Read Car_Nicobarese 1 RĀCHA 19 Bible Online

1 RĀCHA 19 - Car_Nicobarese bible

1 RĀCHA 19

¹Ngaich ang Ahap nö keuheūtnyöre ṙô nö vë-eny nang Yesīpel tö tī Ĕlaicha, tö tī ò inrē nö fëlngö yik pròfĕt nö aṅtī tö fël.

²Ngaich Yesīpel nö tīnngö vamë-eny nang Ĕlaicha, nö ngö ṙô, Hökngö tī yip tēv yēḵ tö chu nö ngatī, hēk möthë inrē, yē chu öt vīten ngam nômö meh nö sā nômö ök töhĕng tak tö cha ip huṙöich i tö ngatī ṙētak.

³Ngaich hē ò nö meūkö e, hōklöre ngaich anga-aṅ, kiröönngöre ngaich pòn sōḵ nö kapah, yih ngaich nö i Pīrsīpā, ök panam Yūtā, ṙāngö ök tarik re ngaich nö umuh.

⁴Kiröönngöre pöri anga-aṅ nö hĕng sumkam röön nö el tönyalnyi, yih ngaich, ngaich ūichngöre nö elkatòh ök chunipör chōn ngaich havë-engritre anga-aṅ nö hòṅ kapah; ngö ṙô anga-aṅ, Ngāichö tölngö an; Ō Mā Tēv, kēngö ngih nômö chu tö ngamuh; tön öt ĕhten chin tö yik yöng re.

⁵Ṙōlngöre ngaich anga-aṅ ngaich haṙòh nö elkatòh ök chunipör chōn; ngaich, Yĕh meuk, hĕng tak ök ma-ahānga lamūölken ò, ngaich ngö ṙô tö ò, Chōholre man nyā-aṅvkūö.

⁶Ngëicha ngaich anga-aṅ, Yĕh meuk, hĕng tāk ök pikoh töharāngö i kui ök töṙāch ihong, hĕng inrē ök pilön mak. Nyā-aṅvkūö ngaich anga-aṅ òk inrē, ṙōlngöre hēk.

⁷Yih hēk ngam ma-ahānga aṅ im Mā Tēv im innët heuh, ngaich lūölken ò, nö ngö ṙô, Chōholre man nyā-aṅvkūö; tön marô-òlkūö ap kinröönngö meh.

⁸Chōholre ngaich anga-aṅ, ngaich nyā òk inrē, kiröönngöre ngaich nö fën anāi sumkam fën anāi mitööm nö chuh Hôrep ngam rôngö ngam Tēv nö i kumlēḵ ngam nyā-aṅkūöre.

⁹Yih ngaich anga-aṅ nö umuh ik töhĕng kinlūhu, ngaich iyöng umuh; ngaich, Yĕh meuk, yih ngam ṙô ngam Mā Tēv nö in ò, Ngö ṙô anga-aṅ tö ò, Ĕlaicha, suh ap la-en meh ihih?

¹⁰Ngaich ngö ṙô anga-aṅ, Kalē-ĕlōn chin im Mā Tēv, ngam Tēv yip tömaṙôngö; pò yip kūön Israĕl nö ṙāngö ngam kinlēḵngô, tiṙölngö nuk tahāklö meh, fëlngö yik pròfĕt meh nö aṅtī tö fël: ngaich chin, höng chū-ö tītö tö-ōtre; ngaich cha-a nö chöh ngih nômö chu nö hòṅ kēngö e.

