Read Car_Nicobarese 1 RĀCHA 18 Bible Online

1 RĀCHA 18 - Car_Nicobarese bible

1 RĀCHA 18

¹Ngö inlahen angū-ö ngaich unôichrit töṙōl sakāmö, ök ṙô ngam Mā Tēv nö yih nö in Ĕlaicha, im linūöyö samyeūheu, nö ngö ṙô, Kuṙòh, hameuktöre man in Ahap; ngaich chin min tīntö kumṙah i kui ngam tumlat.

²Kiröönngöre ngaich Ĕlaicha nö hameuktöre nö in Ahap. Kalēḵ ök inyāichö nö i Samarīā.

³Havëten Opĕtia ngaich ang Ahap, ök mākūö yik aṅ patī. (Töpa-ekūö ök Opĕtīa tö ngam Mā Tēv;

⁴Pò e nö ngö inlahen, hē Yēsīpel nö fëlngö yik pròfĕt ngam Mā Tēv ngaich ang Opĕtiā nö hēngòng kahë tö yik pròfĕt ngaich hayunngen cha nö kö taneui anāi nö el töhĕng kinluhu, ngaich ha-aṅlen cha ha-ôkö cha inrē tö mak).

⁵Ngö ṙô ngaich Ahap tö Opĕtiā, Kuṙòh keuheūt ngam panam man kiröönngöre, söl i nup töpöklö mak, i nup kun töhëm mak inrē: amahtuṙen in min kôtökūö tö kiyôp hòṅ në kōra köttö inrē nö yöölen nö aṅ, hòṅ hī öt yëngen tö në töṙeūla.

⁶Ngaich lökten cha-a nö kaich ngam panam nö i hôi cha nö keuheūt talöököre nö in e: hēngö talöökö ang Ahap nö kahngenre, tahëngö talöökö ang Opĕtiā nö kahngenre.

⁷Ngaich hē Opĕtiā nö el talöökö, yĕh meuk, meuk kūö ò ngaich Ĕlaicha; akahakūö ngaich anga-aṅ tö ò, ngaich afukngöre, nö ngö ṙô, Më-eṅ ömeh, mā chu Ĕlaicha?

⁸Ngaich sapṙô ò anga-aṅ, chū-ö chini: kuṙòh, vë-eny nang ap māre man, yĕh meuk, Ĕlaicha ön ngòh ihih.

⁹Ngö ṙô ngaich anga-aṅ, Ip yòh öich köölö fālen, töp lökten meh hòṅ kēten ngòh tarik re nö eltī Ahap öich töfëli?

¹⁰Sā ngam Mā Tēv nö tö-aṅ ngam Tēv meh, öt pumnāmuvö tarik hēk öt pūlnguvö öp töt chūök tinīnngö chamöhö meh töp mā chu: ngaich hē cha nö ngö ṙô, Öt ihih ökuh, chūöku ṙô ngaich anga-aṅ nö ip pūlngö pumnāmö tarik inrē, tö cha nö öt kôtökūö tö meh.

¹¹Ngö ṙô man yĕh ngaich töngamuh, Kuṙòh, vë-eny nang ap mā re man yĕh meuk, ihih an Ĕlaicha.

¹²Ngaich ngö inlahen min angū-ö tö chu min höng feushë ṙā-ang in meh, ngaich min öp ma-alaha aṅ im Mā Tēv nö kēngen meh öm yô-òv kū-ö öt akahalōn chū-ö; ngaich yē chu min yih vë-eny nang Ahap, ngaich öt kôtökūö anga-aṅ tö meh, ngaich fëlngen chu min anga-aṅ: tö löktökūö nyinī-öṅre pöri ngòh tarik meh nö tö pa-ekūö tö ngam Mā Tēv.

¹³Öt vënyu ök tī chu nö i ngam Mā chu hē Yēsipel nö fëlngö yik pròfĕt ngam Mā Tēv, tö tī chu hēngòng hayunngö tö tarik yip pròfĕt ngam Mā Tēv nö kö taneui anāi el töhĕng kinluhu ngaich ha-aṅlen cha ha-ôkö cha inrē tö mak?

¹⁴Ngaich man yih ngö ṙô töngamuh, Kuṙòh, vë-eny nang ap mā re man, yĕh meuk, ihih ap Ĕlaicha: ngaich fëlngen chu min anga-aṅ.

¹⁵Ngaich ang Ĕlaicha nö ngö ṙô, Sā ngam Mā Tēv yip tömaṙôngö nö tö-aṅ, ngam tö-aṅ-haṅvkūö tö chu sökhaka, kô-en chin min hameuktöre in ò tö taheui.

¹⁶Lökten Opētia nö kiröönngöre nö höngkūö Ahap, ngaich vë-eny nang ò: kiröönngöre ngaich Ahap nö meukkūö Ĕlaicha.

