Read Car_Nicobarese 1 RĀCHA 20 Bible Online

1 RĀCHA 20 - Car_Nicobarese bible

1 RĀCHA 20

¹Ngaich Penhatat ök rācha aṅ Sīria nö hamūl yik kumyung nö ṙòkhöre: lūöi anāi nët tak yik rācha hol ò, kōra inröl inrē: kiröönngöre ngaich anga-aṅ nö havīlen Samariā ngaich lā-al e nö kiyung.

²Ngaich anga-aṅ nö tīnngö vamënyö nang Ahap ök rācha aṅ Israĕl, nö löö elpanam nö ngö ṙô tö ò, Ngö ṙô ap Penhatat,

³Rupīö chu nup rupīö meh humlum chu inrē nup humlum meh: pīhö chu yip pīhö meh kūön chu inrē yip kūön meh, chū-ö chu inrē yip tölngö tövai.

⁴Ngaich ngö ṙô ök rācha aṅ Israĕl nö sapṙô, Mā chu, Ō rācha, ngaich an nö sā ngam ṙô meh; më-en meh chin chū-ö, ṙòkhöre nup in chu inrē.

⁵Hēk yik vamënyö nang ò nö yih, nö ngö ṙô, Ngö ṙô ap Penhatat, kô-en chin tīnhöti in meh, öich ngö ṙô, Kētö nup rupīö re man in chu, tö nup humlum meh, tö yip pīhö meh, tö yip kūön meh inrē;

⁶Tīntö yip tarik re pöri chū-ö min in meh huṙöich i tö ngatī ṙētak ngaich cha-a min, nö kiluh el patī meh, el patī yip tarik meh inrē: ngaich ngö inlahen angū-ö min, tö nup maheuṅk cha min tövai, ngaich kē-ĕ u cha-a nö eltī re, ngaich kēngö u.

⁷Havëtö yik mā panam ngaich ngam rācha aṅ Israĕl, ngaich ngö ṙô, Vë-ekūö yīö chin, mikahngen e, hòṅ yīö meuk ngòh tarik nö chöhlö töchōich: pò ò yih nö tīntö kamë-eṅre yip pīhö chu nö in chu, tö yip kūön chu, tö nup rupīö chu, tö nup humlum chu inrē; öt hĕng sinôngen ò tö chu.

⁸Ngaich ṙòkhöre yik mā tö yik tarik inrē nö ngö ṙô tö ò, Uh man hang, um rēhĕn hōḵ.

⁹Lökten anga-aṅ nö ngö ṙô tö yik samömtö ṙô aṅ in Penhatat, Vënyö nang ap mā chu ap rācha, kēkö kaha nup ṙô meh chin min nö ṙòkhöre nuk tö söömtu nö ngaich nö in ngòh tarik meh: hö-ö pöri öich kēkö kaha ngih. Kiröönngöre ngaich yik samöömtö ṙô, ngaich kumtö ngih ṙô nö hēk nö in ò.

¹⁰Ngaich Penhatat nö ngö ṙô nö söömhöti nö in ò, Ngatī tī yip yēḵ tēv nö in chu, hēk mötlö inrē, yĕn kô-òre min öp tumlat Samariā nö in vē tarik hol chu nö kö hĕng më-eltī-i.

¹¹Ngaich ök rācha aṅ Israĕl nö ngö ṙô nö sap ṙô, Vë-eny nang ò, Uh ap yēḵ öp mahamöplö lanakre nö in re nö eū-eure, nö sā ò ngam lamuhngö e nö in re.

¹²Ngaich ngö inlahen angū-ö, hē Penhatat nö hang ngih tö söömtu ṙô, hē ò nö ka-eūt, anga-aṅ tö yik rācha inrē, nö el nuk inrūkui, ngö ṙô anga-aṅ tö yik tarik re, Hatöököre yin. Hatöököre cha-a ngaich nö lā-al ngam elpanam.

¹³Ngaich, yĕh meuk, yih ön ngòh pròfĕt hĕng tak nö haröhtöre nö in Ahap ök rācha aṅ Israĕl, nö ngö ṙô, Ngö ṙô An ngam Mā Tēv. Ngaich öm meuk ṙôngö vē tömaṙôngö nö ṙòkhöre? Yĕh meuk kēten cha chin min eltī meh; ngaich akahalōn min më-eṅ tö chu öich Mā Tēv.

¹⁴Ngaich ngö ṙô Ahap, Lökten in chīö? Ngaich ngö ṙô anga-aṅ, Ngö ṙô An ngam Mā Tēv, Lökten in yip ṙāl tarik aṅ in yip kūön rācha i në panam. Ngaich ngö ṙô anga-aṅ, Chīö ap min mu-urĕh tö tī nö im kinyūngö? Më-eṅ, ngö anga-aṅ nö sap ṙô.

