Read Car_Nicobarese 1 RĀCHA 22 Bible Online

1 RĀCHA 22 - Car_Nicobarese bible

1 RĀCHA 22

¹Lūöihöre samyeūheu cha-a nö öt kiyung tö aṅ Samariā Israĕl inrē.

²Ngaich ngö inlahen angū-ö in linūöyö samyeūheu, ang Yēhosafāt ök rācha aṅ Yūtā nö yih nö ik rācha aṅ Israĕl.

³Ngö ṙô ök rācha aṅ Israĕl tö yik tarik re, Akahalōn öyih tö Ramòtkilīöt nö panam hī, ngaich ayī-ö höng ngöh öt halöinyköre, öi öt kē-ĕ e ṙā-ang eltī öp rācha aṅ Sīriā?

⁴Ngö ṙô anga-aṅ ngaich tö Yēhōsafāt, Hō ömeh in chu kiyung i Ramòtkilīöt? Ngaich ngö ṙô ang Yēhosafāt tök rācha aṅ Israĕl, Sā meh chin chū-ö, sā tarik meh yip tarik chu, sā kōra meh nup kōra chu.

⁵Ngaich ngö ṙô Yēhōsafāt tök rācha aṅ Israĕl, Vë-ekūö meh chin hatöntöre man yĕh i ṙô ngam Mā Tēv tötaheui.

⁶Hamūltö yik pròfĕt ngaich ök rācha aṅ Israĕl, fënòng tum tak yik tarik ngaich ngö ṙô tö cha, Kiröönngöre öichu kiyung lā-al Ramòtkilīöt, hēk höng ṙāpöre öichu? Ngaich ngö ṙô cha-a, Kuṙòh kiröönngöre; tön kēten e An min ngam Mā Tēv nö eltī ngam rācha.

⁷Ngö ṙô pöri Yēhōsafāt, Öt ihīhivö hòng pròfĕt ngam Mā Tēv, hòṅ hī hatöntöre in ò?

⁸Ngaich ngö ṙô ök rācha aṅ Israĕl tö Yēhōsafāt, Hĕng tit tak öp tarik öp löktô hī öre hatönre im Mā Tēv, ang Mikāya kikōnyö kūön Imlah: surīkhen ò pöri chū-ö; pò ò nö ötlöököṙô nö in chu, höng töchōich. Ngaich ngö ṙô ang Yēhōsafāt, Uh an yēḵ ngam rācha nö ngatī ṙô.

⁹Ngaich ök rācha aṅ Israĕl nö hĕng tak havëti tö kumkantöre, ngaich ngö ṙô, Kā-eūyen man kē-ĕren Mikayā öp kikōnyö kūön Imlah,

¹⁰Kö ūichhak nak rācha nö el kantēra re tök rācha aṅ Israĕl tök rācha inrē aṅ Yūtā, hayūtöre tö inyutre nö rācha nö elkahôyö i lökhöt i kūö öp inkūp i Samariā; ngaich ṙòkhöre yik pròfĕt nö ṙô-òv nö i kūö cha.

¹¹Ngaich ang Sētikiā ök kikōnyö kūön Kēnā-anā nö vī sinrōl re tö vët, ngaich ngö ṙô, Ngö ṙô An ngam Mā Tēv, Aṅtī tö në man min singngö yip aṅ Sīriā, hanöng saha cha nö hatngö.

¹²Ngatī ṙô yik pròfĕt nö ṙòkhöre, nö ngö ṙô, Kuṙòh chuh Ramòtkilīöt yin, öi mihôiṅ: pò ngam Mā Tēv nö kēten e min nö eltī ngam rācha.

¹³Ngaich ök tanīnöṙô ök kumröönngöre nö havëken Mikayā nö vë-ekūö ò, nö ngö ṙô, Yĕh meuk löök nup ṙô yik pròfĕt nö in öp rācha nöng hĕng nö ṙô töhĕng tak: ngatī ṙô pömchö yēḵ më-eṅ, Vë-ekūö meh chin, öm sā ṙô öp töhĕng tak tö cha, öm löökö ṙô.

¹⁴Ngö ṙô ngaich ang Mikayā, Sā ngam Mā Tēv nö tö-aṅ, öp töng ṙô ngam Mā Tēv tö chu, angū-ö min ṙô.

¹⁵Hē ò ngaich nö yih nö in ök rācha ngö ṙô ngaich ök rācha tö ò, Mikayā, kiröönngöre öyih kiyung lā-al Ramòtkilīöt, hēk höng ṙāpöre öyih? Sapṙô ò ngaich anga-aṅ nö ngö, Kuṙòh kiröönngöre yin, öi mihôiṅ; kēten e An min ngam Tēv nö eltī ngam rācha.

¹⁶Ngaich ngö ṙô ök rācha tö ò, Ām heuh öich chūöku ṙô in meh tö meh öt tahëngu ṙô in chu höng ngam tökô-en i minënyö ngam Mā Tēv?