¹¹Ngaich ngö ṙô anga-aṅ, Kuṙòh kiröönngöre man, ngaich söklöre i kui ngam rôngö öm i kūö ngam Mā Tēv. Ngaich yĕh meuk, chöḵöng umuh An ngam Mā Tēv ngaich min öp tökiröng tökalēḵ kuföt nö lirakngö minë rôngö panyeny min minë ihong nö laköl nö i kūö ngam Mā Tēv; hö-ö pöri ngam Mā Tēv nö el ngam kuföt: kumyeūnö inrē min unôichrit ngam kuföt hö-ö pöri ngam Mā Tēv nö el ngam kumyeūnö:

¹²Unôichrit ngam kumyeūnö öp tameūyö; hö-ö pöri ngam Mā Tēv nö im tameūyö: unôichrit ngam tameūyö öp töṙēm tökūöṅnö ṙô.

¹³Ngaich ngö inlahen angū-ö, hē Ĕlaicha nö hāngö e, haṙungngö kūöre ngaich anga-aṅ tök kinṙum re ngaich kunyī-inyre, sökhak ngaich nö i kūö ök kinluhu, Ngaich, Yĕh meuk, yihtöre ök ṙô nö in ò, nö ngö ṙô, Ĕlaicha, suāp la-en meh ihih?

¹⁴Ngaich ngö ṙô anga-aṅ, Kalē-ĕlōn chin im Mā Tēv, ngam Tēv yip tömaṙôngö; pò yip kūön Israĕl nö ṙāngö ngam kinlēḵngô meh, fëlngö yik pròfĕt meh inrē nö aṅtī tö fël: ngaich chin höng chū-ö tītö tö-ōtre; ngaich cha-a nö chöh ngih nômö chu nö hòṅ kēngö e.

¹⁵Ngaich ngö ṙô ngam Mā Tēv tö ò, Kuṙòh, havantöre man lök el talöökö öp tönyalnyi i Tamāskös: ngaich yē meh yih, hacham el kui Hasaĕl më-eṅ nö rācha i kui Siriā,

¹⁶Hacham el kui Yēhū më-eṅ inrē öp kikōnyö kūön Nimsī nö rācha i kui Israĕl: hacham el kui Ĕlaisa inrē öp kikōnyö kūön Safāt aṅ Āpĕlmehōtah nö pròfĕt nö i chūök meh.

¹⁷Ngaich ngö inlahen min angū-ö, öp töt kô-òngvah min tökūö fël Hasaĕl fëli min tö Yēhū: öp töt kô-òngvah min tökūö fël Yēhū fëli min tö Ĕlaisa.

¹⁸Sön min nö sat köṅny yip in Israĕl ṙahātö chu, yip töt samimtö kui kinmônö re nö in Pēal, nup minuh inrē töt hamām kūö.

¹⁹Kiröönngöre ngaich anga-aṅ nö ṙā-ang umuh, ngaich kôtökūö tö Ĕlaisa ök kikōnyö kūön Safāt nö kuköh chūök sāiny, nö holṙen tö nuk tönët sīön nòng kōiny nuā nö urēhĕkūö ò, in ök innët sīön nòng anga-aṅ inrē: havāngtöre ngaich Ĕlaicha nö in ò ngaich kavaltö ök kinṙum re nö in ò.

²⁰Ṙāngö nuk kōiny nuā ngaich anga-aṅ, ngaich falrit Ĕlaicha, ngaich ngö ṙô, Vë-ekūö meh chin, hökngen chu hāmkūö öp yöng chu kikōnyö töp yöng chu kikānö inrē, ngaich min chūö tömrit meh. Ngaich ngö ṙô anga-aṅ tö ò, Kuṙòh, havantöre man hēk: sitih tī ṙöng öich taheui tö meh?

²¹Havantöre ngaich anga-aṅ nö ṙeū-eung im tinömkörit ò, kē nuk töhĕng tahôl ngaich anga-aṅ kōiny nuā, ṙatnyö likeun u ngaich, ngaich sum nuk alaha u nö ngòh tö nuk chōn kaneun nuk kōiny nuā, kētö u ngaich nö in yik tarik, ngaich nyā-aṅvkūö cha-a. Chōholre ngaich anga-aṅ ngaich kiröönngöre nö tömrit Ĕlaicha, ngaich meukṙen ò.