Read Car_Nicobarese 1 RĀCHA 4 Bible Online

1 RĀCHA 4 - Car_Nicobarese bible

1 RĀCHA 4

¹Ngaich ök rācha Sòlòmön nö rāchakūö yik Israĕl nö ṙòkhöre.

²Vē yin kūön rācha mī-in ò; Asariā ök kikōnyö kūön Sētòk, ök kūönṙô;

³Ēlihōref, Ahīyā inrē, nak kikōnyö kūön Sissā, nak kamūich; Yēhōsāfāt ök kikōnyö kūön Ahīlut, ök mumkahanga;

⁴Pënayā inrē ök kikōnyö kūön Yēhōiata i kui yik kumyung anga-aṅ; kūönṙô nā Sētòk nā Apiatör;

⁵Asariā inrē ök kikōnyö kūön Nātan nö i kui yik yöngṙen; Sapöt ök kikōnyö kūön Nātan, nö kūönṙô hol ök rācha inrē,

⁶Ahīsār inrē i kui yik aṅ patī; Atonīram inrē ök kikōnyö kūön Apta i kui inmūlö.

⁷Nët sīön tak yik yöngṙen in Sòlòmön i kui Israĕl nö ṙòkhöre, yik mameukṙen ök rācha tö yik aṅ patī ò inrē, tö nyā-aṅkūö: hĕng chumngëṅtö tī ngòh töhĕng tak tarik i tö hĕng samyeūheu nö meukṙen nyā-aṅkūö.

⁸Në nun minënyö cha: Penhör, i kui öp rung panam Ifrēm:

⁹Pentēkör, i Mākās, i Sē-alpim inrē, i Pĕtsēmes, i Elōnpethēnan inrē.

¹⁰Penhēset, i Aruppòt; (hayōm ò inrē Sokoh ṙòkhöre inrē nup panam Heför);

¹¹Penapīnātap, i Nafattōr nö ṙòkhöre; (pīhövö anga-aṅ tö Tafāt ök kikōnyö kūön Sòlòmön);

¹²Pē-ana ök kikōnyö kūön Ahilut, i Tē-anak i Mekitō inrē ṙòkhöre inrē Pētsian öp kaha Sarētan lātaṙeū tö Yesrīl, löktökūö Petsian tölngö Āpĕlmehōla, sölngö nö vāngngö tö Yòkmiam:

¹³Penkipör i Ramòtkilīöt, hayōm nup elpanam Yāir anga-aṅ öp kikōnyö kūön Manasē nuk i Kilīöt, hayōm ò inrē nuk i chīṙö Arkòp, ök Pāsan, tafūöl anāi nuk tökiröng elpanam tökinlōngu tö ihong tö kālkūö tö mās:

¹⁴Ahīnatap ök kikōnyö kūön Ittō, i Mahanēm:

¹⁵Ahīmēas, i Naftalī; (anga-aṅ inrē kamë-eṅ Pasemat nö pīhö ò ök kikānö kūön Sòlòmön):

¹⁶Pē-anā ök kikōnyö kūön Husai, i Asēr i Pialot inrē:

¹⁷Yēhōsafat ök kikōnyö kūön Paru-ā i Isākar:

¹⁸Sīmëi ök kikōnyö kūön Elā i Penyamin:

¹⁹Kīpör ök kikōnyö kūön Urī, i panam Kilīöt, öp panam Sīhòn ök rācha aṅ Amôr Ôk inrē ök rācha aṅ Pāsan; höng anga-aṅ ök töng hĕng tak yöngṙen nö im panam.

²⁰Maṙôngö ngaich Yūtā tö Israĕl inrē, sā kuyāyö nup i kūö mai töṙôngöre, nyā-aṅvkūö òk inrē ṙāmölōn.

²¹Hayöng ang Sòlòmön nö i kui nuk pūlngö nö ṙòkhöre löktökūö ngam Yufratīs söl i panam yip aṅ Filistain, tölngö kūöngö Aikup: kētö raneushö cha-a, ngaich kūönkūö Sòlòmön i rô-òtö sakāmö ò.

²²I töhĕng sakāmö nyā-aṅkūö Sòlòmön nö lūöi anāi tökiröng nyanum töpahīöya atra tafūöl anāi tökiröng nyanum tösōngö atra;

²³Söm nòng tö-alahav kōiny nuā nët anāi kōiny nuā aṅ i nup chūök u nö nyā-aṅvkūö, hēngòng sīṅp, nö holre tö hāt, kasēllē, rôpök tö-alahav inrē kōiny hayöm.

²⁴Pò ngam pūlngö ò nö keuheūtngöre chūök i chiṙö tök lāhih töp Yūfratīs, lök tökūö Tifsah söl kasā i kui yik rācha lāhih töp Yūfratīs; vinngö lā-a anga-aṅ nö lām.

²⁵Ngaich Yūtā tö Israĕl inrē nö öt pinhë-evkūö, nö iyöng kö elkatòh angkūr re, tarik, kö elkatòh chōn re tö anychīr inrē, löktökūö Tën söl i Pīrsīpā i rô-òtö nuk sakāmö Sòlòmön.

²⁶Fën anāi köṅny nuk chūök kōra Sòlòmön chūök inröl ò inrē, nët sīön köṅny tarik aṅ uk kōra inrē.

²⁷Cha-a yin më yöngṙen mameukṙen öp rācha Sòlòmön tö nyā-aṅkūö, nyā-aṅkūö yip taṙôkhöre inrē yamihtö kūö nö ik mīs ök rācha Sòlòmön, kö hĕng chumngëṅtö tī ngòh töhĕng tak tarik; öt halöngten töhāṅten cha-a.

²⁸Pārli inrē tönyô kiyôp inrē nyā-aṅkūö nuk kōra, kētö töveut cha-a inrē kōra nö chūök yik yöngṙen, kö i hayōmre ngòh töhĕng tak tarik.

²⁹Kētö mikah Sòlòmön ngam Tēv inrē mikah ellōn ò inrē nö Pōyen, kētö ṙôkö ellōn ò inrē, sā kuyāyö nup i kūö mai.

³⁰Tôlö kūö ök mikah Sòlòmön tö mikah yip kūön aṅ lāchuhöt nö ṙòkhöre tö mikah yip aṅ Aikup inrē nö ṙòkhöre.

³¹Pòn mötlö mikah anga-aṅ tö tarik nö ṙòkhöre; mötlö tö Etān ök aṅ Esrā, mötlö tö Hēman, tö Kalkòl inrē tö Tārta inrē, yik kikōnyö kūön Māhol: vinngö ineūnyi anga-aṅ inrē nö i nup pumnānö tarik nö ṙòkhöre.

³²Lūöi köṅny nup ṙô ò inchō-oṙô: hĕng köṅny taneui nup tinkökö ò.

³³Ṙôtö minënyö chōn anga-aṅ inrē löktökūö sītör öp i Lëpanön söl i hissòp öp samīöp nö i ihong kinlōngö: ṙô tö tö-aṅ chehen inrē, tö tösanëòku tö nup ṙameūla inrē, tö kāḵ inrē.

³⁴Ngaich ṙòkhöre yip tarik nö yih nö hòṅ hang mikah Sòlòmön, ṙā-ang i yik rāchakūö ngih panam, yik hamang ngam mikah ò.