¹⁷Ngaich ngö inlahen angū-ö, hē Ahap nö meūkö Ĕlaicha, ngö ṙô ngaich Ahap tö ò, Më-eṅ ömeh, mahakihten Israĕl?

¹⁸Ngö ṙô ngaich anga-aṅ nö sap ṙô, Hö-ö chin chū-ö hakihten Israĕl; tön më-eṅ man, tö yip aṅ patī yöng meh inrē, pò yīö ṙāngö në chöngö ngam Mā Tēv, ngaich më-eṅ tömrit Pē-al.

¹⁹Lökten yĕh töngamuh tīnngö mahamūl yip aṅ Israĕl nö in chu nö ṙòkhöre i kui ap rôngö Kārmel, tö yip pròfĕt Pē-al inrē yip töfënòng taneui anāi, yip pròfĕt Asēra inrē töfënòng yip nyamā-aṅvkūö nö el mīs Yēsīpel.

²⁰Lökten Ahap nö tīnhanga nö in yik kūön Israĕl nö ṙòkhöre, nö ip rôngö Kārmel.

²¹Haröhtöre ngaich Ĕlaicha nö yihtöre nö in yik tarik, ngaich ngö ṙô, I ṙô-òten öi sökngöre ihôi në tönët ṙinātö ellōn? Yē ngam Mā Tēv nö Tēv, tömrit ò; yĕn Pē-al pöri ngaich tömrit ò yĕh. Ngaich öt hĕng höiny milôhò yik tarik nö sapṙô ò.

²²Ngö ṙô ngaich ang Ĕlaicha tö yik tarik, Höng humĕng tit tak chin chū-ö, tö ōtren pròfĕt ngam Mā Tēv; fënòng taneui anāi pöri më tarik pròfĕt Pē-al.

²³Lökten hökngen cha yēḵ nö nët nòng tī tö kōiny nuā ihih; hökngen cha inrē nö atöllö kōiny nuā re hĕng nòng, rökan inrē nö pinyënyö, ṙāten ò ngaich nö i kui minë ngòh, un ṙātu elkatòh tö tameūyö: leūch ngam tahëng nòng chū-ö min kōiny nuā, ngaich ṙāten ò min i kui minë ngòh, öt ṙātu tameūyö nö elkatòh.

²⁴Havëkö minënyö ngam tēv re yī-ö, ngaich chū-ö havëkö minënyö ngam Mā Tēv ngaich öp Tēv min tö aṅtī tö tameūyö nö sapṙô, hökngen ò nö Tēv Anga-aṅ. Ṙòkhöre ṙô ngaich yik tarik nö ngö ṙô nö sapṙô, töhuveū an angū-ö nö ṙô.

²⁵Ngö ṙô ngaich Ĕlaicha tö yik pròfĕt Pē-al, Hĕng nòng atöllö yin tö kōiny nuā re, leūichan urĕh; tön maṙôngö yin; ngaich havëkö minënyö ngam tēv yīö, uh pöri ṙātö tameūyö elkatòh.

²⁶Ngaich kē ök kōiny nuā cha-a, ngaich havëkö minënyö Pē-al löktökūö peuheū söl sakāmö, nö ngö ṙô, Ō Pē-al, sapṙô ih. Hö-ö pöri nö ṙô-òv tö tö takööya, öt rēhĕn nö hĕng tak samap ṙô. Kumööyöre cha-a nö ik tahāklö ök tövīlöng.

²⁷Ngaich ngö inlahen angū-ö ik sakāmö, ang Ĕlaicha nö hayëngen cha, nö ngö ṙô, Pōitô yin: tön tēv apa; lohten ap nö ṙòngmö chöh ellōn re, hēk inrē kiröönngöre nö yô-òv kū-ö, hēk inrē lohten nö marô-òlkūö kinröönngö, hēk inrē lohten nö haṙòh, ngaich hòṅ kilanglöng.

²⁸Pōitô cha-a ngaich nö hū-a, ngaich sā inlāhenre nö kötnyö alahare nö aṅtī tö sakū kanöt inrē, hanöng saha nup mahām nö pòpnyi nö ṙā-ang in cha.

²⁹Ngaich ngö inlahen angū-ö, hē e nö ngaich nö chööḵngö ngam tö kamlö sakāmö, ngaich cha-a nö iṙūöhö ṙô nö vë-ekūötēv hanöng saha ngam ṙētak öp tökētu tö harap; hö-ö pöri nö tö takööyavö ṙô, öt rēhĕn nö töchumkūöṙenvö.

³⁰Ngaich ngö ṙô Ĕlaicha tö yik tarik nö ṙòkhöre, Tā-ih haröhtöre yin in chu; ngaich ṙòkhöre yik tarik nö yihtöre nö haröhtöre nö in ò. Vītit ök tahāklö ngam Mā Tēv anga-aṅ ök tö tiṙöli.