¹⁵Hamūl yik ṙāl tarik ngaich anga-aṅ aṅ in yip kūön rācha minë panam, ngaich cha-a nö nëtòng lūöi anāi nët: unôichrit cha anga-aṅ nö hamūl yik tarik nö ṙòkhöre, yik kūön aṅ Israĕl nö ṙòkhöre, nö sat köṅny.

¹⁶Kunyī-inyre cha-a ngaich tö sakāmö. Mihiyōyöre pöri Penhatat nö ka-ēut nö el nuk inrūkui, anga-aṅ tö yik rācha, yik tölūöi anāi nët tak rācha yik hamòlṙen ò.

¹⁷Urēhnyi nö kunyī-inre yik ṙāl tarik aṅ in yik kun rācha aṅ i minë panam; tīnnyö kumnyī-inyre ngaich Penhatat, ngö ṙô cha-a ngaich nö vë-eny nang ò, Tarik yip umuh kumnyī-inyre nö ṙā-ang Samariā.

¹⁸Ngö ṙô ngaich anga-aṅ, Yē cha nö kunyī-inyre nö i lanāmö, kē-ĕ cha nöng aṅ; hēk yē cha nö kunyī-inyre nö i kinyūngö, kē-ĕ cha nöng aṅ.

¹⁹Kunyī-inyre vē ngaich nö ṙā-ang elpanam, yik ṙāl tarik aṅ in yik kun rācha aṅ minë panam, tö yik kumyung tamömrit cha.

²⁰Ngaich cha-a nö kö fëlngö lā-al re; falngöre ngaich yik aṅ Sīriā, lū-u cha ngaich Israĕl: ngaich ang Penhatat ök rācha aṅ Sīriā nö öt kô-òngvah i uk ök kōra nö holtö yik tarik mī-i uk kōra.

²¹Kumyī-inyre ngaich ök rācha aṅ Israĕl, ngaich kiyung nuk kōra tö nuk inröl, fëlngö yik aṅ Siriā inrē nö pōihangvah tī.

²²Yihtöre ngaich ök pròfĕt nö haröhtöre nö ik rācha aṅ Israĕl, ngaich ngö ṙô tö ò, Kuṙòh hangë-el alahare man, mikahang e inrē, ngëichkö e inrē ngam tī meh: tön ip invantö ngih samyeūheu ap min rācha aṅ Sīriā nö yih nö lā-al meh.

²³Ngaich yik tarik ök rācha aṅ Sīriā nö ngö ṙô tö ò, Tēv aṅ kui rung an kòl ngam tēv cha; lökten cha nö kalēḵ tö hī: tā-a pöri töi kiyūngö cha i tö ṙā-akūö panam, öthō ayī-ö min öt kalēḵ tö cha.

²⁴Ngö inlahen tī man yĕh; kēngö yip rācha, nö kö ṙā-ang i chūök re, ngaich ṙātö yip yöngṙen nö i chūök cha:

²⁵Ngaich kaheuk yip kumyung më-eṅ in re nö sā yip kumyung yanëngen meh ngaich, kōra sā tum nòng kōra inröl sā tum nòng inröl: töi kiyung lā-al cha el törā-akūö panam, öt hōḵ in min öt kalēḵ tö cha. Ngaich anga-aṅ nö hang ṙô cha, ngaich ngatī tī.

²⁶Ngaich ngö inlahen angū-ö im invanrit ngam samyeūheu, ang Penhatat nö hamūl yik aṅ Sīriā, ngaich chuh Efek, nö kiyung nö lā-al Israĕl.

²⁷Hamūlöre ngaich yik kūön Israĕl, halēnö nyā-aṅkūö inrē, kiröönngöre ngaich nö lā-al cha: iyöngtöre ngaich yik kūön Israĕl nö lā kūö cha nöng sā tö nët kiteūm kun pököre; tööḵlö pöri ngam panam tö yik aṅ Sīriā.

²⁸Yihtöre ngaich ök tarik ngam Tēv nö haröhtöre ngaich vë-ekūö ök rācha aṅ Israĕl, nö ngö ṙô, Ngö ṙô An ngam Mā Tēv, Kūö yip Sīriā nö ngö ṙô, tēv yip aṅ kui rung an ngam Mā Tēv, hö-ö pöri anga-aṅ nö tēv aṅ el achāṙö; lökten chin min kēten vē tömaṙôngö nö eltī meh nö ṙòkhöre, hòṅ yīö min akahalōn tö chu, öich chū-ö Mā Tēv.

²⁹Iyöngtöre cha-a ngaich nö lā-alre nö sat sumkam. Ngaich ngö inlahen angū-ö, im sinātö sakāmö ngam kinyūngö nö rultenre; ngaich yik kūön Israĕl nö fëlngö yik aṅ Sīriā hēngòng köṅny i töhĕng sakāmö yik kumröön kumyung,

³⁰Falngöre pöri nö i Efek nö elpanam yik chööḵṙen: ngaich ök kinlōngö nö fukkui yik tönët anāi sat köṅny tarik tö-ōtren. Falngöre inrē Penhatat, ngaich kuhēthötre nö el panam, nö el ök lātuhēt takô urôhò.