¹⁷Ngö ṙô ngaich anga-aṅ, Meūkö Israĕl chin öp tö parāta i kui minë rôngö, sā sīṅp töt yamūmuvö: ngaich ngö ṙô ngam Mā Tēv Rö-ö yin vē nö töyōmu; hökngen cha nö kö havantöre nö i patī re im kumchikṙen.

¹⁸Ngaich ngö ṙô ök rācha aṅ Israĕl tö Yēhosafāt, Röh öich taheui vë-eny nang meh tö ò nö öthō nö löökö ṙô nö in chu, höng tötlöök?

¹⁹Ngaich ngö ṙô anga-aṅ, Lökten man hangihtöre tö ṙô ngam Mā Tēv: meuk ngam Mā Tēv chin nö el kantērare nö ūichhaka, ṙòkhöre inrē nö sökhaka nö in ò më tömaṙôngö el halīöngö lāhāmö ò lātavē ò inrē.

²⁰Ngaich ngö ṙô ngam Mā Tēv, Chiāp min mahaṙöingen Ahap, hòṅ ò nö kiröönngöre ngaich fukngö nö i Ramòtkilīöt? Ngaich hĕng tak ök tö ngö ṙô; Ngaich ngö ṙô inrē ök tahëng tak.

²¹Ngaich yihtöre ök ma-alaha hĕng tak, sökhak ngaich nö i kūö ngam Mā Tēv, nö ngö ṙô Chū-ö chin min mahaṙöingen ò.

²²Ngaich ngö ṙô ngam Mā Tēv tö ò, Öm aṅtī tö yòh? Ngaich ngö ṙô anga-aṅ, Kiröönngöre chin min, öich ma-alaha töminyôiny-an elvāng yip pròfĕt ò nö ṙòkhöre. Ngaich ngö ṙô anga-aṅ, Më-eṅ man ngaich mahaṙöingen ò min, ngaich mihôiṅ min inrē; Kuṙòh ngaich man, ngaich ngatī tī.

²³Yĕh lökten ngëicha, tö ngam Mā Tēv nö chaphöt töminyôiny-aṅ ma-alaha nö elvāng vē pròfĕt meh nö ṙòkhöre; öt löökö ṙô An ngam Mā Tēv nö in meh.

²⁴Ngaich Sētikiā ök kikōnyö kūön Kēnā-anā nö haröhtöre, ngaich fatāk arëkūö Mikayā, nö ngö ṙô, Lökngö yih ök taheui ma-alaha aṅ im Mā Tēv nö ṙā-ang in chu nö vë-ekūö meh?

²⁵Ngaich ngö ṙô ang Mikayā, Yĕh meuk, meūkö e man min ip sakāmö angū-ö, yē meh min kuhēthötre öm hayunngöre el ap lātuhēt urôhò,

²⁶Ngaich ngö ṙô ök rācha aṅ Israĕl, Kē-ĕ Mikayā, kēten ò hēk in Amön öp mahayöng ngam elpanam, in Yôas inrē öp kūön ngam rācha;

²⁷Ngö ṙô pöchö, Ngö ṙô öp rācha, Chaphöt ngòh tarik el kinlōngö, ha-aṅlen ò tö nyā-aṅkūö inkihten ha-ôkan inrē tö mak inkihten, hanöng saha yanīhih chu ip lanāmö.

²⁸Ngaich ngö ṙô ang Mikāya, Yē meh min ṙēhĕn havan im kumchikṙen ngaich öt löknyö in chu ṙô ngam Mā Tēv. Ngaich ngö ṙô anga-aṅ, Yī-ö tarik, hang yin öi ṙòkhöre.

²⁹Lökten ök rācha aṅ Israĕl tö Yēhōsafāt inrē ök rācha aṅ Yūtā nö chuh Ramòtkilīöt.

³⁰Ngaich ngö ṙô ök rācha aṅ Israĕl tö Yēhosafāt, Harīkngenre chin chū-ö min, öich kiröönngöre im kinyūngö; hayūtöre pöri më-eṅ tö inyut rācha. Harīkngenre ngaich kiröönngöre nö im kinyūngö.

³¹Ngaich ök rācha aṅ Sīriā nö tölṙô yik tölūöi anāi nët tak yöngkūö kumyung el nuk inröl ò, un rēhĕn töpōyö höng in öp rācha aṅ Israĕl.

³²Ngaich ngö inlahen angū-ö, hē yik yöngkūö kumyung el nuk inröl nö meūkö Yēhosafāt, lökten cha nö ngö ṙô, Kô-en an nö ngam rācha aṅ Israĕl; kānngöre cha-a ngaich nö lā-al ò nö kiyung: ayôṙa ngaich Yēhosafāt.

³³Ngaich ngö inlahen angū-ö hē yik yöngkūö nuk inröl nö meūkan nö öt rācha aṅ Israĕl, havöökūöre cha-a ngaich nö ṙeū-eung i linū-u ò.

³⁴Ngaich hĕng tak ök tarik tamūök ök linreny re nöng kamlah, kô-òngvah tī ngaich tök rācha aṅ Israĕl nö lökhöt hôi tanapkūö nuk hanīöt lanaklö: lökten anga-aṅ nö ngö ṙô tök yōm ök inröl ò, Kētö tīre man, kēngen chu ṙā-ang i vē kumyung; tön pōihangṙen chin nyāhavö.

