Read Car_Nicobarese 1 RĀCHA 21 Bible Online

1 RĀCHA 21 - Car_Nicobarese bible

1 RĀCHA 21

¹Ngaich ngö inlahen angū-ö unôichrit në tök aṅ Yesrīl ang Nëpòt nö hēngö panô-òṅ, tök panô-òṅ vāin, ök i Yesrīl, röhta nö i patī ök rācha Ahap ök aṅ Samariā.

²Vë-ekūö Nëpòt ang Ahap, nö ngö ṙô, Kētö öp panô-òṅ vāin re man in chu, hòṅ chu öich panô-òṅvö tö e nö chūök nup chōn töng hĕng samyeūheu nö aṅ tön röhta ap nö i patī chu; ngaich chū-ö min kē-ĕkūö meh tö ṙënngen e tö tö-ĕhten tö e panô-òṅ vāin: hēk inrē, yē e nö tölöök nö lōn meh, ngaich chū-ö min kētö ṙāi e tö rupīö.

³Ngaich ngö ṙô Nëpòt tö Ahap, Sōten chu an ngam Mā Tēv öich kētö amin yip muvöhngöre nö in meh.

⁴Yih ngaich Ahap nö i patī re nö haṙivölōn kunyahalōn inrē tökūö ök ṙô Nëpòt ök aṅ Yesrīl nö vë-ekūö ò: pòn ngö ṙô anga-aṅ, Öt hòṅ kē-ĕkūö meh chin tö amin yik muvöhngöre. Ṙōlngöre ngaich anga-aṅ nö el chaman re nö hapungngö kūö re, ngaich sōḵ nö nyā-aṅvkūö.

⁵Yihtöre pöri ök pīhö ò Yesīpel nö in ò, ngaich ngö ṙô tö ò, Kūöyòh öm ngatī miṙivlōn, öm öt hòṅ nyā-aṅvkūö?

⁶Pò chu vë-ekūö Nëpòt öp aṅ Yesrīl, öich ngö ṙô tö ò, Kētö ap panô-òṅ vāin re man in chu nö ṙāi tö rupīö; hēk inrē, yē meh hō-o lōn tö e, kētö tahëng panô-òṅ vāin chū-ö min in meh nö ṙënngen e: ngaich ngö ṙô anga-aṅ nö sapṙô, Hö-ö chin hòṅ kē-ĕkūö meh tö ngam panô-òṅ vāin chu.

⁷Ngaich ngö ṙô tö ò ang Yesīpel ök pīhö ò, Më-eṅ öm töngamuh mahayöng ngih pūlngö Israĕl? Chōholre man, öm nyā-aṅvkūö, hökngen ngam ellōn meh nö ṙāmölōn: kētöp panô-òṅ vāin Nëpòt chin min öp aṅ Yesrīl nö in meh.

⁸Kūich līpöre ngaich anga-aṅ nö i minënyö Ahap hapanngö kūö e ngaich tö ök kintāntö minënyö ò, ngaich söömngö nuk līpöre nö in yik mā in yik tötulöngö minā-aṅ inrē yik im elpanam ò, in yik holtöṙah Nëpòt inrē.

⁹Ngö tī anga-aṅ nö kūich mat nuk līpöre; Ahangkö öp inhīkö yin, ngaich ha-ūichlen Nëpòt nö lātulöng nö in yik tarik:

¹⁰Nët tak asöklö tö tarik, tö kūön sāṙen, nö i kūö ò, hökngen cha nö ngö ṙô nö sūöichkö fālen ò, Ötlēkôre man tö ngam Tēv tö ngam rācha inrē. Ngaich chātnyen ò pöichö elkahôyö, kulehan, hòṅ ò nö kapah.

¹¹Ngaich yik tarik aṅ ngam elpanam ò, yik mā yik tökiröngö minā-aṅ inrē nö iyöng elpanam ò, nö ngaich nö asā ök tösöömtu nö in cha tö Yesīpel, Nö sā kinūchö u nö i mat nuk līpöre nuk sahöömngö ò nö in cha.

¹²Ahangkö inhīkö ngaich cha-a, ngaich ha-ūichlen Nëpòt nö lātulöng nö in yik tarik.

¹³Nak tönët tak inrē tarik, nak kūön sāṙen, kuhēthötre ngaich ūichhaka nö i kūö ò: ngaich nak tarik sāṙen nö sūöichkö fālen Nëpòt, nö i kūö yik tarik, nö ngö ṙô, Ötlēkôre an Nëpòt tö ngam Tēv töp rācha inrē. Ngaich cha-a nö chātngen ò nö lā uk ök elpanam, kulehan ngaich nö aṅtī tö ihong, ngaich kapah anga-aṅ.

