpanam nö kô-òngvah nö kē-ĕ, kuhēthötre ngaich anga-aṅ nö el ök patī rācha, föngtökūöre ngaich nö el ök patī rācha, ngaich kapah,

¹⁹Kūö nuk tökööl ò nuk tökööl fālen ò nuk töchōich nö i kūö ngam Mā Tēv, i linökö el talöökö Yērōpoām, ik tökööl ò inrē vahīten ò, nö vīngen Israĕl nö köölö fālen.

²⁰Nuk inlahen Simrī, ök inhôngen chöngö tö ò inrē, röh nup nö kūichi nö i mat Līpöre Kinṙötngö yip Rācha aṅ Israĕl?

²¹Nët tit ngaich yik tarik Israĕl nö harēvöre: ròngti yik tarik tamömrit Tīpni ök kikōnyö kūön Kinat, nö hòṅ vīlen ò nö rācha; ròngtī tamömrit Omrī.

²²Ngaich pöri yik tarik tamömrit Omrī nö mihôiṅ nö lā-al yik tarik tamömrit Tipni ök kikōnyö kūön Kinat: kapah ngaich ang Tipni, hayöng ngaich ang Omrī.

²³Ik tölūöi anāi kahuk samyeūheu Asā rācha aṅ Yūtā rultenre ang Omrī nö hayöng nö i kui Israĕl, ngaich nët sīön samyeūheu nö hayöng tafūöl samyeūheu anga-aṅ nö hayöng nö i Tirsa.

²⁴Havah ök rung Samarīa ngaich anga-aṅ nö in Sēmör nö nët kinlaha ṙāi tö rupīö; vīlö chūök kumyung ngaich anga-aṅ nö i kui rung, ngaich kaheuk minënyö ök elpanam ök vahī-il ò, nö sā minënyö Sēmör ök tö inlānuṙen, tök rung, nö i Samariā.

²⁵Ngaich ang Omrī nö la-evṙen tö töchōich nö i kūö ngam Mā Tēv, ngaich mötlö la-en tö tötlöök tö yik mu-urēhĕkūö ò nö ṙòkhöre.

²⁶Pò ò nö lök i nuk talöökö Yērōpoām nö ṙòkhöre ök kikōnyö kūön Nēpòt, i nuk tökööl ò inrē nuk aṅtī ò nö vīngen Israĕl nö köölö fālen, nö harunnyö lanīnö ngam Mā Tēv ngam Tēv Israĕl, nö i nuk töng chanök alaha.

²⁷Ṙòkhöre nuk inlahen Omrī, ök hameuktö ò kumlēḵ inrē, röh nup nö kūichi nö i mat Līpöre Kinṙötngö yik Rācha aṅ Israĕl?

²⁸Haṙòh ngaich Omrī nö in yik yöng re, lāpi ngaich nö i Samariā: hayöng ngaich Ahap ök kūön ò kikōnyö nö ṙënngen ò.

²⁹Im linūöi anāi hëvhöre samyeūheu Asā rācha aṅ Yūtā rultenre Ahap ök kikōnyö kūön Omrī nö hayöng nö i kui Israĕl: ngaich anga-aṅ nö i Samariā nö nët anāi nët samyeūheu.

³⁰Ngaich Ahap ök kikōnyö kūön Omrī nö chōichö la-en nö i kūö ngam Mā Tēv nö mötlö tö yik mū-urēhĕkūö ò nö ṙòkhöre.

³¹Ngaich ngö inlahen angū-ö nöng sā e öre nö töng höhövṙen ngam inlahen ò nö lök nup tökööl Yērōpoām ök kikōnyö kūön Nēpòt, töp lökten ò nö kē pīhöre tö Yēsipel ök kikānö kūön Etpē-al rācha aṅ Sītōn, kiröönngöre ngaich nö lök la-en Pē-al, ngaich salāman.

³²Vīlö tahāklö Pē-al ngaich anga-aṅ nö el patī Pē-al, ök vahī-il ò nö i Samariā.

³³Vī Asērah ngaich ang Ahap; nö harunnyö lanīnö ngam Mā Tēv, ngam Tēv Israĕl, nö mötlö tö yik rācha i Israĕl nö ṙòkhöre yik mū-urēhĕkūö ò.

³⁴I nuk sakāmö ò ang Hi-ĕl aṅ Pētĕl nö vīlen Yērikō: ṙātö chūökrööntö machööḵlö anga-aṅ anòng tö kinpaha Apīrām ök lanòh kūön ò, ngaich asöklö nuk inkūp anga-aṅ nö anòngtö kinpaha Sekup ök kikōnyö manāngö kūön ò; sā ngam ṙô ngam Mā Tēv, ngam ṙô ò nö löktö eltī Yôsuā ök kikōnyö kūön Nön.