³¹Ngaich Ĕlaicha nö nët sīönö kahëtö ihong, sā tumtak miyöngö yik kikōnyö kūön Yāköp, ök lööṙö ngam ṙô ngam Mā Tēv, nö ngö, Israĕl öp min minënyö meh.

³²Aṅtī tö minë ihong anga-aṅ ngaich nö vīlö ök tahāklö nö minënyö ngam Mā Tēv: vī talöökö mak inrē anga-aṅ nö vīnngö nö ik tahāklö nö sā ṙôkö tönët kumvôkö kinlaha lumngam kulöl.

³³Hatöök nuk ngòh ngaich anga-aṅ, ngaich rök ök kōiny nuā nö pinyënyö ṙāten e ngaich nö i kui nuk ngòh. Ngö ṙô ngaich anga-aṅ, Hatööḵlö aṅ töfën pīp tö mak, ngaich ṙöstö e i kui ngam töföngö tökētu, i kui minë ngòh inrē.

³⁴Ngö ṙô ngaich anga-aṅ, Nëttör heuh tī; ngaich ngatī tī cha-a im innët heuh. Ngaich ngö ṙô anga-aṅ, Hēk yin lūöitör heuh; ngaich ngatī tī cha-a im linūöi heuh.

³⁵Hëm ngaich ök mak nö havī ök tahāklö; hatööḵlö ök talöökö mak inrē anga-aṅ tö mak.

³⁶Ngaich ngö inlahen angū-ö i ṙētak öp tökētu tö harap, yihtöre ang Ĕlaicha ök pròfĕt nö haröhtöre, ngaich ngö ṙô, Ō Mā Tēv, Tēv Aprahām, Isak, Israĕl inrē, hökngen e töngamuh nö mikahlōn tö ngam Tēv nö in Israĕl, tö chu inrē chū-ö öich tarik meh, tö chu inrē öich ngatī tī tö u i ṙô meh.

³⁷Hang ṙô chu, Ō Mā Tēv, hòṅ vē tarik nö akahalōn tö meh, Mā Tēv, öm Tēv hòṅ meh hēk havan tö ellōn cha.

³⁸Suktöre ngaich ök tameūyö ngam Mā Tēv, ngaich haṙāpngö ök töföngö tökētu, tö nuk ngòh, tö nuk ihong, tök tumlat, ngaich nyôkngökūö tök mat ök më-el talöökö mak.

³⁹Ngaich hē yik tarik nö meūkö e nö ṙòkhöre, fāttökūöre cha-a ngaich nö afukngöre: ngö ṙô cha-a ngaich, Ngam Mā Tēv, anga-aṅ An Tēv.

⁴⁰Ngaich ngö ṙô ang Ĕlaicha tö cha, Kē më pròfĕt Pē-al; un hĕng hang tak tö cha töt kô-òngvah. Ngaich acha-a nö kē-ĕ cha: kēten cha ngaich Ĕlaicha nö i Kīsòn, ök kun töhëm mak in e ngaich nö fëlngen cha.

⁴¹Ngö ṙô ngaich Ĕlaicha tö Ahap, Hōklöre man nyā-aṅvkūö òk inrē; tön ṙô kumṙah öp umuh töpōyen.

⁴²Kiröönngöre ngaich Ahap nö nyā òk inrē. Peūlöre ngaich Ĕlaicha nö i kui Kārmel; sōnngöre ngaich anga-aṅ nö el tumlat, ahëm tök kūöre nö ihôi nuk kui kinmônöre.

⁴³Ngö ṙô ngaich anga-aṅ tök tarik re, Peūltöre man kuṙòh, ngëichkö lā-el mai. Peūlöre ngaich anga-aṅ, ngaich ngëicha, ngaich ngö ṙô Höng hö-övö. Ngaich ngö ṙô anga-aṅ, Kiröönngöre man hēk, öm sat van.

⁴⁴Ngaich ngö inlahen angū-ö im sinat van, ngö ṙô anga-aṅ, Yĕh meuk, löklö el mai ap umuh nö meutlö taṙul, höng sā ṙôktāk eltī tarik. Ngö ṙô ngaich anga-aṅ, Kuṙòh, ngö ṙô tö Ahap, Halēn ap inröl re man ngaich, öm peūtöre, hòṅ ngam kumṙah nö öt asökngen meh.

⁴⁵Höng öt rô-òtuṙen ngaich angū-ö, sahlöre kūö ngaich ngam halīöngö tö taṙul kuföt inrē, yöng kumṙah ngaich ök umuh. El inröl ngaich Ahap, nö chuh Yesrīl.

⁴⁶In Ĕlaicha ngam kël ngam Mā Tēv; nyëklö ṙat re ngaich anga-aṅ, ngaich urēhĕkūö Ahap nö fal söl ik lökhöt i Yesrīl.