¹⁴Söömngö ṙô cha-a ngaich nö in Yesīpel, nö ngö ṙô, Kulehe ök Nëpòt nö ngaich, ngaich ök nö kapah.

¹⁵Ngaich ngö inlahen angū-ö hē Yesipel nö hāngö Nëpòt nö kulehe, tö ò inrē nö ngaich nö kapah, ngö ṙô ngaich Yesipel tö Ahap, Chōholre man, Kē ap panô-òṅ vāin Nëpòt nö amin meh öp aṅ Yesrīl, öp sinôngen meh tö ò nö kētu nö in meh nö ṙāitö rupīö: tön öt aṅ ök nö ngaich Nëpòt, pòn kapah.

¹⁶Ngaich ngö inlahen angū-ö, hē Ahap nö hāngö Nëpòt nö kapah, chōholre ngaich Ahap nö kiröönngöre nö chuh ik panô-òṅ vāin Nëpòt ök aṅ Yesrīl nö kē-ĕ e nö amin ò.

¹⁷Ngaich yih ngam ṙô ngam Mā Tēv nö in Ĕlaicha ök aṅ Tispeh nö ngö ṙô,

¹⁸Chōholre man, kiröönngöre höngkūö Ahap öp rācha aṅ Israĕl, öp mī-iyöng Samariā: yĕh meuk, el öp panô-òṅ vāin Nēpòt ap, chuh in e ap nö kiröönngöre nö kē-ĕ e nö aminre.

¹⁹Vë-ekūö ò pömchö, ngöṙô, Ngö ṙô An ngam Mā Tēv, Ngaich tī ömeh kumpah, öm kē amin re inrē? Vë-ekūö ò pömchö, ngö ṙô, Ngö ṙô An ngam Mā Tēv, Ip chūök nup am nö kurak mahām Nëpòt in e min nup am nö kurak mahām meh öm më-eṅ takô-en.

²⁰Ngaich ngö ṙô Ahap tö Ĕlaicha, Kôtökūö öm tö chu, Ō më-eṅ tökunyaha elmat tö chu? Ngaich sap ṙô ò anga-aṅ, Kôtökūö chin tö meh: pò meh inyihngöre öm la-evṙen tö tötlöök i kūö ngam Mā Tēv.

²¹Yĕh meuk, kētö kui meh chin min tö tötlöök, ahatngö tī re chin min öich fòhngen meh, rökngen nyīö chin min kikōnyö nö ṙā-ang i patī Ahap, anga-aṅ öp tö-öpikūö, anga-aṅ inrē öp töṙā-ayö nö elkahôyö in Israĕl;

²²Ngaich vīten ngam patī meh chū-ö min nö sā ök patī Yērōpoām ök kikōnyö kūön Nëpòt, sā ök patī Pē-asā inrē ök kikōnyö kūön Ahīcha, kūö ngam inrunnyö lanīnö chu, ngam tī meh harūnö chu öich līn, ngaich inrē öm vīten Israĕl nö köölö fālen.

²³Ngö ṙô inrē ngam Mā Tēv nö vë-ekūö Yesīpel, Kāngen Yesīpel nup min am nö in öp lanaklö i Yesrīl.

²⁴Anga-aṅ öp tökapah aṅ in Ahap nö elpanam kā-ayö min tö am; anga-aṅ öp tökapah nö elkahôyö kā-ayö min tö aṅ el kuföt chehechōn.

²⁵(Hö-ö pöri nö hĕng tak tö sā Ahap, ök mī-inyihngöre nö la-evṙen tö tötlöök nö i kūö ngam Mā Tēv öp töharuhlöng ellōn tök pīhö ò Yēsipel.

²⁶Ngaich anga-aṅ inrē nö yahlen nö tömrit ngam sin-òkkūö vinë-eṅkūö insātēv nö sā yip aṅ Amôr, yik tö-ahōṙi tö ngam Mā Tēv nö ṙā-ang i kūö yik Israĕl.)

²⁷Ngaich ngö inlahen angū-ö, hē Ahap nö hang nuk ṙô, tikaichngö inyutre ngaich anga-aṅ, ngaich kahumlö alahare tö sāk, ahik inrē, hulalhak inrē nö el sāk, ṙēmöröön inrē nö kiröönngöre.

²⁸Yih ngaich ngam ṙô ngam Mā Tēv nö in Ĕlaicha ök aṅ Tispeh, nö ngö ṙô,

²⁹Meūkö Ahap ömeh nö hayāichngöre nö i kūö chu? Pò ò nö hayāichngöre nö i kūö chu, hö-ö chin min kētö ngih tötlöök i në sakāmö ò: kētö ngih tötlöök pöri min chū-ö i kui öp patī ò i hē sakāmö ap kūön ò kikōnyö.