Read Car_Nicobarese 1 RĀCHA 17 Bible Online

1 RĀCHA 17 - Car_Nicobarese bible

1 RĀCHA 17

¹Ngaich ang Ĕlaicha ök aṅ Tispeh, ök aṅ i yik yamih aṅ Kīlīöt, nö ngö ṙô tö Ahap, Sā ngam Mā Tēv nö tö-aṅ ngam Tēv Israĕl, ngam tö-aṅhāṅvkūö tö chu sökhaka, öt tachāmuvö min tö rēhĕn öt rēhĕn nö kumṙāhav i në samyeūheu, höng sā ngam ṙô chu pöri.

²Ngaich yih ngam ṙô ngam Mā nö in ò, nö ngö ṙô,

³Kē-ĕngre man ṙā-ang ihih havööngö kūöre kū-ötö lā chuhöt, ngaich hayunngöre ip kun töhëm mak Chērit, öp lā kūö Yôtön.

⁴Ngaich ngö inlahen min, òk aṅ ngam kun töhëm mak man min; ngaich chin inrē tölṙô nup chehechōn nö ha-aṅlen meh umuh.

⁵Lökten ò ngaich nö kiröönngöre nö asā ngam ṙô ngam Mā Tēv: pò ò nö ngaich nö kirööngöre ngaich iyöng ip kun töhëm mak Chērit, öp lā kūö Yôtön.

⁶Kumtö nyā-aṅ ò ngaich nuk chehechōn alaha inrē tö peuheū, nyā-aṅ alaha inrē tö harap; ngaich höng òk aṅ im kun töhëm mak anga-aṅ.

⁷Rĕhrô-òten ngaich ngö inlahen angū-ö, tö ngam kun töhëm mak nö nyôngö, pòn öt kumṙāhavö nö im panam.

⁸Yih ngaich ngam ṙô ngam Mā Tēv nö in ò, nö ngö ṙô,

⁹Chōholre man, yihtöre i Sārefāt, öp panam aṅ Sitōn, iyöng umuh ngaich: yĕh meuk, ngaich chin tölṙô öp tafīösi kikānö umuh nö ha-āṅlen meh.

¹⁰Chōholre anga-aṅ ngaich ngaich chuh Sārefāt; ngaich hē ò nö sölta nö i kūö inkūp ök elpanam, yĕh meuk, hĕng taka ök umuh tafīösi kikānö mahamūl ngòh; havëken ò ngaich anga-aṅ nö ngö ṙô, Vë-ekūö meh chin kē-ĕrö òk chu man tö mak rahëchyen öm chūökutī, hòṅ chu òk.

¹¹Ngaich hē ò nö kiröönngöre nö kē-ĕrö e, hūken ò ngaich anga-aṅ, nö ngö ṙô, Vë-ekūö meh chin kumtö nyā-aṅ chu pömchö eltī re töhĕng hanam rôti.

¹²Ngaich ngö ṙô anga-aṅ, Sā ngam Mā Tēv nö tö-aṅ ngam Tēv meh, öt hĕng tāk in chin tö pikoh, höng hĕng më-eltī-i ap atra el pīp, rahëchyen inrē ap tavī-i el pilön: yĕh meuk nët milôhò nun në ngòh hamūl chu, pò chu hòṅ kuhēthötre vī-i e nyā-aṅkūö ai tap kūön chu kikōnyö, hòṅ ai tap kūön chu kikōnyö, hòṅ ai höng nyā-aṅ e, ngaich kapah.

¹³Ngaich Ēlaicha nö ngö ṙô tö ò, Um pa-ekūö: ngaich man la-evṙen tap ṙô re: urĕh pöri öm in e vī nyā-aṅ chu tö kun pikoh, ngaich kēten e in chu, ngaich unôich vī nyā-aṅ nā tap kūön meh kikōnyö.

¹⁴Tön ngö ṙô an ngam Mā Tēv, ngam Tēv Israĕl, Öt keuheūt ap min atra nö el ap pīp öt rēhĕn nö keuheūt ap tavī-i nö el ap pilön, hanöng saha ap sakāmö hē tī ngam Mā Tēv nö tīntö kumṙah nö i kui ngih tumlat.

¹⁵Kiröönngöre ngaich anga-aṅ ngaich nöng asā ṙô Ēlaicha: ngaich ök tafīösi tö ò, tök aṅ patī ò inrē, nö ṙōl sumkam kūö nö nyā.

¹⁶Öt keuheūt ök atra el pīp, öt rēhĕn nö heuheūt ök tavī-i el pilön, sā ngam ṙô ngam Mā Tēv, ngam ṙô ò nö in Ēlaicha.

¹⁷Ngaich ngö inlahen angū-ö unôichrit në tö ök nyīö kikōnyö kūön ök kikānö ök töpatī-iv tök patī, nö vahav; aṙū-angen anga-aṅ tökūö ök invah, lökten ò nö öt ōtre unhômö.

¹⁸Ngö ṙô ngaich anga-aṅ tö Ēlaicha, Ō më-eṅ tarik ngam Tēv, sitih inlahen öich vö in meh? Tö meh yih ngaich in chu öm hōten chu fē-ĕlre tö tökööl re, ngaich fëlngö ngam kūön chu kikōnyö inrē?

¹⁹Ngö ṙô ngaich anga-aṅ tö ò, Kētap kūönre man kikōnyö in chu. Kē an ngaich Ĕlaicha nö ṙā-ang in ò, ngaich kēlen ò nö el ök urôhò, ök chūök ò, haṙōlngen ò ngaich nö el ök chamamre.

²⁰Ngaich ngö ṙô anga-aṅ nö im Mā Tēv, Ō Mā Tēv, Tēv chu, kētö tötlöök öm inrē i kui ngòh tafīösi ngòh chūök chu iyöng rahëchtaṙen, i finëlngö ngòh kūön ò kikōnyö?

²¹Hateutngöre ngaich anga-aṅ nö lūöi heuh nö ik nyīö ngaich ngö ṙô nö havëkö ngam Mā Tēv, Ō Mā Tēv, Tēv chu, vë-ekūö meh chin hökngen ngih nômö ngòh nyīö nö yih nö hēk nö in ò.

²²Hang ṙô Ĕlaicha ngaich ngam Mā Tēv; yih ngaich ngam nômö ngam nyīö nö hēk nö in ò, aṅlö ngaich anga-aṅ.

²³Kē ök nyīö ngaich ang Ĕlaicha, ngaich kēten ò nö el patī nö ṙā-ang el ök urôhò, ngaich kēten ò, nö el pati nö nö ṙā-ang el ök urôhò, ngaich kēten ò, nö in ök yöng ò kinānö ngö ṙô ngaich ang Elaicha, Yĕh meuk, aṅ an ngam kūön meh kikōnyö.

²⁴Ngaich ngö ṙô ök kikānö tö Ĕlaicha, Ngaich chin akahalōn tö meh öm tarik ngam Tēv, tö ngam ṙô ngam Mā Tēv inrē elvāng meh nö kanô-en.