³¹Ngaich ngö ṙô yik tarik ò tö ò, Yĕh meuk, hang vē rācha in aṅ patī Israĕl nö tö-aṙē-ĕlōn tö rācha: vë-ekūö meh, tā-a töi fūmṙat re tö sāk, aṅ el kui tö pisik inrē, ngaich kunyī-inyre ip rācha aṅ Israĕl: amahtenvö öp min nö hayöölen nômö meh.

³²Lökten cha nö fūmṙat re tö sāk, tumchöklö kui re inrē tö pisik, nö yih nö ik rācha aṅ Israĕl, nö ngö ṙô, Ngö ṙô ap tarik meh Penhatat, Vë-ekūö meh chin, hökngen chu aṅ. Ngaich ngö ṙô anga-aṅ, Ṙòngmö aṅ apa? Hol chu apa.

³³Ngaich yik tarik nö hol tö huneū-enre nö meukngen e, ngaich höngöre töp ṙô ò yĕn ellōn ò; ngaich ngö ṙô cha-a, Ap hol meh ap Penhatat. Ngaich ngö ṙô anga-aṅ, Kuṙòh, kēten ò yĕn. Yihtöre ngaich Penhatat nö in ò; ngaich hōten ò anga-aṅ nö yôklö nö el inröl.

³⁴Ngaich Penhatat nö ngö ṙô tö ò, Hòṅ havan tö nup elpanam chin nup kahë ök yöng chu nö in ök yöng meh; vī talöököre pömchö i Tamaskös, sā vahī ök yöng chu nö i Samariā. Ngö ṙô ang Ahap, Ngaich chū-ö inrē hökngen meh kiröönngöre kum tö ngih kinlēḵngô. Lökten ò nö vī kinlēḵngô nö in ò, ngaich hökngen ò nö kiröönngöre.

³⁵Ngaich hĕng tak ök tarik aṅ in yik kūön yik pròfĕt tö ngö ṙô tök holre lökten i ṙô ngam Mā Tēv, Fëlö chu man, vë-ekūö meh chin. Ngaich sōḵ ök tarik nö fëlan.

³⁶Ngaich ngö ṙô anga-aṅ tö ò, Pò meh öt hang ṙô ngam Mā Tēv, Yĕh meuk, höng feushë man min ṙā-ang in chu ngaich hĕng nòng min öp lāyön kamāpö meh. Ilööṙen ngaich hē ò, hĕng nòng ngaich ök lāyön tökôtökūö tö ò, kapaha kūö ngaich tö ò nö kāpan.

³⁷Ngaich kôtökūö anga-aṅ tök tahëng tarik, ngaich ngö ṙô, Fëlö chu man, vë-ekūö meh chin. Fëlan ngaich ök tarik, fëlan nöng hanyahken ò.

³⁸Lökten ök pròfĕt nö kiröönngöre ngaich el talöökö nö hökkö ök rācha, harīkngenre tök vanönkui ò nö asöltu nö rung mat ò.

³⁹Ngaich hē ò ök rācha nö chöö-öng umuh hūken ök rācha ngaich anga-aṅ: nö ngö ṙô, Chuh ellōn ök kinyūngö ön ngòh tarik meh; ngaich, Yĕh meuk, hĕng tak ök tarik kamānngöre, ngaich hĕng tak kahëti tö tarik nö in chu, ngaich ngö ṙô, Haköpken ngòh tarik: yĕn yô-òv lökngen min anga-aṅ nö chatngen, ngaich ap nômö meh min ṙënngen öp nômö ò, hēk inrē më-eṅ min tī tö rupīö hĕng kinlaha.

⁴⁰Ngaich kūö ngòh tarik meh nö lūöchlen nö ihih umu-aṅ inrē, kiröönngöre ngaich anga-aṅ. Ngaich ngö ṙô ök rācha aṅ Israĕl tö ò, Ngatī an min ngam inkaha fālen tö meh; ngaich man huveū-eu tī tö e.

⁴¹Ṙòngngö ök vanön kui re ngaich anga-aṅ nö ṙā-ang i mat ò, nö kurāten; akahakūö ngaich ök rācha aṅ Israĕl tö ò nö aṅ in yik pròfĕt.

⁴²Ngö ṙô ngaich anga-aṅ tö ò, Ngö ṙô An ngam Mā Tēv, Pò meh ṙāngö ök tarik nö ṙā-ang eltī meh ök töhōtu finëlngö tö chu, lökten ap min nômö meh nö kiröönngöre nö ṙënngen nômö ò, yip tarik meh inrē nö ṙënngen yip tarik ò.

⁴³Chuh patī re ngaich ök rācha aṅ Israĕl nö haṙivlōn kunyahalōn inrē ngaich yih nö i Samarīa.