³⁵Ṙūöhölre ngam kinyūngö ik sakāmö angū-ö: hangöhöyö ngaich ök rācha nö el ök inrölre nö lā-al yik aṅ Siriā ngaich kapah tö harap: ngaich nuk mahām nö hëmnyi nö ṙā-ang i kūö ök vah nö el ök inröl.

³⁶Ngaich ik hē maneuttö ngam tavūöi ök ṙô tökeuheūtngöre chūök nö in yik kumyung, töngö, Kö chuh elpanam re, kö chuh i panam re inrē.

³⁷Kapah ngaich ök rācha, ngaich kētu nö i Samariā; ngaich cha-a nö lāpngen ök rācha nö i Samariā.

³⁸Ngaich cha-a nö söich ök inröl nö el ök törūḵngö mak i Samariā; ngaich nuk am nö kurak nuk mahām ò; (in e yik mī-inyihköre kikānö nö vōkö ṙung;) Sā ngam ṙô ngam Mā Tēv ngam ṙô ò nö ngaich.

³⁹Röh nuk nö kūichi nö i mat Līpöre Kinṙötngö yik Rācha aṅ Israĕl, nuk inlahen Ahap, tö nuk vahīṙen ò inrē, tök patī kanël alōfanta mahānlö ò, tö nuk elpanam inrē vahī-il ò?

⁴⁰Haṙòh ngaich Ahap nö in yik yöng re; ngaich Ahāsīa kikōnyö kūön ò nö hayöng nö ṙënngen ò.

⁴¹Ngaich Yēhosafāt ök kikōnyö kūön Asā nö rūltenre nö hayöng i kui Yūtā im finën samyeūheu Ahap ök rācha aṅ Israĕl.

⁴²Lūöi anāi taneui samyeūheu ṙēti ang Yēhosafat hē ò nö rulten re nö hayöng; nët anāi taneui samyeūheu anga-aṅ nö hayöng nö i Yērusalem. Asupāh minënyi ök kikānö yöng ò kūön Silhih.

⁴³Keuheūt anga-aṅ nö lök el talöökö Asā ök yöng ò kikōnyö; öt kānköre ang-aṅ tö e, la-evṙen tö töchip nö i kūö ngam Mā Tēv: hö-ö pöri nö kē-ĕyö nuk i kui rung chūökö; ṙòngmöng kētö tökētu yik tarik nö el nuk chūökö i kui rung föng tötahūsa inrē.

⁴⁴Vī lanāmö ang Yēhosafat nö in ök rācha aṅ Israĕl.

⁴⁵Röh nuk nö kūichi nö i mat Līpöre Kinṙötngö yik Rācha aṅ Yūtā, nuk inlahen Yēhosafat, nuk hameuk tö ò inrē kumlēḵ ò, inlahen ò inrē nö kiyung?

⁴⁶Ngaich yik chööḵṙen chamô-òṅ kōiny, yik tö-ōtren i nuk sakāmö Asā ök kikōnyö yöng ò, ṙā-aiṙen ngaich tö ò nö im panam.

⁴⁷Öt rāchavö nö umuh i Itöm: höng ṙanët rācha ök umuh.

⁴⁸Vī chōng ngaich Yēhosafat aṅ Tārsis nö chamuh Ôfīr nö chööḵöny tö humlum; öt kiröönngöre pöri anū-ö; pò nuk chōng nö lakūki nö i Esiyònkēpör.

⁴⁹Ngaich ngö ṙô ang Ahāsia ök kikōnyö kūön Ahap tö Yēhosafat, Hökngen yip tarik chu man nö in yip tarik meh nö el chōng. Öt halöngten pöri ang Yēhosafat.

⁵⁰Haṙòh ngaich Yēhosafat nö in yik yöng re, lāpi ngaich nö in yik yöngre ik elpanam Tāvit ök yöng ò: ngaich Yēhorām ök kikōnyö kūön ò nö hayöng nö ṙënngen ò.

⁵¹Rultenre ngaich Ahasīa ök kikōnyö kūön Ahap nö hayöng nö i Samariā im sinat samyeūheu Yēhosafat ök rācha aṅ Yūtā, nët samyeūheu anga-aṅ nö hayöng i kui Israĕl.

⁵²Höng tötlöök nyöre nuk la-en ò nö i kūö ngam Mā Tēv, höng lök el talöökö ök kikōnyö yöng re anga-aṅ, el talöökö ök kikānö yöng re inrē, el talöökö Yērōpoām inrē ök kikōnyö kūön Nëpòt nup lökten tī ò nö vīten Israĕl nö köölö fālen.

⁵³Lök la-en Pē-al anga-aṅ, salāman inrē, ngaich harunnyö lanīnö ngam Mā Tēv, ngam Tēv Israĕl, nöng sā nup taṙòkhöre inlahen ök yöng ò kikōnyö.